1. Parey Lerwa David, ki serten parmi nou i kapab demande?

PERSONN pa kontan enkyet. Nou tou nou anvi viv en lavi trankil e kalm. Me parfwa nou kapab santi nou enkyet. I pour sa rezon ki serten serviter Zeova i kapab demann sa menm kestyon ki Lerwa David ti demann Zeova: “Ziska kan fodre ki mon pran traka e viv tou le zour avek en leker sagren?”​—Ps. 13:2.

2. Ki nou pou vwar dan sa lartik?

² Menm si nou tou nou enkyet parfwa, i annan keksoz nou kapab fer pour kontrol sa santiman. Dan sa lartik, nou pou premyerman vwar serten keksoz ki kapab fer nou enkyet. Apre, nou pou vwar sis keksoz ki nou kapab fer ki pou ed nou reste kalm ler nou annan problenm.

3. Kwa ki kapab fer nou enkyet? Eski nou kapab anpes sa bann keksoz arive?

³ I annan plizyer keksoz ki kapab fer nou enkyet e nou pa kapab anpes serten sa bann keksoz arive. Par egzanp, nou pa kapab anpes pri manze, lenz ek lakaz ogmante tou le lannen e nou pa kapab anpes nou koleg travay oubyen nou kanmarad lekol esey tant nou pour fer en keksoz ki malonnet oubyen imoral. Nou osi pa kapab anpes dimoun fer krim dan landrwa kot nou reste. Nou annan  tou sa bann problenm parski laplipar dimoun i fer bann desizyon ki pa baze lo prensip Labib. Osi, Satan ki sef sa lemonn, i konnen ki serten dimoun pou les “traka lavi” anpes zot servi Zeova. (Mat. 13:22; 1 Zan 5:19) Alor, nou pa sirprann ki lemonn i ranpli avek bann problenm ki fer dimoun enkyet.

4. Ki i kapab arive si nou sitan enkyet konsernan nou bann problenm?

⁴ Nou bann problenm i kapab fer nou sitan enkyet ki nou pa kapab mazin okenn lezot keksoz. Par egzanp, nou kapab trakase ki nou pa pou ganny ase larzan pour aste bann keksoz ki nou bezwen. Oubyen ki nou pou malad e mank travay ouswa menm perdi nou travay. Nou kapab osi enkyet ki nou pa pou reste fidel si nou ganny tante pour dezobei lalwa Bondye. Byento, Satan pou fer bann ki anba son kontrol atak pep Bondye, alor nou kapab enkyet lo ki nou pou fer ler zot atak nou. Nou kapab demande, ‘Eski i mal pour mwan enkyet konsernan sa bann keksoz?’

5. Ki Zezi ti pe esey dir ler i ti dir son bann disip: “Aret trakase”?

⁵ Nou konnen ki Zezi ti dir son bann disip: “Aret trakase.” (Mat. 6:25) Eski Zezi ti pe esey dir ki nou pa devret enkyet ditou? Non. Apre tou, i ti annan serten serviter Zeova dan lepase ki ti enkyet. Me zot pa ti perdi laprouvasyon Zeova. * (1 Rwa. 19:4; Ps. 6:3) An realite, Zezi ti pe rekonfort nou. I pa ti oule ki nou vin sitan enkyet konsernan bann keksoz ki nou bezwen ki nou servis pour Zeova pa vin sa keksoz pli enportan dan nou lavi. Alor, ki nou kapab fer ler nou enkyet?​—Vwar bwat “ Ki mannyer ou kapab fer sa?”

6. Dapre Filipyen 4:6, 7, kwa ki kapab fer nou reste kalm?

⁶ (1) Priy souvan. Ler ou enkyet konsernan en problenm, ou kapab priy Zeova pour ganny led. (1 Pyer 5:7) Zeova i kapab reponn ou lapriyer par donn ou “lape Bondye ki depas tou sa ki [ou] kapab konpran.” (Lir Filipyen 4:6, 7.) Zeova pou servi son lespri sen ki pwisan pour donn ou lape lespri e pour kalme bann panse ki fatig ou.​—Gal. 5:22.

7. Ki nou devret gard antet ler nou priye?

⁷ Ler ou priy Zeova, devid ou leker avek li. Dir li ou problenm e eksplik li ki mannyer ou pe santi konsernan sa problenm. Si i posib pour rezourd sa problenm, demann li lasazes pour ou konnen ki ou pou fer e demann li sa lafors pour ou fer li. Si i napa nanryen ki ou kapab fer pour rezourd sa problenm, demann Zeova pour ed ou pour pa tro enkyet. Ler ou spesifik dan ou lapriyer, ou pou vwar pli byen ki mannyer Zeova i reponn ou lapriyer. Si Zeova pa reponn ou lapriyer deswit, pa aret priye. Zeova pa zis anvi ki ou spesifik dan ou lapriyer me i osi anvi ki ou kontinyen priy li.​—Lik 11:8-10.

