1. Ebɛn asɛm na bi a hɛn mu binom bebisa, dɛ mbrɛ Ɔhen David bisae no?

HƐN nyinara, yɛpɛ dɛ yenya asetsena a asomdwee wɔ mu. Obiara nnyi hɔ a n’enyi gye ho dɛ dadwen bɛhyɛ no do. Naaso, ɔtɔ da a, obotum aba dɛ dadwen bɛhyɛ hɛn do. Dɛm ntsi, bi a Jehovah n’asomfo binom bebisa asɛm a Ɔhen David bisaa Jehovah no bi. Obisaa dɛ: “Muntu me kra mu egyina ma onkodu dabɛn, awerɛhow wɔ m’akoma mu adzekyee nyinara yi?”​—Ndw. 13:2.

2. Ebɛnadze na yebosusu ho wɔ adzesua yi mu?

² Ɔwɔ mu, ɔtɔ da a hɛn nyinara dadwen bɛda hɛn do, naaso ndzɛmba bi wɔ hɔ a yebotum ayɛ dze atsew do. Adzesua yi mu no, yebedzi kan ahwɛ ndzɛmba ahorow bi a obotum ama dadwen abɛda hɛn do. Ɔno ekyir no, yɛbɔhwɛ ndzɛmba esia a yebotum ayɛ ma hɛn asowa mu aadwe hɛn ɔmmfa ho dɛ yerihyia ɔhaw no.

3. Ebɛn tsebea ahorow na ɔma yɛhaw, na biribi wɔ hɔ a yebotum ayɛ wɔ ho anaa?

³ Ndzɛmba pii na obotum ama dadwen abɛda hɛn do. Dɛm ndzɛmba yi bi wɔ hɔ a, yebotum ayɛ ho biribi kakra, bi so wɔ hɔ a yerunntum nnyɛ ho hwee. Dɛ nhwɛdo no, edziban, ntar, nye beebi a yɛbɛda no bo a ɔkɔ sor afe biara no, yerunntum nnyɛ ho hwee; anaa mpɛn dodow a hɛn edwumamufo anaa hɛn skuulfo bɔsɔ hɛn ahwɛ dɛ yendzi akɔhwi anaa yɛmfa hɛnho  nhyɛ ɔbrakyew mu no, yerunntum nnyɛ ho hwee. Afei so, nsɛmbɔn a nkorɔfo dzi wɔ hɛn apaamu no yerunntum nnsiw ano. Yehyia nsɛndzendzen a ɔtse dɛm, osiandɛ wiadze a yɛtse mu no, nyimpa piinara mmfa Bible mu ngyinadonsɛm nnyɛ edwuma. Satan a ɔyɛ wiadze yi nyame no nyim dɛ nyimpa binom bɛma kwan ma “wiadze yi mu akɔdadwen” aahyɛ hɔn do ma woeegyaa dɛ wɔbɔsom Jehovah. (Matt. 13:22; 1 John 5:19) Ntsi ɔnnyɛ hɛn nwanwa dɛ tsebea ahorow a ɔma yɛhaw ahyɛ wiadze yi mu mã!

4. Sɛ ɔhaw hyɛ hɛn do bor do a, bi a ebɛnadze na yɛbɛyɛ?

⁴ Yebotum ama ɔhaw ahyɛ hɛn do araa ma yɛronndwen biribi fofor biara ho bio. Dɛ nhwɛdo no, bi a yɛbɔdwen ho dɛ edwuma a yɛyɛ no remma yennya sika pii mmfa nntotɔ ndzɛmba a yehia, anaa bi a yɛbɛyar ma yaatoto edwuma mu anaa mpo hɛn edwuma efi hɛn nsa. Bio so, bi a yɛbɔdwendwen ho dɛ, sɛ wɔsɔ hɛn hwɛ dɛ yembu Nyankopɔn ne mbra do a, annhwɛ a na yenndzi no nokwar. Ɔnnkɛkyɛr Satan bɛma hɔn a odzi hɔn do tum no atow ahyɛ Nyankopɔn no nkorɔfo do. Ntsi bi a yɛbɔdwen dza yɛbɛyɛ ber a wɔatow ahyɛ hɛn do no ho. Bi a yebebisa hɛnho dɛ, ‘Ana ɔyɛ mfom dɛ mobɔdwendwen nsɛm a ɔtsetse dɛm ho?’

