ບົດຄວາມສຶກສາທີ 1
ໃຫ້ມີໃຈສະຫງົບແລະເພິ່ງພະເຢໂຫວາ
ຂໍ້ພະຄຳພີປະຈຳປີ 2021: “ຖ້າພວກເຈົ້າມີໃຈທີ່ສະຫງົບແລະໄວ້ວາງໃຈເຮົາ ພວກເຈົ້າກໍຈະມີຄວາມເຂັ້ມແຂງ.”—ເອຊາ. 30:15, ລ.ມ.
ເພງ 3 ເປັນກຳລັງ ຄວາມຫວັງ ແລະຄວາມໝັ້ນໃຈຂອງເຮົາ
ໃຈຄວາມສຳຄັນ *
1. ບາງຄົນອາດຖາມຄືກັບກະສັດດາວິດແນວໃດ?
ເຮົາທຸກຄົນຢາກມີໃຈສະຫງົບແລະມີຄວາມສຸກ. ບໍ່ມີໃຜດອກທີ່ຢາກອຸກໃຈ. ແຕ່ບາງເທື່ອເຮົາອາດຈະຮູ້ສຶກອຸກໃຈ. ນີ້ເປັນເຫດຜົນທີ່ຜູ້ຮັບໃຊ້ພະເຢໂຫວາບາງຄົນອາດຖາມຄືກັບກະສັດດາວິດຖາມພະເຢໂຫວາວ່າ: “ຂ້ອຍຈະຕ້ອງກັງວົນແລະເສົ້າໃຈທຸກມື້ໄປອີກດົນປານໃດ?”—ເພງ. 13:2, ລ.ມ.
2. ເຮົາຈະຮຽນຫຍັງໃນບົດຄວາມນີ້?
2 ເຖິງວ່າບາງເທື່ອເຮົາອາດຈະຮູ້ສຶກອຸກໃຈ ແຕ່ກໍມີບາງຢ່າງທີ່ເຮົາເຮັດໄດ້ເພື່ອຈະອຸກໃຈໜ້ອຍລົງ. ໃນບົດຄວາມນີ້ ເຮົາຈະມາຮຽນບາງເລື່ອງທີ່ອາດເຮັດໃຫ້ເຮົາຮູ້ສຶກອຸກໃຈ ແລະເຮົາຈະມາຮຽນສິ່ງທີ່ເຮົາເຮັດໄດ້ 6 ຢ່າງເຊິ່ງຈະຊ່ອຍເຮົາໃຫ້ມີໃຈສະຫງົບເມື່ອມີບັນຫາ.
ສິ່ງໃດອາດເຮັດໃຫ້ເຮົາຮູ້ສຶກອຸກໃຈ?
3. ມີຫຍັງແດ່ທີ່ເຮັດໃຫ້ເຮົາອຸກໃຈເຊິ່ງເຮົາຄວບຄຸມບໍ່ໄດ້?
3 ມີຫຼາຍຢ່າງທີ່ເຮັດໃຫ້ເຮົາຮູ້ສຶກອຸກໃຈ ແລະກໍມີບາງຢ່າງທີ່ເຮົາຄວບຄຸມບໍ່ໄດ້ເຊັ່ນ: ຄ່າກິນ ຄ່າຢູ່ ເຄື່ອງນຸ່ງຂອງຖືທີ່ມັກເພີ່ມຂຶ້ນໃນແຕ່ລະປີ. ຫຼືເຮົາບໍ່ສາມາດຫ້າມໝູ່ຢູ່ບ່ອນເຮັດວຽກຫຼືຢູ່ໂຮງຮຽນທີ່ພະຍາຍາມກົດດັນເຮົາໃຫ້ເຮັດຜິດສິນລະທຳຫຼືເຮັດສິ່ງທີ່ບໍ່ສັດຊື່ໄດ້. ແລະເຮົາກໍຫ້າມບໍ່ໃຫ້ມີອາຊະຍາກຳເກີດຂຶ້ນໃນບ່ອນທີ່ເຮົາຢູ່ບໍ່ໄດ້. ເຮົາເຈິບັນຫາແບບນີ້ກໍຍ້ອນເຮົາຢູ່ໃນໂລກທີ່ຫຼາຍຄົນບໍ່ໄດ້ເຮັດຕາມຫຼັກການໃນຄຳພີໄບເບິນ. ນອກຈາກນັ້ນ ຊາຕານທີ່ເປັນຜູ້ປົກຄອງໂລກນີ້ຍັງຮູ້ວ່າ ຜູ້ຮັບໃຊ້ພະເຢໂຫວາບາງຄົນຈະເຊົາຮັບໃຊ້ເພິ່ນຍ້ອນ “ອຸກໃຈກັບຊີວິດໃນໂລກນີ້.” (ມທ. 13:22; 1 ຢຮ. 5:19) ດັ່ງນັ້ນ ເຮົາຈຶ່ງບໍ່ແປກໃຈເລີຍວ່າ ເປັນຫຍັງໂລກນີ້ຈຶ່ງມີແຕ່ບັນຫາທີ່ເຮັດໃຫ້ຫຼາຍຄົນອຸກໃຈ!
