1. Kagitta ni Patul David, anni i matageno na karuan nittam?

KAYÀ tam ngamin i memammo nga pattolay. Manaki tam i mavvuru-vurung. Ngem siempre, egga ira i tiempo nga sobra i avvuru-vurung tam, yayya nga baka matageno na karuan nga aripan ni Jehova i gitta na natageno ni Patul David nga kunna: “Ari ngà vuluvuga makemammo. Mas mavuru-vurung i futù.”—Sal. 39:3.

2. Anni i gigiammuattam taw nga artikulo?

² Ariattam nga malillitan i pavvuru-vurung. Ngem egga i makua tam tapenu ari ittam kuruga mavvuru-vurung. Taw nga artikulo, ammuattam i karuan ira nga rason nu ngatta mavvuru-vurung ittam. Kabalinna, gigiammuattam i annam nga makua tam tapenu makapattalupaddian ittam nga kalmadu nu egga i problema.

3. Anni ira i mamavvurung nittam? Kontroladu tam kari danatun?

³ Napakaru i mamavvurung nittam ngem ariattam nga kontroladu i karuan tatun. Angngariganna, ariattam nga makontrol i pangngina na makan, sinnun, anna renta na balay ta kada dagun. Ariattam gapa nga makontrol nu mamippiga ittam nga tentan na katrabahu onu kaeskuela tam tapenu malladdug onu magangngua tu imoral. Ariattam nga mafugaddan i totolay ta lugar tam nu magangngua ira tu krimen. Gagangay ngana laman danatun nga problema megafu ta mattolay ittam ta mundo nu sitaw ari nga nebase ta prinsipio ira na Biblia i appana-panono na magaru nga totolay. Ammu ni Satanas, i  dios naw nga mundo, nga ari nga masserbi kani Jehova i karuan nga totolay megafu ta “avvuru-vurung ta neravvunan nga attolay.” (Mat. 13:22; 1 Juan 5:19) Ari ngana gafu ittam nga makaddag nga napannu yaw nga mundo tu problema nga mamavvurung ta totolay!

4. Anni i mesimmu nu sobra i avvuru-vurung tam ta problema tam ira?

⁴ Nu sobra ngana i avvuru-vurung tam ta problema tam ira, baka yatun ngana laman i agga-nono tam. Angngariganna, baka mavurung ittam nga ari makalanno i sueldu tam ta paggatang ta pakawagattam ira. Baka mattaki ittam yayya nga ari nga makatrabahu onu malsa ta trabahu. Baka mavurung gapa ittam nga ari nga makapattalupaddian nga matalo nu matenta ittam nga ari tuttulan i dob na Dios. Aranni ngana nga atakeyan danuri massuporta kani Satanas i totolay na Dios. Yayya nga baka mavurung ittam nu anni noka i kuattam sonu mesimmu yatun. Awayyana nga iyavu tam, ‘Marake kari nga pakavurungakku danatun nga gannug?’

5. Anni i kayà kagian ni Jesus ta kinagina nga ‘ari kamu mavurung’?

⁵ Kinagi ni Jesus ta disipulosna nga ‘ari kamu mavurung.’ (Mat. 6:25) Kayà kari kagian ni Jesus nga ariattam ngana kavurungan i maski anni? Ari. Daddammattam nga navvuru-vurung gapa i matalo ira nga aripan ni Jehova ta nappasa. Ngem ari nawawan i fabor ni Jehova ta nira. * (1 Pat. 19:4; Sal. 6:3) Kakuruganna, kinagi yatun ni Jesus tapenu banna-bannayan ittam. Arianna kayà nga sobra nga mavurung ittam ta pakawagattam ira. Ta nu kunnatun, baka nonopattam nga ari importante i passerbi kani Jehova. Anni gafu i kuattam nu mavvuru-vurung ittam?—Innan i kahon nga “ Kunnasi Kuan Yatun?”

6. Kunnasi ittam mabbalin tu kalmadu base ta Filipos 4:6, 7?

⁶ (1) Makimallo kanayun. Nu mavvuru-vurung ka megafu ta problemam, mapalubbangakka nu makimallo ka kani Jehova. (1 Ped. 5:7) Tabbagan ni Jehova i pakimallo mu ira gukaban na pangiyawana tu ‘imammo na Dios nga ari malippawa na tolay.’ (Bibbigan i Filipos 4:6, 7.) Mabbalin ittam tu kalmadu megafu ta imammo nga iyawa na makapangngua nga masanto nga espiritu ni Jehova.—Gal. 5:22.

