1. Mahecad to hongti ci Tafitian, o mamilicay kita ci Yihofaan to maanan a salicay hani?

MAKALIMAY kita rihaday ko kaˈorip, awaay ko maolahay cariraw to romiˈamiˈad. Kawra awaawa sai malitemohay ita ko kacalemceman a tatokian. Mahecad ci Tafitian, o roma sikawdan ni Yihofa milicayay ci Yihofaan to hatiniay a salicay alatek: “Cariraway kako to romiˈamiˈad, tatahacowa ko hatolas hani?”—ˈOlic 13:2.

2. Oniya lalakaw wa milengo to manan?

² Soˈlin awaay ko pakayraan ita awa ko cariraw, kawra adihayay ko demak mamaremo ita, miˈimer to hatiniay a harateng. Oniya lalakaw mamilengo, iraay ko manan a lalangian to pacariraway kitaanan, dotoc mihadakay to 6 a pakayraan, padama kitaanan ano misiˈayaw to pasangaray i kamayan eca ka marawraw.

3. O manan a demakan ko cowa ko mamaˈimer ita, kawra o papaira to cariraw alatek?

³ O lalangian no ˈalomanay a tamdaw a cariraw i, awaay pakayraan ita miˈimer. Tinakoen, pasangar pasangaray ko sakaˈorip, awaay ko pakayraan ita miˈimer tonini. Coka fanaˈ kita, hahacowa mikayhid ko cafay matayal cafay micudad a midemak to makaniway malafoay a demak. Roma i, awaay pakayraan ita  miconged to mararaway a demak. Anini, misiˈayaw kita to hatiniay a pasangaray, samanen cowa pitoor to safalod no Fangcalay Cudad a maˈorip ko ˈalomanay a tamdaw. Mafanaˈay ko kawas no hekal ci Satan, o roma tamdaw pakayni “cariraw no lekakawa,” awaay ko harateng sapidokoaw ci Yihofaan. (Matay 13:22; 1 Yohani 5:19) Maˈorip kita toniya hekal i, tada karetengay ko saroero!

4. Misiˈayaw to taˈangayay saroero, wa samaan ko harateng ita alatek?

⁴ Misiˈayaw to taˈangayay a saroero, macariraway ko harateng ita alatek. Tinakoen, calemcemay kita cangoˈotay ko mietanan a payci sakaˈorip, anca calemcemay to adada, caka ngaˈay malingad matayal, anca malahdaw ko katayalan. Alatek calemcemayho kita mamakayhid ko niyah mararaw, caka madimadi to Kawas. Roma i, caka halafin wa owingen ni Satan ko midamaay cingranan miˈodis to finawlan no Kawas, cacalemcemho kita alatek caka ngaˈay kita misiˈayaw. Telocto wa saan kita miharateng: Calemcem kako to hatiniay a demak o matatodongay hokira?

5. Sowal ni Yis aka to ka cariraw, o manan ko tatodong hani?

⁵ Na pasowalan ni Yis ko nisawawaan ningra: ‘Aka to macariraw.’ (Matay 6:25) Tatodong ningra i, coka ngaˈay cariraw kita to polong a demak hokira? Cowa ka hatira. Nolitengan, o madimadiay a sikawdan ni Yihofa macariraway cakarihaday, kawra cowa ka hawaden ni Yihofa cangra. * (1 Hongti 19:4; ˈOlic 6:3) Mihaen ko sowal ni Yis, o mihinomay kitaanan. Cowa ka ciharateng Cingra pakidem ko cariraw no falocoˈ ita cato ka ngaˈay a misamacay midoko to Kawas. Mihaenay, samaan ko demak ita, o cowa ka pakidem a cariraw hani?— Nengnengen ko sapatongal lalakaw “ Sasamaan ko hademak.”

6. Pakayni Filipi 4:6, 7, o manan ko papadama kitaanan rihaday ko falocoˈ?

⁶ (1) Micerid mitolon. Mikifalocoˈ kita mitolon ci Yihofaan, mamalowan ko saroero. (1 Pitiro 5:7) Papacaˈofen ni Yihofa ko satolon ita, ‘pafeli kitaanan ko mataˈlifay maharatengay a rihaday.’ (ˈOsien ko Filipi 4:6, 7.) Taˈangayay ko ˈicel no Fangcalay saocor, pafeliay ci Yihofa to mahaenay a ˈicel padama kitaanan miliyaw a rihaday ko falocoˈ.—Kalatiya 5:22.

