Saˈu birxichuwara laˈnummonte gede, mannu teese heeˈrate kaayyo, rosonna jiro addaxxanni hattono dancha manna ikkate sharramanni keeshshino. Ikkollana togoore addaxxa, anfoonnikki bayicho haˈnanni heeˈne soˈrisiisanno kaarta laˈˈate gedeeti. Hatto yaa kayi albillitte teense heeˈnanni gede kaaˈlannohu addaxxinanni biddishshi dino yaate? Deeˈni!

Duucha woyite mitte dilgora kaˈneemmo woyite, dirono egennono ninke rooranno manna amaaˈlineemmo. Hatteente gede, dirono hayyono ninke koˈo hune rooranno Maganiwiinni albillittete heeshshonkera ikkanno biddishsha afiˈra dandiineemmo. Isi aanno amaale, mitu 3,500 diri albaanni borreessama hanafinohu mittu maxaafi giddo yaano Qullaawu Maxaafi giddo afiˈra dandiineemmo.

Qullaawu Maxaafi kulannore addaxxineemmohu mayiraati? Korkaatuno konni Maxaafi Anni kalqete giddo taalle nookki hayyicha ikkinohuraati. Iso “Hegerera Heeˈrannohu” hattono “hegere hegerera ati Maganoho” yinoonni. (Daanieeli 7:9; Faarso 90:2) Isi ‘gorduwa kalaqinoho’; qoleno “baatto seekke kalaqinohunna xintinohu isooti.” (Isayaasi 45:18) Isi suˈmisi Yihowa ikkinota coyiˈrino.—Fulo 6:3, lekkaalliidi qaagiishsha.

Qullaawu Maxaafi mannu baalunku Kalaqaanchi qixxeessino maxaafa ikkino daafira, mittu budi woy sirchi wole rooranno diyaanno. Kulanno amaale woˈmanka woyite kaaˈlitannote; qoleno baalante gobbara heeˈranno manna kaaˈlitino. Qullaawu Maxaafi geeshsha batinyu afiinni tirroonnihunna lowo mannira iillinohu wolu maxaafi dino. * Hakko daafira aye gobbara noo manchino nabbawanna amaalesi adha dandaanno. Tini baala taje Qullaawu Maxaafi umisi yaannori halaale ikkinota leellishshanno:

“Halaalinta Maganu manna [dimallaadanno] . . . Aye gosano ikkiro Maganu waajjannosihanna dancha loosannoha baxanno.”—SOQQAMAASINETE LOOSO 10:34, 35.

Oosonsa baxannonna kaaˈlanno anninna ama gede, Maganu Yihowano Qaalisi Qullaawu Maxaafi widoonni baxillunni kaaˈlannonke Annaati. (2 Ximootewoosi 3:16) Kalaqinonkehunna hagiirraamma ikkineemmo gede assannonkeri maatiro afinohu iso ikkino daafira, Qaalisi kulannonkere addaxxineemmo.

Albillitte togoo heeshsho heeˈrate maa assa hasiissannohe? Tenne afate, aane noo birxicho nabbawi.