1-زەرتتەۋ ماقالاسى
سابىر ساقتاپ، ەحوباعا سەنىم ارتىڭىز
2021-جىلدىڭ تارماعى: «سابىر ساقتاپ، ماعان سەنىم ارتساڭدار، كۇشتى بولاسىڭدار» (يشايا 30:15).
3-ٵن سەن بىزگە كۇش بەردىڭ، ٷمىت بەردىڭ
اڭداتپا *
1. ٴداۋىت پاتشا سياقتى، كەيبىرەۋلەر نە دەۋى مۇمكىن؟
ٴبارىمىز دە ۋايىم-قايعىسىز، تىنىش ٶمىر سۇرگىمىز كەلەدى. ۋايىم كەشۋ ەشكىمگە دە ۇنامايدى. ٴبىراق ٴبىزدىڭ سارىۋايىمعا سالىنىپ جاتاتىن كەزدەرىمىز بولادى. سوندىقتان ٴداۋىت پاتشا سياقتى، ەحوبانىڭ كەيبىر قىزمەتشىلەرى دە: «قاشانعى ۋايىمعا سالىنىپ، جۇرەگىم كۇن سايىن قان جىلاي بەرمەك؟»— دەۋى مۇمكىن (ٴزاب. 13:2).
2. بۇل ماقالادا ٴبىز نە قاراستىرامىز؟
2 ۋايىمنان تولىقتاي ارىلۋ مۇمكىن بولماسا دا، ونداي سەزىمدەردى جۇگەندەۋ ٷشىن كوپ نارسە ىستەي الامىز. بۇل ماقالادا ٴبىز الدىمەن ۋايىمىمىزعا سەبەپشى بولىپ جاتاتىن كەيبىر جايتتارعا نازار اۋدارامىز. كەيىن قيىندىقتارمەن كۇرەسكەندە سابىر ساقتاۋعا كومەكتەسەتىن التى جايتتى قاراستىرامىز.
ٴبىزدى ۋايىمعا سالاتىن جاعدايلار
3. قانداي جايتتار ٴبىزدى ۋايىمعا سالۋى مۇمكىن جانە ٴبىز ولارعا قانشالىقتى اسەر ەتە الامىز؟
3 ٴبىزدى ۋايىمعا سالىپ، تىنىشتىقتان ايىراتىن جايتتار كوپ. ولاردىڭ كەيبىرىنە ٴبىز ەش اسەر ەتە المايمىز. مىسالى، تاماقتىڭ، كيىم مەن باسپانانىڭ جىل سايىن قانشالىقتى قىمباتتايتىنىن ٴبىز قاداعالاي المايمىز. ارىپتەستەرىمىز بەن سىنىپتاستارىمىز شىنشىلدىقتان اتتاۋعا نە جىنىستىق ازعىندىق جاساۋعا ٴبىزدى قانشالىقتى ٴجيى ازعىراتىنىنا دا ەش اسەر ەتە المايمىز. اينالامىزدا بولىپ جاتقان قىلمىستى توقتاتۋ دا ٴبىزدىڭ قولىمىزدان كەلمەيدى. بۇنداي قيىندىقتارعا كەزىگەتىن سەبەبىمىز — ٴبىز ٶمىر ٴسۇرىپ جاتقان دۇنيەدە ادامداردىڭ باسىم كوپشىلىگى كيەلى كىتاپ پرينسيپتەرىن ۇستانبايدى. ونىڭ ۇستىنە، دۇنيەنى شايتان بيلەپ وتىر جانە ول ٴبىزدىڭ «وسى زاماننىڭ ۋايىم-قايعىسىنا» باتىپ، ەحوباعا قىزمەت ەتپەي قويعانىمىزدى قالايدى (مات. 13:22؛ جوح. 1-ح. 5:19). سوندىقتان بۇل دۇنيەنىڭ ادامدى ۋايىمعا باتىراتىن قيىندىقتارعا تولى بولعانى ەش تاڭعالدىرمايدى!
