1. Kiki Kiñe David, imbe mbadga ngim bôt ikété yés i nla badba?

BÉSBOBASÔ di gwé ngôñ i niñ ikété nsañ. Mut to yada ikété yés a ngwés bé le yom i tééñga nye. Ndi ngim mangéda i yé i pam le ngandak mam i lona bés nduña. Inyu hala nyen bagwélél ba Yéhôva bahogi ba yé le ba bat Yéhôva kiki Kiñe David le: “M’a hek pék ikété ñem wem letee ni ngéda mbe, lakii me gwé ndutu ñem wem nkôm kel?”​—Tjémbi 13:2.

2. Kii di ga tehe munu yigil ini?

² Tolakii di nla bé ke nduña ngwéé, di nla boñ ngim mam inyu hôgbaha yo. Munu yigil ini, di ga bôk di tehe i mam ma nla boñ le di bana nduña. I mbus, di ga pôdôl manjel masamal di nla gwélél inyu ba nwee to ngéda di mboma mandutu.

3. Mambe mam ma nla lona bés nduña, baa di nla keñgle i mam ma?

³ Ngandak mam i nlona bés nduña. Kiki hihéga, hiki nwii, ndamba i bijek, i mambot, homa liyééne, i mbet ndik bet ni bet; solôñ yés i bôlô ni i suklu i ntinde bés i tembee ni i malal ma nyega. Di nla bé to sôñga bôt i kand bikuu mu libôga jés. Di mboma mandutu ma inyule di niñ i nkoñ ’isi i het libim li bôt li nyi bé matiñ ma Bibel. Satan, djob li hiai hini, a nyi le ngandak bôt  i ga neebe bé i gwélél Yéhôva inyule “mandutu ma niñ munu nkoñ ’isi” unu ma ntéé bé bo makôô ’isi. (Matéô 13:22; 1 Yôhanes 5:19) Jon di nok inyuki nkoñ ’isi u yé nyonok ni nduña i len ini.

4. Nduña i nlôôha i nla tinde bés i badba mambe mambadga?

⁴ Nduña i nla lôôha yuu bés kayéle di hoñol ha bé yom ipe. Kiki hihéga, di nla badba le: Baa me ga pam i bana moni nwominsô mi mbéda me inyu bana i mam me gwé ngôñ? Tole m’a boñ lelaa ibale me nkwo kon ndi ba héya me i bôlô? Di nla kon woñi le bisu bi manoodana di yé le di bôk mbén Djob. Di nyi le ndék ngéda wee Satan a ntinde bôt bé i kolba bagwélél ba Djob. Jon i nla pam le di badba le: ‘M’a boñ lelaa ha ngéda i?’ Di nla ki badba le: ‘Baa i yé toi béba i tôñ inyu nya mam i?’

5. Kii Yésu a bé sômbôl kal ni bini bibuk le: “Ni waa tôñ”?

⁵ Di nyi le Yésu a kal banigil bé le: “Ni waa tôñ.” (Matéô 6:25) Baa Yésu a bé sômbôl kal le di tôñ bañ inyu yom yo ki yo? Heni! Bigda le, bagwélél ba Yéhôva ba kôba ba bi boma mam ma ma bi lona bo nduña. Ndi ba bi nimis bé maada map malam ni Yéhôva. * (1 Bikiñe 19:4; Tjémbi 6:4) Yésu a bé ti bés makénd le di lôôha bañ tôñ inyu mam ma niñ kayéle bibégés di nti Djob bi ba ha bé jam li bisu i niñ yés. Kii i nla hôla bés i hôgbaha nduña yés?​—Béñge minkéñék mi matila le “ Lelaa u nla pam i boñ hala?”

6. Inoñnaga ni kaat Filipi 4:6, 7, kii i nla hôla bés i ba nwee i ngéda di gwé nduña?

⁶ (1) Bana lem i soohe. Bikristen bi nôgda nduña i nlôôha bi nla kôs hôgbe ibale bi nkôôge Yéhôva bebee ikété masoohe. (1 Pétrô 5:7) Inyu timbhe masoohe ma, Yéhôva a nla ti bés “nsañ Nyambe u u nloo mam momasôna mut binam a nla nok.” (Añ Filipi 4:6, 7.) Yéhôva a mômôs nduña yés ni njel mbuu mpubi wé.​—Galatia 5:22.