8. Ki nou devret enkli dan nou lapriyer?

⁸ Ler ou pe larg tou ou bann lenkyetid lo Zeova dan lapriyer, pa oubliye pour remersye li. I bon pour nou mazin tou bann bon keksoz ki nou annan menm ler  nou pas dan bokou problenm. Me ki ou devret fer si ou pa konnen ki mannyer pour dir Zeova sa ki ou pe santi? Mazinen ki Zeova pou reponn ou lapriyer menm si ou zis kapab dir ‘Silvouple, ed mwan!’​—2 Kron. 18:31; Rom. 8:26.

9. Ki nou devret fer ler nou per?

⁹ (2) Depan lo lasazes Zeova e pa lo ou prop lasazes. Dan letan profet Izai, bann dimoun Zida ti per pangar zot ganny atake par bann Asiryen. Bann dimoun Zida pa ti oule bann Asiryen i ganny laviktwar lo zot, alor zot ti al rod led avek bann Ezipsyen. (Iza. 30:1, 2) Zeova ti averti zot ki si zot ti met konfyans dan bann Ezipsyen, sa ti pou anmenn maler pour zot. (Iza. 30:7, 12, 13) Atraver profet Izai, Zeova ti dir son pep ki zot devret fer ler zot per. I ti dir: “Zot pou annan lafors si zot reste kalm e annan konfyans” dan Zeova.​—Iza. 30:15b, NWT.

10. Dan ki sityasyon nou kapab montre ki nou annan konfyans dan Zeova?

¹⁰ Ki mannyer nou montre ki nou annan konfyans dan Zeova? Annou vwar serten legzanp. Meton ou ganny ofer en travay kot ou pou ganny plis larzan me ou pou bezwen travay plis e sa pou anpes ou servi Zeova parey ou pe deza fer. Oubyen en dimoun kot ou landrwa travay i demontre en lentere romantik dan ou me sa dimoun i pa en serviter Bondye. Ouswa enn ou fanmir pros i dir ou ki i pou napa nanryen pour fer avek ou si ou kontinyen servi Zeova. Dan sak sa bann sityasyon, ou pou annan en desizyon difisil pour fer me Zeova pou donn ou led ki ou bezwen. (Mat. 6:33; 10:37; 1 Kor. 7:39) Me eski ou pou met konfyans dan Zeova e obei son konsey?

11. Ki resi Labib nou kapab etidye ki pou ed nou reste kalm ler lezot i opoz nou?

¹¹ (3) Aprann avek bann bon legzanp e avek bann move legzanp. Dan Labib i annan bann resi ki montre ki i vreman enportan pour reste kalm e annan konfyans dan Zeova. Amezir ou etidye sa bann resi, reflesir lo kwa ki ti ed bann serviter Zeova pour reste kalm ler lezot ti opoz zot. Par egzanp, ler lakour siprenm Zwif ti dir bann zapot aret anons sa bon nouvel, zot pa ti per. Me avek kouraz zot ti dir: “Nou devret obei Bondye plito ki zonm.” (Akt 5:29) Menm apre ki bann zapot ti’n ganny fwete, zot pa ti panik. Akoz? Parski zot ti konnen ki Zeova pe siport zot e zot ti annan Son laprouvasyon. Alor zot ti kontinyen anons sa bon nouvel. (Akt 5:40-42) Pareyman, ler disip Etyenn ti pe al ganny touye, i ti reste sitan kalm ki son figir ti “parey figir en lanz.” (Akt 6:12-15) Sa i akoz i ti asire ki i ti annan laprouvasyon Zeova.

12. Dapre 1 Pyer 3:14 ek 4:14, akoz nou kapab ere ler nou ganny persekite?

¹² Bann zapot ti annan laprev ki Zeova ti avek zot. I ti’n donn zot pouvwar pour fer mirak. (Akt 5:12-16; 6:8) Ozordi, Zeova pa’n donn nou sa pouvwar pour fer mirak. Me Zeova i dir nou atraver son Parol ki ler nou ganny persekite akoz nou fer sa ki byen, nou annan son laprouvasyon e i donn nou son lespri sen. (Lir 1 Pyer 3:14; 4:14.) Alor nou pa devret enkyet konsernan ki nou pou fer si nou ganny persekite dan lavenir. Plito, nou devret fer nou mye la konmela pour ranforsi nou konfyans ki Zeova i kapab siport e sov nou. Zezi ti promet  son bann disip: “Mon pou donn zot lasazes e fer zot konnen ki pour dir e tou zot lennmi pa pou kapab reziste ni kontredir zot.” Zis parey bann disip, nou bezwen annan konfyans dan sa promes Zezi. Zezi ti osi promet nou: “Si zot andire, zot pou sov zot lavi.” (Lik 21:12-19) Osi, pa zanmen oubliye ki Zeova i kapab mazin menm bann pti detay konsernan son bann serviter ki’n reste fidel ziska lanmor, pour li kapab resisit zot.

