Mie Kaweid Likilik ong Mour Mwahu ni Ahnsou Kohkohdo?

PLAY

Duwehte me iren mwowe ko koasoia, aramas akan kin nantihong rapahki mour mwahu ni ahnsou kohkohdo sang ni ar kin koapworopworki soahng kan me duwehte dahme koasoandier ong ar mour, sukuhl laud, kepwehpwe oh en wiahla aramas mwahu men. Ahpw, en wia soahng pwukat kin rasehng omw doadoahngki map sapwung ehu pwe ken lella wasa ieu. Eri, met wehwehki me sohte kaweid likilik ehu ong ahnsou kohkohdo? Soh mie!

KAWEID SANG EMEN ME KEIEU MWAHU

Ni ahnsou me kitail kin wiahda pilipil, kitail kin kalapw idek rehn emen me mahsang oh loalokongsang kitail. Duwehte met, kitail kak diarada kaweid likilik kan ong ni ahnsou kohkohdo sang rehn emen me uhdahn mahsang oh kupwurokong sang kitail. Kitail kak wadek sapwellime kaweid nan pwuhk ehu me tepida ntingdi mpen sounpar 3,500 samwalahr ako. Pwuhk wet adaneki Paipel.

Dahme kahrehda ke kak likih Paipel? Pwehki e pwilisang rehn Ih me keieu mah oh kupwurokong nin lahng oh sampah. Paipel kin mahsaniheki ih “Mehmeno me ahneki mour poatopoat” oh “Koht poatopoat emen, oh pahn wia Koht kohkohlahte.” (Daniel 7:9; Melkahka 90:2) Ih me “ketin kapikada nanleng, iei ih me Koht! E ketin wiahda oh kapikada sampah.” (Aiseia 45:18) E mahsanihong kitail me mware iei Siohwa.—Melkahka 83:18.

Paipel sohte mahsanih me ehu tiahk de keinek mwahusang ekei. Pwehki e pwilisang rehn Sounkapikpen aramas koaros. Kaweid kan loale kin ahnsou koaros doadoahk oh aramas akan nan sahpw koaros kin paiekihda. Paipel mie ni lokaia tohto oh e kohpeseng tohtohsang pwuhk teikan. * Met wehwehki me aramas wasa koaros kak wadek oh ale kaweid sang loale. Met kin pwungiong dahme Paipel mahsanih:

“Koht sohte kin ketin lipilipilki aramas, ahpw nan wehi koaros, e kin ketin kupwurperenki aramas emen me kin lemmwiki ih.”—WIEWIA 10:34, 35.

Duwehte pahpa nohno kan me kin poakohng oh sewese neirail seri kan, Siohwa Koht ketin wia Sahm limpoak men me kin ketin sewese kitail sang nan sapwellime Mahsen, Paipel. (2 Timoty 3:16) Ke kak likih sapwellime Mahsen; pwehki ih me ketin wiaikitailda oh e ketin mwahngih dahme pahn kaperenkitailda.

KAWEID ME LIKILIK

Kitail kak likih dahme Paipel kin mahsaniheki duwen ahnsou kohkohdo pwehki rahnwet kitail kin kilang mwekid en sampah wet oh wiewiahn aramas akan me Paipel kohpadahr mpen sounpar 2,000 samwalahro.

DAHME KIN WIAWI

“Ehu tohnwehi pahn mahweniong ehu tohnwehi oh ehu wehi pahn mahweniong ehu wehi. E pahn mie rerrer en sahpw laud, oh ehuehu wasa lehk lapalap oh soumwahu lusulus pahn kin wiawi.”—LUK 21:10, 11.

WIEWIAHN ARAMAS AKAN

“Ni imwin rahn akan, e pahn mie ahnsou apwal oh keper. Pwe aramas akan pahn kin roporop ong pein irail, poakohng mwohni, aksuwei, pohnmwahso, lahlahwe, sohte pahn kin peikiong pahpa nohno kan, sohte pahn kin kasapahlkalahngan, soaloalopwoat, sempoak, sohte men pwungki meteikan, karaunlikamw, sohte kak kaunda pein irail, lemei, sohte pahn kin poakohng me mwahu, re pahn kin pangala meteikan, keptakai, aklapalap, re pahn kin nsenkihte wia nsenarail oh sohte kin poakohng Koht.”—2 TIMOTY 3:1-4.