7. Kii di nlama bé hôya ngéda di nsoohe Nyambe?

⁷ I ngéda di nsoohe Yéhôva di nlama néhne nye ñem wés. Di añle yaga nye i mam momasô ma ntééñga bés, ni lelaa di nôgda. Ibale i ndutu di mboma i nla mal, di bat nye pék inyu yi kii di boñ. Di bat ki nye ngui i ha makidik di nyoñ bisélél. Ibale njel yo ki yo i ta bé i pam mu ndutu i, bat Yéhôva mahôla le nduña i yuu bañ we. Ngéda di nsima i mam di ngwés ikété masoohe, di ga tibil tehe lelaa Yéhôva a ntimbhe mo. To ibale u nhoo bé kôhna ndimbhe, u tomb bañ. U hôya bañ le Yéhôva a mbem ndik bé le u sima mam u gwé ngôñ masoohe, ndi ngôñ yé i yé le u téñbe ki ni masoohe.​—Lukas 11:8-10.

8. Kii di nlama ki pôdôl mu masoohe més?

⁸ I ngéda u mbééga Yéhôva nduña yoñ ni njel masoohe, u hôya bañ ti nye mayéga inyu mam a mbôñôl we. To di mboma mandutu, i yé loñge i bigda bisai di nkôs. Ibale ngim mangéda i mpam we le u yi bé i jam u kal masoohe moñ inyule nduña i nloo hihéga, u hôya bañ le Yéhôva a ntimbhe yak  masoohe ma yé sem kwep kiki bo mana le: ‘Éé a Djob, hôla me!’​—2 Miñañ 18:31; Rôma 8:26.

9. Kii di nlama boñ i ngéda di nkon ngim jam woñi?

⁹ (2) Bôdôl pék i Yéhôva ñem he yoñ bé. Dilo di mpôdôl Yésaya, bôt ba Yuda ba bi bôdôl kon woñi le bôt ba Asiria ba yé le ba leñ bo gwét. Jon ba bi ke ba bat Égiptô mahôla inyu boñ le bôt ba Asiria ba yémbél bañ bo. (Yésaya 30:1, 2) Yéhôva a bi bôñe bo le liboñok jap libe li, li bé lama lona bo bikuu. (Yésaya 30:7, 12, 13) Yéhôva a bi gwélél mpôdôl Yésaya inyu kal litén i yom ba bé lama boñ inyu ba nwee. A kal le: “Ngui nan y’a ba le ni yén nwee ni bôdôl ki me ñem.”​—Yésaya 30:15b.

10. Imbe ngéda di nla unda Yéhôva le di mbôdôl nye ñem?

¹⁰ Lelaa di nla unda le di mbôdôl Yéhôva ñem? Hégda le u nléba bôlô i nti we ngandak moni, ndi i nlélém ngéda, i nti ha bé we pôla i noñ mam ma mbuu kiki i nsômbla. Tole mañge muda wada tole nu munlôm i homa woñ bôlô a ntjak we ndéñg, ndi a ta bé Mbôgi Yéhôva. Tole w’a boñ laa ibale mut woñ lihaa a nkal we le: “U nlama pohol ipôla me ni Djob joñ.” I yoñ makidik munu dihéga daa dini i ta bé jam li ntomb, ndi Yéhôva a nti bés matiñ ma ma nhôla bés i yi kii di boñ ibale ngim jam i mpémél bés hala. (Matéô 6:33; 10:37; 1 Korintô 7:39) Mbadga i yé ni le: “Baa di ga bôdôl Yéhôva ñem, di bii matiñ ma bisélél?

11. Mimbe miñañ mi Bibel di nlama nigil i ngéda bôt ba nkolba nson wés?

¹¹ (3) Biniigana di nla ôt dihéga dilam ni dibe Bibel i nsima. Bibel i yé nyonok ni dihéga di bôt di di ñunda nseñ i yén nwee ni i bôdôl Yéhôva ñem. I ngéda u mba u nigil dihéga di, yimbe i yom i bi hôla bagwélél ba Djob ba i yén nwee bisu bi ngolba ikeñi. Kiki hihéga, i hiai hi bisu, ntôñ bakéés u bi bat baôma le ba waa téé likalô, ndi hala a bi kônha bé bo woñi. Ni makénd momasôna, baôma ba bi timbhe bo le: “Di nlama nôgôl Nyambe kiki ñane iloo bôt.” (Minson mi baôma 5:29) Yak i mbus le ba bi bude bo, baôma ba bi kon bé woñi. Inyuki? Inyule ba bé yi le Yéhôva a bé ni bo. Ñ, a bé maséé ni i yom ba bé boñ. Jon ba bi ke ni bisu i añal ñañ nlam. (Minson mi baôma 5:40-42) Nlélém inyu nnigil Stéfanô, i ngéda a bé bisu bi nyemb, a bi yén nwee kayéle su wé u bé “kiki su añgel.” (Minson mi baôma 6:12-15) Inyuki? Inyule a bé yi le a bé boñ jam li nlémél Yéhôva.

