Lá rígá mbá ikha dí ma̱ndoo mambáyáaʼ mu maraxtaa májánʼ nda̱wa̱á ráʼ.
Xó má ni̱jkua̱nú ndiʼyáá asndu xúgi̱, rí xa̱bu̱ nakumu̱ún rí makuwá májánʼ nda̱wa̱á á mu nunigajma̱a̱ itháan, nduyáʼ mbújkha̱a̱ ga̱jma̱a̱ á mu nanindxuún míjíinʼ xa̱bu̱. Mú dí matani xúgíʼ rígi̱ nindxu̱u̱ xóo majmaaʼ mbá mapa dí na̱nguá ki̱ʼni̱ májánʼ. Lá rúʼko̱ eyoo gáʼthúu̱n dí nda̱a̱ mbóoʼ ikha rí ma̱ndoo mambáyulú mu makuwáánʼ májánʼ nda̱wa̱á ráʼ.
IKHA NDRÍGÓO MBÁA BI̱ NAJMAÑUU ITHÁAN
Índo̱ nandulú muraʼwíí mbá rí mu̱ʼni̱, ginii rí nuʼni nindxu̱u̱ dí nurajxi̱i̱ mbáa bi̱ itháán nikhi̱i̱ o bi̱ nakro̱ʼo̱o̱ itháán májánʼ ki xóo ikháanʼ. Á mu nandulú makuwáánʼ májánʼ nda̱wa̱á gíʼmaa muʼnimbulú kuʼyáá bi̱ nakro̱ʼo̱o̱ májánʼ ga̱jma̱a̱ bi̱ najmañuu itháán ki xóo ikháanʼ. Ikha rígi̱ nindxu̱u̱ Biblia, dí nigumaraʼmáʼ nákhá 3,500 tsiguʼ.
Ndíjkha rí ma̱ndoo muʼnimbulú dí na̱ʼkha̱ raʼthí náa Biblia rá. Numuu dí bi̱ ajngóo nindxu̱u̱ bi̱ itháan nakro̱ʼo̱o̱ bi̱ xtáa náa xúgíʼ numbaaʼ. Ikhaa bi̱ ‹Niʼníí tsiguʼ má xtáa› ga̱jma̱a̱ ‹maxtáa kámuu› (Daniel 7:9; Salmo 90:2). Ikhaa nindxu̱u̱ ‹Dios bi̱ gajkuwiin bi̱ niʼni mekhu ga̱jma̱a̱ ku̱ba̱ʼ› (Isaías 45:18). Ikhaa naʼthúlú dí mbiʼyuu nindxu̱u̱ Jeobá (Salmo 83:18).
Numuu dí Biblia na̱ʼkha̱ náa bi̱ niʼniáánʼ, ikhí naʼsngúlú dí xúgiáánʼ ni̱ndxu̱lú mbríguáánʼ. Consejo dí na̱ʼkha̱ ikhí nambáñún xúgíinʼ xa̱bu̱ bi̱ kúwíin náa xúgíʼ numbaaʼ. Libro rígi̱ nijuiʼtájuíi náa itháan ajngáa ga̱jma̱a̱ nijuixnáraʼa náa xúgíʼ tsu̱du̱u̱ ku̱ba̱ʼ. * Asndu tsáá xa̱bu̱ ma̱ndoo makro̱ʼo̱o̱ ga̱jma̱a̱ ma̱ndoo maxná ikhoo, numuu dí náa Biblia naʼthí:
“Dios tséraʼwíin xa̱bu̱, ikhaa nagruiguíin xúgíinʼ bi̱ namíñúún kuyáá, bi̱ nuni̱ rí májánʼ, tséʼniuu má náá xuajin eguwáʼ” (HECHOS 10:34, 35).
Xó má eʼni mbáa xa̱bu̱ nikhi̱i̱ nandoo kaʼñún ga̱jma̱a̱ nambáñún e̱ji̱i̱n, xúʼko̱ má kayuuʼ eʼni Jeobá Dios ma̱ngaa. Ikhaa nandoo kaʼyulú ga̱jma̱a̱ najmuu Ajngá rawuunʼ mu mambáyulú (2 Timoteo 3:16). Ikháán ma̱ndoo ma̱ta̱ya̱a̱ dí gajkhun nindxu̱u̱ dí na̱ʼkha̱ raʼthí náa Ajngá rawuunʼ Dios, numuu dí ikhaa niʼniáánʼlú ga̱jma̱a̱ ndaʼyoo ndiéjunʼ rí itháan májánʼ dí ma̱ndoo muʼnilú.
Ndiéjunʼ gáʼyoo matani mu maraxtaa ikhí rá. Rúʼko̱ ma̱ta̱ya̱a̱ náa imbo̱o̱ artículo.
^ párr. 6 Náa libro “¡Araxtaa gagi kámuu mbiʼi!” náa capítulo 5, ikhí mataxkamaa tikhuu i̱yi̱i̱ʼ ga̱jma̱a̱ video náa naʼthí xú káʼnii nijuiʼtájuíi ga̱jma̱a̱ nijuixnáraʼa Biblia. Ayuʼ náa www.pr418.com araxnáá clic náa BIBLIOTECA > MBAʼA LIBRO GA̱JMA̱A̱ FOLLETO.
^ párr. 16 Á mu nandaaʼ ma̱ta̱ya̱a̱ itháán, atayáá náa Libro La Biblia... ¿la Palabra de Dios, o palabra del hombre? náa capítulo 9, rí nini̱ testigos de Jeobá dí rígá náa www.pr418.com. Atani clic náa BIBLIOTECA > OTRAS PUBLICACIONES.
Puede que también le interese
BI̱ NAYEJNGOO
Rí gajkhun ga̱jma̱a̱ numuu dí marigá nda̱wa̱á
Atanimbáa rí naʼthí Dios dí maʼni náa tsu̱du̱u̱ ku̱ba̱ʼ ga̱jma̱a̱ numún xa̱bu̱.
BI̱ NAYEJNGOO
Lá nayambáá consejos ndrígóo Biblia ráʼ.
Tikhun nundxa̱ʼwa̱míjna̱ rí kiʼsngáa ndrígóo Biblia tséjmaa nditháan. Á mu rí mbiʼi xúgi̱ rígá wéñuʼ ku̱ma̱, náa numuu rí mbuʼyááʼ mbá libro rí naʼni itháan rí 2,000 tsiguʼ dí rígá rá.
BI̱ NAYEJNGOO
Biblia ga̱jma̱a̱ xóo makuwáanʼ nda̱wa̱á
Ajngá rawunʼ Dios ma̱ndoo mambáyulúʼ maʼni̱i̱ a̱jkiu̱lú náa xkujndu rí nuraʼníí mámbá mbiʼi náa numbaaʼ rígi̱. Mú Biblia nandoo nambáyulúʼ itháan ga̱jma̱a̱ naʼthúlúʼ rí marigá nda̱wa̱á.
