1. Baka seiku ari pemasmur, nama engka diasaika kitai?

SEMUA kitai deka pengidup ti nadai pengirau. Tang kekadang kitai engka napi pengirau. Indah sekeda ari nembiak Jehovah engka bisi asai ati baka seiku ari pemasmur, lebuh iya madah: “Ati aku balat irau, datai ke aku nyau enda ulih bejaku.”—Mas. 77:4.

2. Nama deka dipejuraika kitai ba artikel tu?

² Taja pan kekadang kitai berasai irau, tang bisi sekeda utai ke ulih digaga kitai ngambika enda kelalu irau. Ba artikel tu, kitai deka ngelala sekeda utai ti ulih ngasuh kitai irau. Lalu udah nya, kitai deka bejuraika enam iti chara kena mutarka pengirau kitai.

3. Nama utai ulih ngasuh kitai irau, lalu kati kitai ulih mutarka nya?

³ Mayuh utai ulih ngasuh kitai irau, lalu kitai enda ulih mutarka sekeda utai tu. Ambika chunto, kitai enda ulih nagang rega pemakai, gari tauka endur diau ari niki. Kitai mega enda ulih nagang ulah orang ke sama gawa tauka sama sekula ke engka nguji deka ngasuh kitai enda lurus tauka ngereja ulah ti kamah. Lalu kitai mega enda ulih nagang  orang ari ngereja jenayah ba endur kitai diau. Kitai bisi penanggul tu laban mayuh orang enda nitihka prinsip Bup Kudus. Sitan, ke nguasa dunya tu nemu sekeda orang enda nyembah Jehovah ketegal “pengirau pasal pengidup.” (Mat. 13:22, Bup Kudus Berita Manah Ka Rebak Diatu; 1 Jhn. 5:19) Nya alai kitai enda tekenyit dunya tu bisi mayuh penanggul ke ulih ngasuh orang balat irau.

4. Nama ulih nyadi enti kitai kelalu irau?

⁴ Kitai engka nyadi balat irau nyentukka enda ulih ngereja nama-nama. Ambika chunto, kitai engka irau gaji kitai enda chukup kena meli utai ke diguna tauka enti kitai sakit lalu enda datai kereja, tuke engka muai kitai ari kereja. Lalu lebuh bisi penguji, kitai engka irau enti kitai ulih tetap ati ngagai Jehovah. Enda lama agi, sida ke nyukung Sitan deka nyerang nembiak Petara. Nyadi kitai engka irau, nama deka digaga kitai maya nya. Kitai engka berunding, ‘Kati nya salah irauka pasal utai tu?’

5. Nama reti ku Jesus lebuh iya nyebut: ‘Anang irau’?

⁵ Ku Jesus madah ngagai bala murid iya: ‘Anang irau.’ (Mat. 6:25) Kati tu reti iya kitai enda ibuh irau? Tentu enda! Kingatka, sekeda ari nembiak Jehovah kelia menya bisi berasai irau. Tang Jehovah agi rinduka sida. * (1 Raj. 19:4; Mas. 6:3) Kebendar iya, Jesus enggai kitai kelalu irau enggau utai ke diguna ba pengidup nyentukka kitai enda ngenuluka sembah kitai ngagai Jehovah. Nya alai, nama chara ulih mutarka asai irau?—Peda kutak “ Chara Ngereja Nya.”

6. Nitihka Pilipi 4:6, 7, nama ulih nulung kitai enda irau?

⁶ (1) Seruran besampi. Lebuh nuan irau pasal sekeda penanggul, nuan ulih besampi ngagai Jehovah. (1 Pet. 5:7) Jehovah ulih nyaut sampi nuan lebuh Iya meri ‘pemaik Petara, ti ngelui peragam mensia.’ (Bacha Pilipi 4:6, 7.) Jehovah ulih meri nuan pemaik nya nengah roh kudus Iya.—Gal. 5:22.

7. Nama patut dikingatka kitai lebuh besampi ngagai Petara?

⁷ Lebuh nuan besampi ngagai Jehovah, padahka penanggul sereta asai ati nuan ngagai Iya. Enti penanggul nya ulih diputarka, minta meh penemu-dalam sereta pengering kena mutarka penanggul nya. Tang enti penanggul nya enda ulih diputarka, minta meh Jehovah nulung nuan enda kelalu irau. Enti nuan besampi enggau silik, nuan senang meda chara Jehovah nyaut sampi nuan. Baka ni enti Jehovah enda nyaut sampi nuan tekala nya? Anang meh badu besampi! Jehovah deka nuan terus besampi pasal pekara nya.—Luk. 11:8-10.