5. Aber a Jesus kãa dɛ: “Mma hom nndwendwen” no, nna ɔrepɛ akyerɛ dɛn?

⁵ Yenyim dɛ Jesus kãa kyerɛɛ n’ekyirdzifo dɛ: “Mma hom nndwendwen.” (Matt. 6:25) Ana iyi kyerɛ dɛ ɔmmpɛ dɛ yɛbɔdwendwen biribiara ho koraa? Oho, ɔnntse dɛm! Yɛrekã yi ara, Jehovah n’asomfo anokwafo binom a wɔtsenaa ase tsetse no so hyiaa nsɛm tsebea a ogyaa hɔn dadwen, naaso Jehovah ammpow hɔn. * (1 Ahe. 19:4; Ndw. 6:3) Mbrɛ ɔtse nye dɛ, nna Jesus rehyɛ hɛn nkuran. Nna ɔmmpɛ dɛ yɛma asetsena mu ndzɛmba gya hɛn dadwen araa ma ɔka ɔsom a yɛdze ma Nyankopɔn no. Ɔnodze, sɛ dadwen bɛda hɛn do a, ebɛnadze na yebotum ayɛ ama no do aatsew?​—Hwɛ adakaba a wɔato dzin “ Dza Ɔsɛ Dɛ Eyɛ.”

6. Dɛ mbrɛ Philippifo 4:6, 7 kyerɛ no, ebɛnadze na obotum aboa hɛn ma hɛn asomu aadwe hɛn?

⁶ (1) Taa bɔ mpaa. Sɛ Christianfo a dadwen ahyɛ hɔn do no bɔ Jehovah mpaa hwehwɛ no hɔ mboa a, wobotum enya ahotɔ. (1 Pet. 5:7) Jehovah bobua wo mpaabɔ na ɔaama enya “Nyankopɔn asomdwee a ɔtra [nyimpa] ntseasee nyina no.” (Kenkan Philippifo 4:6, 7.) Jehovah dze no sunsum krɔnkrɔn a tum wɔ mu no boa hɛn ma hɛn asomu dwe hɛn.​—Gal. 5:22.

7. Sɛ yɛrobɔ Nyankopɔn mpaa a, ebɛnadze na ɔsɛ dɛ yɛma ɔtsena hɛn adwen mu?

⁷ Sɛ erobɔ Jehovah mpaa a, fi w’akoma mu kã biribiara a ɔhaw wo no ho asɛm kyerɛ no. Kã ɔhaw pɔtsee no nye mbrɛ isi tse nka kyerɛ no. Sɛ biribi wɔ hɔ a ibotum ayɛ wɔ ɔhaw no ho a, bɔ mpaa serɛ no dɛ ɔmma wo nyansa na eetum ehu, na ɔmma wo ahoɔdzen a ibotum dze edzi ho dwuma. Sɛ ihu dɛ ɔyɛ ɔhaw a irunntum nnyɛ ho hwee a, serɛ Jehovah dɛ ɔmboa wo amma ɔhaw no ho dadwen aannhyɛ wo do. Sɛ ekã dza ɔhaw wo pɔtsee no ho asɛm wɔ wo mpaabɔ mu a, ber rokɔ do no, ibohu no yie paara mbrɛ Jehovah esi ebua wo mpaabɔ no. Sɛ ennya w’ebisadze no ho mbuae amonmu hɔ ara mpo a, mma nngyaa mpaa no bɔ. Nnyɛ ɔhaw a irihyia no nye mbrɛ isi tse nka no nko na Jehovah pɛ dɛ ekã kyerɛ no, mbom no, ɔpɛ dɛ ekɔ do ara kã wo haw no ho asɛm kyerɛ no kesi dɛ ibenya ho mbuae.​—Luke 11:8-10.