7. Ano mitolon kita ci Yihofaan i, haratengen sasamaan ko hademak?

⁷ Ano mitolon kita ci Yihofaan i, hadaken ko nai falocoˈay a sowal, pasowalen Cingra to malifaay a pasangaray, ato nafalocoˈan iso. Ano iraay ko hapakayraan a misaysay, cangacangen ci Yihofa pafeli tisowanan to taneng mikilim toniya pakayraan, hanaca ira ko ˈicel a dademak. Ano cowa ko mamasaysay koni a pasangaray i, cangacangen ko sapadama ni Yihofa eca ka pakidem ko calemcem. Ihkalen ko satolon iso, caka halafin mamahapinang samaanay ci Yihofa pacaˈof. Hanaca soˈlin caka tangsol a milifok to sapacaˈof, aka a pisawad. Mitokelay ci Yihofa tisowanan ihkal ko pitolon Cingraanan, mitokelayho kisowanan padadotoc mihaen to demak.—Luka 11:8-10.

8. Itini satolon hadaken ita ko maanan?

⁸ Ano mitolon kita ci Yihofaan i, cowa ko roray aca no falocoˈ ko pasowalen Cingra, paihkalenho ko piakoˈid. Soˈlin pasangar ko pakayraan, haratengen ita o malifokayto ita o maanan a sapalemed, ano mihaen to demak iraay ko epoc. Latekay, pasangaray kiso mihadak to cariraw no falocoˈ. Kawra haratengen,  o kantangay a sowal ita “Lidongen kako” ano saan i, tatengilen ni Yihofa koni.—2 Rayray 18:31; Loma 8:26.

9. Samaan ko demak ngaˈ milifok to soˈlinay sadipot?

⁹ (2) Tadiˈecen ko taneng ni Yihofa, cowa ko niyah a taneng. ˈAyaw no Kongyin 8 hahekalan, milooday ko sofitay no Asiriya, tada matalaway ko finawlan no Yutaya. Sapicoˈayaw to Asiriya tamdaw, pasayraay cangra makaniway kawas no Icip micangacang to sadama. (Isaya 30:1, 2) Mirikecan ni Yihofa cangra, ano caka pasasiyor wa ira ko taˈangayay pades mifekad. (Isaya 30:7, 12, 13) Miocoran Yihofa ci Isaya pasowal cangraanan, samaan ko demak ngaˈ milifok to soˈlinay sadipot. Sanay ci Yihofa: ‘Aka marawraw, sarocoden mitadiˈec Kako, o caciˈicel kamo.’—Isaya 30:15b.

10. Itini masamanay a pakayraan, wa ngaˈay kita paihkal to marocekay ko pitadiˈec no niyah ci Yihofaan?

¹⁰ Samaan ko hademak ita, o misarocoday mitadiˈec ci Yihofaan hani? Haratengen ko ilaenoay pakayraan. Ano iraay ko cecay tayal adihayay ko mamaetan a payci, kawra mamicerid kiso a miciyapan, maˈesal ko toki midoko ci Yihofaan, o roma i, itini i katayalan iso, ira ko maolahay tisowanan, kawra coko patafangay to tireng micada to paputisem a Krisciyang cingra, anca pacieci a papipiliˈ ko paro no lomaˈ iso, sowal sa: “Kako kaolahan iso, anca o Kawas iso ko kaolahan?” Mahaen ko pakayraan, pasangaray misaˈosi. Ano samaanto ko pakayraan i, wa kayaten ni Yihofa kiso. (Matay 6:33; 10:37; 1 Korinto 7:39) O salicay i, soˈlinay kiso mitadiˈec ci Yihofaan, makahi a midemak hokira?

11. Micekiw kita to manan a maˈoningay no Fangcalay Cudad, o papadama to niyah eca ka rawraw misiˈayaw to sapalak?

¹¹ (3) Mikitini i tireng no tao minanam to nalifetan ato sapasifanaˈ. Itini Fangcalay Cudad adihayay ko tinakoan mamitadtad, aka matalaw misarocod mitadiˈec ci Yihofaan masaka limlaan. Micekiw to hatiniay a maˈoningay i, oha ngangaˈay kita miharateng: O manan ko papadama to sikawdan no Kawas, tahalifa to pakidemay a sapalak, kamayan a eca ka rawraw hani? Tinakoen, o saˈakawangay a hoing no Yutaya mirikecay to tarokos aka to mitosil sai, timoloay cangra a pasowal: ‘O Kawas ko dadofdofen niyam, cowa ko tamdaw.’ (Dmak 5:29) Ikor mipekpekan cangra, kawra cowa ka talaw cangra. Misamaanay hani? Samanen mafanaˈay cangra, o kaolahan ni Yihofa ko midemakan no niyah, iraay ko sadama ni Yihofa ato pihayda, mansa padadotoc cangra timolo milasil to ngaˈayay lihaf. (Dmak 5:40-42) Malecaday, misiˈayaw to saroero no patay ci Stifano kamayan ‘rihaday ko pising, ora pising ningra malecaday o pising no coyoh.’ (Dmak 6:12-15) Misamaanay hani? Samaanen pakasoˈlinay ci Stifano milifokay to pihayda ni Yihofa.