8. Nama utai bukai ke ulih disebut kitai dalam sampi?

⁸ Lebuh nuan madahka pengirau nuan ngagai Jehovah, nuan mega ulih madahka diri beterima kasih ngagai Iya. Kitai ulih berunding pasal utai manah ke dikembuan kitai, taja pan kitai bisi penanggul. Enti nuan tusah deka madahka asai ati ngagai Jehovah, kingatka Jehovah ulih nyaut sampi nuan taja pan nuan semina madah ‘Tulung aku!’—2 Ban. 18:31; Rom. 8:26.

9. Nama patut digaga kitai enti kitai berasai takut?

⁹ (2) Bepanggai ba penemu-dalam  Jehovah, ukai penemu diri empu. Ba kurun kelapan Sebedau Masihi, orang bansa Judah berasai takut diserang orang Asiria. Ngambika sida enda dipegai perintah Asiria, sida minta tulung ari menua Ejip. (Isa. 30:1, 2) Tang Jehovah madahka pemutus sida deka ngujungka ngagai pengerusak. (Isa. 30:7, 12, 13) Nengah Isaiah, Jehovah madahka bansa Judah chara sida ulih likun. Ku Isaiah: “Panggaika pengarap kita ba [Jehovah]. Nya baru kita deka kering sereta likun.”—Isa. 30:15b.

10. Ni maya kitai ulih arapka Jehovah?

¹⁰ Ni maya kitai ulih arapka Jehovah? Peratika sekeda chunto. Nuan engka diberi kereja ti begaji besai. Tang nuan patut gawa lebih jam, lalu nya ulih ngachau sembah nuan ngagai Jehovah. Tauka bisi orang ba endur gawa deka nguntik nuan, tang iya ukai penyembah Jehovah. Lalu nama deka digaga nuan enti bisi diri sebilik ngasuh nuan milih: “Aku tauka Petara nuan?” Nuan engka tusah deka ngaga pemutus. Tang Jehovah deka meri nuan iring ti diguna. (Mat. 6:33; 10:37; 1 Kor. 7:39) Kati nuan ulih arapka Jehovah lalu nitihka iring Iya?

11. Nama teladan Bup Kudus ke ulih nulung kitai enda irau lebuh napi pemerinsa?

¹¹ (3) Belajar ari teladan ti manah enggau ti enda manah. Bup Kudus bisi mayuh chunto ti nunjukka kebuah nya beguna kitai enda ibuh irau sereta ulih bepanggai ba Jehovah. Lebuh nuan beratika sekeda ari chunto tu, peda nama nulung nembiak Petara enda irau lebuh sida balat diperinsa. Ambika chunto, bala rasul enda takut lebuh raban Kunsil orang Judah ngasuh sida badu nginjil. Tang sida enggau berani madah: ‘Kami enda tau enda ngasika Petara, ukai ngasika mensia.’ (SKR. 5:29) Indah pengudah sida disipat, bala rasul enda kesal. Nama kebuah? Laban sida nemu Jehovah bisi enggau sida, lalu Jehovah lantang ati enggau sida. Nya alai, sida ulih terus nginjil berita manah. (SKR. 5:40-42) Pia mega, lebuh Stepen nyauka dibunuh, iya enda irau nyentukka mua iya “baka mua melikat.” (SKR. 6:12-15) Nama kebuah? Laban iya nemu Jehovah lantang ati enggau iya.

12. Nitihka 1 Peter 3:14 enggau 4:14, nama kebuah kitai ulih gaga ati lebuh diperinsa?

¹² Bala rasul enggau terang nemu Jehovah bisi enggau sida, laban Iya udah meri sida kuasa ngereja pengawa ajih. (SKR. 5:12-16; 6:8) Tang kitai enda nerima kuasa nya kemayaharitu. Taja pia, Jehovah ngena Bup Kudus meransang kitai. Enti kitai diperinsa ketegal ngereja utai ti ngena, Iya gaga ati lalu roh kudus Iya bisi enggau kitai. (Bacha 1 Peter 3:14; 4:14.) Ari ke berunding nama deka digaga kitai lebuh kitai diperinsa jemah ila, kitai enggau naka ulih negapka pengarap kitai ba Jehovah diatu, ke ulih nyukung sereta ngelepaska kitai. Baka bala murid ba kurun keterubah, kitai arapka semaya Jesus: “Aku deka meri kita jaku enggau penemu-dalam ti enda ulih disaut tauka disakal munsuh kita.” Udah nya Jesus nampung: “Ulih ati ti tan kita deka diselamatka.” (Luk. 21:12-19) Lalu kingatka, Jehovah ulih ingat semua utai pasal nembiak Iya ke mati enggau tetap ati. Enggau penemu nya, Iya ulih ngangkatka sida idup baru.

