1. Weh kweschanz King Dayvid mi aks weh som a wi mait aks tudeh?

AALA wi waahn ga wahn kaam ahn peesful laif. Nobadi laik wori. Bot sohntaim, wi mait stil feel angshos er ga tingz weh mek wi wori. In fak, som a Jehoava servant dehn mait aks di saym kweschanz weh King Dayvid mi aks Jehoava: “How lang Ah wahn haftu di wori ahn feel angshos? How lang mi haat haftu feel sad eech day?”—Ps. 13:2.

2. Weh wi wahn diskos eena dis aatikl?

² Eevn doa wi kyaahn reeli geh rid a wi woriz, wi stil ga sohn tingz weh wi ku du soh dat wi noh wori tu moch. Eena dis aatikl, di fers ting wi wahn du da diskos som a di tingz weh mek wi wori er feel angshos. Den wi wahn diskos siks tingz weh wi ku du fi help wi stay kaam wen wi deel wid wi prablemz.

3. Wat da sohn tingz weh ku mek wi wori er feel angshos, ahn wai wi noh ga no kanchroal oava dehnya tingz?

³ Wahn lata tingz ku mek wi wori er feel angshos. Ahn wi noh ga no kanchroal oava som a dehndeh tingz. Fi egzampl, di prais a food, kloaz, ahn shelta kip di goh op evri yaa, ahn wi noh ga no kanchroal oava dat. Ahn wi kyaahn kanchroal how aafn di peepl weh wi werk wid er goh da skool wid wahn chrai temp wi fi lai er komit sekshwal imoraliti. Ahn wi kyaahn stap peepl fahn komit kraim eena wi naybahud.  Di reezn wai wi fays dehndeh chalenjiz da bikaaz wi liv eena wahn werl wehpaat peepl noh kay bowt weh di Baibl seh. Ahn Saytan, hoo da di roola a dis werl, noa dat som peepl wahn alow “di woriz a dis laif” fi stap dehn fahn serv Jehoava. (Mach. 13:22; 1 Jan 5:19) Soh ih noh sopraiz wi dat di werl ful op a prablemz weh kaaz peepl fi wori soh moch!

4. Weh ku hapm if wi staat tu wori tu moch bowt di prablemz weh wi fays?

⁴ If wi staat tu wori tu moch bowt di prablemz weh wi fays, den wi wahn kyaahn tink bowt eniting els. Fi egzampl, wi mait staat tu wori dat wi noh wahn ga inof moni fi bai evriting weh wi need er dat wi wahn geh sik ahn kyaahn goh da werk er eevn looz wi jab. Wi mait aalso wori bikaaz wi tink dat wi wahn giv een tu temtayshan. Soon Saytan wahn mek di peepl weh hihn rool oava atak Jehoava peepl, soh wi mait staat tu wori bowt weh wee wahn du wen dehn staat tu atak wi. Wi mait aks wiself, ‘Ih rang fi mek Ai di wori bowt dehndeh kaina tingz?ʼ

5. Weh Jeezas mi meen wen ih seh: “Stap wori”?

⁵ Wi noa dat Jeezas mi tel ih falowaz fi “stap wori.” (Mach. 6:25) Yu tink dat meenz dat Jeezas ekspek wi noh fi wori bowt notn non ataal? Af koars nat! In fak, eena di paas som a Jehoava laayal servant dehn yoostu wori ahn feel veri angshos bowt sertn tingz. Stilyet, Jehoava mi pleez wid dehn. * (1 Ki. 19:4; Ps. 6:3) Soh weh Jeezas mi-di seh den? Hihn akchwali mi-di komfert wi. Hihn neva waahn wi staat tu wori soh moch bowt how wi wahn get di tingz weh wi need dat wi ferget dat wi servis tu Jehoava da weh reeli impoatant. Soh den, weh wi ku du soh dat wi noh wori tu moch?—Si di baks “ How Wi Ku Du Dat.”

6. Akaadn tu Filipiyanz 4:6, 7, weh wi ku du fi help wi feel kaam wen wi wori er feel angshos?

⁶ (1) Pray aal di taim. Kristyanz weh deh anda wahn lata schres ku geh di help weh dehn need wen dehn pray tu Jehoava. (1 Peet. 5:7) Fi ansa yu pryaaz, Jehoava wahn gi yu di “kaina pees weh peepl kyaahn andastan.” (Reed Filipiyanz 4:6, 7.) Soh wen wi wori er feel angshos, Jehoava ku yooz ih powaful hoali spirit fi mek wi feel kaam.—Gal. 5:22.

