1. Lala Adịrahụ iDevidi, ịtọ ẹla oyina angịhyẹ nyahị à tị́ ka tọ myị́?

AHỊ wuu tịtọ nyọka la okpunyi ẹ-ẹpwụ nya ọhịhị. Ọ́ kaa kpụ ọngọngọhẹ ịpyọ nyọka me imahị ka. Ma ụka ọhẹ, ahị kaa me imahị yẹẹyẹẹ. Ọọwa ka du myị́ ká anchẹ nya iJihova ịhyẹ ka tọ ịtọ ẹla ọlẹ ká Adịrahụ iDevidi tọ yẹkẹẹ: “Ányị m̄ tị́ ka me imahị tata ka ba-à? Ọjụjụ tị́ ka myị ọkịlẹtụ nyam ẹnụ myị́ ẹnụ da ka ụka oyina?”​—Eje. 13:2.

2. Ẹlịyẹ ahị tị́ wẹẹ ka kụ ẹhị yẹ a-ang ọjẹ́jẹ ọlẹ?

² Ịlẹhị lẹ, ahị wuu kaa me imahị ụka ọhẹ, ịngịhyẹ tị ji kahị ka jẹ́-ẹ họ nyọka me imahị gbuu ka. Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya ang ịhyẹ ịlẹ kị dudu kahị kaa me imahị. Ọọwa lẹ, ahị ka kụ ẹhị yẹ ang ịrwọnyẹ ịlẹ kahị ka họ nyọka dahị ụbwọ kahị ka kụ kem ụka kahị la akama lẹlẹ.

3. Ang iyina à tị́ ka hu imahị omeme hahị myị́? Ahị kà jẹ́-ẹ hu ang ịịwa abwọ la ọ-ka họ tahị myị́?

³ Ang lụmẹ-lụmẹ du kahị kaa me imahị. Áhị tị ka jẹ́-ẹ wu ang ịịwa kpa la ọ-ka họ tahị ka. Ọ-chụ pwokwita, áhị ka jẹ́-ẹ wu ịnya nya ang oriri, ang ọkụrụ-kụrụ, lee ịnya nya ẹpwa kpa la ọ-ka ka uhye gụ ọọwa ẹka myị́ ẹka ka. Ịnyịnyị, a-ahị a kaa ya jaabwọ ká ala ube-ụpwụ nyahị lee ala ọlụkụrwọ nyahị ka mahị yẹ hya-hya kaka ba nyọka me ọnọọkịla lee ọ-ka họ ụya ka. Áhị tị ka jẹ́-ẹ hu angịnyị abwọ la ọ-họ uguru-ẹla o-oye nyahị ka. Ahị wẹẹ yẹ akama ịwẹ wuu ọọlajị nyọlẹ kahị jam hịhị ẹ-ẹpwụ nya odehe ọlẹ ká angịnyị lụmẹ-lụmẹ á kaa cheje nya ẹla pwokwu ẹla ọlẹ ká ịBayịbụụ mẹjẹ ka. Ịnyịnyị, Olegu Onyobyi ko ri ọngọ kpa odehe ọlẹ ụ-ụbwọ, jẹ́ nyori angịnyị ka ya iwe da “ká  olo nya imahị nya ọhịhị ọlẹ” ka hwaa abwọ la ọ-ka gbịgba ha iJihova. (Mat. 13:22; 1 Jọn. 5:19) Lẹ, ọ́ lahị ẹbyẹbyị nyọlẹ ká odehe myị̀ la akama ịlẹ kị du ká ọngịnyị kaa la imahị omeme ka!

4. Ịyẹ à tị́ ka họ myị́ kori kahị me imahị lụmẹ u-uhye nya akama nyahị?