12. Itini saka 1 Pitiro 3:14 ato 4:14 sanay, misiˈayaw kita to sapalak i, hano kamayanho a ngaˈay lipahak?

¹² Pakasoˈlinay ko tarokos kalacafayay ci Yihofa cangraanan, samaanen pafeliay ci Yihofa cangranan to ˈicel midemak to kasapaan. (Dmak 5:12-16; 6:8) Manaokaniw, coka hecad ko pakayraan ita anini. Kawra pakaynian ni Yihofa i Fangcalay Cudad damsayay a mikiˈok kitaanan, ano pakayni kita i moecelay a demak micada to roray, wa milifok to pihayda Ningra, ato sapafeli Ningra a fangcalay saocor. (ˈOsien ko 1 Pitiro 3:14; 4:14.) Mihaenay, cowa ko cacalemcem kita ano tahacada to sapalak wa ngaˈay misaysay hokira, o haharatengen ita o manan ko hademak nohatini, mitongal to pakasoˈlin noniyah, o papafelien ni Yihofa to ˈicel kita, milidong kitaanan. Mahecad itini saka 1 hahekalan a Krisciyang, pakasoˈlinay to sakiˈok ni  Yis, sanay cingra: ‘Pafelien ako kamo to hasowal ato taneng, ano samaanto ko pisafelit no tamdaw i, cowa ko papakalowid tamowanan.’ Mikiˈokayho ci Yis: ‘Ano miemem kamo, wa madipot ko ˈorip.’ (Luka 21:12-19) Aka mapawan, midokoay ci Yihofaan a tamdaw, ano pakayni noka madimadi Cingraanan malahdaw ko ˈorip, o mamaharateng ni Yihofa ko kihcod nangra, patikol paˈorip cangraanan.

13. O roma tamadw marawraway cowa pitadiˈec ci Yihofaan, mikitini i tireng nangra mamananam ita ko maanan a sapasifanaˈ?

¹³ O roma tamdaw marawraway, cowa pitadiˈec ci Yihofaan. Mikitini i tireng nangra wa mananam ita ko manan a sapasifanaˈ. Songilaˈen miharateng ko nalifetan nangra, papadama kitanan miliyas to malecaday a raraw. Cecay tinakoan i, hongti no Yutay ci Asa. Itini pikowan ningra, iraay ko sofitay miˈodisay to Yutay kitakit. Tadiˈecay ci Asa ci Yihofaan, telocto mapadikay ko ˈada. (2 Rayray 14:9-12) Ikor, milooday ko hongti no Israil ci Paasa ci Asaan, coka ˈaloman ko sofitay nangra, kawra coka hecad ci Asa isalakatay, micangacang to salidong ni Yihofa cingraanan, pafeliay to linkim to hongti no Siriya, micangacang to sadama nangra. (2 Rayray 16:1-3) Matoˈas ci Asa i, pakidemay ko adada, kawra cowa ka picangacang to sadama ni Yihofa.—2 Rayray 16:12.

14. Mikitini i tireng ni Asa mamananam ita ko maanan sapasifanaˈ?

¹⁴ Salakat, tahalifa ci Asa to pasangaray i, micangacangay to sadama ni Yihofa, kawra ikor to o niyah sanay a pakayraan ko sapisaysay to pasangaray. Cangacangay cingra to sadama no Siriya tamdaw, micoˈay to hongti no Israil. Ano nengnengen i, hato matatodongay koni a demak, pairaay to miming a sakangaˈay. Nikawrira, ora dipayar no Yutaya cowa ka halafin. Pakaynian ni Yihofa i cecay a pairasolay pasowal ci Asa: ‘Samanen tadiˈecay kiso to hongti no Siriya, cowa pitadiˈec to Kawas iso ci Yihofaan, mamalahdaw ko sofitay no Siriya i kamay iso.’ (2 Rayray 16:7) Oha maminaˈon kita, hamaan a mitiˈer to niyah a misaysay to pasangaray, telocto cowa to pisongilaˈ micekiw to Fangcalay Cudad, mamicangacang to sakayat ni Yihofa. Soˈlin tahalifa to kacalohan a pakayraan, aka a marawraw, tadiˈecen ci Yihofa, papadamaen Ningra kita inaneng ko misaˈosian.

