1. Kaa bɔ nɛ Matsɛ David pee ɔ, mɛni sane nɛ wa kpɛti ni komɛ ma nyɛ ma bi?

WƆ TSUO wa suɔ nɛ wa ná tue mi jɔmi ngɛ si himi mi. Nɔ ko sume nɛ e pee yeyeeye, se be komɛ ɔ, wa peeɔ yeyeeye. Enɛ ɔ he je nɛ Yehowa sɔmɔli komɛ ma nyɛ ma bi sane nɛ Matsɛ David bi Yehowa a nɛ. David bi Yehowa ke: “Mɛni be ma na nɔ́ kɛ yaa si? Aywilɛho ma hyi ye tsui mi daa ligbi kɛ yaa si mɛni be?”​—La 13:2.

2. Mɛni he wa ma susu ngɛ ní kasemi nɛ ɔ mi?

² E ngɛ mi kaa wɔ tsuo wa peeɔ yeyeeye be komɛ mohu lɛɛ, se ní komɛ ngɛ nɛ wa ma nyɛ maa pee konɛ wa ko pee yeyeeye tsɔ. Ngɛ ní kasemi nɛ ɔ mi ɔ, wa maa na ní komɛ nɛ ma nyɛ ma ha nɛ waa pee yeyeeye. Lɔ ɔ se ɔ, wa ma susu ní ekpa komɛ nɛ ma nyɛ maa ye bua wɔ nɛ waa pee kpoo be mi nɛ wa ngɛ wa nyagba amɛ a nya dae ɔ a he.

3. Mɛni níhi ma nyɛ ma ha nɛ waa hao, nɛ wa ma nyɛ maa tsi ní nɛ ɔmɛ a nya lo?

³ Níhi fuu ma nyɛ ma ha nɛ waa pee yeyeeye, nɛ behi fuu ɔ, nɔ́ ko be nɛ wa ma nyɛ maa pee ngɛ ní nɛ ɔmɛ ekomɛ a he. Kaa nɔ hyɛmi nɔ́ ɔ, daa jeha a, a fɔɔ niye ní kɛ tadehi a nɔ, nɛ tsu hiɔ hu yaa hiɔwe, se nɔ́ ko be nɛ wa ma nyɛ maa pee ngɛ he. Wa be nyɛe ma kudɔ wa ní tsuli loo wa sukuu bi nɛ a bɔɔ mɔde kaa a maa ka wɔ konɛ waa kɛ wa he nɛ wo je mi bami yaya mi aloo wa ko ye anɔkuale ɔ hulɔ. Wa be nyɛe maa tsi  nihi nɛ a peeɔ ní yayahi ngɛ wa kpɔ ɔ mi ɔ hu a nya. Waa kɛ nyagba nɛ ɔmɛ kpeɔ, ejakaa nihi fuu dɛ Baiblo sisi tomi mlaahi a nɔ kɛ mwɔ yi mi kpɔhi ngɛ je nɛ wa ngɛ mi nɛ ɔ mi. Jehanɛ hu ɔ, Satan nɛ ji je nɛ ɔ mi mawu ɔ le kaa “níhi a blɔ nya tomi nɛ ɔ mi yeyeeye peemi” ma nyɛ ma ha nɛ nihi nɛ a kpa Yehowa sɔmɔmi. (Mat. 13:22; 1 Yoh. 5:19) Enɛ ɔ he ɔ, e pee we wɔ nyakpɛ kaa je ɔ mi hyi tɔ kɛ nyagbahi nɛ haa nɛ nihi peeɔ yeyeeye wawɛɛ!

4. Ke nyagbahi nɛ waa kɛ ngɛ kpee ɔ ha nɛ wa pee yeyeeye tsɔ ɔ, mɛni ma nyɛ maa ba?

⁴ Nyagbahi nɛ waa kɛ kpeɔ ɔ ma nyɛ ma ha nɛ waa hao hluu kaa wa be nyɛe ma susu nɔ́ kpa ko he. Kaa nɔ hyɛmi nɔ́ ɔ, eko ɔ, wa maa hao kaa wa be nyɛe ma ná sika nɛ maa su kɛ he wa hiami níhi, aloo wa maa hao kaa hiɔ be hae nɛ wa nyɛ waa ya ní tsumi, nɛ lɔ ɔ he ɔ, wa ní tsumi ma nyɛ maa je wa dɛ. Jehanɛ hu ɔ, wa ma nyɛ maa hao kaa ke waa kɛ ka ko kpe ɔ, wa be nyɛe maa ye Mawu anɔkuale. E be kɛe nɛ Satan ma ha nɛ nihi nɛ e ngɛ mɛ kudɔe ɔ nɛ a ya tua Mawu we bi, enɛ ɔ he ɔ, wa ma nyɛ maa hao ngɛ nɔ́ wa maa pee ke e ba lɛ jã a he. Eko ɔ, wa ma bi wa he ke, ‘Anɛ tɔmi ngɛ he kaa ma hao ngɛ ní nɛ ɔmɛ a he lo?’