⁴ Ahị ka me imahị u-uhye nya akama ịlẹ kahị la gbee kahị ka jẹ́-ẹ kụ irya u-uhye nya ang ọkịla ọhẹ-lọhẹ kaka myị́. Ọ-chụ pwokwita, ahị ka me imahị u-uhye nyori áhị ka ye okpoko nwà kpụ ahị ka jẹ́-ẹ ra ang ịlẹ kahị baba ka, lee ẹdụrụ ka jụ́ụhị kpụ ahị ka jẹ́-ẹ họ ụkụrwọ ka lee ị dọmwụ ka kuhi hi ụkụrwọ myị́. Ahị dọmwụ ka kụ irya myị́ nyori ọhẹka, ahị ka chị mịleji ụka kahị la ọmayẹ nyọka bịrị ehile nya Ohe. Lụka o-kpii, Olegu Onyobyi ka kpa angịlẹ kị ji ekpeleji nyamwụ jahị da angịnyị nya Ohe Oluhye, lẹ ahị ka ja me imahị u-uhye nya ang ọlẹ kahị ka họ ụka ọọwa myị́. Ahị ka ja tọ ịlọhị wo myị́ nyori, ‘Ọ tịpyọ nyọka juwa me imahị u-uhye nya ẹla ịlịịwẹ?’

5. Etu nya ẹla ọlẹ ká iJisọsị ya nyori: “Anụ juwa nwụ ịlọnụ la imahị . . . kpong-kpong ka” tị́ ri ányị?

⁵ Ahị jẹ́ ká iJisọsị byi angịjụgbẹyị nyamwụ yẹkẹẹ: “Anụ juwa nwụ ịlọnụ la imahị . . . kpong-kpong ka.” (Mat. 6:25) Ọọwa mẹjẹ nyori iJisọsị ya, ahị nyị chuko u-uhye nya ịngịngịhyẹ kaka ịnyị? Ehe! Kpịtịya nyori lụka onyogo, anchẹ nya iJihova ịhye ịlẹ kị la ọmyịmyị la imahị omeme, ma ẹla nyaa tị kpụ iJihova ịpyọ. * (1 Ịdị. 19:4; Eje. 6:3) IJisọsị wẹẹ ya ahị ọdahile hahị ịnyị. Ọ́ tịtọ kahị ka me imahị u-uhye nya abwọlẹ kahị ka bwu ye ang ịlẹ kị ri ịbaba nyahị gbee ká ịgba ọgbagba nya iJihova ka ri ang ọhọhẹ ọ-ọhịhị nyahị ka lẹ ka. Ịyẹ ahị tị́ tịtị ka họ ụka kahị ja me imahị?​—Yẹ akpa ọlẹ ko ri, “ Abwọlẹ Á ka Bwu Họ Ịnyị.”

6. Jaabwọ ká ụpwụ nya Ala iFilipayị 4:6, 7 ya, ịyẹ à tị́ ka dahị ụbwọ nyọka kụ kem?

⁶ (1) Raabwọ ụka myị́ ụka. Ụka ka ja me imahị u-uhye nya akama ọhẹ, a ka jẹ́-ẹ raabwọ ha iJihova nyọka dang ubwọ. (1 Pit. 5:7) IJihova ka wẹ abwọ ọrịrị nyang bwula o-hu “okpunyi nya Ohe Oluhye ọlẹ kọ kaa kpoye nya ọ-jẹ́ myịmyị nya angịnyị ehe wuu” hang. (Wa Ala iFilipayị 4:6, 7.) IJihova ka ya okpunyi hang bwula olegu ịgọgọ nyamwụ.​—Gal. 5:22.

7. Ẹlịyẹ ahị tị́ ka kpịtịya ụka kahị juwa raabwọ ha Ohe Oluhye?