Ia omw madamadau ni omw kilang me sangete mahs Paipel kawehwehdahr dahme pahn wiawi rahnpwukat? Mweinele ke pwungki dahme Leung sang Hong Kong, koasoia: “Kokohp en Paipel kan ntingdi mahsie. Aramas sohte kak kohpada soahng pwukat ni pwung. Eri Paipel uhdahn pwilisang rehn emen me kupwurokong sang kitail.”

Paipel kin audaudki kokohp epwiki kei me pweidahr. * Kokohp pwukat kadehdehda me Paipel iei uhdahn Mahsen en Koht. Siohwa mahsanih: “Ngehite me Koht, oh sohte pil emen me duwehte ngehi. Sangete nin tapio I kasalehda dahme pahn wiawi mwuhr.” (Aiseia 46:9, 10) Kahrehda, mie kahrepe mwahu me ke kak likih dahme Paipel mahsaniheki duwen ahnsou kohkohdo.

KAWEID ME KE PAHN PAIEKIHDA AHNSOU WET OH KOHKOHLAHTE

Ke pahn paiekihda ni omw kin idawehn kaweid en Paipel. Tehk ekei karasepe kan.

MADAMADAU TOUPAHREK DUWEN MWOHNI OH DOADOAHK

“Ahneki mehkot me tikitik ni kapehd meleilei mwahusang pehmw kan koaros wie kedikedirepwki rahn koaros songosong en koledi kisinieng.”—EKLESIASDES 4:6.

MOUREN PENEINEI

“Emenemen kumwail uhdahn pahn kin poakohng eh pwoud lih duwehte eh kin poakohng pein ih, oh ni pali teio, lih pwopwoud men uhdahn pahn kin wauneki laud eh pwoud.”—EPISOS 5:33.

EHUONG METEIKAN

“Ke dehr pwunod de lingeringer; pwe met pahn kahrehiong uhk nan apwal.”—MELKAHKA 37:8.

Ma ke kin kapwaiada dahme Paipel mahsanih, eri ke pahn ahneki mour mwahu ni ahnsou wet oh ni ahnsou kohkohdo. Nan Paipel, kitail kak diar sapwellimen Koht inou kaselel en ni ahnsou kohkohdo, me iangahki

POPOHL OH SOHTE KEPER

“Re pahn paiamwahu oh popohl.”—MELKAHKA 37:11.

MIE IHMW OH MWENGE ONG KOAROS

“Aramas akan pahn kauwada imwarail kan oh kousoanla loale—sohte emen tohrohr pahn kak doadoahngki. Re pahn wiahda ar mwetuwel en wain oh pahn kin nsenamwahuki wahn wain kan.”—AISEIA 65:21.

SOHLA SOUMWAHU OH MEHLA

“Mehla solahr pahn wiawi, solahr mwahiei, solahr sengiseng oh solahr medek.”—KAUDIAHL 21:4.

Dahme ke anahne wia pwe ken ahneki soangen mour wet ni ahnsou kohkohdo? Tehk iren mwurin met.

^ par. 6 Oaritik kan me pid duwen kawehwehdi oh kohpeseng en Paipel, menlau kohla nan www.pr418.com oh kilang pahn BIBLE TEACHINGS > HISTORY & THE BIBLE.

^ par. 16 Ma komw men esehla ekei oaritik kan, menlau kilang pwuhko Dahme Paipel Uhdahn Padahngki? nan irelaud 2, me Sounkadehdehn Siohwa kan wiahda. Ke kak ale (download) sang www.pr418.com/pon. Menlau kilang pahn SAWASPEN PAIPEL KAN > PWUHK KAN OH KISIN PWUHK KAN.

Sounkadehdehn Siohwa kan

Mie Kaweid Likilik ong Mour Mwahu ni Ahnsou Kohkohdo?

KAWEID SANG EMEN ME KEIEU MWAHU

You May Also Like

Me Mehlel Duwen Ahnsou Kohkohdo

Kaweid en Paipel kan Kesempwalte Rahnpwukat?

Mie me Kak Ese Duwen Ahnsou Kohkohdo?

Paipel oh Omw Mour en Ahnsou Kohkohdo