7. Weh wi shuda aalwayz memba wen wi di pray tu Jehoava?

⁷ Wen wi pray tu Jehoava, wi need fi poar owt wi haat tu ahn. Soh tel ahn wat da di prablem ahn tel ahn egzakli how yu feel bowt di prablem. If ih pasabl fi solv di prablem, aks ahn fi di wizdom fi noa weh fi du, an aks ahn fi di schrent fi du it. Bot if yu kyaahn du notn fi solv di prablem, den aks Jehoava fi mek yu noh aalwayz di wori bowt it. Wen yu mek shoar dat yu tel Jehoava evriting, ih wahn bee eeziya fi si how Jehoava ansa yu pryaaz. Ahn Jehoava noh mait aalwayz ansa yu pryaaz rait away, bot noh giv op. Bikaaz Jehoava noh onli waahn yu bee spesifik wen yu pray tu ahn, ih aalso waahn yu kip aan di pray tu ahn.—Look 11:8-10.

8. Weh wi shuda pray bowt?

⁸ Wail yu pray tu Jehoava, noh onli tel ahn weh yu di wori bowt, bot aalso mek shoar fi tel ahn weh yu tankful fa. Eevn  wen wi ga lata prablemz, ih gud fi mek wi tink bowt aala di gud tingz weh wi gat. Bot weh yu shuda du if yu noh noa how fi tel Jehoava weh yu reeli di feel? Memba dat hihn wahn aalwayz ansa yu pryaaz eevn if aal weh yu ku seh da ‘Jehoava, pleez help mi!ʼ—2 Chron. 18:31; Roam. 8:26.

9. Weh wi shuda du wen wi feel frayd?

⁹ (2) Pen pahn Jehoava wizdom, ahn noh pahn yu oan wizdom. Joorin di taim a di prafit Aizaiya, di peepl a Jooda mi frayd dat di Asiriyan dehn mi wahn atak dehn. Soh weh dehn mi du? Wel, sins dehn neva waahn di Asiriyan dehn fi rool oava dehn, dehn gaahn aks di Eejipshan dehn fi help. (Isa. 30:1, 2) Jehoava mi waan dehn dat sins dehn mi chros eena di Eejipshan dehn, tingz neva gwehn gud fi dehn. (Isa. 30:7, 12, 13) Jehoava yooz Aizaiya fi tel di peepl weh dehn kuda mi du fi noh feel frayd. Ih tel dehn: “Yu wahn bee powaful if yu stay kaam ahn chros [Gaad].”—Isa. 30:15b.

10. Eena weh sichuwayshanz wi ku shoa dat wi chros eena Jehoava?

¹⁰ How wi ku shoa dat wi chros eena Jehoava? Mek wi luk pahn sohn egzampl. Lesgoh seh yu geh wahn jab aafa weh wahn alow yu fi mek moa moni, bot if yu tek da jab yu wahn haftu werk ekschra owaz, an ih wahn stap yu fahn serv Jehoava az moch az yu di serv ahn now. Er sopoaz wahn persn weh yu werk wid tel yu dat ih laik yu, bot da persn noh serv Jehoava. Er wat if wan a yu famili membaz weh yu reeli kloas wid tel yu ih noh waahn ga notn fi du wid yu if yu kip aan di serv Jehoava? Ih wuda bee haad fi du weh rait eena eni wan a dehndeh sichuwayshan, bot Jehoava wahn help yu fi mek di rait disizhan. (Mach. 6:33; 10:37; 1 Kor. 7:39) Bot now dis da di kweschan: Yoo wahn chros Jehoava ahn du weh ih tel yu fi du?