⁷ Ụka ka juwa raabwọ ha iJihova, ya ẹla ọla irya nyang wuu joo. Ya ang ọlẹ ko ri akama nyang, ka wụlẹ ya joo jaabwọ ọlẹ kọ lang. Kori kọ chịkpẹẹ nyọka myị akama ọọwa myị́, bịlọọ kọ ya ẹla ọjẹ́jẹ hang nyọka jẹ́ ang ọlẹ ká ka họ bala ọ-ka jung ọngịrị nyọka họ ịnyị. Ọ́ tị ri ká ịngịhyẹ-ẹ́ ji a ka jẹ́-ẹ họ nyọka myị́ akama ọọwa ka, bịlẹ iJihova kọ dang ụbwọ nyọka me imahị u-uhye nyamwụ lụmẹ ka. Ụka ka gu ẹnyị nya ang kpangga ịịwẹ ẹ-ẹpwụ nya abwọ ọrịrị, ọ ka nọ chẹẹ a ka yẹ gede-gede jaabwọ ọlẹ ká iJihova wẹ abwọ ọrịrị ọọwa. Kori ka ye ọwẹwẹ nya abwọ ọrịrị nyang i-ijata ka wẹwẹ, a hwabwọ la ọ-ka raabwọ ka. IJihova á tịtọ ká ka gu ẹnyị nya ang kpangga ẹ-ẹpwụ nya abwọ ọrịrị kem ka, ọ tịtọ ká ka kịnyaa la ọ-ka raabwọ u-uhye nya ang ịịwa ịnyịnyị.​—Luk. 11:8-10.

8. Ẹlịyẹ ahị tị́ ka gu ẹnyị ẹ-ẹpwụ nya abwọ ọrịrị nyahị?

⁸ Ụka ká ja hu imahị omeme nyang kpa ka tọ iJihova ẹ-ẹpwụ nya abwọ ọrịrị, jẹ́ myị̀myị̀ nyori a joo obe ọhọhọ ịnyịnyị. Ọ há kahị ka kpịtịya nya ang ịnyịịla ịlẹ kahị la kori kahị  dọmwụ la akama lụmẹ-lụmẹ wẹwẹ. Kori kọ lujwo ụka ọhẹ hang nyọka ye omyi ẹla ọlẹ kọ ka gba ẹla ọlẹ kọ juwa i-irya nyang kpehe, kpịtịya nyori iJihova kaa wẹ abwọ ọrịrị okpii lala, ‘Chuchuu dam ụbwọ!’​—2 Ego. 18:31; Rom. 8:26.

9. Ịyẹ ahị tị́ ka họ ụka ká ẹla-á chị uhi juhi?

⁹ (2) Kpụnịrọ ẹla ọjẹ́jẹ nya iJihova, ị-ịnyịlọng ka. Lụka nya ahyẹẹnụ nya ọlọmwụ Ayịsaya, alepweji nya iJuda juhi nyori ala Asiriya ka wẹ ka dẹwụ taa. Chajị nyọlẹ ká ala iJuda á tịtọ ká ala Asiriya ka kụraa ka lẹ, ị kaka bịlẹ ala Ijipiti nyọka daa ụbwọ. (Ayị. 30:1, 2) IJihova daa ọna nyori ọ-dahịhile ala Ijipiti nyị ka cheju ẹ-ẹpwụ nya ayịreji. (Ayị. 30:7, 12, 13) Bwula ọlọmwụ Ayịsaya, iJihova ya jaa jaabwọ kị ka bwu ye ewu o-chike ọlam. O yẹkẹẹ: “Anụ ka ye ọngịrị bwula ọ-kụ kem bala ọ-dahịhilem,” am iJihova.​—Ayị. 30:15b, NW.

10. Ẹ-ẹpwụ nya iwe-ahụrụ iyina ahị tị́ ka jẹ́-ẹ mẹjẹ nyori ahị dahịhile iJihova?