7. Anni nakuan i daddammattam nu makimallo ittam ta Dios?

⁷ Nu makimallo ka kani Jehova, ikagim nisa i ngamin nga mataga-tageno mu. Ikagim nisa i espesipiko nga problemam anna nu kunnasi naka nga afektan natun. Nu egga i posible nga solusion na problemam, ikiddom nisa i sirib tapenu mammuammu nu anni i kuammu anna i sikan tapenu makuam yatun. Nu awan gapa tu solusion na problemam, ikiddom kani Jehova nga uffunan naka tapenu ari ka mavuru-vurung. Nu espesipiko i pakimallo mu, mas manawag nga masingammu i tabbag ni Jehova tatun ira. Nu ari insigida nga matabbag i pakimallo mu, ari ka nakuan nga magimmang nga makimallo. Fuera paga ta pabbalin tu espesipiko, kayà gapa ni Jehova nga ariammu immangan i makimallo nisa.—Luc. 11:8-10.

8. Anni nakuan i ilagum tam ta pakimallo tam?

⁸ Nu ipakimallo tam kani Jehova i vuru-vurung tam, ariattam gapa nakuan kattaman i mappabalo. Maski nu napakaru i problema tam, agga-nono tam nakuan i bendision ira ni  Jehova nittam. Nu egga i tiempo nga ariattam ammu i ipakimallo tam megafu ta grabe nga emosiottam, daddammattam nga tabbagan ni Jehova i pakimallo tam maski nu i mekagi tam laman ay ‘Dios ku uffunannà bi!’—2 Cro. 18:31; Roma 8:26.

9. Anni i kuattam nu maganassing ittam?

⁹ (2) Mattalo ta sirib ni Jehova, ari tu ta baggim. Ta kaggawan ni profeta Isaias, maganassing i totolay na Juda ta Asiriano ira. Manakida nga masakup ira na Asiriano yatutta nappoffun ira ta pagano nga nasion na Ehipto. (Isa. 30:1, 2) Megafu tatun, inabisowan ira ni Jehova nga mattuppal ira ta marake nu pakakuadda yatun. (Isa. 30:7, 12, 13) Gukaban ni Isaias, kinagi paga ni Jehova ta nira nu kunnasi ira mabbalin tu memammo. Kunna: “Massikakkamu nu mattalupaddiakkamu nga kalmadu anna nu mattalo kamu” kani Jehova.—Isa. 30:15b.

10. Anni ira i situasion nga mepasingattam i pattalo tam kani Jehova?

¹⁰ Kunnasi tam mepasingan nga mattalo ittam kani Jehova? Yaw i karuan nga angngarigan: Kunnasi nu meyofer niko i tadday nga trabahu nga mas dakal i suelduna ngem mattrabahu ka tu mas aru nga oras anna madaral natun i iskediul mu ta espiritual? Kunnasi gapa nu korsunada naka na katrabahum ngem ari yayya Saksi ni Jehova? Onu kunnasi nu egga i meddu nga kafamiliam nga pappilian naka tu kunnaw: “Sakan onu i Dios mu?” Awayyana nga marigatakka nga maddesision tatun ira. Ngem ta kada situasion, iddan naka ni Jehova tu sirib nga kawagammu. (Mat. 6:33; 10:37; 1 Cor. 7:39) Ngem mattalo ka kari kani Jehova anna tuttulammu yayya?

11. Anni ira nga angngarigan ta Biblia i gigiammuattam tapenu mattalupaddian ittam nga kalmadu nu makokkontra ittam?

¹¹ (3) Gigiammuan i makasta anna marake ira nga ehemplo. Aru nga angngarigan ta Biblia i mangipasingan nga importante i pabbalin tu kalmadu anna pattalo kani Jehova. Durante nga gigiammuammu yatun, sifutammu nu anni i nakoffun ta totolay na Dios tapenu mabbalin tu kalmadu maski nu egga i pangokkontra. Angngariganna, turi ta pinagimmang na atannang nga korte na Judio i apostol ira nga mallayyagayya, ari ira naganassing. Magutu nga kinagida: “Mawag tu kurugam-mi i Dios anne ta tolay.” (King. 5:29) Maski nu nalalatigo i apostol ira, ari ira naganassing. Ngatta? Megafu ta ammuda nga uuffunan ira ni Jehova anna faboranna ira. Nitulu-tuloyda lagapa nga ilayyagayya i mapia nga dumug. (King. 5:40-42) Turi ta aranni ngana nga matay si Esteban, nattalupaddian yayya nga kuruga kalmadu anna i mukana ay “kagitta na muka na anghel.” (King. 6:12-15) Ngatta? Megafu ta siguradu yayya nga egga nisa i fabor ni Jehova.

