Mga 3,500 na taon na an nakaagi, sinabihan kan Diyos na Jehova an mga nagsasamba sa saiya kun ano an dapat nindang gibuhon para magkaigwa nin magayon na puturo: “Tinatawan taka nin pagpipilian, an buhay o an kagadanan, an bendisyon o an sumpa; asin dapat mong pilion an buhay tanganing mabuhay ka, ika saka an saimong mga gikan.”—Deuteronomio 30:19.

Para magkaigwa nin magayon na puturo, kaipuhan ninda kaidto na gumibo nin tamang desisyon. Arog kan sa sainda an pagpipilian ta ngunyan. Ipinapaliwanag kan Bibliya kun paano ta mapipili an magayon na puturo: “Paagi sa pagpahiling nin pagkamuot ki Jehova na saimong Diyos, paagi sa pagdangog sa saiyang mga sinasabi.”—Deuteronomio 30:20.

MAG-ADAL NIN BIBLIYA: Para mamutan si Jehova, inot kaipuhan mong makanuod manungod saiya sa Bibliya. Sa paggibo mo kaiyan, mahihiling mo na saro siyang mamumuton na Diyos asin na an pinakamarahay an gusto niya para saimo. Inaagda ka niya na mamibi saiya “huli ta nagmamakulog siya sa [saimo].” (1 Pedro 5:7) Nangangako an Bibliya na pag naghinguwa ka na magin harani saiya, “marani siya sa [saimo].”—Santiago 4:8.

ISABUHAY AN MGA NANUNUDAN MO: Masasabing nagdadangog ka sa Diyos kun sinusunod mo an saiyang madunong na paggiya na mababasa sa Bibliya. Kun gigibuhon mo iyan, “magigi kang mapanggana asin madunong.”—Josue 1:8.