5. Mɛni Yesu ngɛ tsɔɔe benɛ e de ke: “Nyɛɛ jɔɔ yeyeeye peemi” ɔ?

⁵ Wa le kaa Yesu de e se nyɛɛli ɔmɛ ke: “Nyɛɛ jɔɔ yeyeeye peemi.” (Mat. 6:25) Anɛ Yesu ngɛ tsɔɔe kaa wa ko hao ngɛ nɔ́ ko nɔ́ ko he kulaa lo? Pi jã kulaa ji sane ɔ! Mo kai kaa Yehowa sɔmɔli anɔkualetsɛmɛ komɛ nɛ a hi si blema a pee yeyeeye, se kɛ̃ ɔ, Yehowa kplɛɛ a nɔ. * (1 Ma. 19:4; La 6:3) Ngɛ anɔkuale mi ɔ, Yesu ngɛ wa bua woe. E pee jã konɛ wa ko pee yeyeeye tsɔ ngɛ níhi nɛ wa hia a he nɛ lɔ ɔ nɛ ba sa wa Mawu jami he ngɛ blɔ yaya nɔ. Lɛɛ mɛni wa ma nyɛ maa pee konɛ wa ko pee yeyeeye tsɔ?​—Hyɛ daka nɛ ji, “ Bɔ Nɛ O Maa Pee Lɛ Ha.”

6. Kaa bɔ nɛ Filipi Bi 4:6, 7 ɔ tsɔɔ ɔ, ke wa pee yeyeeye ɔ, mɛni ma nyɛ ma ha nɛ waa pee kpoo?

⁶ (1) Moo pɔ sɔlemi. Ke nyagba ko ha nɛ o ngɛ haoe ɔ, o ma nyɛ maa je o tsui mi kɛ sɔle ha Yehowa nɛ e ye bua mo. (1 Pet. 5:7) Yehowa ma nyɛ ma ha o sɔlemi ɔmɛ a heto nɛ e ma ha mo e “tue mi jɔmi ɔ nɛ pã níhi a sisi numi tsuo ɔ.” (Kane Filipi Bi 4:6, 7.) Yehowa maa gu e mumi klɔuklɔu ɔ nɛ ji e he wami ɔ nɔ kɛ ha mo tue mi jɔmi.​—Gal. 5:22.

7. Ke wa ngɛ sɔlee ha Mawu ɔ, mɛni nɛ e sa nɛ e hi wa juɛmi mi?

⁷ Ke o ngɛ sɔlee ha Yehowa a, jee o tsui mi nɛ o de lɛ nɔ́ fɛɛ nɔ́. Mo de lɛ o nyagba a nɛ o de lɛ bɔ nɛ o ngɛ he nue ha tutuutu. Ke nɔ́ ko ngɛ nɛ o ma nyɛ maa pee ngɛ he ɔ, mo bi lɛ nɛ e ha mo juɛmi kɛ he wami nɛ o kɛ pee jã. Nɛ ke o be nyɛe maa pee nyagba a he nɔ́ ko ɔ, lɛɛ mo bi Yehowa nɛ e ye bua mo nɛ o ko hao tsɔ ngɛ he. Ke o de Yehowa nɔ́ tutuutu nɛ ngɛ mo haoe ngɛ o si himi mi ɔ, ngɛ be nɛ sa mi ɔ, o maa na bɔ nɛ e ha o sɔlemi ɔ heto ha a heii. Se ke Yehowa ha we o sɔlemi ɔmɛ a heto amlɔ nɔuu po ɔ, ko kpa sɔlemi. Yehowa suɔ nɛ o de lɛ níhi pɔtɛɛ nɛ ngɛ o nya gbae ɔ, nɛ ngɛ jamɛ a be ɔ mi nɔuu ɔ, e suɔ nɛ o ya nɔ nɛ o sɔle ngɛ jamɛ a ní ɔmɛ a he.​—Luka 11:8-10.