11. Wat da sohn Baibl egzampl weh ku help wi stay kaam wen peepl persikyoot wi?

¹¹ (3) Laan fahn di gud ahn di bad egzampl dehn. Di Baibl gat een lata egzampl weh shoa wi dat ih veri impoatant fi stay kaam ahn chros eena Jehoava. Az yu stodi dehndeh egzampl, noatis weh mi help Gaad servants fi stay kaam wen peepl mi-di persikyoot dehn. Fi egzampl, wen di Jooish sopreem koat mi koman di apasl dehn fi stap preech, dehn neva feel frayd ataal. Wi ku si humoch korij dehn mi ga wen dehn seh: “Wi haftu obay Gaad az fi wee roola insteda man.” (Aks 5:29) Eevn afta dehn mi beet dehn, di apasl dehn stil neva feel frayd. Wai? Bikaaz dehn mi noa dat Jehoava mi deh pahn fi dehn said. Ahn Jehoava mi pleez wid dehn. Ahn dat da wai dehn mi kantinyu fi preech di gud nyooz. (Aks 5:40-42) Di disaipl Steeven mi ga lata korij tu. Eevn wen dehn mi wahn soon kil ahn, ih mi stay kaam. Ih mi stay soh kaam dat “ih fays mi luk az peesful az wahn aynjel fays.” (Aks 6:12-15) Wai? Bikaaz hihn mi noa dat Jehoava mi pleez wid ahn.

12. Akaadn tu 1 Peeta 3:14 ahn 4:14, wai wi ku bee hapi eevn wen ada peepl di persikyoot wi?

¹² Di apasl dehn mi ga proof dat Jehoava mi deh wid dehn. Hihn mi gi dehn di powa fi du miraklz. (Aks 5:12-16; 6:8) Bot tudeh Jehoava noh gi wi di powa fi du miraklz. Eevn soh, chroo fi hihn Werd di Baibl, Jehoava tel wi dat wen peepl persikyoot wi bikaaz wi faytful, hihn pleez wid wi an ih hoali spirit deh wid wi. (Reed 1 Peeta 3:14; 4:14.) Soh wi shudn wori bowt weh wi wahn du if wi fays persikyooshan eena di fyoocha. Insteda dat, wi  shuda chrai du wi bes fi schrentn wi kanfidens dat Jehoava ku sopoat wi ahn sayv wi. Ahn jos laik how di fers disaipl dehn mi put dehn chros eena di pramis weh Jeezas mi mek, wee haftu chros eena da pramis tu. Dis da weh Jeezas mi pramis: “Ai wahn giv unu wizdom an Ai wahn help unu noa weh fi seh, an unu enimi dehn wahn kyaahn eevn aagyu wid unu.” Ahn Jeezas mi ad wahn garantee tu ih pramis wen ih seh: “If unu bayr op til di en, unu wahn sayv unu laif.” (Look 21:12-19) Neva ferget dat Jehoava aalwayz memba eevn di lee deetaylz bowt ih servant dehn weh mi faytful tu ahn dong tu di en. Sayka dat, hihn ku bring dehn bak tu laif.

13. How wee wahn benifit if wi stodi bowt peepl weh neva stay kaam ahn chros eena Jehoava?

¹³ Wee ku eevn laan fahn peepl weh neva stay kaam ahn chros eena Jehoava. Wai? Bikaaz if wi stodi dehndeh bad egzampl, ih wahn help wi noh fi mek di saym mistayk weh dehn mi mek. Fi egzampl, wen King Aysa mi jos staat tu rool oava Jooda, wahn big aami mi kohn fi atak ahn, bot hihn mi pen pahn Jehoava, ahn Jehoava mi help ahn fi win di fait. (2 Chron. 14:9-12) Bot laytaraan wen King Baysha a Izrel mi kohn fi atak ahn wid wahn moch smaala aami, Aysa mi pay di Siriyan dehn fi help ahn owt insteda luk tu Jehoava. (2 Chron. 16:1-3) Ahn wen King Aysa mi geh sik bad ahn soon ded, ih neva pen pahn Jehoava fi help ahn.—2 Chron. 16:12.