8. Sɛ yɛrobɔ mpaa a, ebɛnadze na ɔsɛ dɛ yɛkaa dɛ yɛbɛyɛ?

 ⁸ Aber a edze wo dadwen roto Jehovah n’enyim wɔ mpaabɔ mu no, kaa dɛ ebɛda no ase. Sɛ yerihyia nsɛm tsebea a no mu yɛ dzen mpo a, ɔyɛ papa dɛ yɛbɔdwendwen ndzɛmba pa a yɛwɔ no ho. Sɛ ɔtɔ da na innhu asɛm a ebɛkã dze akyerɛ mbrɛ isi tse nka a, ɔsɛ dɛ ekaa dɛ Jehovah bua mpaa tsiabaa a ebɔ no. Sɛ dza ibotum akã ara nye, ‘Meserɛ wo boa me!’ mpo a, obobua mpaa a ɔtse dɛm no.​—2 Mber. 18:31; Rom. 8:26.

9. Yebesi dɛn enya bambɔ a odzi mũ?

⁹ (2) Fa woho to Jehovah ne nyansaa do, na mma mmfa woho nnto wankasa wo nyansaa do. Wɔ mfeha a otsĩa awɔtwe A.H.B. no, nna Judahfo no suro dɛ Assyriafo no bɔtow ahyɛ hɔn do. Osiandɛ nna Judahfo no mmpɛ dɛ Assyriafo no bedzi hɔn do konyim ntsi, wɔkɔr Egyptfo a nna wɔsom abosom no hɔ kɔhwehwɛɛ mboa. (Isa. 30:1, 2) Jehovah bɔɔ hɔn kɔkɔ dɛ Egyptfo a wɔdze hɔnho ato hɔn do no bɛma hɔn sɛɛ aba awerɛfir mu. (Isa. 30:7, 12, 13) Jehovah nam Isaiah do kyerɛɛ Judahfo no mbrɛ wobesi enya bambɔ a odzi mũ. Ɔkãa dɛ: “Kommyɛ na awerɛhyɛmu mu na hom ahoɔdzen befir” Jehovah hɔ.​—Isa. 30:15b.

10. Ebɛn tsebea ahorow na sɛ yɛkɔ mu a, yebotum akyerɛ dɛ yɛdze hɛnho to Jehovah do?

¹⁰ Ebɛn aber na yebotum akyerɛ dɛ yɛdze hɛnho to Jehovah do? Hom mma yensusu nhwɛdo ahorow bi ho nhwɛ. Fa no dɛ enya edwuma bi a akatua no wɔ sor, naaso edwuma no bɛgye wo mber pii ma ntsi irunntum nnyɛ pii wɔ Jehovah no som mu dɛ mbrɛ eyɛ seseiara no. Anaa fa no dɛ w’edwumamunyi bi a ɔnnyɛ Ɔdasefo akyerɛ woho enyigye. Anaa fa no dɛ wo busuanyi bi a edɔ no papaapa akã akyerɛ wo dɛ: “Emi na wo Nyankopɔn no, fa kor.” Wɔ tsebea no mu biara mu no, no ho behia dɛ isi gyinae a no mu yɛ dur, naaso wɔ no mu biara mu no, Jehovah bɛma wo akwankyerɛ a ihia no. (Matt. 6:33; 10:37; 1 Cor. 7:39) Naaso asɛm no nye dɛ, Ana edze woho bɔto akwankyerɛ a ɔtse dɛm do na edze aayɛ edwuma?

