Waut kaun ons werkjlich halpen, een scheenet Läwen to kjrieen?
Soo aus wie en de väaje Artikjels jeseenen haben, proowen Menschen veschiednet, om een scheenet Läwen to haben. Dee veloten sikj biejlikj opp Woasajarie, Schoolen, Rikjtum un proowen goode Menschen to sennen. Sikj opp dise Sachen veloten wudd soo sennen, aus wan eena wudd eene faulsche Launtkoat brucken. Bediet daut dan, daut daut nuscht jeft, wua opp to vetruen es un waut eenem een scheenet Läwen jeft? See wie mol.
VON WÄM DE BASTE HELP KJEMT
Wan wie motten waut wichtjet entscheiden, dan recht wie ons foaken no wäm, waut ella es un mea weet aus wie. Krakjt soo es daut, wan wie een scheenet Läwen haben wellen. Daut jeft wäm, waut väl ella es un väl mea weet aus wie, un opp dän kjenn wie vetruen. Sienen Rot kjenn wie en de Heilje Schreft, de Bibel, finjen, waut ojjefäa 3 500 Joa trigj aunjefongen wort to schriewen.
Wuarom kjenn wie ons opp de Bibel veloten? Wäajen dee von dän kjemt, waut de kjlieekjsta un elsta es, waut et äwaheipt jeft. Von am woat jesajcht, daut siene Doag nich to talen sent, daut daut am von Eewichkjeit häa jejäft haft un daut hee eewich bliewen woat (Daniel 7:9; Psalm 90:2). Hee es deejanja, “dee dän Himmel jemoakt haft, un auleen Gott es; dee de Ieed häajestalt un jemoakt haft” (Jesaja 45:18). Hee lat ons weeten, daut sien Nomen Jehova es. Eenje sajen uk Jahwe (Amos 9:6, JHF).
De Schreft moakt kjeenen Unjascheet manke Menschen, wiels dee krakjt von dän kjemt, waut aule Menschen jemoakt haft. De Rot doabennen es emma jeltich un kjemt de Menschen oppe gaunze Welt togood. Daut jeft kjeen Buak, waut opp soo väl Sproaken äwasat es un soo wiet vebreet es aus de Bibel. * Daut bediet, daut Menschen von aulawäajen de Schreft läsen kjennen un sikj von dee halpen loten. Daut stemt uk krakjt met daut, waut de Schreft sajcht:
“Nu see ekj . . ., daut Gott manke Menschen kjeen Unjascheet moakt; oba ut aule Velkja, dee aunnemt, dee am ferchten un doonen waut rajcht es.” (APOSTELJESCHICHT 10:34-35)
Krakjt soo aus leeftolje Elren äare Kjinja halpen, soo halpt Jehova Gott, ons leeftolja Voda, ons derch sien Wuat, de Bibel (2. Timotäus 3:16). Opp sien Wuat kjenn wie ons veloten. Hee haft ons jemoakt un doawäajen weet hee krakjt, waut ons fält, om een scheenet Läwen to haben.
Waut mott eena doonen, daut eena dise Tiet beläwen kaun? Kjikj en dän näakjsten Artikjel.
^ Varsch 6 En Kapitel 5 von daut Buak Een scheenet Läwen fa emma! finjst du noch mea Artikjels un Videos doaräwa, woo de Bibel es äwasat un vebreet worden. Go no www.pr418.com un kjikj bie BIEEKJA UN MEA > BIEEKJA, HEFTA UN BLÄDA.
^ Varsch 16 En Kapitel 3 von daut Buak Een scheenet Läwen fa emma! finjst du noch mea doaräwa. Daut jeft daut opp www.pr418.com. Go no BIEEKJA UN MEA > BIEEKJA, HEFTA UN BLÄDA.
Veleicht jleichst du uk dit
DE WOAKTORM
De Woarheit äwa daut, waut noch komen woat
Stoakj dienen Gloowen aun daut, waut Gott fa de Ieed verutjesajcht haft, un see, waut fa Menschen oppe Ieed läwen woaren.
