E pei ona tatou talanoaina i mataupu ua mavae, o loo taumafai tagata e maua se lumanaʻi lelei e ala i le maufaatuatuaina o mea e pei o iʻuga tuupōina, aʻoaʻoga, tamaoaiga, ma le avea ma tagata lelei. Ae o le uia o nei auala, e tai pei lava o le faaaogāina o se faafanua e lē saʻo ina ia oo ai i se nofoaga o loo faamoemoe i ai. Po o lona uiga la, e leai se taʻiala maufaatuatuaina mo le lumanaʻi? O le tali, e iai!

Pe a faia ni filifiliga, e masani lava ona tatou talanoa atu i se tasi e matua atu ma e sili atu lona atamai nai lo o i tatou. E faapena foʻi ona tatou maua taʻiala maufaatuatuaina mo lo tatou lumanaʻi, mai i Sē e sili atu ona matua ma atamai nai lo o i tatou. E mafai ona tatou faitau i ana fautuaga mai i se tusi ua taʻua o le Tusi Paia, lea na amata tusia i le pe ā ma le 3,500 tausaga ua mavae.

Aiseā e mafai ai ona e maufaatuatuaina le Tusi Paia? Talu ai o le Tusitala o le Tusi Paia e sili atu ona umi ona soifua nai lo o i tatou, ma o ia o Lē e sili ona atamai i le aoao o mea. Ua faamatalaina o ia o “Lē e mai anamuā ona aso” ma “e mai i le vavau e oo i le faavavau.” (Tanielu 7:9; Salamo 90:2) O ia “o Lē na foafoaina le lagi, o Ia o le Atua moni, o le Mataisau o Lē na faia le lalolagi.” (Isaia 45:18) Ua ia faailoa mai iā i tatou o lona suafa o Ieova.​—Salamo 83:18.

Talu ai o le Tusi Paia e mai i Lē na foafoaina tagata uma, e lē faasilisilia la e le Tusi Paia se aganuu po o se ituaiga o tagata. O fautuaga o loo iai e aogā i taimi uma mo tagata o atunuu uma. Ua maua i le tele o gagana, ma e sili atu ona kopi ua tufatufaina nai lo o se isi lava tusi. * O lea, ua mafai ai e tagata i so o se mea ona faitau i ai ma taʻitaʻiina ai i latou. E lagolagoina lenei manatu i le faamatalaga a le Tusi Paia:

“E lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.”​—GALUEGA 10:34, 35.

E pei lava ona saunia e se matua alofa taʻiala mo lana fanau, ua faapena foʻi ona saunia e Ieova le Atua lo tatou Tamā alofa ni fesoasoani e ala mai i lana Afioga le Tusi Paia. (2 Timoteo 3:16) E mafai ona tatou maufaatuatuaina lana Afioga, ona na ia foafoaina i tatou ma e na te silafia mea e tatou te maua ai le fiafia.

O le ā e tatau ona e faia ina ia maua ai lenā lumanaʻi? E maua le tali i le mataupu e sosoo ai.