Munateli Kutondahu Enu Aweni Chakekala Mbidi Yenu
Kwakwihi nayaaka 3,500 yinahituhu, Yehova Nzambi wayilejeli antu adifukwileña kudi yena yuma yateleliwu kwila hakwila akekali nambidi yakiñewa: “Ami nakushili dehi kumesu eyi niwumi nikufwa, ninkisu niishiñu; dichi dinu tondaku wumi kulonda wuhandi, nineyi nianyaneyi.”—Kuhituluka 30:19.
Ateleli kufuukula chiwahi hakwila akekali nachihandilu chachiwahi kumbidi. Ninetu makonu dichitwatela kwila. Bayibolu yatuleja chitunateli kutonda mbidi yayiwahi, chiyahosha nawu: “Wukeñi Yehova Nzambi yeyi, wovwahili mwizu dindi.”—Kuhituluka 30:20.
TUNATELI KUMUTIYILILA ÑAHI YEHOVA NIKWOVWAHILA IZU DINDI?
DIZENUÑA BAYIBOLU: Hakwila mumukeñi Yehova mwatela kudizaña Bayibolu kulonda mumwiluki. Chimukudizaña mukwiluka nenu hiNzambi wukweti kukeña wunakukeña nindi mwikali namuzañalu. Nakukeña nindi mumulombeña, “muloña yena wayakamenaña.” (1 Petulu 5:7) Bayibolu yatukana nawu neyi muzata nañovu kulonda muswini kwakwihi nayena, “niyena wukuswina kwakwihi nanenu.”—Yakoba 4:8.
ZATISHENUÑA YUMA YIMUNAKUDIZA: Kumutiyilila Nzambi kwatalisha mukwovwahila kufumba kwindi kwekala muBayibolu. Neyi mwovwahilaña kufumba kwindi, ‘mwakakooleka munjila jenu, dichi mwakamona kuwaha.’—Yoshuwa 1:8.
^ Yidi munawa madimi 7 kushilahu idimi daMandarin niCantonese Chinese.