4. ເຮົາອາດເປັນແນວໃດເມື່ອມີບັນຫາຫຼາຍຢ່າງ?
4 ເຮົາອາດຈະມີບັນຫາຫຼາຍຢ່າງທີ່ເຮັດໃຫ້ຮູ້ສຶກອຸກໃຈເຊັ່ນ: ເຮົາອາດຢ້ານວ່າຈະບໍ່ມີເງິນພໍໃຊ້ ຫຼືຢ້ານວ່າຖ້າເຈັບປ່ວຍຈະເຮັດວຽກບໍ່ໄດ້ຫຼືຕົກວຽກ. ແລະເຮົາອາດຢ້ານວ່າຈະບໍ່ສັດຊື່ຕໍ່ພະເຢໂຫວາເມື່ອຖືກລໍ້ໃຈໃຫ້ເຮັດຜິດ. ອີກບໍ່ດົນຊາຕານຈະໃຊ້ພວກຜູ້ຕໍ່ຕ້ານມາໂຈມຕີປະຊາຊົນຂອງພະເຢໂຫວາ ແລະເຮົາອາດຢ້ານວ່າບໍ່ຮູ້ຊິເຮັດແນວໃດເມື່ອເກີດເຫດການແບບນັ້ນ. ເຮົາອາດຄິດວ່າ ‘ຜິດບໍທີ່ຈະຮູ້ສຶກອຸກໃຈກັບສິ່ງເຫຼົ່ານີ້?’
5. ພະເຢຊູໝາຍຄວາມວ່າແນວໃດເມື່ອເພິ່ນບອກວ່າ “ໃຫ້ເຊົາອຸກໃຈ”?
5 ພະເຢຊູບອກລູກສິດຂອງເພິ່ນວ່າ “ໃຫ້ເຊົາອຸກໃຈ.” (ມທ. 6:25) ເພິ່ນໝາຍຄວາມວ່າເຮົາບໍ່ຄວນອຸກໃຈຫຍັງເລີຍບໍ? ບໍ່ແມ່ນ. ເພາະຜູ້ຮັບໃຊ້ພະເຢໂຫວາບາງຄົນໃນສະໄໝອະດີດກໍຮູ້ສຶກອຸກໃຈຄືກັນ ແຕ່ພະເຢໂຫວາກໍຍັງພໍໃຈເຂົາເຈົ້າຢູ່. * (1 ກະ. 19:4; ເພງ. 6:3) ພະເຢຊູໃຫ້ກຳລັງໃຈເຮົາຫຼາຍແທ້ໆ ເພິ່ນບໍ່ຢາກໃຫ້ເຮົາອຸກໃຈກັບສິ່ງເຫຼົ່ານີ້ຫຼາຍເກີນໄປເພາະມັນອາດສົ່ງຜົນຕໍ່ວຽກຮັບໃຊ້ພະເຢໂຫວາ. ແລ້ວມີຫຍັງແດ່ທີ່ເຮົາຕ້ອງເຮັດເມື່ອຮູ້ສຶກອຸກໃຈ?—ເບິ່ງຂອບ “ ສິ່ງທີ່ເຮັດໄດ້.”
ຫົກຢ່າງທີ່ຊ່ອຍເຮົາໃຫ້ມີໃຈສະຫງົບ
ເບິ່ງຂໍ້ 6 *
6. ຕາມຟີລິບປອຍ 4:6, 7 ອັນໃດຈະຊ່ອຍເຮົາໃຫ້ມີໃຈສະຫງົບ?