12. Segun ta 1 Pedro 3:14 anna 4:14, ngatta awayya tam lagapa i mabbalin tu magayayya maski nu mapeppersigi ittam?

¹² Egga i mananawag nga ebidensia nga suportan ni Jehova i apostol ira. Niddanna ira tu pakapangngua nga mammilagro. (King. 5:12-16; 6:8) Ngem ariattam ngana makua yatun ta kaggawattam. Maski kunnatun, nipasiguradu lagapa ni Jehova gukaban na Biblia nga nu mapeppersigi ittam megafu ta kinatunung, mapagayayya tam yayya anna iyawana i espirituna nittam. (Bibbigan i 1 Pedro 3:14; 4:14.) Imbes nga kavurungattam nu anni noka i kuattam sonu grabe i kapeppersigi tam, mas makasta nga kuattam ngana i adde na mawayya tam sangawe tapenu patuyaggan i pattalo tam nga mawayya ittam nga uffunan anna ipaliag noka ni Jehova. Kagitta na kingngua na ollu ira nga disipulos, mawag nga mattalo ittam taw  nga promesa ni Jesus: “Maggafu noka niakan i uvovugan nu anna paka-uto nga ari nga maturu-turia, ni tu matabba-tabbag na kontra nu ira.” Nu mattalo ittam tatun, yaw i bala-balo tam: “Ta pagatta-attam nu, mala nu i inango nga adde ta ngangangay.” (Luc. 21:12-19) Ariattam gapa nga kattaman nga meraddamman ni Jehova maski i kabadditan nga detalye meyannung ta aripanna ira nga natay nga matalo. Megafu tatun, mawayyana ira nga paginnolayan noka.

13. Anni i magigiammu tam ta marake ira nga angngarigan danuri na ariadda nakapattalupaddian nga kalmadu anna ariadda nattalo kani Jehova?

¹³ Makagigiammu tam gapa ta marake ira nga angngarigan danuri na ariadda nga nakapattalupaddian nga kalmadu anna ariadda nattalo kani Jehova. Moffunan ittam na nesimmu nira tapenu mebita tam nga maparigan i nakaliwatadda ira. Tadday nga angngarigan si Patul Asa na Juda. Ta gafu na pammagurena, nattalo yayya kani Jehova turi ta egga i umatake nga daka-dakal nga armada. Megafu tatun, pinavviktoria yayya ni Jehova. (2 Cro. 14:9-12) Ngem turi ta umatake i mas baddi nga armada ni Patul Baasa na Israel, pinagan ni Asa i Siriano ira tapenu uffunadda yayya ta pakiggerra. Ari tu kagitta na kingnguana ta nappasa, ari yayya nga nattalo ta uffun ni Jehova tapenu mavviktoria. (2 Cro. 16:1-3) Tapus turi ta magimmamatay ngana yayya megafu ta grabe nga taki, ari yayya nga nattalo ta uffun ni Jehova nisa.—2 Cro. 16:12.

14. Anni i magigiammu tam ta nakaliwatan ira ni Asa?

¹⁴ Ta ollu, nappoffun si Asa kani Jehova turi ta namroblema yayya. Ngem ari nabbayag, nammakatalo yayya ta baggina imbes nga mappoffun kani Jehova. Nu nonopattam, alle makasta gapa i plano ni Asa nga mappoffun ta Siriano ira kontra ta Israel. Ngem ari nga nabbayag yatun nga pavviktoriada. Kinagi ni Jehova nisa gukaban na profeta: “Megafu ta nammakatalo ka ta patul na Siria anna ari ka nga nammakatalo kani Jehova nga Dios mu, nakatammang ta limam i armada na patul na Siria.” (2 Cro. 16:7) Nu makkaproblema ittam, magimmugug ittam nakuan nga ari nga sobra nga mammakatalo ta baggi tam. Mappegiya ittam nakuan ta uvovug ni Jehova. Maski nu meparubang ittam ta problema nga kawagan i insigida nga desision, kalmadu ittam nakuan anna mattalo kani Jehova tapenu uffunanna ittam nga mangngua tu fustu nga desision.

