Ngimba Findu Fiki Fibaghile Ukubatula Ukuti Musabwaghe Ubumi Ubununu Ubwa Nkyeni?

IGHULA

Ukufwana na muno twaketile mu nkhani iyi yakindagha, abandu bikughelaghela ukusyagha injila isyakuti basabwaghe ubumi ubununu ubwa nkyeni mwakubika ulusubilo mu findu bo ifimanyilo, ikyuma nukuya mundu nnunu. Loli linga mukughelaghela ukuti musabwaghe ubumi ubununu mwakubombela ifindu ifi, sifwene itolo nukubombela amapu aghabutungulu linga mukubuka ku malo aghakihesya. Ngimba isi sikusanusya ukuti yikayapo injila inunu iyakwisa kubwagha ubumi ubununu ubwa nkyeni? Hayi.

UBULONGOSI UBWAKUFUMA KU MUNDU UNNUNU

Linga tukusala ifyakubomba, utubalilo twingi tukunsuma umundu yumo unkusi kangi uwa mahala ukukinda uswe ukuti atutule. Mwakufwana itolo, tubaghile ukubwagha ubulongosi ubununu ubwa kuyoba isya bumi ubununu ubwa nkyeni ukufuma ku mundu yumo uyu nkusi kangi wamahala fiyo ukukinda uswe. Tubaghile ukubelenga ubulongosi ubu mu Baibolo, ibuku ili lyalembiwe ifyinja 3,500 ifi fikindilepo.

Nongwa yafiki mukulondiwa ukulisubila Ibaibolo? Panongwa yakuti uyu alembile nkusi kangi wamahala fiyo nkipeliwa kyosa. Umwene ikuyobiwa ukuya “mumi bwila na bwila” uyu “ikufika na kubusita kumalika.” (Danieli 7:9; Salimo 90:2) Umwene “yo apelile ikya kumwanya, yo Kyala yumoywene, yo yuyo akibumbile ikisu.” (Yesaya 45:18) Umwene ikutubula ukuti ingamu yake yo Yehova.—Salimo 83:18 NWT.

Ibaibolo litikuyoba ukuti uluko pamo inyiho simo syakulondiwa ukukinda isingi. Sili bo ulu panongwa yakuti lifumile ku Mpeli wa bandu bosa. Utubalilo tosa ifundo syake sikubatula abandu bingi pa kisu kyosa. Likwaghiwa munjobelo nyingi kangi abandu bingi bikwaghiwa nalyo ukukinda ibuku lililyosa. * Isi sikusanusya ukuti kulikosa abandu babaghile ukubelenga Ibaibolo kangi ifundo syake sibaghile ukubatula. Isi sikukolelana na isi Ibaibolo likuyoba ukuti:

“Kyala atikunsalila umundu mbundu bwake, loli mfikolo fyosa, uyu ikuntila nukubomba ingolofu, yo uyu umwene ikumwambilila.”—IMBOMBO SYA BATUMIWA 10:34, 35.

Mwakufwana itolo na bapapi aba babaghanile abanabo nukubatula, Yehova Kyala yo Tata wa lughano uyu ikutupa ubutuli ukwendela M’masyu ghake, Ibaibolo. (2 Timoti 3:16) Mubaghile ukusubila Amasyu ghake panongwa yakuti yo uyu atupelile kangi ikumanya isi sibaghile ukutupangisya ukuti tuhobokeghe.

TULISUBILEGHE IBAIBOLO

Tubaghile ukusubila isi Ibaibolo likuyoba isyakufwana nu bumi ubwa nkyeni panongwa yakuti amasiku agha tukuketa ifindu ifi fikubombiwa ifi Ibaibolo lyayobile ngani ifyinja 2,000 ifi fikindilepo.

ISI IBAIBOLO LIKUYOBA UKUTI SIKUYA PAKUBOMBIWA:

“Ikikolo kya bandu kisakukisambukilagha ikikolo ikinine, bope nubunyafyale bwisakubusambukilagha nubunyafyale ubunine. Twisakuyangako utusenyenda utukulumba mbuyo bu bwingi, ninjala, nimbungo imbela filalilali.”—LUKA 21:10, 11.

ISI IBAIBOLO LIKUYOBA ISYA MUNO ABANDU BISAKUYILA:

“M’masiku ghakubumalikisyo, po twisakwisagha utubalilo utupalapala. Namanga abandu bisakwiyighanagha bene, bisakuyagha baghanandalama, ba lwitufyo, ba matingo, batukamahelu, bilabapapi, basitakuwa ulupi, basitabwikemo, basitabumanyani, basitalwitikano, balohelo, basitakwighomola, bakali, basitakusighana inunu, bapefyabinabo, basitakwilingania, ba lwiyumbiko, baghana fya kughusekesya umbili ukukinda ukungana Kyala.”—2 TIMOTI 3:1-4.