4. ۋايىمعا باتىپ كەتسەك، نە بولادى؟
4 ٴبىزدىڭ كەيدە ۋايىمعا باتىپ كەتەتىنىمىز سونشا — باسقا ەش نارسە جايلى ويلاي الماي قالۋىمىز مۇمكىن. مىسالى، كەيدە ٴبىز «قاجەتىمىزدى ساتىپ الۋعا جەتەتىن اقشا تابا الامىن با؟» دەپ مازاسىزدانۋىمىز مۇمكىن. يا بولماسا «اۋىرىپ قالسام شە، جۇمىسقا جارامسىز بولىپ، جۇمىسىمنان ايىرىلىپ قالمايمىن با؟» دەپ تە ۋايىم كەشۋىمىز مۇمكىن. «قۇدايدىڭ زاڭىن بۇزۋعا ازعىرىلعان كەزدە ادال بولىپ قالا الامىن با؟» دەگەن وي دا تىنىشىمىزدى ۇرلايدى. جاقىندا شايتاننىڭ ٶز قول استىنداعى ادامداردى قۇداي حالقىنا قارسى ايداپ سالاتىنىن بىلگەندىكتەن، «سول شابۋىل كەزىندە مەن قالاي ارەكەت ەتەر ەكەنمىن؟» دەپ تە ۋايىمدايتىن شىعارمىز. ٴتىپتى «وسىنداي جايتتاردى ۋايىمداعانىم دۇرىس پا؟» دەپ تە ۋايىمدارمىز.
5. يسانىڭ «ۋايىمداۋدى قويىڭدار!» دەگەن سوزدەرى نەنى بىلدىرەدى؟
5 بىلەتىنىمىزدەي، يسا ٶزىنىڭ ٸزباسارلارىنا: «ۋايىمداۋدى قويىڭدار!»— دەگەن (مات. 6:25). سوندا يسا ٴبىزدىڭ مۇلدەم ەش نارسەنى ۋايىمداماۋىمىز كەرەكتىگىن ايتقان با؟ ارينە، جوق! ەسىمىزدە بولسا، ەجەلدە ەحوبانىڭ كەيبىر ادال قىزمەتشىلەرىنىڭ ۋايىمعا باتقان كەزدەرى بولعان. ٴبىراق سول ٷشىن ولار ەحوبانىڭ ىقىلاسىنان ايىرىلىپ قالعان جوق * (پات. 1-ج. 19:4؛ ٴزاب. 6:3). نەگىزى، يسا «ۋايىمداۋدى قويىڭدار!» دەۋىمەن ٴبىزدىڭ كوڭىلىمىزدى ورنىقتىرعىسى كەلگەن. ول ٴبىزدىڭ كۇندەلىكتى ومىرگە قاجەتتى نارسەلەردى شەكتەن تىس ۋايىمداپ، سول ۋايىمنىڭ قۇدايعا دەگەن قىزمەتىمىزگە كەرى اسەر ەتكەنىن قالاماعان. ٴبىراق ىشتەگى ۋايىمدى قالاي تىزگىندەۋگە بولادى؟ سونىڭ كەيبىر جولدارىن قاراستىرايىق. (« بىلاي ەتىپ كورىڭىز» دەگەن قورشاۋدى قاراڭىز.)
سابىر ساقتاۋعا كومەكتەسەتىن التى قادام
6-ابزاستى قاراڭىز *
6. فىلىپىلىكتەرگە 4:6، 7 گە ساي، بىزگە ۋايىمعا سالىنباي، سابىر ساقتاۋعا نە كومەكتەسەدى؟
6 1) ٴجيى دۇعا ەتىڭىز. ەگەر قيىندىقتار تىنىشتىقتان ايىرىپ، ۋايىمعا سالىپ جاتسا، ەحوبادان كومەك سۇراپ دۇعا ەتىڭىز (پەت. 1-ح. 5:7). دۇعاڭىزعا جاۋاپ رەتىندە ەحوبا سىزگە «قۇدايدىڭ ادام اقىلىنان اسقان تىنىشتىعىن» سيلايدى (فىلىپىلىكتەرگە 4:6، 7 وقىڭىز). ەحوبا ٶزىنىڭ قۇدىرەتتى كيەلى رۋحى ارقىلى سىزگە سابىر ساقتاۋعا كومەكتەسىپ، جۇرەگىڭىزدە تىنىشتىق ورناتادى (عال. 5:22، ٴسىلت.).