15. Anni nakuan i kuattam kada bibbigattam i Biblia?

¹⁵ (4) Kabisaduan i teksto ira na Biblia. Egga ira i teksto ta Biblia nga mangipasingan nga massikan ittam nu mattalupaddian ittam nga kalmadu anna nu mattalo ittam kani Jehova. Nu egga i mabibbig mu nga kunnatun, kabisaduammu yatun. Awayyana nga makoffun nikaw nu iyassikammu i pabbibbig mu tatun onu nu itura mu danatun tapus pakatotolim nga bibbigan. Kinagi ni Jehova kani Josue nga mawag tu kanayunna nga bibbigan i libru na Dob tapenu makakua yayya tu masirib ira nga desision. Makoffun danatun nga mabibbigna tapenu ari yayya nga maganassing anna magutu nga meyorolluna i totolay na Dios. (Jos. 1:8, 9) Egga gapa ira i situasion nga gagangay laman nga mamavvurung onu mamaganassing nittam. Ngem aru nga teksto ta Biblia i makoffun nittam tapenu mabbalin ittam tu kalmadu.—Sal. 27:1-3; Prov. 3:25, 26.

16. Kunnasi nga usu-usan ni Jehova i kongregasion tapenu mattalupaddian ittam nga kalmadu anna mattalo ittam nisa?

¹⁶ (5) Makikavulu ta totolay na Dios. Usu-usan ni Jehova i kapangngurug tam ira tapenu moffunan ittam nga mattalupaddian nga kalmadu anna tapenu mattalo ittam nisa. Ta study tam, mabenefisiowan ittam ta palappa  ira kunne na gapa ta komento na wawwaragi tam anna ta makapagaram ira nga paggiristoria tam. (Heb. 10:24, 25) Kuruga mapasikan gapa i nono tam nu iyistoria tam i pakavurungattam ira ta madukko nga kokkofuttam ta kongregasion. Dakal i meyuffun na “mapia nga uvovug” na kofuttam tapenu makkasta i panageno tam anna ari ittam kuruga mavvuru-vurung.—Prov. 12:25.

17. Segun ta Hebreo 6:19, kunnasi nga mamatuyag i iddanama na Pappatulan maski nu mariga i problema tam?

¹⁷ (6) Paladdan i iddanamam. Masserbi nga “angkla na ikararua” i iddanama na Pappatulan. Mamatuyag yatun nittam maski nu meparubang ittam ta mariga ira nga problema onu pavvuru-vurung. (Bibbigan i Hebreo 6:19.) Nonopammu i promesa ira ni Jehova ta mappange sonu awan ngana tu pakavurungattam. (Isa. 65:17) Imajinammu sonu egga ka ngana ta memammo nga bagu nga mundo nu sitaw awan ngana tu marake nga mesimmu. (Mik. 4:4) Mapaladdam gapa i iddanamam nu ikagim ta tanakuan i meyannung ta Paraiso. Kuammu nakuan i ngamin nga mawayyam nga mallayyagayya anna magangngua tu disipulos tapenu ‘mala mu i ganna-gannug ira nga iddanamammu.’—Heb. 6:11.

18. Anni i mesimmu ta mappange, ngem kunnasi tam nga marubang danatun?

¹⁸ Aranni ngana nga manuppal yaw nga mundo yayya nga mas umaru i problema ira nga mamavvurung nittam. Makoffun i teksto tam ta dagun 2021 tapenu marubattam danatun anna makapattalupaddian ittam nga kalmadu. Ngem mawayya tam laman nga makua yatun nu mattalo ittam kani Jehova, ari tu ta mismu nga sikattam. Yayya nga taw nga dagun, ipasingattam nakuan ta annangngua tam nga mangurug ittam taw nga promesa ni Jehova: “Massikakkamu nu mattalupaddiakkamu nga kalmadu anna nu mattalo kamu.”—Isa. 30:15.