11. Ebɛn Bible mu kyerɛwtohɔ na sɛ yesũa a ɔbɔboa hɛn ma yaayɛ komm ber a yerihyia ɔsoɛrtsia no?

¹¹ (3) Sũa biribi fi hɔn a wɔyɛɛ nhwɛdo pa nye hɔn a wɔannyɛ nhwɛdo pa no hɔ. Kyerɛwtohɔ pii wɔ Bible no mu a ɔma yehu hia a no ho hia dɛ yɛyɛ komm na yɛdze hɛn werɛ hyɛ Jehovah mu. Aber a irusũa kyerɛwtohɔ a ɔtse dɛm no, dwendwen adze a ɔboaa Nyankopɔn n’asomfo ma wɔkɔr do yɛɛ komm aber a nna worihyia ɔsoɛrtsia a no mu yɛ dzen no ho. Dɛ nhwɛdo no, aber a Jewfo asɛndziibea kunyin no hyɛɛ asomafo no dɛ wongyaa asɛmpa no kã no, wɔammbɔ hũ. Mbom no, wɔdze akokodur kãa dɛ: “Otwar dɛ yetsie Nyankopɔn asɛm mbom kyɛn nyimpa dze.” (Andw. 5:29) Aber a wɔhwee hɔn no ekyir mpo no, asomafo no ennsuro. Ebɛnadze ntsi a? Osiandɛ nna wonyim dɛ Jehovah wɔ hɔn afã. Dza wɔyɛe no maa Jehovah n’enyi sɔɔ hɔn. Dɛm ntsi, wɔkɔr do kãa asɛmpa no. (Andw. 5:40-42) Dɛmara so na aber a woruboku osuanyi Stephen no, ɔkɔr do daa no edzi dɛ ɔwɔ asomdwee na wohun “n’enyim dɛ ɔtse dɛ ɔbɔfo enyim.” (Andw. 6:12-15) Ebɛnadze ntsi a? Osiandɛ nna ɔwɔ awerɛhyɛmu dɛ Jehovah agye no ato mu.

12. Dɛ mbrɛ 1 Peter 3:14 nye 4:14 kyerɛ no, ebɛnadze ntsi na sɛ wɔsoɛr tsia hɛn mpo a, yebotum enya enyigye?

¹² Asomafo no hun adanse a nna ɔda edzi kofee dɛ Jehovah ka hɔn ho. Nna ɔama hɔn tum a wotum dze yɛ anwanwadze. (Andw. 5:12-16; 6:8) Naaso ndɛ dze, Jehovah mma hɛn tum a yetum dze yɛ anwanwadze. Ɔno mpo no, Jehovah nam n’Asɛm no do fi ɔdɔ mu ma hɛn awerɛhyɛmu dɛ, sɛ tsenenee ntsi yehu  amandze a, ɔgye hɛn to mu na no sunsum no ka hɛn ho. (Kenkan 1 Peter 3:14; 4:14.) Dɛm ntsi, ɔnnsɛ dɛ yɛdwendwen dza yɛbɛyɛ no daakye ber a yeehyia ɔsoɛrtsia no ho, mbom no, dza yebotum ayɛ no ndɛ dze ahyɛ ahotodo a yɛwɔ wɔ Jehovah mu dzen dɛ obotum aboa hɛn na ɔaagye hɛn no na ɔsɛ dɛ yɛdze hɛn adwen si do. Dɛ mbrɛ esuafo a wodzi kan no yɛe no, ɔsɛ dɛ yenya Jesus n’anohoba yi mu awerɛhyɛmu. Ɔkãa dɛ: “Emi na mebɛma hom ano nye nyansa a hom atamfo nyina runntum nngyina enyim, na worunntua ano.” Na yɛdze hɛnho to Jesus n’anohoba yi so do. Ɔkãa dɛ: “Hom abotar mu na hom benya hom akra.” (Luke 21:12-19) Mma wo werɛ mmfir da dɛ Jehovah n’asomfo anokwafo a woewuwu nyinara no, ɔkaa hɔnho nsɛm nyinara. Osiandɛ ɔkaa hɔnho nsɛm ntsi obenyan hɔn.