15. Ano miˈosi kita to Fangcalay Cudad i, wa ngaˈay samaan ko hademak?

¹⁵ (4) Haratengen ko sinael. Itini Fangcalay Cudad adihayay a sinael ngaˈay mitadtad, ano caka rawraw kita, mitadiˈec ci Yihofaan, wa milifok to ˈicel. Ngaˈayay naˈengen i ponoˈ, o cecay ngaˈayay pakayraan i hadaken ko ngiha miasip to sinael, anca tiliden ikorto i ceriden a milomal. Palimoˈotan no Kawas ci Yosuwa padadotoc midotim to rikec ni Mosi, ano mihaen cingra wa inaneng ko demak. Roma i, itini i rikec maˈosiay ningra a sowal papadama cingraanan miremo to makokiˈay, ira ko timolo a milahci to ˈinorong. (Yosuwa 1:8, 9) Anini, adihayay ko pakayraan pairaay to cariraw ato kokiˈ no mita. Itini Fangcalay Cudad adihayay ko sinael papadama kitaanan aka marawraw, ira ko rihaday no falocoˈ.—ˈOlic 27:1-3; Taneng 3:25, 26.

16. Samanay ci Yihofa pakayni i salikaka padama kitaanan eca ka rawraw ato mitadiˈec Cingraanan?

¹⁶ (5) Micerid micawma to midokoay to Kawas a tamdaw. Pakaynian ni Yihofa i salikaka padama kitaanan aka marawraw mitadiˈec Cingraanan. Mirienang to saˈopo i, micadaay kita to sapasifanaˈ, matengilay a sapacaˈof, kalacafay to salikaka a macacawmaˈ, wa ngaˈay pakalalok kitaanan, adihayay ko haepoc. (Hipray 10:24, 25) Wa ngaˈay kita itini kasakopang mahela ko ngaˈayay widang,  mifowah to nafalocoˈan cangraanan. O cecay “ngaˈayay a sowal” no widang milowanay to mipaekelay to falocoˈ ita a cariraw.—Taneng 12:25.

17. Mikitini Hipray 6:19 mahapinang kita, o hatokel no Hongti Kitakit hano ngaˈay padama kitaanan itini pasangaray pakayraan tanektek caka ngiyangi?

¹⁷ (6) Tanektek ko pakasoˈlin to mamalaˈosi ko hatokel. Hatokel no Hongti Kitakit “mahecaday o sakaˈorip a ˈenor,” misiˈayaw kita to pasangaray ato kacarirawan i, papadama kitaanan a tanektek caka ngiyangi. (ˈOsien ko Hipray 6:19.) Mikiˈokay ci Yihofa, itini i faelohay a hekal awato ko cariraw a maˈorip. (Isaya 65:17) O mamicerid kita a midotim toniya tokel. Miharateng to itiniay kita i faelohay hekal rihaday ko kaˈorip, cowa ko mamacekid matalaw. (Mika 4:4) Misaˈicel kiso pasowal to tao toniya makapahay a hatokel no ikor, papadama to niyah tanektek ko pakasoˈlin toniya tokel, mihaenay ka pisarocod mirienang to mitosilay a tayal. Mihaen ko demak ita, ‘pakayni hatokel no niyah wa tanektek ko pakasoˈlin tahira i tolas.’—Hipray 6:11.

18. Masamaan ko pakayraan noikor? Wa samaan kita a misiˈayaw hani?

¹⁸ Mangata mangataayto ko saikoray a romiˈad, wa adihay ko malifaay ita pacariraway kitaanan a pasangaray. 2021 miheca pakamihecaay a sinael papadama kitaanan misiˈayaw toniya sapalifet, aka a marawraw. Ngaˈay kita mihaen to demak, cowa ko ˈicel no niyah ko mitadiˈecan, o mitadiˈecay kita ci Yihofaan. Toniya cecay miheca, nanay tano waywayan ita a misawacay pakasoˈlinay ko niyah to sakiˈok ni Yihofa: ‘Aka marawraw, sarocoden mitadiˈec Kako, o caciˈicel kamo.’ —Isaya 30:15.