8. Mɛni he nɛ e sa nɛ waa sɔle ngɛ?

⁸ Ke o ngɛ sɔlee ha Yehowa ngɛ o nyagba amɛ  a he ɔ, moo bɔ mɔde nɛ o na lɛ si hulɔ. Ke waa kɛ nyagbahi nɛ a nya wa ngɛ kpee po ɔ, e hi kaa wa ma susu jɔɔmihi nɛ wa ná a he. Ke o li munyuhi pɔtɛɛ nɛ o kɛ maa tsɔɔ Yehowa bɔ nɛ o ngɛ he nue ha a mi po ɔ, mo kai kaa ke o de ke, ‘I kpa mo pɛɛ nɛ o ye bua mi’ pɛ po ɔ, Yehowa maa bu tue.​—2 Kron. 18:31; Rom. 8:26.

9. Mɛni maa ye bua wɔ konɛ waa pee slɔkee?

⁹ (2) Ngɔɔ o hɛ kɛ fɔ Yehowa nile ɔ nɔ, se pi mo nitsɛ o nile nɔ. Ngɛ gbalɔ Yesaya be ɔ mi ɔ, Yuda bi ɔmɛ ye gbeye kaa Asiria bi ɔmɛ ma ba tua mɛ. Akɛnɛ Yuda bi ɔmɛ sume nɛ Asiria bi ɔmɛ nɛ ye a nɔ he je ɔ, a de Egipt bi ɔmɛ kaa a ye bua mɛ. (Yes. 30:1, 2) Yehowa bɔ mɛ kɔkɔ kaa a hɛ nɛ a ngɔ kɛ fɔ Egipt bi ɔmɛ a nɔ ɔ ma ha nɛ a nine nɛ nyɛ si. (Yes. 30:7, 12, 13) Yehowa gu gbalɔ Yesaya nɔ kɛ de Yuda bi ɔmɛ nɔ́ mohu nɛ a pee konɛ a pee slɔkee. E de ke: “Nyɛɛ ngɔ nyɛ hɛ ngɔ fɔ ye nɔ kpoo. Ja jã loko nyɛ he maa wa.”​—Yes. 30:15b.

10. Mɛni si fɔfɔɛ komɛ a mi nɛ wa ma nyɛ maa tsɔɔ kaa wa ngɔɔ wa hɛ kɛ fɔɔ Yehowa nɔ?

¹⁰ Mɛni si fɔfɔɛhi a mi nɛ wa ma nyɛ maa tsɔɔ kaa wa ngɔ wa hɛ kɛ fɔ Yehowa nɔ? Nɔ hyɛmi ní komɛ ji nɛ ɔ nɛ. Ke a ha mo ní tsumi nɛ e hiɔwo ɔ kle, se e ma bi nɛ o kɛ o be fuu nɛ tsu, nɛ e maa sa o Mawu jami he. Aloo nɔ ko nɛ o kɛ lɛ ngɛ ní tsumi he nɛ e sɔmɔ we Yehowa a de mo kaa e bua jɔ o he. Aloo o weku no ko de mo kaa e kɛ mo maa po tako mi ke o kpa we Yehowa sɔmɔmi. Ngɛ si fɔfɔɛ nɛ ɔmɛ eko fɛɛ eko mi ɔ, e he hia nɛ o mwɔ yi mi kpɔ ko nɛ he wa wawɛɛ, se ke o ngɔ o hɛ kɛ fɔ Yehowa nɔ ɔ, e maa tsɔɔ mo blɔ nɛ da. (Mat. 6:33; 10:37; 1 Kor. 7:39) Se sane bimi ɔ ji, anɛ o maa ngɔ o hɛ kɛ fɔ Yehowa nɔ nɛ o kɛ e blɔ tsɔɔmi nɛ tsu ní lo?