7. قۇدايعا دۇعا ەتكەندە نەنى ەستە ۇستاۋىمىز كەرەك؟
7 ەحوباعا دۇعا ەتكەندە، ىشتەگى سەزىمدەرىڭىزدىڭ ٴبارىن اقتارىپ ايتىڭىز. دۇعاڭىز ناقتى بولسىن. قيىندىعىڭىزدىڭ نەدە ەكەنىن، سول قيىندىقتان قانداي كۇي كەشىپ جاتقانىڭىزدى تاپتىشتەپ ايتىپ بەرىڭىز. قيىندىقتىڭ شەشىمى بار بولسا، سونى تاۋىپ، جۇزەگە اسىرۋ ٷشىن دانالىق پەن كۇش سۇراڭىز. ال ەگەر بۇل قيىندىق ٴسىز اسەر ەتە المايتىن قيىندىق بولسا، وندا ەحوبادان شەكتەن تىس ۋايىمعا بەرىلمەي، سابىر ساقتاۋعا كومەكتەسۋىن ٶتىنىڭىز. ەگەر ناقتى دۇعا ەتەر بولساڭىز، ۋاقىتى كەلگەندە ەحوبانىڭ جاۋابىن دا انىق كورەسىز. ال ەگەر دۇعاڭىزعا بىردەن جاۋاپ الماي جاتساڭىز، دۇعا ەتۋدى دوعارماڭىز. ەحوبا ٴسىزدىڭ ناقتى دۇعا ەتكەنىڭىزدى عانا ەمەس، تاباندىلىقپەن دە دۇعا ەتكەنىڭىزدى قالايدى (لۇقا 11:8—10).
8. دۇعا ەتكەندە نەنى ۇمىتپاۋىمىز كەرەك؟
8 ەحوباعا بار ۋايىمىڭىزدى ايتىپ دۇعا ەتكەندە، ريزاشىلىق ٴبىلدىرۋدى دە ۇمىتپاڭىز. ٴتىپتى ەڭ قيىن دەگەن جاعدايلاردى باستان كەشىپ جاتقاندا دا، كورىپ جاتقان باتالارىمىز جايلى ويلانعانىمىز دۇرىس. ىشتەگى سەزىمدەرىڭىزدى جەتكىزۋگە ٴسوز تاپپاي جاتساڭىز، مىنانى ۇمىتپاڭىز: ەحوبا ٴسىزدىڭ جاي عانا «ماعان كومەكتەسشى!» دەگەن دۇعاڭىزعا دا جاۋاپ بەرەدى (شەج. 2-ج. 18:31؛ ريم. 8:26).
9-ابزاستى قاراڭىز *
9. بويىمىزدى قورقىنىش بيلەگەندە نە ىستەۋىمىز كەرەك؟
9 2) ٶزىڭىزدىڭ ەمەس، ەحوبانىڭ دانالىعىنا ارقا سۇيەڭىز. سوناۋ ب.ز.ب. VIII عاسىردا ياھۋدا حالقى اسسيريالىقتاردىڭ شابۋىلىنان ۇرەيلەرى ۇشىپ قورىقتى. اسسيريالىقتاردىڭ قولىنا تۇسكىسى كەلمەگەن ولار مىسىردىڭ كومەگىنە جۇگىندى (يشايا 30:1، 2). ەحوبا ولاردىڭ قىڭىرلىقپەن جاساعان بۇل ارەكەتتەرىنىڭ ارتى جاقسىلىققا اپارمايتىنىن ەسكەرتتى (يشايا 30:7، 12، 13). ول حالقىنا يشايا ارقىلى ناعىز قاۋىپسىزدىكتى قايدان ىزدەۋ كەرەكتىگىن ايتتى. ەحوبا: «سابىر ساقتاپ، ماعان سەنىم ارتساڭدار، كۇشتى بولاسىڭدار»،— دەدى (يشايا 30:15ٵ).