13. Ebɛnadze na yebotum esũa efi dza ɔtoo hɔn a wɔannyɛ komm na woennya awerɛhyɛmu wɔ Jehovah mu no hɔ?

¹³ Yebotum so esũa biribi efi dza ɔtoo hɔn a wɔannyɛ komm na woennya awerɛhyɛmu wɔ Jehovah mu no hɔ. Dɛm nhwɛdo bɔn a wɔyɛe no, sɛ yesũa ho adze a, ɔbɔboa hɛn ma yeekwetsir dɛ yebedzi mfom a ɔtse dɛmara. Dɛ nhwɛdo no, aber a Judahhen Asa hyɛɛ ase dɛ oridzi hen no, nsordaafo dɔm kɛse bi baa Judahman no do, naaso Asa dze noho too Jehovah do na Jehovah maa odzii konyim. (2 Mber. 14:9-12) Ekyir yi, Israelhen Baasha dze nsordaafo dɔm kakraabi baa Asa do. Naaso dɛm aber yi dze, Asa ammfa noho annto Jehovah do ma ɔanngye no emmfi n’atamfo nsamu dɛ mbrɛ ɔyɛe mber bi a etwa mu no, mbom no okotuaa sika dze hwehwɛɛ Syriafo no hɔ mboa. (2 Mber. 16:1-3) Ber a yarba bi a no mu yɛ dzen bɔɔ Asa ma orubowu no, ɔammfa noho annto Jehovah do annhwehwɛ no hɔ mboa.​—2 Mber. 16:12.

14. Ebɛnadze na yebotum esũa efi mfom a Asa dzii no mu?

¹⁴ Ahyɛse no, ber a Asa hyiaa ɔhaw no, ɔkɔhwehwɛɛ mboa fii Jehovah hɔ. Naaso ekyir yi, nna ɔpɛ dɛ nankasa dzi tsebea no ho dwuma, ntsi ɔannkɔhwehwɛ ne Nyankopɔn no hɔ mboa. Wɔ nyimpa enyi do no, adwen a Asa nyaa dɛ ɔrokɔhwehwɛ mboa efi Syriafo hɔ ma wɔaakõ etsia Israelfo no, nna ɔtse dɛ mbrɛ ɔyɛ adwen pa. Naaso, asomdwee a Judahfo no nyae no anntsena hɔ annkyɛr. Jehovah nam nkɔnhyɛnyi bi do kãa kyerɛɛ no dɛ: “Osiandɛ ɔwo atwer Syriahen, na anntwer [Jehovah] wo Nyankopɔn no, dɛm ntsi na Syriahen no dɔm no efi wo nsa eguan no.” (2 Mber. 16:7) Sɛ yehyia nsɛndzendzen a, ɔsɛ dɛ yɛyɛ ahwɛyie na yaanngye hɛnho enndzi dodoodow na yeennya adwen dɛ hɛnankasa yebotum edzi tsebea no ho dwuma sen dɛ yɛbɔhwehwɛ akwankyerɛ efi Jehovah n’Asɛm no mu. Sɛ ɔsɛ dɛ yesi biribi ho gyinae ntsɛm mpo a, ɔsɛ dɛ yɛyɛ komm dze hɛnho to Jehovah do na ɔbɔboa hɛn ma yeesi gyinae pa.

15. Sɛ yɛrekenkan Bible no a, ebɛnadze na yebotum ayɛ?

¹⁵ (4) Kyer Bible no mu nsɛm bi gu wo tsirmu. Sɛ erekenkan Bible no na ihu nsɛm a ɔma ihu dɛ kommyɛ na awerɛhyɛmu a ibenya wɔ Jehovah mu no na w’ahoɔdzen befir a, bɔ mbɔdzen na kyer kyerɛwnsɛm a ɔtse dɛm no gu wo tsirmu. Mbrɛ ɔbɛyɛ a ɔbɛka wo tsirmu no, ɔbɛyɛ papa dɛ ebɛkenkan no dzen ma eepue w’ano anaa ebɛkyerɛw ato hɔ na ataa akenkan. Jehovah hyɛɛ Joshua dɛ ɔnkenkan Mbra nwoma no dabaa na ɔndwendwen ho, mbrɛ ɔbɛyɛ a ɔbɛyɛ n’adze nyansa mu. Nna dɛm nkaakaasɛm no bɔboa no amma ɔaammbɔ hũ na mbom oeenya akokodur dze edzi Nyankopɔn no nkorɔfo enyim. (Josh. 1:8, 9) Wɔ tsebea ahorow a obotum egya wo dadwen anaa ɔama abɔ hũ mu no, ibenya nsɛm pii wɔ  Nyankopɔn n’Asɛm no mu a obotum aboa wo ma w’asomu aadwe wo na eenya akomatɔyamu.​—Ndw. 27:1-3; Mbɛ. 3:25, 26.