11. Ke waa kɛ si temi kɛ womi ngɛ kpee ɔ, mɛni Baiblo mi sanehi wa ma nyɛ maa kase bɔ nɛ pee nɛ wa nyɛ nɛ waa pee kpoo?

¹¹ (3) Moo kase ní kɛ je nɔ hyɛmi ní kpakpahi kɛ yayamihi a mi. Nɔ hyɛmi níhi fuu ngɛ Baiblo ɔ mi nɛ tsɔɔ se nami nɛ ngɛ kpoo nɛ wa maa pee nɛ waa ngɔ wa hɛ kɛ fɔ Yehowa nɔ ɔ he. Ke wa ngɛ nɔ hyɛmi ní nɛ ɔmɛ a he susue ɔ, mo kadi nɔ́ nɛ ye bua Mawu sɔmɔli nɛ a pee kpoo benɛ a he nyɛli te si kɛ wo mɛ ɔ. Kaa nɔ hyɛmi nɔ́ ɔ, benɛ Yuda kojoli ɔmɛ bɔ Yesu bɔfo ɔmɛ kɔkɔ kaa a kpa fiɛɛmi ɔ, a yi gbeye. Mohu ɔ, a kɛ kã de ke: “E sa nɛ waa bu Mawu tue kaa nɔ yelɔ mohu pe adesahi.” (Níts. 5:29) Benɛ a fiaa bɔfo ɔmɛ kpa se po ɔ, a yi gbeye. Mɛni he je? Ejakaa a le kaa Yehowa kɛ mɛ ngɛ. E bua jɔ a he wawɛɛ. Enɛ ɔ he ɔ, a ya nɔ nɛ a fiɛɛ sane kpakpa a. (Níts. 5:40-42) Jã nɔuu kɛ̃ nɛ benɛ Steven kɛ gbenɔ kpe hɛ mi kɛ hɛ mi ɔ, e ya nɔ nɛ e pee kpoo nɛ e “hɛ mi pee kaa Mawu bɔfo ko hɛ mi.” (Níts. 6:12-15) Mɛni he je? Ejakaa e ngɛ nɔ mi mami kaa Yehowa kplɛɛ e nɔ.

12. Ngɛ 1 Petro 3:14 kɛ 4:14 ɔ nya a, mɛni he je wa ma nyɛ ma ná bua jɔmi ke a ngɛ wɔ yi mi wae?

¹² Bɔfo ɔmɛ ná nɔ mi mami kaa Yehowa kɛ mɛ ngɛ. Yehowa ye bua mɛ nɛ a pee nyakpɛ níhi. (Níts. 5:12-16; 6:8) Se mwɔnɛ ɔ, Yehowa ha we wɔ he wami nɛ wa kɛ pee nyakpɛ ní. Se ke waa kɛ haomihi ngɛ kpee ngɛ anɔkuale ɔ he je po ɔ, Baiblo ɔ haa nɛ wa náa nɔ mi mami kaa Yehowa bua jɔ wa he nɛ e kɛ e mumi klɔuklɔu ɔ maa ye bua wɔ. (Kane 1 Petro 3:14; 4:14.) Enɛ ɔ he ɔ, e sɛ nɛ waa hao ngɛ nɔ́ nɛ wa maa pee ke waa kɛ yi mi wami kpe hwɔɔ se ɔ he, mohu ɔ, waa bɔ mɔde tsuo nɛ wa ma nyɛ konɛ wa ná nɔ mi mami nɛ mi wa kaa Yehowa ma fĩ wa se nɛ e ma he wa yi wami. Kaa bɔ nɛ kaseli ɔmɛ pee ɔ, e sa nɛ wa ná nɔ mi mami ngɛ Yesu munyu nɛ e tu ɔ  mi. E wo si ke: “Ma ha nyɛ munyu kɛ juɛmi nɛ ke nihi nɛ a teɔ si kɛ woɔ nyɛ ɔ tsuo pee kake po ɔ, a be nyɛe maa da nya, nɛ a be nyɛe maa ku nya hulɔ.” E wo wɔ si hu ke: “Ke nyɛ fĩ si ɔ, nyɛ maa baa nyɛ wami yi.” (Luka 21:12-19) O hɛ ko je nɔ hu kaa Yehowa hɛ ji bɔ nɛ e sɔmɔli anɔkualetsɛmɛ nɛ a gbo ɔ ngɛ ha a nɔ, lɔ ɔ he ɔ, e ma tle mɛ si kɛ ba wami mi ekohu.

