Casi maʼ bidúʼyanu, stale binni riníʼ ique zabani nayecheʼ pa guni cré destinu, sáʼ scuela roʼ, gapa bueltu o gaca binni nachaʼhuiʼ. Ne ora rúnicabe zacá, casi ñaca niquiiñecabe ti mapa ni cadi biaʼsi nuu ne ni ziné laacabe gadxé ladu. Peru qué riníʼ ndiʼ nga qué zanda guidxélanu xiixa ni gacané laanu guibáninu nayecheʼ.

Ora chiguicaanu ti decisión, stale biaje ruyúbinu gacané tuuxa ni jma nanna o ni jma huaniisi laanu. Nga runi, pa racaláʼdxinu guibáninu nayecheʼ, naquiiñeʼ guyúbinu gacané tuuxa ni jma napa experiencia ne ni jma nuu xpiaaniʼ laanu. Ne zanda guidxélanu ni gacané laanu lu ti libru ni gucuá raca jma de 3,500 iza. Laani nga Biblia.

¿Xiñee zanda guni crenu ni zeeda lu Biblia yaʼ? Purtiʼ ni guníʼ guicá ni nga ni jma nuu xpiaaniʼ lu guidubi naca universu. Laabe nga Binnigola ni maʼ xadxí nabani ne ni qué ziuu dxi gatiʼ (Daniel 7:9; Salmo 90:2). Laabe nga «ni bizáʼ guibáʼ, Dios ni dxandíʼ, ni bizáʼ guidxilayú» (Isaías 45:18). Ne laapebe cayábibe laanu labe nga Jehová (Salmo 83:18).

Cumu zeeda Biblia de Dios ni bizáʼ guiráʼ binni la? qué rusiidiʼ ni risaca ti cultura o ti raza jma que stobi. Ne ca conseju zeeda luni nabé huayacané ca ni binni de guiráʼ guidxi. Laani nga libru ni huayaca traducir lu stale idioma ne ni jma stale binni napa lu guidubi Guidxilayú. * Nga runi, tutiica zanda guiene ni zeeda luni ne gacané ni laa. Biblia ná:

«Biaʼca risaca guiráʼ binni nezalú Dios, ne runi aceptar ca ni ridxibi laa ne rúnicaʼ ni jneza, intiica guidxi laacaʼ» (HECHOS 10:34, 35).

Cásica ti padre ni nadxii ne racané ca xiiñiʼ, Bixhózenu Jehová ni nadxii laanu riquiiñeʼ Biblia para gacané laanu (2 Timoteo 3:16). Nga runi zanda guni creluʼ guiráʼ ni cá lu Stiidxaʼ Dios purtiʼ laapebe bizaʼbe laanu ne nánnabe xii nga ni jma galán para laanu.

¿Xi naquiiñeʼ gúniluʼ para guibániluʼ zacá yaʼ? Zadúʼyanu ni lu sti artículo ca.