13. Nama ulih dipelajarka kitai ari sida ke enda arapka Jehovah?

 ¹³ Kitai mega ulih belajar ari sida ke enda arapka Jehovah. Lebuh kitai beratika teladan ti enda manah tu, nya ulih nulung kitai enda ngereja penyalah ti sama. Ambika chunto, lebuh Asa nyadi raja menua Judah, bisi munsuh enggau raban soldadu ti besai deka nyerang iya. Tang Asa bepanggai ba Jehovah, lalu Jehovah nulung iya menang. (2 Ban. 14:9-12) Pengudah nya, Raja Baasa ari menua Israel enggau raban soldadu iya ti mit deka datai nyerang Asa. Tang ari ke bepanggai ba Jehovah, Asa sanggup mayar soldadu Siria kena nulung iya. (2 Ban. 16:1-3) Lalu ba pengujung pengidup Asa, lebuh iya balat sakit, iya enda minta saup ari Jehovah.—2 Ban. 16:12.

14. Nama ulih dipelajarka kitai ari penyalah ke digaga Asa?

¹⁴ Keterubah iya lebuh Asa bisi penanggul, iya bepanggai ba Jehovah. Tang udah nya, iya bepanggai ba diri empu. Lebuh soldadu menua Israel deka nyerang, Asa engka ngumbai chara ti pemadu manah nya minta tulung ari menua Siria. Tang pemaik ke diasai orang Judah enda lama. Ku Jehovah madah nengah seiku nabi: ‘Laban nuan ngarapka Raja menua Siria, lalu enda ngarapka Jehovah Petara nuan, bala soldadu raja menua [“Siria,” NWT] udah ulih ngerarika diri ari nuan.’ (2 Ban. 16:7) Nya alai, kitai anang kelalu andalka diri nyentukka kitai enda minta iring ari Jehovah nengah Bup Kudus. Indah lebuh kitai patut ngaga pemutus enggau jampat, kitai deka bepanggai ba Jehovah, lalu Iya ulih nulung kitai ngaga pemutus ti betul.

15. Nama ulih digaga kitai lebuh macha Bup Kudus?

¹⁵ (4) Ingatka ayat Bup Kudus. Lebuh nuan macha ayat Bup Kudus ke ulih meransang nuan enda irau sereta arapka Jehovah, uji meh ingat sekeda ari ayat nya. Nuan ulih macha enggau inggar tauka nulis ayat nya. Suah meh ngereja nya. Jehovah ngasuh Josua selalu macha Bup Adat lalu belemati nya ngambika iya ulih ngaga pemutus ti manah. Utai ke dibacha Josua ari Bup Adat ulih nulung iya enda takut, tang bisi pemerani ngiring nembiak Petara. (Jos. 1:8, 9) Mayuh ayat Bup Kudus ulih nulung nuan lantang ba runding lebuh napi penanggul ke ngasuh nuan takut tauka irau.—Mas. 27:1-3; J-lam. 3:25, 26.

16. Baka ni Jehovah ngena bala menyadi Kristian nulung kitai enda irau sereta arapka Iya?

¹⁶ (5) Begulai enggau nembiak Petara. Jehovah ulih ngena bala menyadi Kristian kitai nulung kitai enda irau sereta arapka Iya. Ba gempuru, kitai bulih penguntung ari cheramah, komen sereta randau ti meransang enggau bala menyadi Kristian kitai. (Heb. 10:24, 25) Kitai mega berasai lantang lebuh kitai madahka pengirau diri ngagai menyadi Kristian ti rapat enggau kitai. “Jaku ti siru” ari kaban ulih nulung kitai enda kelalu irau.—J-lam. 12:25.

17. Nitihka Hebrew 6:19, baka ni pengadang nulung kitai enda irau lebuh napi penanggul ti tusah?

¹⁷ (6) Terus merening ke jemah ila. Pengadang kitai baka “sauh ti tegap ke semengat kitai,” lalu nulung kitai enda irau lebuh napi penanggul ti tusah. (Bacha Hebrew 6:19.) Belematika meh pasal semaya Jehovah ke jemah ila, lebuh orang nadai agi bisi pengirau. (Isa. 65:17)  Lalu gambarka diri ba dunya baru, lebuh nadai agi utai jai nyadi. (Mik. 4:4) Nuan ulih negapka pengadang nuan lebuh bekunsika nya enggau orang bukai. Nya alai, enggau naka ulih ngereja pengawa nginjil. Enggau nya, kitai ‘ulih nerima utai ti disadang kitai.’—Heb. 6:11.

18. Nama penanggul ke deka ditapi kitai jemah ila, lalu baka ni kitai ulih mujur napi nya?

¹⁸ Laban kitai idup ba pengujung dunya tu, kitai deka napi mayuh penanggul ke ngasuh kitai balat irau. Ayat taun 2021 deka nulung kitai enda irau laban kitai bepanggai ba Jehovah, ukai ba pengering diri empu. Nya alai, ari ulah kitai, kitai ulih nunjukka diri arapka semaya Jehovah ke madah: “Panggaika pengarap kita ba Aku. Nya baru kita deka kering sereta likun.”—Isa. 30:15.