10. ەحوباعا سەنىم ارتاتىنىمىزدى قانداي جاعدايلاردا كورسەتە الامىز؟
10 ەحوباعا سەنىم ارتاتىنىمىزدى قالاي كورسەتە الامىز؟ مىناداي جاعدايلاردى ەلەستەتىپ كورەيىك. بىرەۋ سىزگە جالاقىسى جوعارى جۇمىس ۇسىندى دەلىك. ٴبىراق ول ٴسىزدىڭ كوپ ۋاقىتىڭىزدى الادى جانە رۋحاني ىستەردى اتقارۋىڭىزعا كەدەرگى جاسايدى. يا بولماسا جۇمىستا ەحوباعا قىزمەت ەتپەيتىن قارسى جىنىستى ادام سىزگە سەزىمىن بىلدىرە باستادى دەلىك. نەمەسە مىناداي جاعداي بولسا: وتباسىڭىزدا بىرەۋ «نە مەنى، نە قۇدايدى تاڭدا!» دەپ كەسىپ ايتادى. وسى جاعدايلاردىڭ بارىندە شەشىم قابىلداۋ وڭاي ەمەس. ٴبىراق ٵربىر جاعدايدا ەحوبا سىزگە قاجەتتى نۇسقاۋلار بەرەدى (مات. 6:33؛ 10:37؛ قور. 1-ح. 7:39). ال ٴسىز قالاي ارەكەت ەتەسىز؟ ەحوباعا سەنىم ارتىپ، ونىڭ بەرگەن نۇسقاۋلارىنا مويىنسۇناسىز با؟
11-ابزاستى قاراڭىز *
11. قۋعىن-سۇرگىن كەزىندە سابىر ساقتاۋ ٷشىن، كيەلى كىتاپتاعى قانداي وقيعالاردى زەرتتەسەك بولادى؟
11 3) كيەلى كىتاپتاعى وقيعالاردان ساباق الىڭىز. كيەلى كىتاپتا سابىر ساقتاپ، ەحوباعا سەنىم ارتۋدىڭ ماڭىزدىلىعىن كورسەتەتىن وقيعالار كوپ. سول وقيعالاردى زەرتتەگەن كەزدە، اياۋسىز قۋعىن كورگەندە قۇدايدىڭ قىزمەتشىلەرىنە سابىر ساقتاۋعا نە كومەكتەسكەنى جايلى ويلانىڭىز. مىسالى، ياھۋديلەردىڭ جوعارعى سوتى ۋاعىزداۋعا تيىم سالعان كەزدە، ەلشىلەر ەش قورىققان جوق. قايتا، ولار باتىلدىقپەن: «بيلەۋشى رەتىندە ٴبىرىنشى كەزەكتە ادامعا ەمەس، قۇدايعا مويىنسۇنۋىمىز كەرەك»،— دەگەن (ەل. ٸس. 5:29). ٴتىپتى سوققىعا جىعىلعاننان كەيىن دە ولار ۇرەيگە بوي الدىرمادى. بۇنىڭ سەبەبى — ەلشىلەر ەحوبا ولاردى قولدايتىنىن ٴبىلدى. ولار ەحوبانىڭ ىقىلاسىنا يە ەدى. سونىڭ ارقاسىندا ولار ىزگى حاباردى ۋاعىزداۋدى دوعارمادى (ەل. ٸس. 5:40—42). شاكىرت ستەپاننىڭ دا ولەر الدىندا سابىرلى بولعانى سونشا — «ونىڭ بەت-ٴجۇزى پەرىشتەنىكىندەي» بولىپ كورىنگەن (ەل. ٸس. 6:12—15). بۇنىڭ سەبەبى نەدە ەدى؟ ستەپان ٶزىنىڭ ەحوبانىڭ ىقىلاسىنا يە ەكەنىنە سەنىمدى بولدى.