¹⁰ Ányị ahị tị́ ka mẹjẹ nyori ahị dahịhile iJihova? Kụ irya nya ọ-chụ pwokwita ịlẹ wẹẹ. Ọhẹka ị ya ụkụrwọ ọlẹ kị ka nwụng uri yẹẹyẹẹ hang, ma ọ tị baba nya ahụ ọ-ka họ ụkụrwọ kpoye nya ụka bala o-ri ọ ka hung abwọ la ọ-ka jẹ́-ẹ gbịgba ha iJihova jaabwọ ka wẹẹ họ lẹẹlẹẹ. Lee, a há ọngọhẹ ọ-ọlụkụrwọ nyang nyọka ye lee ọ-rụrwọ, ọngọọwa á tị ri ọnchẹ nya iJihova ọlẹ kọ hu enyi Ohe lẹka. Lee ọngọhẹ ọlẹ kọ háng yẹẹyẹẹ ẹ-ẹpwụ nya ugbiyegu nyang chị uhi jung nyori: “Am bala iJihova, ọlẹ kọ háng gụ lẹ a ka chụ ẹẹ.” Ẹ-ẹpwụ nya iwe-ahụrụ ịwẹ wuu, à la eje ọnyọọngịrị nyọka chị, ma ẹ-ẹpwụ nya iwe-ahụrụ ọnyị myị́ ọnyị, iJihova ka mẹ ụgbẹyị ọlẹ ka baba jẹ́ng. (Mat. 6:33; 10:37; 1 Kọr. 7:39) Ịtọ ẹla tị ri yẹkẹẹ, à ka dahịhile iJihova bala o-ju ihi nya ẹla ọmẹjẹ nyamwụ?

11. Oja ịla ịBayịbụụ iyina ahị tị́ ka jẹ́ ang u-uhye nyaa nyọka kụ kem ụka ká angịnyị-ị́ ja tụ́ụhị pyịpyị?

¹¹ (3) Jẹ́ ang bwu ọgụ-ẹpẹtẹ ịnyịịla bala ịtịpyọ. Oja lụmẹ-lụmẹ juwa ẹ-ẹpwụ nya ịBayịbụụ ịlẹ kị mẹjẹ nyori, ọ baba yẹẹyẹẹ kahị ka kụ kem bala ọ-dahịhile iJihova. Jaabwọ ka wẹẹ jẹ́ ang u-uhye nya oja ịlịnyị, kụ irya u-uhye nya ang ọlẹ kọ da anchẹ nya Ohe Oluhye ụbwọ nyọka kụ kem ụka ká angịkịla taa pyịpyị. Ọ-chụ pwokwita, ụka ká alegbeju ịla ẹga oleje ọgbẹgbịlẹ nya ala iJuu byi alẹrụ nya iJisọsị nyị ba la o-ya ẹla nya Ohe mẹ, ị́ juhi kpong-kpong ka. Ọkọkọ nyọọwa, ị ya ẹla la ugbodu ojuju yẹkẹẹ: “Ahị lẹ, ihi nya Ohe Oluhye, ahị ka ju pyii gụ ihi nya angịnyị ehe ojuju lẹlẹ.” (Ụkụr. 5:29) Nyọlẹ kị dọmwụ nyi alẹrụ ịịwa enyiri kpá wẹwẹ, ị́ juhi ka. Ịyẹ à tị́ du? Chajị ị jẹ́ nyori iJihova nyị ji oye nyaa. Ẹla nyaa kpọọ ịpyọ. Lẹ, ị kịnyaa la ọ-kpa ẹrụ ọnyịịla pyẹ. (Ụkụr. 5:40-42) Ịnyịnyị, ụka ká ọngọjụgbẹyị iSitivin wẹẹ ka gbu, ọ myị̀ la okpunyi gbee ká ahị nyamwụ yẹda “lala ahị nya olegu-ẹrụ nya Ohe Oluhye.” (Ụkụr. 6:12-15) Ịyẹ tị́ du? Chajị ọ jẹ́ myị̀myị̀ nyori iJihova nyị chị ọkẹkẹnị balọwa.