6 (1) ອະທິດຖານເລື້ອຍໆ. ເມື່ອເຈົ້າອຸກໃຈ ເຈົ້າສາມາດອະທິດຖານຂໍໃຫ້ພະເຢໂຫວາຊ່ອຍເຈົ້າ. (1 ປຕ. 5:7) ເພິ່ນຈະຕອບຄຳອະທິດຖານຂອງເຈົ້າໂດຍໃຫ້ເຈົ້າມີ “ສັນຕິສຸກຂອງພະເຈົ້າທີ່ເກີນຄວາມເຂົ້າໃຈ [ມະນຸດ] ທຸກຢ່າງ.” (ອ່ານຟີລິບປອຍ 4:6, 7) ພະເຢໂຫວາຈະໃຫ້ພະລັງບໍລິສຸດເພື່ອຊ່ອຍເຮົາໃຫ້ມີໃຈສະຫງົບ.—ຄລຕ. 5:22
7. ເຮົາຄວນອະທິດຖານແບບໃດ?
7 ເມື່ອເຈົ້າອະທິດຖານເຖິງພະເຢໂຫວາ ໃຫ້ບອກຄວາມຮູ້ສຶກທຸກຢ່າງກັບເພິ່ນແລະເວົ້າແບບເຈາະຈົງ. ບອກເພິ່ນໃຫ້ຮູ້ວ່າເຈົ້າມີບັນຫາຫຍັງ ແລະເຈົ້າຮູ້ສຶກແນວໃດກັບບັນຫານັ້ນ. ຖ້າເຫັນວ່າບັນຫານັ້ນຍັງພໍມີທາງແກ້ໄຂ ກໍໃຫ້ຂໍສະຕິປັນຍາແລະກຳລັງຈາກພະເຢໂຫວາເພື່ອຈະແກ້ໄຂໄດ້. ຖ້າຫາກວ່າບັນຫານັ້ນແກ້ໄຂບໍ່ໄດ້ ໃຫ້ຂໍພະເຢໂຫວາຊ່ອຍບໍ່ໃຫ້ເຈົ້າອຸກໃຈຫຼາຍເກີນໄປ. ເມື່ອເຈົ້າອະທິດຖານແບບເຈາະຈົງ ເຈົ້າກໍຈະເຫັນວິທີທີ່ພະເຢໂຫວາຕອບຄຳອະທິດຖານຂອງເຈົ້າ. ແຕ່ຖ້າຄຳອະທິດຖານຂອງເຈົ້າຍັງບໍ່ໄດ້ຮັບຄຳຕອບທັນທີ ກໍຢ່າຟ້າວທໍ້ໃຈ. ພະເຢໂຫວາບໍ່ພຽງແຕ່ຢາກໃຫ້ເຈົ້າອະທິດຖານແບບເຈາະຈົງ ແຕ່ຢາກໃຫ້ເຈົ້າອະທິດຖານຫາເພິ່ນເລື້ອຍໆ.—ລກ. 11:8-10
8. ເມື່ອອະທິດຖານ ເຈົ້າຕ້ອງບໍ່ລືມຫຍັງ?
8 ເມື່ອເຈົ້າອະທິດຖານລະບາຍຄວາມຮູ້ສຶກກັບພະເຢໂຫວາ ຢ່າລືມຂອບໃຈເພິ່ນນຳ. ໃຫ້ຄິດເຖິງສິ່ງດີໆທີ່ເຮົາໄດ້ຮັບເຖິງວ່າເຮົາຈະມີບັນຫາຫຼາຍຢ່າງກໍຕາມ. ແຕ່ຖ້າເຈົ້າບໍ່ຮູ້ວ່າຈະບອກຄວາມຮູ້ສຶກກັບພະເຢໂຫວາແນວໃດດີ ຂໍໃຫ້ຮູ້ໄວ້ວ່າພຽງແຕ່ເຈົ້າເວົ້າວ່າ: ‘ຂໍຊ່ອຍລູກແດ່!’ ພະເຢໂຫວາກໍຈະຕອບຄຳອະທິດຖານຂອງເຈົ້າແລ້ວ.—2 ຂ່າວ. 18:31; ຣມ. 8:26
ເບິ່ງຂໍ້ 9 *
9. ເຮົາຄວນເຮັດຫຍັງເມື່ອເຮົາຮູ້ສຶກຢ້ານ?