12. پەتىردىڭ 1-حاتى 3:14 جانە 4:14 كە ساي، نەلىكتەن ٴبىز قۋعىن-سۇرگىنگە ۇشىراعان كەزدە باقىتتى بولا الامىز؟
12 ەلشىلەردىڭ ەحوبانىڭ ىقىلاسىنا يە ەكەنى ٴبىر جايتتان انىق كورىندى. ەحوبا ولارعا كەرەمەتتەر جاسايتىن قۇدىرەت بەردى (ەل. ٸس. 5:12—16؛ 6:8). بۇگىندە بىزدە ونداي قۇدىرەت جوق. ٴبىراق ٶز ٴسوزى ارقىلى ەحوبا ادىلدىك ٷشىن قاسىرەت شەككەنىمىزدە ٴبىزدى ىقىلاسىنان ايىرماي، كيەلى رۋحىن بەرەتىنىنە سەندىرەدى (پەتىردىڭ 1-حاتى 3:14؛ 4:14 وقىڭىز). سوندىقتان «بولاشاقتا قۋعىن-سۇرگىن كەزىندە قالاي ارەكەت ەتەمىن؟» دەپ ويلاي بەرمەڭىز. قايتا، قولىڭىزدان كەلگەنشە، ەحوبانىڭ ٴبىزدى قولداپ، قۇتقارۋعا قۇدىرەتى جەتەتىنىنە سەنىمدىلىگىڭىزدى ارتتىرا بەرىڭىز. ەرتەدەگى شاكىرتتەر سياقتى، ٴبىز دە يسانىڭ مىنا ٴبىر ۋادەسىنە سەنىم ارتۋىمىز كەرەك: «مەن سەندەرگە دانالىق بەرىپ، ايتاتىن سوزدەرىڭدى اۋىزدارىڭا سالامىن. سوندا جاۋلارىڭنىڭ ٴبارى بىرىكسە دە، سەندەرگە قارسى شىعا دا، داۋلاسا دا المايدى». سونداي-اق يسا: «تاباندى بولۋلارىڭمەن جاندارىڭدى ساقتاپ قالاسىڭدار»،— دەپ ۋادە ەتكەن (لۇقا 21:12—19). مىنانى ۇمىتپاڭىز: ەحوبا ومىردەن وتكەن ادال قىزمەتشىلەرى جايلى مالىمەتتى بۇگە-شىگەسىنە دەيىن جادىندا ساقتاپ قالادى. كەيىن سوعان سۇيەنىپ، ولاردى ومىرگە قايتا تىرىلتەتىن بولادى.
13. سابىر ساقتاپ، ەحوباعا سەنىم ارتپاعان ادامداردىڭ وقيعالارىن زەرتتەۋدىڭ قانداي پايداسى بار؟
13 ٴبىز سابىر ساقتاپ، ەحوباعا سەنىم ارتپاعان ادامداردىڭ وقيعالارىنان دا ساباق الا الامىز. سولار جايلى زەرتتەيتىن بولساق، ولاردىڭ قاتەلىكتەرىن قايتالامايمىز. مىسالى، ەفيوپيالىق قالىڭ اسكەر ياھۋداعا قارسى اتتانعاندا، اسا پاتشا ەحوباعا سەنىم ارتىپ، جەڭىسكە جەتكەن ەدى (شەج. 2-ج. 14:9—12). ٴبىراق كەيىن يسرايل پاتشاسى باعاسا شاعىن عانا اسكەرىمەن شابۋىلداعان كەزدە، اسا بۇرىنعىداي ەحوباعا جۇگىنۋدىڭ ورنىنا، سيريادان اسكەري كومەك سۇراپ، وعان قۇن تولەدى (شەج. 2-ج. 16:1—3). ٶمىرىنىڭ اياعىندا اۋىر دەرتكە شالدىققان كەزدە دە، اسا ەحوبانىڭ كومەگىنە جۇگىنبەدى (شەج. 2-ج. 16:12).
14. اسا پاتشانىڭ جاساعان قاتەلىگىنەن نە ۇيرەنەمىز؟
14 العاشىندا قيىندىققا كەزىككەندە اسا پاتشا ەحوبادان كومەك ىزدەدى. ٴبىراق كەيىن ول قيىندىقتارىن ەحوبانىڭ كومەگىمەن ەمەس، ٶز بەتىنشە شەشۋگە تىرىستى. ٴبىر قاراعاندا، اسانىڭ يسرايلگە قارسى تۇرۋ ٷشىن سيريادان كومەك سۇراعانى ماسەلەنى شەشكەندەي كورىندى. ٴبىراق ونىڭ بۇل جەتىستىگى ۇزاققا جالعاسپادى. ەحوبا ٶزىنىڭ پايعامبارى ارقىلى وعان بىلاي دەدى: «سەن قۇدايىڭ ەحوباعا ەمەس، سيريا پاتشاسىنا ارقا سۇيەگەندىكتەن، سيريا پاتشاسىنىڭ اسكەرى قولىڭا تۇسپەي، قۇتىلىپ كەتتى» (شەج. 2-ج. 16:7). ٴبىز دە ماسەلەمىزدى ٶز بەتىمىزشە شەشىپ، ەحوبادان ٶز ٴسوزى ارقىلى باسشىلىق بەرۋىن سۇراماي جاتىپ ارەكەت ەتۋدەن ساق بولۋىمىز قاجەت. ٴتىپتى شۇعىل شەشىم قابىلداۋ كەرەك بولعان جاعدايدا دا ٴبىز سابىر ساقتاپ، ەحوباعا سەنىم ارتۋىمىز كەرەك. سوندا ول بىزگە دۇرىس شەشىم قابىلداۋعا كومەكتەسەدى.
