Niinzi Chikonzya Kutugwasya Kuti Tuzoopone Buumi Bulikabotu Kunembo?

LIZYA

Mbuli mbutwabona muzyiiyo zyayinda, bantu balikweezya kuti bazoopone buumi bulikabotu kunembo kwiinda mukusyoma masalamusi, kuyanduula madigili, kunota akuba muntu uulikabotu. Kubelesya nzila eezi, kuli mbuli kuya kulibumwi busena mbutazi pe kulikubelesya nzila iitali njiyo pe. Eezi zyaamba kuti taakwe chintu na chikonzya kutugwasya kuti tuzoopone buumi bulikabotu kunembo? Peepe, teembuzyaamba pe.

TULAKONZYA KUGWASIGWA AAMUNTU MUSONGO

Chiindi nituyanda kusala chimwi chintu, nga twabuzya muntu mupati ulaaluzibo kwiinda ndiswe. Munzila iikozyenie, kuti katuyanda kuziba kuti buumi bwesu buzooba biyeni kunembo, tulakonzya kugwasigwa aamuntu mupati alubo ulaabusongo kwiinda ndiswe. Malayilile aazwa kuMuntu ooyo akalembwa mumalembe aasalala aakalembwa chiindi loko. Malembe aayo aasalala ndiJwi lyaLeza, Bbayibbele.

Nkamboonzi nweelede kusyoma Bbayibbele? Nkaambo Munaalyo mupati kwiinda bantu boonse alubo ulaabusongo kwiinda zintu zyoonse zilikujulu aanyika. Muntu ooyo wiitwa kuti, “Sinsiku” alubo wakaliwo “kuzwa lili alili mane kukabe kutamani.” (Daniele 7:9; Intembauzyo 90:2) “Mulengi wamajulu, Leza mwini-mwini, Ooyo wakabumba nyika.” (Isaya 45:18) Alubo ulaazina limugeme lyakuti Jehova.—Intembauzyo 83:18.

Bantu bamisyobo yoonse balakonzya kugwasigwa aBbayibbele, nkaambo lyakazwa kuMulengi wabantu boonse. Malayilile aalyo alagwasya chiindi choonse. Alubo lili kugwasya bantu bali munyika yoonse. Lilajanika mumilaka myiingi loko alubo lili kupupululwa loko kwiinda amwi mabbuku. * Eezi zyaamba kuti, kufumbwa nkubabede bantu balakonzya kulimvwisisisya akuzulwidwa aandilyo. Eezi zileendelana anzilyaamba lwalyo Bbayibbele:

“Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—MILIMO 10:34, 35.

Mbuli bazyali mbubazulwida bana babo, Jehova Leza, Taateesu siluyando, ulatuzulwida kabelesya Jwi lyakwe, Bbayibbele. (2 Timoteyo 3:16) Tulakonzya kulisyoma Jwi lyakwe nkaambo nguwe wakatulenga alubo ulizizi zintu nzituyanda kuti tupone buumi bulikabotu.

TULAKONZYA KULISYOMA BBAYIBBELE

Tulakonzya kulisyoma Bbayibbele kuti lilakonzya kutuzulwida, nkaambo muminyaka iili 2 000 yayinda lyakaamba choonzyo atala azintu zilikuchitika lino ambubabede bantu bamazubaano.

ZYAKALI KUZOOCHITIKA

“Cisi ciyoobukila cisinyina abwami buyoobukila bwaminyina. Kuyooba mizuzumo yanyika mipati, alimwi mumasena aaindene-indene kuyooba nzala azilwazi.”—LUKA 21:10, 11.

BUNTU BWABANTU

“Kumazuba aamamanino kuyooba ziindi zikatazya ncobeni. Nkaambo bantu bayooba basikuliyanda, bayandisya mali, basikulidunda, basikulisumpula, basikusampaula, batamvwidi bazyali, batalumbi, batasyomeki, batajisi luyando lwakuzyalwa andulo, batanyoneki, basikubejelezya, batalilesyi, bakali, batayandi bubotu, basikwaaba bamwi, batalaiki, basikulitukumuna, bayandisya zyakulikondelezya kwiinda kuyandisya Leza.”—2 TIMOTEYO 3:1-4.

