U Nga Wu Kuma Kwihi Nkongomiso Lowu Tshembekaka Wo Va Ni Vumundzuku Lebyinene?

TLANGA

Hilaha hi buleke hakona eka tinhlokomhaka leti nga hundza, vanhu vo tala va tshemba leswaku dyondzo, rifuwo ni ku va munhu lonene swi ta endla leswaku va va ni vumundzuku lebyinene. Ku tshemba swilo sweswo swi fana ni ku tirhisa mepe lowu nga tirhiki kahle loko u teka riendzo. Xana sweswo swi vula leswaku a ku na nkongomiso lowu tshembekaka mayelana ni vumundzuku? Doo!

NKONGOMISO LOWU HUMAKA EKA XIHLOVO LEXINENE

Loko hi endla swiboho, hi ntolovelo hi vulavurisana ni lavakulu ni lava tlhariheke ku hi tlula. Hilaha ku fanaka, hi nga kuma nkongomiso lowu tshembekaka hi vumundzuku bya hina eka Un’wana loyi a kuleke a tlhela a tlhariha ku hi tlula. Xitsundzuxo Xakwe hi xi kuma eka matsalwa lama kwetsimaka lama sunguleke ku tsariwa kwalomu ka malembe ya 3 500 lama hundzeke. Buku leyi ya matsalwa yo kwetsima yi vitaniwa Bibele.

Hikwalahokayini u fanele u tshemba Bibele? Hikuva Mutsari wa yona i nkulu swinene a tlhela a tlhariha swinene evuakweni hinkwabyo. U hlamuseriwa tanihi “Nkulukumba wa Masiku” loyi a nga kona “hilaha ku nga heriki.” (Daniyele 7:9; Pisalema 90:2) Hi yena “Mutumbuluxi wa matilo, Xikwembu xa ntiyiso, Loyi a vumbeke misava.” (Esaya 45:18) U hi byela leswaku vito rakwe i Yehovha.—Pisalema 83:18.

Leswi Bibele yi humaka eka Muvumbi wa vanhu hinkwavo, a yi na xihlawuhlawu eka ndhavuko kumbe rixaka ro karhi. Xitsundzuxo xa yona a xi hundzeriwi hi nkarhi naswona xi pfune vanhu ematikweni hinkwawo. Ya kumeka hi tindzimi to tala ku tlula tibuku tin’wana naswona vanhu vo tala va na yona. * Leswi swi vula leswaku hinkwako laha vanhu va kumekaka kona va nga kota ku yi hlaya va tlhela va kongomisiwa hi yona. Leswi swi pfumelelana ni leswi Bibele yi swi vulaka:

“Xikwembu a xi na xihlawuhlawu, kambe eka tiko rin’wana ni rin’wana munhu loyi a xi chavaka a tlhela a endla leswinene wa amukeleka eka xona.”—MITIRHO 10:34, 35.

Tanihi leswi mutswari la nga ni rirhandzu a pfunaka vana vakwe, Yehovha Xikwembu i Tatana la nga ni rirhandzu loyi a hi pfunaka hi ku tirhisa Rito rakwe, ku nga Bibele. (2 Timotiya 3:16) U nga ri tshemba Rito rakwe; phela hi yena a hi vumbeke naswona wa swi tiva leswi nga hi tsakisaka.

NKONGOMISO LOWU TSHEMBEKAKA

Hi nga tshemba leswaku Bibele yi ni nkongomiso lowu hi nga wu tshembaka hi vumundzuku hikuva kwalomu ka malembe ya 2 000 lama hundzeke, yi profete hi leswi endlekaka ni mahanyelo lawa hi ma vonaka namuntlha.

SWIENDLAKALO

“Matiko ma ta hlaselana ni mifumo yi ta hlaselana. Ku ta va ni ku tsekatseka lokukulu ka misava, naswona ku ta va ni ku kayivela ka swakudya ni mintungu.”—LUKA 21:10, 11.

MAHANYELO

“Emasikwini yo hetelela ku ta fika mikarhi yo nonon’hwa leyi swi tikaka ku hanya eka yona. Hikuva vanhu va ta va lava tirhandzaka, varhandzi va mali, lava tikurisaka, lava titlakusaka, vasandzi, lava nga yingisiki vatswari, lava nga khensiki, lava nga tshembekiki, lava nga riki na rirhandzu, lava nga tiyimiselangiki ku pfumelelana ni van’wana, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka, lava rhandzaka ku tiphina ku ri ni ku rhandza Xikwembu.”—2 TIMOTIYA 3:1-4.

Xana u gimeta hi ku yini loko u vona leswi Bibele yi swi profeteke khale swi humelelaka namuntlha? A swi kanakanisi leswaku u pfumelelana na Leung, wa le Hong Kong loyi a nga te: “Vuprofeta bya le Bibeleni byi tsariwe khale swinene. A swi nge koteki ku va munhu wa laha misaveni a profeta hi swilo leswi ivi swi endleka hilaha swi endlekaka hakona namuntlha. Hikwalaho, Bibele yi fanele yi tsariwe hi munhu un’wana la tlhariheke ku hi tlula.”

Bibele yi ni vuprofeta byo tala lebyi hetisekaka namuntlha. * Leswi swi kombisa leswaku hakunene Bibele i Rito ra Xikwembu. Yehovha u ri: “Hi mina Xikwembu, a ku na xin’wana lexi fanaka na mina. Ku sukela eku sunguleni ndzi boxa leswi nga ta humelela swi nga si humelela.” (Esaya 46:9, 10) Hikwalaho, u ni xivangelo lexinene xo tshemba leswi Bibele yi swi vulaka hi vumundzuku.

NKONGOMISO LOWU KU PFUNAKA SWESWI NI HILAHA KU NGA HERIKI

Loko u landzela nkongomiso lowu kumekaka eMatsalweni yo Kwetsima, u ta vuyeriwa. Xiya swikombiso leswi landzelaka.

KU VA NI LANGUTELO LERINENE HI MALI NI NTIRHO

“Swa antswa ku wisa ku ri ni ku tshamela ku tirha ni ku hlongorisa moya.”—EKLESIASTA 4:6.

VUTOMI BYA NDYANGU

“Un’wana ni un’wana wa n’wina u fanele a rhandza nsati wakwe hilaha a tirhandzaka hakona; hi hala tlhelo, wansati u fanele a va ni xichavo xo enta eka nuna wakwe.”—VAEFESA 5:33.

KU HANYISANA NI VANHU VAN’WANA

“U nga hlundzuki, tshika vukarhi; u nga karihi ivi u endla leswo biha.”—PISALEMA 37:8.

Ku tirhisa leswi Bibele yi swi vulaka swi ta endla u hanya vutomi lebyinene sweswi u tlhela u va ni vumundzuku lebyinene enkarhini lowu taka. EBibeleni hi kuma xitshembiso xa Xikwembu xa vumundzuku lebyi tsakisaka lebyi katsaka

KU RHULA NI NSIRHELELO

“Va ta tsaka swinene hikuva ku ta va ni ku rhula lokukulu.”—PISALEMA 37:11.

VANHU HINKWAVO VA TA VA NI TIYINDLU NI SWAKUDYA

“Va ta aka tiyindlu va tshama eka tona, va ta rima masimu ya madiriva va dya mihandzu ya wona.”—ESAYA 65:21.

A KU NGE HE VI NA VUVABYI KUMBE RIFU

“Rifu a ri nge he vi kona, hambi ku ri nkosi, ku rila ni switlhavi a swi nge he vi kona.”—NHLAVUTELO 21:4.

I yini leswi u faneleke u swi endla leswaku u va ni vumundzuku byolebyo? Hlaya nhlokomhaka leyi landzelaka.

^ par. 6 Leswaku u kuma vuxokoxoko mayelana ni ku hundzuluxeriwa ni ku hangalasiwa ka Bibele, nghena eka www.pr418.com/ts kutani u ya ehansi ka TIDYONDZO TA BIBELE > MATIMU NI BIBELE.

^ par. 16 Leswaku u kuma leswi engetelekeke, vona ndzima 9 ya buku leyi nge, Bibele—I Rito Ra Xikwembu Kumbe I Ra Munhu? leyi kandziyisiweke hi Timbhoni ta Yehovha. Ya kumeka eka website ya www.pr418.com/ts. Nghena eka LAYIBURARI > TIBUKU NI TIBROXARA.

U Nga Ha Tsakela

XIHONDZO XO RINDZA

Ntiyiso Hi Vumundzuku

Tiyisa ntshembo wa wena hi leswi Xikwembu xi tshembisaka leswaku xi ta swi endlela vanhu laha misaveni.

XIHONDZO XO RINDZA

Xana Milawu Ya Le Bibeleni Ya Pfuna Namuntlha?

Leswi ku nga ni rungula ro tala namuntlha, ha yini u fanele u hlaya buku leyi tsariweke emalembeni ya kwalomu ka 2 000 lama hundzeke?

XIHONDZO XO RINDZA

Xana U Kona Loyi A Nga Kotaka Ku Tiva Vumundzuku?

Ku ni xihlovo lexi tshembekaka xa vumundzuku.

XIHONDZO XO RINDZA

Ndlela Leyi Bibele Yi Nga Ku Pfunaka Ha Yona Leswaku U Va Ni Vumundzuku Lebyinene

Rito ra Xikwembu ri nga hi pfuna leswaku hi kota ku langutana ni swilo leswi hi karhataka sweswi, ku nga swiphiqo swa siku na siku leswi hinkwerhu hi langutanaka na swona emisaveni leyi yo biha. Kambe Bibele yi endla leswi tlulaka sweswo. Yi tlhela yi hi voningela leswaku hi kota ku tiva vumundzuku.

SWIVUTISO LESWI HLAMURIWAKA HI BIBELE

Xana Bibele Yi Profetile Hi Ndlela Leyi Vanhu Va Ehleketaka Ni Ku Hanya Hayona Namuntlha?

Bibele a yi profetile leswaku vanhu a va ta nyanya ku biha.

XIHONDZO XO RINDZA