16. Ebɛn kwan do na Jehovah nam asafo no do boa hɛn ma yenya akomatɔyamu na yenya no mu awerɛhyɛmu?

¹⁶ (5) Enye Nyankopɔn no nkorɔfo mbɔ. Jehovah nam hɛn nuanom do boa hɛn ma yenya akomatɔyamu na yenya no mu awerɛhyɛmu. Sɛ yɛkɔ asafo nhyiamu a, yenya mfaso fi nkyerɛkyerɛ a wɔdze ma hɛn, mbuae a hɛn nuanom ma nye nkɔmbɔ a ɔhyɛ nkuran a yɛnye hɛn nuanom bɔ no mu. (Heb. 10:24, 25) Afei so, hɛn anyɛnkofo a wɔwɔ asafo no mu a yɛwɔ hɔn mu ahotodo no, sɛ yɛkã dza ɔhaw hɛn ho asɛm kyerɛ hɔn a, ɔno so botum ahyɛ hɛn nkuran papaapa. “Asɛmpa” bi a hɛn nyɛnko bi bɛkã akyerɛ hɛn no botum eyi dadwen bi a no mu yɛ dur a ɔda hɛn do no.​—Mbɛ. 12:25.

17. Dɛ mbrɛ Hebrewfo 6:19 kyerɛ no, ebɛn kwan do na Ahendzi no ho enyidado a yɛwɔ no botum ama yaakɔ do egyina hɔ ɔmmfa ho nsɛndzendzen a yehyia no?

¹⁷ (6) Hyɛ w’enyidado no mu dzen. Ahendzi no ho enyidado a yɛwɔ no tse dɛ “ɔkra ne sekyɛ.” Ɔma yɛkɔ do gyina hɔ ɔmmfa ho nsɛndzendzen a yehyia anaa dadwen a ɔda hɛn do no. (Kenkan Hebrewfo 6:19.) Anohoba a Jehovah abɔ afa daakye ho no, dwendwen ho; dɛm aber no biribiara nnyi hɔ a obegya hɛn dadwen. (Isa. 65:17) Fa w’adwen bu dɛ ewɔ wiadze fofor a asomdwee wɔ mu no mu, beebi a biribiara remma enntseetsee no. (Mic. 4:4) Sɛ ekã enyidado a ewɔ no ho asɛm kyerɛ afofor a, ɔno so bɛhyɛ w’enyidado no mu dzen. Yɛ dza ibotum biara wɔ asɛnka nye esuafoyɛ edwuma no mu. Sɛ eyɛ dɛm a, ibotum enya ‘enyidado a ɔhyɛ mã dze ekodu ewiei.’​—Heb. 6:11.

18. Ebɛn nsɛndzendzen na yebotum ahwɛ kwan daakye, na yebesi dɛn egyina ano?

¹⁸ Osiandɛ wiadze nhyehyɛɛ yi rebɛn n’ewiei ntsi, yebehyia nsɛndzendzen pii a obegya hɛn dadwen. Hɛn afe asɛm ma afe 2021 no botum aboa hɛn ma yeegyina nsɛndzendzen a ɔtsetse dɛm no ano, na hɛn asomu aakɔ do adwe hɛn. Naaso, yerunntum mmfa hɛn ahoɔdzen nnyɛ iyi, gyedɛ yɛdze hɛn werɛ hyɛ Jehovah mu. Wɔ afe 2021 mu no, hom mma yɛmfa hɛn ndzeyɛɛ nkyerɛ dɛ yɛgye Jehovah n’anohoba yi dzi. Ɔkãa dɛ: “Kommyɛ na awerɛhyɛmu mu na hom ahoɔdzen befir.”​—Isa. 30:15.