13. Ke wa kase nihi nɛ a pee we kpoo nɛ a ngɔɛ a hɛ kɛ fɔ Yehowa nɔ ɔ a he ní ɔ, kɛ lɔ ɔ maa ye bua wɔ ha kɛɛ?

¹³ Wa ma nyɛ maa kase ní kɛ je nihi nɛ a nyɛ we nɛ a pee kpoo nɛ a ngɔɛ a hɛ kɛ fɔ Yehowa nɔ ɔ a sane ɔ hu mi. A nɔ hyɛmi ní yaya amɛ a he ní nɛ wa maa kase ɔ maa ye bua wɔ nɛ wa kua yayamihi nɛ a pee ɔ. Kaa nɔ hyɛmi nɔ́ ɔ, benɛ Asa bɔni nɔ yemi kaa matsɛ ngɛ Yuda nɛ́ ta buli babauu ba tua lɛ ɔ, e ngɔ e hɛ kɛ fɔ Yehowa nɔ, nɛ Yehowa ha nɛ e ye kunimi. (2 Kron. 14:9-12) Se pee se benɛ Israel Matsɛ Baasha kɛ ta buli bɔɔ ko ba tua Asa a, e ngɔɛ e hɛ kɛ fɔ Yehowa nɔ kɛ ha yemi kɛ buami, mohu ɔ, e ya hla yemi kɛ buami kɛ je Siria bi ɔmɛ a ngɔ. (2 Kron. 16:1-3) Jehanɛ hu ɔ, benɛ Asa ba nu hiɔ wawɛɛ ɔ, e ngɔɛ e hɛ kɛ fɔ Yehowa nɔ nɛ e ye bua lɛ.​—2 Kron. 16:12.

14. Mɛni wa ma nyɛ maa kase ngɛ Asa sane ɔ mi?

¹⁴ Sisije ɔ, benɛ Asa kɛ nyagbahi kpe ɔ, e ngɔ e hɛ kɛ fɔ Yehowa nɔ. Se pee se benɛ e kɛ nyagbahi kpe ɔ, e kɛ e hɛ fɔɛ Mawu nɔ, mohu ɔ, lɛ nitsɛ e bɔ mɔde kaa e ma tsu nyagba a he ní. Asa ya bi yemi kɛ buami ngɛ Siria bi ɔmɛ a dɛ, nɛ e ngɛ kaa nɔ́ nɛ Yuda bi ɔmɛ ná tue mi jɔmi. Se tue mi jɔmi nɛ ɔ se kɛ we. Yehowa gu gbalɔ ko nɔ kɛ de Asa ke: ‘Akɛnɛ o ngɔ o hɛ ngɔ fɔ Siria matsɛ ɔ nɔ, nɛ o ngɔɛ o hɛ ngɔ fɔɛ Yehowa, o Mawu ɔ nɔ he je ɔ, Siria matsɛ tabo ɔ tu fo kɛ je o he.’ (2 Kron. 16:7) E sa nɛ waa hyɛ nɛ wa ko ngɔ wa hɛ kɛ fɔ wɔ nitsɛmɛ wa nɔ nɛ wa susu kaa ke wa bi we Yehowa nɛ e tsɔɔ wɔ blɔ kɛ gu e Munyu ɔ nɔ po ɔ, wɔ nitsɛmɛ wa ma nyɛ ma tsu sanehi a he ní. Ke waa kɛ si fɔfɔɛ ko kpe tlukaa po ɔ, e sa nɛ waa pee kpoo nɛ waa ngɔ wa hɛ kɛ fɔ Yehowa nɔ, nɛ e maa ye bua wɔ nɛ waa pee juɛmi nɛ da.

15. Ke wa ngɛ Baiblo ɔ kanee ɔ, mɛni wa ma nyɛ maa pee?

¹⁵ (4) Moo kase ngmamihi kɛ wo o yi mi. Ke o ngɛ Baiblo ɔ kanee nɛ o na ngmami komɛ nɛ tsɔɔ bɔ nɛ se nami ngɛ he kaa wa maa pee kpoo nɛ waa ngɔ wa hɛ kɛ fɔ Yehowa nɔ ɔ, bɔɔ mɔde nɛ o kase ngmami nɛ ɔmɛ kɛ wo o yi mi. E maa hi kaa o maa kane ngmami ɔ nɛ e je kpo aloo o maa ngma kɛ fɔ si konɛ o pɔ kanemi. Yehowa de Yoshua kaa e kɛ gbi blɛuu nɛ kane Mlaa womi ɔ be fɛɛ be konɛ e pee ní lelɔ. Nɔ́ nɛ e kane ɔ maa ye bua lɛ nɛ e ko ye gbeye, mohu ɔ, e maa pee kã nɛ e nyɛɛ Mawu we bi a hɛ mi. (Yosh. 1:8, 9) Munyuhi fuu ngɛ Mawu Munyu ɔ mi nɛ ma nyɛ maa ye bua mo nɛ o pee kpoo ngɛ si fɔfɔɛhi nɛ ma nyɛ ma ha nɛ o hao loo o ye gbeye ɔ a mi.​—La 27:1-3; Abɛ 3:25, 26.