Niinzi chipa kuti zintu zyakaambwa chiindi loko muBbayibbele, zizoozuzikizigwe mazubaano mbuli mbuzyakaambidwe? Zilaantanganana kuti uzuminana aazyakwaambwa aaLeung wakuHong Kong, wakati: “Bupolofita bwamuBbayibbele bwakalembwa chiindi loko. Tazichiti pe kuti muntususu akonzye kwaamba makani aachoonzyo munzila iiliboobu. Eezi zitondeezya kuti Bbayibbele lyakazulwidwa aamuntu musongo loko kwiinda ndiswe.”

MuBbayibbele muli bupolofita bwiingi loko bwakazuzikizigwa. * Eezi zitondeezya kuti Bbayibbele ndiJwi lyaLeza. Jehova wakaamba kuti: “Ndime Leza, taakwe uumbi uuli mbuli ndime. Kuzwa kumatalikilo ndaambila limwi ciyoocitika kumbele.” (Isaya 46:9, 10) Twaambo ootu, tupa kuti tusyome nzilyaamba Bbayibbele atala abuumi bwakunembo.

MALAYILILE AAKONZYA KUKUGWASYA KUKABE KUTAMANI

Kupona kweendelana amalayilile aaBbayibbele kugwasya nduwe. Bona zimwi zikozyano.

KUBAAMABONENO AALIKABOTU ATALA AMALI AMULIMU

“Kulyookezya kusyoonto nkubotu kwiinda kulijaya kubeleka mulimo muyumu akutandaanya muwo.”—MUKAMBAUSI 4:6.

KUBOTELWA MUMPULI

“Umwi aumwi wanu weelede kuyanda mukaintu wakwe mbubonya mbwaliyanda mwini; kunze lyaboobo, mukaintu awalo weelede kumulemeka kapati mulumaakwe.”—BAEFESO 5:33.

KUKKAZYANIA KABOTU ABAMWI

“Koleka kunyema abukali; utacimwi akutalika kucita cibi.”—INTEMBAUZYO 37:8.

Kubelesya malayilile aamuBbayibbele kulakugwasya lino alubo kupa kuti uzoopone buumi bulikabotu kunembo. MuBbayibbele, muli zisyomezyo zibotu loko nzyasyomezya kuyootuchitila kunembo Leza, ziswaanizya:

LUUMUNO AKULYIIBA

“Bayoobotelwa kapati muluumuno lunji.”—INTEMBAUZYO 37:11.

BOONSE BAYOOBA AAMAANDA ACHAKULYA

“Bayooyaka maanda akukkala mulingawo, bayoosyanga myuunda yamisaansa akulya micelo yanjiyo.”—ISAYA 65:21.

KUCHISWA ALUFU ZIYOOMANA

“Lufwu talukabi limbi, akwalo koomoka, kulila nokuba kucisa takukabi limbi pe.”—CIYUBUNUZYO 21:4.

Weelede kuchitaanzi kuti uzoopone buumi bulikabotu kunembo? Langa chiiyo chitobela.

^ par 6 Kuti ujane makani miingi atala ambulyakasandululwa ambulyakapupululwa Bbayibbele, njila aawebbusayiti yesu iitegwa www.pr418.com/toi mpawo ulange aachipanzi chitii, NJIISYO > ZYAMUBBAYIBBELE ZYACHIINDI & ABBAYIBBELE.

^ par 16 Kuti ujane makani miingi atala ankani eeyi, langa chaandaano 9 chabbuku litegwa The Bible—God’s Word or Man’s? lyakapupululwa aaBakamboni baJehova. Lilajanika aawebbusayiti yesu iitegwa www.pr418.com. Langa aachipanzi chitii, LIBRARY > BOOKS & BROCHURES.

Bakamboni baJehova

Niinzi Chikonzya Kutugwasya Kuti Tuzoopone Buumi Bulikabotu Kunembo?

TULAKONZYA KUGWASIGWA AAMUNTU MUSONGO

You May Also Like

Kasimpe Kali Atala Amazuba Aalikunembo