¿Imata jipa punllapi ali causaiguta charichun ayudaita ushan?

Cai idiomapi uyangapaj o ricungapaj

Gentecunaca destinopi crishpallami jipa punllacunapica ali causaiguta charishun nishpami pensan. O denoca estudiashpa, culquita charishpa o ali gente cashpami jipa punllacunapica ali causaiguta charita ushashun nishpami pensan.

¿PITA GENTECUNATACA ALIGUTA YACHACHISHPA GUIAITA USHAN?

¿Nachu jipa punllacunapi ali causangapaj munashpaca, nara imatapash rurashpallata primeroca ñucanchitapash yali experienciata charij personata o mayor gentegucunata consejocunata mañapanchi? Ari nachu. Jipa punllacunapi ali causangapaj munashpaca chaitami rurapanchi. Shinapash ñucanchica hace 3.500 huatacuna huashaman escribishca Bibliagupimi alipacha guiata o consejocunata tarita ushapanchi.

Shinapash ¿imashpata Bibliapica confiaita ushapanchi? Porque Bibliata escribijca, tucuicunata yali ali yachaita charij ‘unai unai huatacunata charij shuj Rucugu’, pundatallata ‘ña tiashca’, shinallata “na tucurina causaita” para siempre causaita charijmi escribishca (Daniel 7:9; Salmo 90:2). Shinallata paimi ‘Jahua pachatapash, cai pachatapash ruraj Taita Dios’ can (Isaías 45:18). Shinallata paillatami paipa shutigutapash gentecunamanga yachachin. Paica, Jehová Diosmi can (Salmo 83:18, TNM).

Tucui gentecunata ruraj Taita Dios Bibliaguta rurashcamandami, shuj razamanda gentecuna o shuj culturata charij gentecuna shujcunatapash yali cashcataca na yachachin. * Ashtahuangarin Bibliapi tiashca consejocunaca tucui llactamanda gentecunatami ninanda ayudashca. Bibliataca mundo enteropimi ashtaca idiomacunaman traducishca. Chaimandami ashtaca gentegucunaca Bibliapi nishcataca fácil intindita ushashca. Shinallata Bibliapipash cashnami nin:

“Taita Diosca, na pitapash ñavita ricushpalla chasquinllu. Chaitaca, cunanga alipachami yachani. Maijan llactapi cashpapash, paita manllashpa, imatapash cashcatapacha rurajtami, [o alita rurajtami] Diosca alicachin” (HECHOS 10:34, 35).

Imashinami shuj juyaj taita paipa huahuacunata ninanda juyashpa ayudan, shinallatami ñucanchita ninanda juyaj Jehová Diosca Bibliaguhuan ñucanchitaca ninanda ayudan (2 Timoteo 3:16). Ñucanchica Bibliapi nishcataca tucuitami confiaita ushapanchi, porque Bibliataca ñucanchita aliguta rijsij Taita Diosmi rurashca.

BIBLIAPI NISHCATACA TUCUITAMI CONFIAITA USHAPANCHI

Ñucanchica Bibliapi nishcataca tucuitami confiaita ushapanchi. Porque 2 mil huatacuna huashamanllatami cunan punllacunapi ima pasanata, shinallata gentecunapash imashina cai punllacunapi canataca ali ali villashca.

CUNAN PUNLLACUNAPI PASAJ COSASCUNA

“Shuj llactapi causajcunahuan, caishuj llactapi causajcunahuanmi macanajunga. Shinallata llactata jatun mandaj puracunapashmi macanajunga. Shinallata alpa mama ninanda chujchushpa tucuchijuipash, ninan yarjaipash, millai ungüicunapash, shuj shuj llactacunapimi tianga” (LUCAS 21:10, 11).

CUNAN PUNLLACUNAPI GENTECUNA

“Tucurimui punllacunapica, jatun llaquicunami shamunga. Chai punllacunapica, paicunalla ali cangapaj munajcuna, charijyangapaj munajcuna, pitapash yalimi canchi nijcuna, jariyashpa jatun tucujcuna, Diostapash nali shimicunata rimajcunami tianga. Taitata, mamatapash na cazujcuna, na pashi nijcuna, Diostapash na manllajcunami tianga. Pitapash na juyajcuna, ninanda fiñarishcamanda ali tucungapaj na munajcuna, yangata juchachijcuna, ima munashcata rurajcuna, llaquitapash na llaquijcuna, ima alitapash na ricunayachijcunami tianga. Umachishpa japichijcuna, na shuyashpa imatapash ñapash rurangapaj munajcuna, imamandapash ninanda jariyajcuna, Taita Diostapash na juyashpa, yanga cushijushpa causanatalla juyajcunami tianga” (2 TIMOTEO 3:1-4).