Ngimba mubaghile ukuyoba isyafiki linga muketile ukuti isi Ibaibolo lyayobile ngani syo sikubombiwa amasiku agha? Kisita kukayika mubaghile ukukolelana na isi ayobile Leung uwa ku Hong Kong, umwene atile: “Ubusololi ubwa mu Baibolo bwalembiwe iyolo fiyo. Sikabaghila ukubombiwa ukuti umundu yumo unsitabugholofu ayobile ngani ifindu bo ifi. Naloli Ibaibolo lyafumile ku mundu uwamahala fiyo ukukinda uswe.”

Ibaibolo likuyoba ubusololi bwingi ubu bwafwanisiwe. * Isi sikunangisya ukuti Ibaibolo naloli Masyu gha Kyala. Yehova ikuti, “Yo yuyune ne Kyala nimwene, nukuti akayako uyungi uyu afwene nanine. Ukufuma mu mbwandilo nayobile ngani isi syaliko kubumalikilo, ndinkuyobela ngani isi syayagha pakwisa.” (Yesaya 46:9, 10) Yonongwa yake mukulondiwa ukusubila fiyo isi Ibaibolo likuyoba isyakufwana nu bumi ubununu ubwa nkyeni.

UBULONGOSI UBU BUKUBATULA LINO NA NKYENI

Linga mukukonga ubulongosi ubu bukwaghiwa mu Baibolo, mukuya pakusayiwa fiyo. Inong’onela ififwanikisyo fimo.

UBULONGOSI UBUNUNU PA NKHANI YA NDALAMA NI MBOMBO

“Kununupo ukuya nafyo finandi palikimo nukutengana ukukinda ukwikolania fiyo ni mbombo akabalilo kosa kisita kukabilamo nafimo.”—UNDUMBILILI 4:6.

MUNO TUBAGHILE UKUYILA NI MBUMBA IYALUSEKELO

“Umundu wesa anganeghe unkasi wake bo mumo ighanile mwene; umwene unkikulu yo fikuti iyisyeghe ku ndume.”—BAEFESI 5:33.

MUNO TUBAGHILE UKUYILA PABUMANYANI NA BANGI

“Wiyepusyeko kubukalale kangi usilekeghe ingalalisi; ungatamiwagha mundumbula sisisi syo sikukutwala kubutulanongwa.”—SALIMO 37:8.

Linga mukukonga isi Ibaibolo likuyoba, mukuya pakuya nu bumi ubununu lino kangi mwisakuya nu bumi ubununu nkyeni. Mu Baibolo, tukulwagha ulufingo ulununu ulu Kyala afingile nkyeni ukongelelapo

ULUTENGANO NUKUFIGHILILIWA

“Bisakwikyelagha nifinunu ifi fikulefuka itolo.”—SALIMO 37:11.

AMALO AGHAKWIKALA NIFYAKULYA

“Abandu bisakuyengagha inyumba nukwitughala mumo, bisakubyalagha amafilu kangi nukwikyela nubwalwa bwa seke syake.”—YESAYA 65:21.

UBUBINE PAMO UBUFWE FITISAKUYANGAKO KANGI

“Bope nubufwe nalinga bo busulumanie, nalinga ko kukuta pamo ko kubaba fitisakuyangako kangi.”—UBUSETULI 21:4.

Ngimba mukulondiwa ukubomba isyafiki ukuti musabwaghe ubumi ubununu ubwa nkyeni? Isagha tukete inkhani iyakukongapo.

^ ipal.6 Ukuti mumanye nyingi pa nkhani iyakusanusiwa nukuyabiwa kwa Baibolo, buka pa www.pr418.com kangi keta pa ISI IBAIBOLO LIKUMANYISYA > IMBILI NI BAIBOLO.

^ ipal.16 Ukuti mumanye nyingi keta umutu 9 mu buku ilyakuti Bible—God’s Word or Man’s? Likufumusiwa na Baketi ba Yehova. Likwaghiwa kangi pa www.pr418.com. Buka pa LIBRARY > BOOKS & BROCHURES.

Lumo Mubaghile Ukulonda Ukumanya Isya Nkhani iyi

AMALALUSYO AGHA IBAIBOLO LIKWAMULA

Ngimba Ibaibolo Lyayobile Ngani Isyamuno Abandu Bisakwinong’onelagha nu Kubombela Ifindu Amasiku Agha?

Ibaibolo lyayobile ngani ukuti abandu bikwisakuchenja fiyo utuyilo twabo ukuya babibi.

INGASYA YA NDINDILILI