14. Weh wi ku laan fahn di mistayk dehn weh Aysa mi mek?

¹⁴ At fers, wen Aysa mi-di goh chroo prablemz, ih aalwayz yoostu goh tu Jehoava fi help. Bot laytaraan, ih neva pen pahn Jehoava fi help. Insted, ih mi chrai fi fiks ih prablem dehn pan ih oan. At fers, maybi peepl mi tink dat wen Aysa mi aks di Siriyan dehn fi help fait gens Izrel, dat da-mi wahn gud aidyaa. Bot Jooda neva ga pees fi wahn lang taim. How wi noa dat? Bikaaz Jehoava mi yooz wahn prafit fi tel Aysa dat eevn doa Siriya mi did help dehn, Siriya mi wahn stil bee wahn powaful enimi tu Jehoava peepl. (2 Chron. 16:7) Wi haftu bee kyaaful dat wi noh staat tu tink dat wi ku fiks wi prablem dehn pahn wi oan widowt luk fi Jehoava gaidans eena fi hihn Werd di Baibl. Eevn wen wi deh eena wahn sichuwayshan weh wi haftu mek wahn disizhan pahn di spat, wi haftu stay kaam ahn chros eena Jehoava, ahn den hihn wahn help wi mek di rait disizhan.

15. Weh wi ku du wen wi di reed di Baibl?

¹⁵ (4) Laan skripchaz bai haat. Wen yu fain skripchaz weh shoa yu how impoatant ih impoatant fi stay kaam ahn chros eena Jehoava, chrai fi laan dehndeh skripchaz bai haat. Maybi yu ku reed dehn owt lowd er rait dehn dong an kip di goh oava dehn. Jehoava mi tel Jashwa fi reed di buk a di Laa day ahn nait soh dat ih kuda mi ak eena wahn waiz way. Di Laa mi wahn aalso help ahn fi noh bee frayd ahn fi ga korij wail ih leed Jehoava peepl. (Josh. 1:8, 9) Wahn lata di skripchaz eena Gaad Werd ku help wi fi stay kaam eena sichuwayshanz weh wuda naamali mek wi wori er feel angshos.—Ps. 27:1-3; Prov. 3:25, 26.

16. How Jehoava yooz di kangrigayshan fi help wi stay kaam ahn chros eena hihn?

¹⁶ (5) Spen taim wid Gaad peepl. Jehoava yooz wi bradaz ahn sistaz fi help wi stay kaam ahn chros eena hihn. Wen wi goh da di meetin dehn, wi benifit fahn di taak dehn weh wi hyaa, di koment dehn fahn di aadyans, ahn di inkorijin kanvasayshan  dehn weh wi gat wid wi bradaz ahn sistaz. (Heeb. 10:24, 25) Aalso, wen wi tel wi kloas fren dehn eena di kangrigayshan bowt di tingz weh mek wi wori, dehn ku inkorij wi. “Wahn gud werd” fahn wahn fren ku help wi noh fi wori soh moch ahn mek wi feel kaam wen wi angshos.—Prov. 12:25.

17. Akaadn tu Heebrooz 6:19, how wi hoap fi di fyoocha ku help wi stay kaam eevn wen wi goh chroo haad taimz?

¹⁷ (6) Kip yu hoap schrang. Wi hoap fi di fyoocha “da laik wahn anka eena wi laif.” Ih ku help wi stay kaam wen wi wori bowt sohnting er feel angshos er wen wi goh chroo haad taimz. (Reed Heebrooz 6:19.) Tink bowt di fyoocha weh Jehoava pramis wi. Joorin da taim, nobadi wahn ga reezn fi wori er feel angshos. (Isa. 65:17) Imajin yuself eena da peesful nyoo werl wehpaat nohmoh bad tingz wahn hapm. (Mic. 4:4) Ahn wen yu tel adaz bowt dis nyoo werl, yu hoap wahn geh schranga saym taim. Du evriting yu kud eena di preechin ahn teechin werk. If yu du dat, yu ku “bee shoar bowt di hoap weh [yu] gat rait dong tu di en.”—Heeb. 6:11.

18. Weh mait hapm eena di fyoocha, ahn weh wee ku du bowt it?

¹⁸ Bikaaz wi di geh kloasa ahn kloasa tu di en a dis sistem a tingz, wi wahn ga moa prablemz weh ku mek wi wori er feel angshos. Wi yaateks fi 2021 ku help wi fays dehndeh chalenj ahn stay kaam. Bot wi kyaahn du dis pahn wi oan—wi haftu chros eena Jehoava. Joorin dis yaa, mek wi shoa bai wi akshanz dat wi ga fayt eena Jehoava pramis: “Yu wahn bee powaful if yu stay kaam ahn chros eena mee.”—Isa. 30:15.