Punda tiempopillata Bibliapi escribishcacuna cunan punllacunapi clarito pactarijujta ricushpaca ¿imatata nipanguiman? Caimanda parlashpami Hong Kong llactamanda Leung shuti runaguca cashna nirca: “Punda punda tiempopipacha escribishcacuna cunanbi pactarijujta ricushpaca, yanga gentellaca Bibliataca na escribishcangachu yanimi. Chaitaca ñucanchitapash yali ali yuyaita charijmi escribishcanga yanimi”.

Bibliapica ashtaca profeciacuna imashina pactarishcatami ricupanchi. * Chaimandami Bibliataca Taita Diospa shimimi can nipanchi. Shinallata Jehová Diosca: “Ñucami Taita Dios cani, ñucamanda shuj Taita Diosca na tianllu. Jipa punllacuna ima tucunatapash, ñucami callarimandapacha villani” ninmi (Isaías 46:9, 10). Chaimandami jipa punllacunapi cai o chaimi pactaringa nishpa Bibliagupi villajujpica confianallami capanchi.

BIBLIAPI NISHCACUNACA CUNANBIPASH Y JIPA PUNLLACUNAPIPASHMI AYUDANGA

Bibliapi nishcacunata tucuipi cazushpaca alimi causapangui. Por ejemplo, Bibliaca cai cati yuyaicunapimi ayudaita ushan.

TRABAJO Y CULQUI

“Ishcai maqui jundata ninanda trabajashpa, yuyaita shaijuchingapaj randica, shuj maqui jundatalla trabajashpa, ashaguta samanami ashtahuan ali” (ECLESIASTÉS 4:6).

FAMILIA UCUPI

Cusaca “quiquinllata juyarinshna, cangunapaj huarmitapash juyana canguichi ninimi. Shinallata huarmipash, cusataca alicachishpa cazuchun ninimi” (EFESIOS 5:33).

SHUJCUNAHUAN ALI LLEVARINA

“Ninanda fiñarinata saquishpa, chai fiñarinataca shitai. Nalita ruranataca, ama ninanda munajuichu” (SALMO 37:8).

Bibliapa consejocunata catinami cunanbipash y shamuj punllacunapipash ali causachun ayudaita ushan. Shinallata Bibliapimi Taita Dios shuj juyailla causaiguta caramunata yachachijun.

CUSHILLA TRANQUILO, ALI CAUSANA

‘Casilla ali causaihuan o tranquilo ali causaihuanmi, ninanda cushijunajunga’ (SALMO 37:11).

TUCUICUNAMI IMAPASH NA FALTASHPA ALI CAUSANGA

“Huasicunata shayachishpami, chaipi causanajunga. Uvas chagrata tarpushpami, chaipi fucushcata micushpa causanajunga” (ISAÍAS 65:21).

PIPASH ÑANA IMAPASH UNGUICUNAHUAN HUAÑUNGACHU

“Huañuipash, huacaipash, llaquipash, nanaipash, na ashtahuan tiangachu” (APOCALIPSIS 21:4).

Jipa punllacunapi shina ali causaiguta charingapaca ¿imatata rurana capanchi? Chaitaca chaishuj temapimi ricupashun.

^ párr. 6 Bibliata imashina traducijta y shinallata imashina gentecunaman chayachijta yachangapaj munashpaca www.pr418.com paginapi ricupangui. Chaipaca BIBLIAPA YACHACHISHCACUNA > BIBLIACA IMASHINATA CUNANGAMAN TIASHPA CATISHCA nishca partepi ricupangui.

^ párr. 16 Caimanda ashtahuan yachajungapaj munashpaca La Biblia... ¿la Palabra de Dios, o palabra del hombre? nishca libropi, capítulo 9ta ricupangui. Chai librotaca testigo de Jehovacunami llujchipashca. Shinallata caitaca www.pr418.com paginapipashmi ricuita ushapangui. Chaipaca BIBLIOTECA > OTRAS PUBLICACIONES nishcapimi español shimipi ricuita ushapangui.