12. Jaabwọ ká ụpwụ nya 1 iPita 3:14 bala 4:14 ya, ịyẹ tị́ du kahị ka chị ọkẹkẹnị ụka kị tụ́ụhị pyịpyị?

¹² Alẹrụ ịwẹ la ang ẹjẹẹ ogede-gede nyori iJihova juwa balaa. Ọ ya ọngịrị haa nyọka họ ụkụrwọ ẹbyẹbyị. (Ụkụr. 5:12-16; 6:8) IJihova á tị ya ọngịrị hahị ahị nyọka họ ụkụrwọ ẹbyẹbyị alẹ ka. Ọ lịnyị odu lẹ, ẹ-ẹpwụ nya Omyi Ẹla nyamwụ, iJihova bwula ọháha ya ọ-jẹ́ myị̀myị̀ hahị nyori kori kahị nyị yẹ akama chajị nya abwẹla ọnyịịla, ọ kaa chị ọkẹkẹnị balahị, olegu nyamwụ tị jam balahị ịnyịnyị. (Wa 1 iPita 3:14; 4:14.) Lẹ, ahị chuko u-uhye nya abwọlẹ kahị ka họ kori ká ọtụpyịpyị ọtụka á chịhị ọgụ ị-ịlahị ka. Ọkọkọ nyọọwa, ahị ka họ ang ọlẹ kahị ka họ myị lẹẹlẹẹ nyọka  ju ahị ọ-dahile nyahị ọngịrị ẹ-ẹga nya iJihova nyori, ọ ka jẹ́-ẹ dahị ụbwọ bala ọ-chịhị da. Jaabwọ ká angịjụgbẹyị nya iJisọsị ịla oyi ọhọhẹ họ, o ri opyii kahị ka dahịhile ọnụ ọmyịmyị nya iJisọsị ọlẹ kọ yẹkẹẹ: “Am ayịdang ka ya ọnụ o-ya ẹla myị́ hanụ bala ẹla ọjẹ́jẹ ọlẹ ká ọngọngọhẹ nya aluji nyanụ á ka godayị gbe myị́ ka lee ọ-ka jẹ́-ẹ la eje, ọọ kụrụụnụ myị́ kpong-kpong kaka.” IJisọsị myị ọnụ hahị yẹkẹẹ: “U-uhye nya ugbodu ojuju nyanụ ọ-kpa pwụ ọbaba, ọchịda nyanụ ọ-ka wu ọyị myị́, a do pịlẹ lẹlẹ.” (Luk. 21:12-19) A tị deeri ẹnẹnẹhẹ nyori iJihova kpa ẹla ọnyị myị́ ọnyị u-uhye nya anchẹ nyamwụ ịlẹ kị gbu ẹ-ẹpwụ nya ọmyịmyị ị-ịmachị ka, lẹ ọ ka jẹ́-ẹ wulaa eji bwula igu.

13. Apyobwuna oyina ahị tị́ ka ye bwula ọ-jẹ́ ang u-uhye nya ang ọlẹ kọ họ tọ angịlẹ kị myị kụ kem bala ọ-dahịhile iJihova ka?

¹³ Ahị ka jẹ́-ẹ jẹ́ ang ịnyịnyị bwu ẹga nya angịlẹ kị myị kụ kem bala ọ-dahịhile iJihova ka. Ọ-jẹ́ ang u-uhye nya ọgụ-ẹpẹtẹ ịlịnyị ka dahị ụbwọ nyọka họ jaabwọ ká angịịwa họ ka. Ọ-chụ pwokwita, ụka ká Asa ri Adịrahụ nya ala iJuda ká alẹwụ ịtụka-ịtụka wẹ nyọka dẹwụ tọọ, ọ kpụnịrọ iJihova du kọ ya ọkụrụ-kụrụ họọ. (2 Ego. 14:9-12) Ụka ọkịla tị ká alẹwụ ị-pyịnyẹng nya Adịrahụ iBeecha nya ala Isirelụ wẹ jahị dọọ, Asa nwụ ala iSiriya uri nyọka tụ́ ẹwụ tọọ, ọkọkọ nyọka yẹhị rịrị ka ẹga nya iJihova nya ọchịda, jaabwọ ọlẹ kọ họ lụka ọ-kẹkpẹ. (2 Ego. 16:1-3) Ịnyịnyị, lụka nya ocheju nya ọhịhị nyamwụ ká ẹdụrụ jwọọ yẹẹyẹẹ, ọ́ kpụnịrọ iJihova nyọka dọọ ụbwọ ka.​—2 Ego. 16:12.