12. Inoñnaga ni 1 Pétrô 3:14 ni 4:14, kii i nla boñ le di ba maséé i ngéda ba ntééñga bés?

¹² Baôma ba bé yi ntiik le Yéhôva a bé ni bo. A bi ti bo ngui i boñ bihélha bi mam. (Minson mi baôma 5:12-16; 6:8) Hala a ta bé nlélém ni bés i len ini. Ndi to hala, ni njel Lipôdôl jé, Yéhôva a nyis bés le i ngéda di nok ndutu inyu telepsép, a nkônôl bés maséé, a nti ki bés mbuu mpubi wé. (Añ 1 Pétrô 3:14; 4:14.) Iloole di lôôs ngéda i badba kii di ga boñ ibale ndééñga i nai, i yé nseñ le di bok mahoñol i mam di nla boñ nano, inyu ba nkwoog nkaa le Yéhôva a gwé ngap i nit bés ikété ndééñga ni i tohol bés. Kiki banigil ba hiai hi bisu, di nlama hémle unu mbônga u Yésu le: “M’a ti bé bibuk ni pék le baoo banan  bobasôna mpôdnaga b’a la bé kolba to pééna.” Di yé nkwoog nkaa ni bibuk bi Yésu bini le: “Hônba nan yon y’a sôñ biniñ binan.” (Lukas 21:12-19) Di hôya bañ le Yéhôva a ntééda yak disiina di mam bagwélél bé ba ba tiñi ni nye ba mboñ, to ba nwo a nlona bo bitugne.

13. Lelaa dihéga di bôt ba bi la bé yén nwee to bôdôl Yéhôva ñem di nla hôla bés?

¹³ Di nla yak ôt biniigana mu i ndémbél i bôt ba bi nla bé yén nwee to bôdôl Yéhôva ñem. I ngéda di nigil miñañ mi, hala a nhôla bés i keñgle mahôha i bôt ba ba bi boñ. Kiki hihéga, i ngéda Asa a bi yila kiñe Yuda, soso ntôñ gwét u bi leñ nye gwét. A bôdôl Yéhôva ñem kayéle Yéhôva a ti nye yémbél. (2 Miñañ 14:9-12) I mbus ngéda, ngeñ man ntôñ gwét nu Israel, nu Kiñe Baasa a bé éga, a bi leñ Lôk Yuda gwét, iloole Asa a yéñ mahôla ipañ Yéhôva kiki a boñ i ngéda bisu, a bi tehe nseñ i bat bisônda bi Siria mahôla, a ti bo gôl ni silba. (2 Miñañ 16:1-3) Ni ki le mamélél ma niñ yé, a bi bana béba kon makôô a bôdôl bé Yéhôva ñem.​—2 Miñañ 16:12.

14. Bimbe biniigana di ñôt mu dihôha di Asa?

¹⁴ Bibôdle bi ane yé, Asa a bi yéñ mahôla ma Yéhôva ngéda a bé i ndutu. Ndi i mbus ngéda, a bi yéñ ha bé mahôla ma Yéhôva ikété ndutu, a kahal boñ mam kiki ñem u bé kal nye. Litehge li bôt ba binam, Asa a bé a kôli bat bôt ba Siria mahôla inyu jôs Israel. Ndi yémbél yé i bi nom bé. Yéhôva a kal nye ni njel mpôdôl wada le: “Lakii u nigbene kiñe Siria, ndi u nigbene bé Yéhôva Nyambe woñ, jon ntôñ gwét u kiñe Siria u mpamba moo moñ.” (2 Miñañ 16:7) I ngéda di mboma mandutu, di yéñ bañ i pamba mu ikété ni biliya gwés bésbomede tole ni pék yés, ndi di yéñ mahoñol ma Yéhôva ikété Bitilna. Yak i ngéda ndutu i nkwo le di nlama pala yoñ makidik, ibale di nyén nwee, di bôdôl Yéhôva ñem a ga hôla bés i pamba mu.