15-ابزاستى قاراڭىز *
15. كيەلى كىتاپتى وقىعان كەزدە نە ىستەسەك بولادى؟
15 4) كيەلى كىتاپ تارماقتارىن جاتتاڭىز. كيەلى كىتاپتان سابىر ساقتاپ، ەحوباعا سەنىم ارتۋعا كومەكتەسەتىن تارماقتاردى كورگەندە، ولاردى جاتتاپ الۋعا تىرىسىڭىز. بۇل ٷشىن ولاردى داۋىستاپ وقىڭىز نە جازىپ الىپ، قايتالاپ ٴجۇرىڭىز. ەحوبا ەشۋاعا دانالىقپەن ارەكەت ەتۋ ٷشىن زاڭ كىتابىنداعى سوزدەردى جۇيەلى تۇردە كۇبىرلەپ وقۋدى بۇيىرعان. وقىعاندارى ەشۋاعا قورقىنىشقا بوي الدىرماي، قۇداي حالقىن باتىلدىقپەن جەتەلەپ جۇرۋگە دە كومەكتەسپەك ەدى (ەشۋا 1:8، 9). قۇداي سوزىندەگى كوپتەگەن تارماقتار ادامدى ادەتتە ۋايىمعا سالاتىن نە ۇرەيىن تۋدىراتىن جاعدايلاردا سابىر ساقتاپ، جانتىنىشتىعىنا يە بولۋعا كومەكتەسەدى (ٴزاب. 27:1—3؛ ناق. س. 3:25، 26).
16-ابزاستى قاراڭىز *
16. بىزگە سابىر ساقتاپ، وزىنە سەنىم ارتۋعا كومەكتەسۋ ٷشىن ەحوبا قاۋىمدى قالاي قولدانادى؟
16 5) قۇداي حالقىمەن ارالاسىڭىز. بىزگە سابىر ساقتاپ، وزىنە سەنىم ارتۋعا كومەكتەسۋ ٷشىن ەحوبا باۋىرلاستارىمىزدى قولدانادى. قاۋىم كەزدەسۋلەرىندە ساحنادان ايتىلاتىن نۇسقاۋلار، باۋىرلاستاردىڭ بەرەتىن تۇسىنىكتەمەلەرى جانە باۋىرلاستارمەن ايتاتىن سەرگىتەرلىك اڭگىمەلەرىمىز بىزگە كوپ پايداسىن تيگىزەدى (ەۆر. 10:24، 25). قاۋىمداعى سەنىمدى دوستارىمىزعا مازالاعان ۋايىمدارىمىزدى ايتقاندا دا ٴبىر جىگەرلەنىپ قالامىز. دوسىمىزدىڭ ايتقان «جاقسى ٴسوزى» ۋايىمىمىزدى سەيىلتۋگە كادىمگىدەي كومەكتەسۋى مۇمكىن (ناق. س. 12:25).