13. Ki byenfe nou gannyen ler nou etidye leksperyans bann ki pa ti reste kalm e ki pa ti met konfyans dan Zeova?

¹³ Nou osi kapab aprann avek leksperyans bann ki pa ti reste kalm e ki pa ti met konfyans dan Zeova. Ler nou etidye sa bann move legzanp, sa pou ed nou evite fer menm fot ki zot ti fer. Par egzanp, pa bokou letan apre ki Aza ti’n vin lerwa Zida, en gran larme ti vin atak li. Aza ti depan lo Zeova e Zeova ti ed li ranport laviktwar. (2 Kron. 14:9-12) Pli tar, Lerwa Baasa ki ti lerwa Izrael, ti vin atak Aza avek en pli pti larme. Me sa fwa si, Aza pa ti depan lo Zeova pour sov li, parey i ti fer dan lepase. O kontrer, i ti pey bann Siryen pour ed li. (2 Kron. 16:1-3) Osi, ver lafen son lavi, ler i ti vreman malad, i pa ti depan lo Zeova pour ed li.​—2 Kron. 16:12.

14. Ki nou kapab aprann avek bann fot ki Aza ti fer?

¹⁴ O konmansman, Aza ti rod led avek Zeova ler i ti fer fas avek problenm. Me pli tar, i pa ti depan lo son Bondye pour ganny led. O kontrer, i ti esey rezourd son problenm li menm. I kapab ki o konmansman i ti paret en bon nide pour Aza demann bann Siryen led me son plan pa ti marse. Zeova ti dir li atraver en profet: “Akoz ou’n met ou konfyans dan lerwa Siri olye lo [Zeova], ou Bondye; larme Siri in sape anba ou kontrol.” (2 Kron. 16:7) Nou devret fer atansyon ki nou pa mazinen ki nou kapab rezourd nou problenm lo nou menm san rod gidans Zeova atraver son Parol. Menm ler nou bezwen pran en desizyon vitman, nou devret reste kalm e depan lo Zeova. I pou ed nou fer sa bon desizyon.

15. Ki nou kapab fer ler nou pe lir Labib?

¹⁵ (4) Aprann bann verse Labib parker. Ler ou vwar bann verse Labib ki montre lenportans pour reste kalm e annan konfyans dan Zeova, esey aprann zot parker. Pour ou kapab aprann sa bann verse, lir zot aotvwa oubyen ekri zot e pas lo la souvan. Zeova ti dir Zozye ki i bezwen lir sa liv Lalwa avwabas pour li kapab azir avek lasazes. Sa ki Zozye ti lir dan liv Lalwa ti pou ed li pour pa per me pour annan kouraz pour gid pep Bondye. (Zoz. 1:8, 9, NWT) I annan en kantite verse dan Parol Bondye ki kapab ed ou pour annan lape lespri e pour reste kalm dan bann sityasyon ki ti pou fer ou enkyet oubyen per.​—Ps. 27:1-3; Prov. 3:25, 26, NWT.

16. Ki mannyer Zeova i servi kongregasyon pour ed nou reste kalm e annan konfyans dan li?

¹⁶ (5) Pas letan avek pep Bondye. Zeova i servi nou bann frer ek ser pour ed nou reste kalm e annan konfyans dan li. Dan nou bann renyon, nou ganny bokou byenfe atraver bann lenstriksyon ki ganny donnen dan bann diskour, atraver bann komanter e osi atraver bann konversasyon ankourazan ki nou fer avek nou bann frer ek ser. (Ebr. 10:24, 25)  Nou osi kapab ganny ankouraze ler nou koz avek nou bann zanmi pros dan kongregasyon lo sa ki fer nou enkyet. “En bon parol” sorti kot en zanmi i kapab ed nou pour pa tro enkyet.​—Prov. 12:25.

17. Dapre Ebre 6:19, ki mannyer nou lespwar i kapab ed nou reste kalm dan bann moman difisil?

¹⁷ (6) Gard ou lespwar antet. Nou lespwar i “parey lank en bato dan nou lavi” parski i ed nou reste kalm malgre nou pas dan bann sityasyon difisil oubyen nou annan bann problenm ki fatig nou. (Lir Ebre 6:19.) Mazin lo sa lavenir ki Zeova in promet. Sa letan, i pou napa nanryen ki pou fer nou enkyet. (Iza. 65:17) Imazin ou dan sa nouvo lemonn kot i annan lape e kot napa bann move keksoz ki pe arive. (Mik. 4:4) Osi, ler ou koz avek lezot konsernan nouvo lemonn sa pou fer ou pli asire konsernan ou lespwar. Alor, fer tou sa ki ou kapab dan sa travay pour fer disip. Si ou fer sa, ou lespwar pou “konpletman asire ziska lafen.”​—Ebr. 6:11.

18. Ki bann problenm nou kapab gannyen dan lavenir e ki mannyer nou kapab fer fas avek?

¹⁸ Anmezir ki lafen sa lemonn i aprose, nou pou fer fas avek plis problenm ki kapab fer nou enkyet. Nou teks pour lannen 2021, i kapab ed nou pour reste kalm ler nou fer fas avek sa bann problenm e pour nou pa pou depan lo nou prop lafors me pour annan konfyans dan Zeova. Pandan sa lannen ki pe vini, annou montre par nou aksyon ki nou annan lafwa dan sa promes Zeova ki dir: “Zot pou annan lafors si zot reste kalm e annan konfyans.”​—Iza. 30:15, NWT.