14. Ẹlịyẹ ahị tị́ ka jẹ́ bwu ọ-jẹ́ họ ka nya Asa?

¹⁴ Bwu ọmwụ ọdada, Asa kaa yẹhị rịrị ka ẹga nya iJihova ụka kọ la akama. Ma ụka ohyẹẹkpẹ, ọ́ myị yẹhị rịrị ka ẹga nya Ohe Oluhye nyọka dọọ ụbwọ ka, ọ chụ nyọka họ ẹla lịlọmwụ. Ụka nya ọgbanyẹ lẹ, ọ ka me ẹla ọnyịịla nyọlẹ ká Asa diro ala iSiriya nyọka dọọ ụbwọ dẹwụ tọ ala Isirẹlụ, ma okpunyi ọlala nya iJuda á tata ka. IJihova byoo bwula ọlọmwụ ọhẹ yẹkẹẹ: “Ajị nyọlẹ ka dahịhile adịrahụ nya ala iSiriya nyọka dang ụbwọ ọkọkọ nyọka kpụnịrọ [iJihova] Ohe Oluhye nyang lẹ, angịdẹwụ nya ala iSiriya be bwu ụbwọ nyang lẹ.” (2 Ego. 16:7) Ahị ka dụmwọ-dụmwọ kahị ka dahịhile ịlọhị kpoye kpụ ahị ka ja họ ẹla lịlọhị ọkọkọ nyọka yẹhị rịrị ka ẹga nya iJihova nyọka kpahị ụgbẹyị bwula Omyi Ẹla nyamwụ ka. Ụka kahị dọmwụ baba nyọka cheje nya ẹla la agaga wẹwẹ, ahị ka kụ kem kpụnịrọ iJihova, ọ tị ka dahị ụbwọ nyọka cheje ọnyịịla.

15. Ịyẹ ahị tị́ ka họ myị́ ụka kahị ja wa ịBayịbụụ?

¹⁵ (4) Kpa ẹla ịla ịBayịbụụ e-egbeju. Ụka ka yẹ ẹla ịhyẹ bwu ịBayịbụụ ịlẹ kị mẹjẹ jaabwọ kọ baba nyọka kụ kem bala ọ-dahịhile iJihova, maga ka kpa ẹga ịlịnyị e-egbeju. Ọ ka dụbwọ myị́ nyọka waa gboo lee ọ-ka daa neeji nyọka wụlaa yẹ ụka myị́ ụka. IJihova byi iJochuwa nyị wa ụpwụ nya ehile ụka myị ụka, tụ́ odu tú ẹnụ chajị kọ ka jẹ́-ẹ họ ẹla la ẹla ọjẹ́jẹ. Ẹla ọlẹ kọ wa bwu ẹpwụ nya ụpwụ nya Ehile ka dọọ ụbwọ nyọka juhi ka, ma ọ ka ju ugbodu nyọka kpa angịnyị nya Ohe Oluhye ụ-ụgbẹyị. (Joch. 1:8, 9) Omyi ẹla lụmẹ-lụmẹ ji ẹpwụ nya Ụpwụ Ịgọgọ ịlẹ kị ka dang ụbwọ nyọka kụ kem ẹ-ẹpwụ nya iwe-ahụrụ ịlẹ kị ka du ká ka me imahị lee o-juhi ịnọ.​—Eje. 27:1-3; Etu 3:25, 26.

16. Ányị iJihova à tịị kpa alọjịra-jịra dahị ụbwọ nyọka kụ kem bala ọ-dahịhilọọ?