15. Kii di nla boñ i ngéda di ñañ Bibel?

¹⁵ (4) Tééda minlôñ mi Bibel i ño. I ngéda u nsoñgol Bibel, ndi u bol bahoma ba ñunda le i yé nseñ i yén nwee ni i bôdôl Yéhôva ñem ngéda u mboma mandutu, noode tééda ndék minlôñ w’a bigda i mbus ngéda. Inyu pam i boñ hala, i nla ba nseñ le u añ minlôñ mi ni kiñ ngii, u tila nwo homa, inyu boñ le u tiimba soñgol nwo i mbus ngéda. Yéhôva a bi ti Yôsua oda le, a añ kaat i mbén juu ni njamuha ni kiñ si inyu boñ le a boñ mam ni pék. I mam a bé añ mu mbén ma bé lama hôla nye i éga litén li Djob ibabé i kon woñi. (Yôsua 1:8, 9) Ngandak minlôñ i Bibel i nla hôla we i ba nwee, yak ngéda u mboma mam ma yé le ma kônha we woñi tole ma ti we nduña i nlôôha.​—Tjémbi 27:1b-3; Bingéngén 3:25, 26.

16. Lelaa Yéhôva a ngwélél bilôk bikéé bi likoda inyu hôla bés i ba nwee ni i bôdôl nye ñem?

¹⁶ (5) Tégbaha ngéda ni bagwélél ba Djob bape. Yéhôva a ngwélél lôk kéé i bôda ni i bôlôm inyu hôla bés i yén nwee ni i bôdôl nye ñem. I makoda més, di ñôt nseñ ni minkwel ba nti hikôma, ni mandimbhe ma lôk kéé i bôda ni i bôlôm. Yak ngéda di nkwel ni bo bibôdle tole mamélél ma likoda. (Lôk Héber 10:24, 25) Di nla ki kôhna  makénd i ngéda di nkwel ni mawanda més ma ñem nyuu ma likoda, di añlege bo i mam di nôgda. “Bibuk bilam” bi liwanda jés, bi nla hôyôs nduña yés.​—Bingéngén 12:25.

17. Inoñnaga ni kaat Lôk Héber 6:19, lelaa i botñem di gwé inyu Ane Djob i nhôla bés i yén nwee to ngéda di mboma mandutu?

¹⁷ (6) Kee ni bisu i lédés botñem yoñ. Botñem yés inyu Ane Djob i yé “kiki hikoba hi sitima inyu biniñ gwés,” i nhôla bés i yén nwee i ngéda di mboma mandutu tole i ngéda di gwé nduña. (Añ Lôk Héber 6:19.) Yoñ ngéda i ôt mahoñol mu mbônga Yéhôva a bôn bés, le ndék ngéda wee i mam momasôna ma nti bés nduña ma nyoi. (Yésaya 65:17) Hégda le u yé i mbok yondo, i het yom ibe yo ki yo i ga tééñga ha bé bés. (Mika 4:4) Yom ipe i i nla hôla bés i lédés botñem yés i yé le di añle bôt i mam m’a bôña i mbok yondo. Di boñ kii yosôna di nla inyu tééne bôt likalô, di niiga ki bo inyu boñ le ba yila banigil. Ibale di mboñ hala, di nla “ba nkwoog nkaa ni botñem [yés] i nya yôni letee ni lisuk.”​—Lôk Héber 6:11.

18. Mambe mandutu ma mbem bés dilo di nlo, lelaa di nla pam i yémbél mo?

¹⁸ Kiki di nkahal pam mamélél ma nkoñ ’isi unu, di ga boma mandutu ma ma yé le ma ti bés nduña i nlôôha. Pes kaat i nwii 2021 i nla hôla bés i hônba mandutu ma ni i yén nwee, he ni ngui yés bésbomede bé ndi ni i bôdôl di gwé yak Yéhôva. Jon mu nwii u nlo, di unda ni maboñok més le di nhémle mbônga u Yéhôva unu le: “Ngui nan y’a ba le ni yén nwee, ni bôdôl ki me ñem.”​—Yésaya 30:15, MN.