17-ابزاستى قاراڭىز *
17. ەۆرەيلەرگە 6:19 عا ساي، ٷمىتىمىز بىزگە قيىن شاقتا سابىر ساقتاۋعا قالاي كومەكتەسەدى؟
17 6) ٷمىتىڭىزدى بەرىك ساقتاڭىز. ٴبىزدىڭ ٷمىتىمىز «جانىمىزدىڭ زاكىرى ىسپەتتى»، ول بىزگە قيىندىققا كەزىككەندە، سانامىزدى ۋايىم مەڭدەگەندە شايقالماۋعا كومەكتەسەدى (ەۆرەيلەرگە 6:19 وقىڭىز). ەحوبا ۋادە ەتكەن بولاشاق جايلى وي جۇگىرتىڭىز، وندا مازانى قاشىراتىن ويلار اتىمەن بولمايدى (يشايا 65:17). ٶزىڭىزدى ۋايىمعا سالاتىن قيىندىقتاردان ادا، تىنىشتىق ورناعان جاڭا دۇنيەدە جۇرگەنىڭىزدى ەلەستەتىڭىز (ميحا 4:4). ٷمىتىڭىز جايلى وزگەلەرگە ايتساڭىز، ٶزىڭىزدىڭ دە ٷمىتىڭىز بەرىك بولا تۇسەدى. ۋاعىزداۋ مەن شاكىرت دايىنداۋ ىسىنە اتسالىسۋعا بارىڭىزدى سالىڭىز. سولاي ەتەر بولساڭىز، «سوڭىنا دەيىن ۇمىتىڭىزگە نىق سەنىمدى بولاسىز» (ەۆر. 6:11).
18. الداعى ۋاقىتتا نە بولۋى مۇمكىن جانە سونداي كەزدە ٴبىز نە ىستەي الامىز؟
18 وسى دۇنيەنىڭ اقىرى تاياپ قالعاندىقتان، ٴبىز تىنىشتىقتان ايىرىپ، مازاسىز كۇيگە ٴتۇسىرۋى مۇمكىن جاعدايلارعا ٵلى كوپ كەزىگەمىز. 2021-جىلدىڭ تارماعى بىزگە قيىندىقتاردى ٶز كۇشىمىزبەن ەمەس، سابىر ساقتاپ، ەحوباعا سەنىم ارتۋ ارقىلى ەڭسەرۋگە كومەكتەسەدى. وسى جىلى ەحوبانىڭ مىنا ۋادەسىنە سەنەتىنىمىزدى ىسىمىزبەن كورسەتە بەرەيىك: «سابىر ساقتاپ، ماعان سەنىم ارتساڭدار، كۇشتى بولاسىڭدار» (يشايا 30:15).
8-ٵن ەحوبا — ٴبىزدىڭ قورعانىمىز
^ 5-ابزاس 2021-جىلدىڭ تارماعى قازىر جانە بولاشاقتا تىنىشتىقتان ايىراتىن جاعدايلاردا ەحوباعا سەنىم ارتۋدىڭ قانشالىقتى ماڭىزدى ەكەنىنە نازار اۋدارادى. بۇل ماقالادا ٴبىز جىلدىق تارماقتا ايتىلعان سوزدەرگە ساي ارەكەت ەتۋدىڭ جولدارىن قاراستىرامىز.
^ 5-ابزاس دەنساۋلىقپەن بايلانىستى كەيبىر ادال باۋىرلاستارىمىز شەكتەن تىس ۋايىمعا نە ۇرەيلى ۋايىمعا ۇشىراپ جاتادى. يسانىڭ ايتقان سوزدەرىن وسىنداي ۋايىممەن شاتاستىرىپ الماۋىمىز كەرەك.
^ 63-ابزاس سۋرەت سيپاتتاماسى: 1) قىز باۋىرلاس ٶزىنىڭ ۋايىمدارى جايلى كۇنى بويى دۇعا ەتىپ ٴجۇر.
^ 65-ابزاس سۋرەت سيپاتتاماسى: 2) جۇمىستا تۇسكى ٷزىلىس كەزىندە ول دانالىق ىزدەپ، قۇداي ٴسوزىن وقىپ وتىر.
^ 67-ابزاس سۋرەت سيپاتتاماسى: 3) ول كيەلى كىتاپتاعى وقيعالار جايلى وي جۇگىرتىپ وتىر.
^ 69-ابزاس سۋرەت سيپاتتاماسى: 4) ول جاتتاپ الۋ ٷشىن جىگەر بەرەتىن تارماقتاردى توڭازىتقىشتىڭ ەسىگىنە جابىستىرىپ جاتىر.
^ 71-ابزاس سۋرەت سيپاتتاماسى: 5) ول قىزمەتتە باسقالارمەن ارالاسۋدان قۋانىش الىپ ٴجۇر.
^ 73-ابزاس سۋرەت سيپاتتاماسى: 6) ول بولاشاق جايلى وي جۇگىرتىپ، ٷمىتىن بەرىك ساقتاپ ٴجۇر.