¹⁶ (5) Yẹjula angịnyị nya Ohe Oluhye. IJihova kaa kpa aanahị alẹng bala anyang dahị ụbwọ nyọka kụ kem bala ọ-dahịhilọọ. Ọọjịra-jịra nyahị, ahị kaa ye apyobwuna bwu ẹpwụ nya ẹla ọlẹ kị wẹẹ mẹjẹ, ẹla ọwẹwẹ nya aanahị  bala ọhụ o-juju ọlẹ kahị kaa ye ụka kahị joja tọ aanahị alẹng bala anyang. (Hib. 10:24, 25) Ahị kaa ye ọhụ ojuju yẹẹyẹẹ ịnyịnyị ụka kahị ya ẹla ọlọkịlẹtụ nyahị je aligu nyahị ịlọjịra-jịra. ‘Ọhụ ojuju’ bwu ẹga nya oligu kaa dụbwọ yẹẹyẹẹ nyọka chụ imahị omeme nyahị hi.​—Etu 12:25.

17. Jaabwọ ká ụpwụ nya Ala iHiburu 6:19 ya, ányị ẹhị ọrịrịị-rịrị nya Ịpyị-Adịrahụ ọlẹ kahị la à tị́ ka dahị ụbwọ nyọka kụ kem ụka nya akama?

¹⁷ (6) Kịnyaa la o-ju ẹhị ọrịrịị-rịrị nyang ọngịrị. Ẹhị ọrịrịị-rịrị nya Ịpyị-Adịrahụ ọlẹ kahị la lala “ang o-wu ugbodu okpukpuru nyahị kpa giri-giri,” du kahị jẹ́-ẹ kụ kem nanana nyori ahị la akama ịtụka-ịtụka lee imahị omeme. (Wa Ala iHiburu 6:19.) Kụ irya u-uhye nya ijuju ọlẹ ká iJihova myị ọnụ wẹẹ. Ụka ọọwa, ọngọngọhẹ á ka la ịngịngịhyẹ ọlẹ kọ ka me imahị u-uhye nyamwụ kaka. (Ayị. 65:17) Kụ irya ka juwa yẹ ịlọng ẹ-ẹpwụ nya okpunyi olodehe onyeewe, ẹga ọlẹ ká ang ọtịpyọ ọhẹ-lọhẹ-ẹ́ ka ji kaka wẹẹ. (May. 4:4) À ka jẹ́-ẹ ju ẹhị ọrịrịị-rịrị nyang ọngịrị kori ka ja ya ẹla nya odehe onyeewe je angịkịla. Họ jaabwọ á ka jụ́ họ ba myị́ ẹ-ẹpwụ nya ụkụrwọ nya ẹla Ohe oyaya bala ọ-họ ká angịkịla ka ri angịjụgbẹyị. Kori ka họ ịnyị, à ka la “ọ-jẹ́ myịmyị nya ịlẹhị-ịlẹhị . . . nya ẹhị ọrịrịị-rịrị ọnyịịla” ọwẹ pwụ ọbaba.​—Hib. 6:11.

18. Ịyẹ à tị́ ka họ ị-ịlahị myị́? Ányị ahị tị́ ka jẹ́-ẹ họ u-uhye nyọọwa?

¹⁸ Nyọlẹ kahị ju ọmyịmyị nya odehe ọlẹ chweẹ wẹẹ, ahị ka ja la akama ịlẹ kị ka du kahị ka me imahị myị́. Egbeju ẹla nya ẹka nya 2021 ka dahị ụbwọ nyọka ji ahị da akama ịịwa bala ọ-kụ kem, bwula ọ-ka dahịhile iJihova, ọkọkọ nya ọngịrị nyịlọhị. Ẹ-ẹpwụ nya ẹka nya 2021 ọlẹ, ahị mẹjẹ bwula abwẹla nyahị nyori ahị la ọmyịmyị u-uhye nya ọnụ ọmyịmyị nya iJihova ọlẹ kọ yẹkẹẹ: “Anụ ka ye ọngịrị bwula ọ-kụ kem bala ọ-dahịhilem.”​—Ayị. 30:15, NW.