16. Mɛni blɔ nɔ nɛ Yehowa guu asafo ɔ nɔ kɛ yeɔ bua wɔ konɛ waa pee kpoo nɛ waa ngɔ wa hɛ kɛ fɔ e nɔ?

¹⁶ (5) O kɛ Mawu we bi nɛ bɔ. Yehowa guɔ wa nyɛmimɛ a nɔ kɛ yeɔ bua wɔ konɛ waa pee kpoo nɛ waa ngɔ wa hɛ kɛ fɔ e nɔ. Ke wa ya asafo mi kpe ɔ, nyɛmimɛ nyumuhi tuɔ munyuhi kɛ woɔ wɔ he wami, nyɛmimɛ haa sanehi a heto, nɛ waa kɛ wa nyɛmimɛ sɛɛɔ ní. Enɛ ɔmɛ tsuo fiaa wɔ kɛ maa si. (Heb. 10:24, 25) Jehanɛ hu ɔ, ke waa kɛ wa huɛmɛ nɛ a ngɛ asafo ɔ mi nɛ wa he mɛ ye ɔ sɛɛ wa nyagbahi a he ní ɔ, a woɔ wɔ he wami wawɛɛ. “Munyu kpakpa” nɛ maa je wa huɛ ko ngɔ ɔ maa ye bua wɔ nɛ wa be yeyeeye pee tsɔ.​—Abɛ 12:25.

17. Kaa bɔ nɛ Hebri Bi 6:19 ɔ tsɔɔ ɔ, mɛni blɔ nɔ nɛ wa Matsɛ Yemi ɔ he hɛ kɛ nɔ fɔmi ɔ yeɔ bua wɔ nɛ wa peeɔ kpoo ngɛ si fɔfɔɛhi nɛ a mi wa mi?

 ¹⁷ (6) Ha nɛ o hɛ kɛ nɔ fɔmi ɔ mi nɛ wa. Wa Matsɛ Yemi ɔ he hɛ kɛ nɔ fɔmi nɛ wa ngɛ ɔ “ngɛ kaa osɛkɛ kɛ ha susuma a.” E yeɔ bua wɔ nɛ wa fĩɔ si ke waa kɛ si fɔfɔɛhi nɛ a mi wa ngɛ kpee aloo wa pee yeyeeye. (Kane Hebri Bi 6:19.) Yehowa wo si kaa hwɔɔ se ɔ, nɔ ko nɔ ko be haoe ngɛ nɔ́ ko he hu. Mo pue o yi mi tɛ ngɛ si womi nɛ ɔ he. (Yes. 65:17) Moo po he foni kaa o ngɛ je ehe nɛ nɔ́ yayami ko be mi nɛ tue mi jɔmi sɔuu nɛ ngɛ mi ɔ mi. (Mika 4:4) O kɛ nihi nɛ sɛɛ o hɛ kɛ nɔ fɔmi ɔ he ní, nɛ lɔ ɔ maa wo mo he wami. Pee nɔ́ nɛ o ma nyɛ ngɛ fiɛɛmi ní tsumi ɔ mi. Ke o pee ní nɛ ɔmɛ tsuo ɔ, o ma nyɛ ma “ná nɔ mi mami nɛ pi si ngɛ hɛ kɛ nɔ fɔmi ɔ mi kɛ ya si nyagbe.”​—Heb. 6:11.

18. Mɛni nyagbahi wa ma nyɛ maa hyɛ blɔ kaa waa kɛ maa kpe hwɔɔ se, nɛ mɛni wa ma nyɛ maa pee kɛ da a nya?

¹⁸ Akɛnɛ níhi a blɔ nya tomi nɛ ɔ ma nyagbe he je ɔ, waa kɛ nyagbahi nɛ ma nyɛ ma ha nɛ waa pee yeyeeye ɔ maa kpe wawɛɛ. Se jeha 2021 wa jeha ngmami ɔ ma nyɛ maa ye bua wɔ nɛ waa da nyagba amɛ a nya nɛ waa pee kpoo ke wa ngɔ wa hɛ kɛ fɔ Yehowa nɔ se pi wɔ nitsɛmɛ wa nɔ. Ngɛ jeha nɛ ɔ mi ɔ, nyɛ ha nɛ waa ngɔ wa ní peepee kɛ tsɔɔ kaa wa ngɛ hemi kɛ yemi ngɛ Yehowa si womi nɛ ji: “Nyɛɛ ngɔ nyɛ hɛ ngɔ fɔ ye nɔ kpoo. Ja jã loko nyɛ he maa wa” a mi.​—Yes. 30:15.