9 (2) ໃຫ້ເພິ່ງພະເຢໂຫວາ ບໍ່ແມ່ນເພິ່ງຕົວເອງ. ໃນສະໄໝຜູ້ພະຍາກອນເອຊາຢາ ປະຊາຊົນໃນຢູດາຢ້ານການໂຈມຕີຈາກພວກອາຊີລີ. ເຂົາເຈົ້າບໍ່ຢາກພ່າຍແພ້ພວກອາຊີລີຈຶ່ງໄປຂໍຄວາມຊ່ວຍເຫຼືອຈາກເອຢິບ. (ເອຊາ. 30:1, 2) ພະເຢໂຫວາເຕືອນວ່າການໄປຂໍຄວາມຊ່ວຍເຫຼືອຈາກເອຢິບຈະເຮັດໃຫ້ເຂົາເຈົ້າພິນາດ. (ເອຊາ. 30:7, 12, 13) ພະເຢໂຫວາບອກວິທີທີ່ເຂົາເຈົ້າຈະໄດ້ຮັບການປົກປ້ອງແທ້ຜ່ານທາງຜູ້ພະຍາກອນເອຊາຢາວ່າ: “ຖ້າພວກເຈົ້າມີໃຈທີ່ສະຫງົບແລະໄວ້ວາງໃຈ [ພະເຢໂຫວາ] ພວກເຈົ້າກໍຈະມີຄວາມເຂັ້ມແຂງ.”—ເອຊາ. 30:15, ລ.ມ ສ່ວນ ຂ
10. ມີສະຖານະການຫຍັງແດ່ທີ່ສະແດງໃຫ້ເຫັນວ່າເຮົາເພິ່ງພະເຢໂຫວາ?
10 ມີສະຖານະການຫຍັງແດ່ທີ່ສະແດງໃຫ້ເຫັນວ່າເຮົາເພິ່ງພະເຢໂຫວາ? ຂໍໃຫ້ເບິ່ງຕົວຢ່າງຕໍ່ໄປນີ້. ເຈົ້າຈະເຮັດແນວໃດຖ້າເຈົ້າໄດ້ຮັບຂໍ້ສະເໜີໃຫ້ເຮັດວຽກທີ່ໄດ້ເງິນຫຼາຍໆ ແຕ່ເຈົ້າຕ້ອງເຮັດວຽກຫຼາຍຂຶ້ນເຊິ່ງບໍ່ມີເວລາຮັບໃຊ້ພະເຢໂຫວາຄືກັບແຕ່ກ່ອນ. ຫຼືບາງຄົນທີ່ຢູ່ບ່ອນເຮັດວຽກເຊິ່ງບໍ່ແມ່ນພະຍານພະເຢໂຫວາມາສົນໃຈເຈົ້າເປັນພິເສດ? ຫຼືຄົນໃນຄອບຄົວບອກວ່າເຂົາເຈົ້າຈະບໍ່ຍອມຮັບເຈົ້າຖ້າເຈົ້າຍັງຮັບໃຊ້ພະເຢໂຫວາ? ເລື່ອງແບບນີ້ເຮົາອາດຕັດສິນໃຈຍາກ ແຕ່ພະເຢໂຫວາຈະໃຫ້ຄຳແນະນຳເພື່ອຊ່ອຍເຮົາໃຫ້ຕັດສິນໃຈໄດ້. (ມທ. 6:33; 10:37; 1 ກຣ. 7:39) ແລ້ວເຮົາຈະເພິ່ງພະເຢໂຫວາແລະເຮັດຕາມຄຳແນະນຳຂອງເພິ່ນບໍ?
ເບິ່ງຂໍ້ 11 *
11. ໃນຄຳພີໄບເບິນມີເລື່ອງໃດແດ່ທີ່ຊ່ອຍເຮົາໃຫ້ມີໃຈສະຫງົບເມື່ອຖືກຕໍ່ຕ້ານ?
