May-ada ba Masasarigan nga Giya Para ha Mas Maopay nga Kabubuwason?
Ginhisgotan ha nauna nga mga artikulo nga an mga tawo nangangalimbasog nga mabilngan an mas maopay nga kabubuwason pinaagi ha pagsarig ha kapalaran, edukasyon, karikohan, pagin maopay nga tawo, ngan iba pa. Pero an pagbuhat hini pariho hin paggamit hin sayop nga mapa tipakadto ha usa nga destinasyon. Karuyag sidngon ba nga waray masasarigan nga giya para ha aton kabubuwason? Diri!
GIYA TIKANG HA PINAKAMAOPAY NGA SUROK
Kon nagdidesisyon, kasagaran na nga nakonsulta kita ha usa nga mas edaran ngan mas maaramon kay ha aton. Ha pariho nga paagi, makakakuha kita hin masasarigan nga giya para ha aton kabubuwason tikang ha Surok nga mas edaran ngan mas maaramon gud kay ha aton. Mababasa naton an Iya sagdon ha usa nga koleksyon han baraan nga mga sinurat nga gintikangan paghimo mga 3,500 ka tuig na an naglabay. Ini nga koleksyon usa nga libro nga gintatawag nga Biblia.
Kay ano nga makakasarig ka ha Biblia? Kay an Awtor hito an pinakaedaran ngan pinakamaaramon nga Persona ha uniberso. Gintatawag hiya nga “an Kadaan han mga Adlaw” nga “tikang ha waray tinikangan tubtob ha waray kataposan.” (Daniel 7:9; Salmo 90:2) Hiya “an Maglalarang han langit, an tinuod nga Dios, . . . nga nagporma han tuna.” (Isaias 45:18) Ginsusumatan kita niya nga Jehova an iya ngaran.—Salmo 83:18.
Tungod kay an Biblia tikang ha Maglalarang han ngatanan nga tawo, waray ito ginpapaurog nga kultura o lahi. An sagdon hito diri nadadaan ngan nagin mapulsanon ha mga tawo ha ngatanan nga katunaan. Iginhubad ito ha mas damu nga linggwahe ngan may mas damu nga naipanaltag kompara ha iba pa nga libro. * Salit mababasa ito han mga tawo ha bisan diin ngan magigiyahan hira hito. Uyon ini ha ginsisiring mismo han Biblia:
“An Dios waray pinaurog, kondi ha tagsa nga nasud an tawo nga may kahadlok ha iya ngan nagbubuhat han husto ginkakarawat niya.”—BUHAT 10:34, 35.
Sugad la nga an mahigugmaon nga kag-anak naggigiya ha iya mga anak, hi Jehova nga Dios usa nga mahigugmaon nga Amay nga nabulig ha aton pinaagi han iya Pulong, an Biblia. (2 Timoteo 3:16) Makakasarig ka ha iya Pulong kay hiya an naghimo ha aton ngan maaram hiya kon ano nga pagkinabuhi an pinakamaopay para ha aton.
Ano an kinahanglan mo buhaton basi magkaada hito nga kabubuwason? Kitaa an sunod nga artikulo.
^ par. 6 Para ha mga detalye mahitungod han paghubad ngan pagpanaltag han Biblia, pakadto ha www.pr418.com/war ngan kitaa an KATUTDOAN HAN BIBLIA > AN KASAYSAYAN NGAN AN BIBLIA.
^ par. 16 Para ha dugang nga detalye, kitaa an kapitulo 9 han libro nga The Bible—God’s Word or Man’s? nga iginpublikar han mga Saksi ni Jehova. Makikita ito online ha www.pr418.com. Kitaa an LIBRARY > BOOKS & BROCHURES.
Bangin Maruyagan Mo Liwat
AN BARANTAYAN
An Kamatuoran Mahitungod ha Aton Kabubuwason
Parig-ona an imo paglaom mahitungod ha ginsisiring han Dios nga mahitatabo ha tuna ngan ha mga maukoy dida hito.
AN BARANTAYAN
Praktikal ba Para Yana an Giya han Biblia?
Tungod han napapanahon nga mga impormasyon, kay ano nga magamit pa han Biblia, nga haros 2,000 ka tuig na ito nga iginsurat?
AN BARANTAYAN
An Biblia Ngan an Imo Kabubuwason
An Pulong han Dios makakabulig ha aton ha pag-atubang ha kon ano an aada ha aton atubangan—mga problema ha kada adlaw dinhi hinin waray kasigurohan nga kalibotan. Pero diri la ito an nahihimo han Biblia. Naghahatag liwat ito hin klaro nga hulagway han tiarabot.