11 (3) ຮຽນຈາກຕົວຢ່າງທີ່ດີແລະຕົວຢ່າງທີ່ບໍ່ດີ. ໃນຄຳພີໄບເບິນມີຫຼາຍເລື່ອງທີ່ສະແດງໃຫ້ເຫັນວ່າເປັນເລື່ອງສຳຄັນທີ່ຈະມີໃຈສະຫງົບແລະເພິ່ງພະເຢໂຫວາ. ເມື່ອເຈົ້າຮຽນເລື່ອງເຫຼົ່ານີ້ ຂໍໃຫ້ຄິດເຖິງສິ່ງທີ່ພະເຢໂຫວາຊ່ອຍຜູ້ຮັບໃຊ້ຂອງເພິ່ນໃຫ້ມີໃຈສະຫງົບເມື່ອຖືກຕໍ່ຕ້ານ. ຕົວຢ່າງເຊັ່ນ: ເມື່ອສານສູງສຸດຂອງຊາວຢິວສັ່ງພວກອັກຄະສາວົກໃຫ້ເຊົາປະກາດເລື່ອງພະເຈົ້າ ເຂົາເຈົ້າກໍບໍ່ເຊົາປະກາດແລະບອກຢ່າງກ້າຫານວ່າ: “ພວກເຮົາຕ້ອງເຊື່ອຟັງພະເຈົ້າທີ່ເປັນຜູ້ປົກຄອງ ບໍ່ແມ່ນມະນຸດ.” (ກຈກ. 5:29) ແລະເຖິງວ່າຈະຖືກຂ້ຽນຕີ ເຂົາເຈົ້າກໍບໍ່ຢ້ານ. ຍ້ອນຫຍັງ? ຍ້ອນເຂົາເຈົ້າຮູ້ວ່າພະເຢໂຫວາຢູ່ນຳເຂົາເຈົ້າແລະພໍໃຈໃນສິ່ງທີ່ເຂົາເຈົ້າເຮັດ. ດັ່ງນັ້ນເຂົາເຈົ້າຈຶ່ງປະກາດຂ່າວດີຕໍ່ໆໄປ. (ກຈກ. 5:40-42) ຊະເຕຟາໂນກໍຄືກັນ ຕອນລາວທີ່ຈະຖືກຂ້າ ລາວກໍຍັງມີໃຈສະຫງົບແລະໜ້າຂອງລາວຄືກັບ “ໜ້າທູດສະຫວັນ.” (ກຈກ. 6:12-15) ຍ້ອນຫຍັງລາວຈຶ່ງມີໃຈສະຫງົບ? ຍ້ອນລາວໝັ້ນໃຈວ່າພະເຢໂຫວາພໍໃຈລາວ.
12. ຕາມ 1 ເປໂຕ 3:14; 4:14 ເປັນຫຍັງເຮົາຈຶ່ງມີຄວາມສຸກເມື່ອຖືກຂົ່ມເຫງ?
12 ພວກອັກຄະສາວົກໝັ້ນໃຈວ່າພະເຢໂຫວາຢູ່ກັບເຂົາເຈົ້າ ແລະໃຫ້ລິດອຳນາດເພື່ອເຂົາເຈົ້າຈະເຮັດການອັດສະຈັນໄດ້. (ກຈກ. 5:12-16; 6:8) ໃນທຸກມື້ນີ້ພະເຢໂຫວາບໍ່ໄດ້ໃຫ້ເຮົາເຮັດການອັດສະຈັນ. ແຕ່ພະເຢໂຫວາບອກເຮົາໂດຍທາງຄຳພີໄບເບິນວ່າເມື່ອເຮົາຖືກຂົ່ມເຫງຍ້ອນເຮັດສິ່ງທີ່ດີ ເພິ່ນກໍພໍໃຈເຮົາແລະໃຫ້ພະລັງບໍລິສຸດກັບເຮົາ. (ອ່ານ 1 ເປໂຕ 3:14; 4:14) ຕອນນີ້ເຮົາບໍ່ຄວນອຸກໃຈວ່າເຮົາຈະເຮັດແນວໃດເມື່ອຖືກຂົ່ມເຫງໃນອະນາຄົດ ແຕ່ເຮົາຄວນເຮັດສິ່ງທີ່ເສີມຄວາມເຊື່ອແລະເຮັດໃຫ້ເຮົາໝັ້ນໃຈວ່າພະເຢໂຫວາຈະປົກປ້ອງເຮົາແລະຊ່ອຍເຮົາໃຫ້ລອດໄດ້. ຄືກັບພວກລູກສິດໃນສະໄໝກ່ອນ ເຮົາຕ້ອງໝັ້ນໃຈໃນຄຳສັນຍາຂອງພະເຢຊູທີ່ວ່າ: “ຂ້ອຍຈະໃຫ້ພວກເຈົ້າມີສະຕິປັນຍາແລະຮູ້ວ່າຈະເວົ້າຫຍັງ ຈົນພວກຄົນທີ່ຮ່ວມຫົວກັນຕໍ່ຕ້ານພວກເຈົ້າຈະຄັດຄ້ານຫຼືໂຕ້ແຍ່ງບໍ່ໄດ້.” ແລະພະເຢຊູຍັງໄດ້ສັນຍາອີກວ່າ: “ໃຫ້ອົດທົນຈົນເຖິງທີ່ສຸດ ແລ້ວພວກເຈົ້າຈະໄດ້ຊີວິດ.” (ລກ. 21:12-19) ແລະຢ່າລືມວ່າພະເຢໂຫວາຈື່ແມ່ນແຕ່ລາຍລະອຽດເລັກໆນ້ອຍໆຂອງຜູ້ຮັບໃຊ້ທີ່ສັດຊື່ທີ່ຕາຍໄປແລ້ວ ເພື່ອຈະປຸກເຂົາເຈົ້າໃຫ້ຄືນມາຈາກຕາຍ.
13. ເຮົາໄດ້ຮຽນຫຍັງຈາກເລື່ອງຂອງຄົນທີ່ບໍ່ມີໃຈສະຫງົບແລະບໍ່ເພິ່ງພະເຢໂຫວາ?
13 ນອກຈາກນັ້ນເຮົາຍັງຈະໄດ້ຮຽນຈາກເລື່ອງຂອງຄົນທີ່ບໍ່ມີໃຈສະຫງົບແລະບໍ່ໄດ້ເພິ່ງພະເຢໂຫວາ. ການຮຽນເລື່ອງເຫຼົ່ານີ້ຈະຊ່ອຍເຮົາບໍ່ໃຫ້ເຮັດຜິດຄືກັບເຂົາເຈົ້າເຊັ່ນ: ຕອນທີ່ກະສັດອາຊາປົກຄອງຢູດາມີກອງທັບໃຫຍ່ມາໂຈມຕີ ແລ້ວອາຊາກໍໝາຍເພິ່ງພະເຢໂຫວາ ແລະພະເຢໂຫວາກໍໄດ້ຊ່ອຍລາວໃຫ້ເອົາຊະນະໄດ້. (2 ຂ່າວ. 14:9-12) ຕໍ່ມາເມື່ອມີກອງທັບທີ່ນ້ອຍກວ່າມາໂຈມຕີອີກເຊິ່ງກໍຄືກອງທັບຂອງບາເອຊາກະສັດອິດສະຣາເອນ ລາວພັດຂໍຄວາມຊ່ວຍເຫຼືອຈາກພວກຊີລີແທນທີ່ຈະຂໍຄວາມຊ່ວຍເຫຼືອຈາກພະເຢໂຫວາຄືກັບທີ່ລາວເຄີຍເຮັດ. (2 ຂ່າວ. 16:1-3) ແລະຕອນທີ່ລາວປ່ວຍໜັກໃກ້ຈະຕາຍ ລາວກໍບໍ່ໄດ້ໝາຍເພິ່ງພະເຢໂຫວາໃຫ້ຊ່ອຍ.—2 ຂ່າວ. 16:12
14. ເຮົາໄດ້ບົດຮຽນຫຍັງຈາກຄວາມຜິດພາດຂອງກະສັດອາຊາ?
14 ຕອນທຳອິດກະສັດອາຊາກໍເພິ່ງພະເຢໂຫວາເມື່ອມີບັນຫາ. ແຕ່ຕໍ່ມາລາວພັດບໍ່ໄດ້ເພິ່ງພະເຢໂຫວາ ແຕ່ພະຍາຍາມແກ້ໄຂບັນຫາດ້ວຍຕົວເອງ. ແຜນຂອງອາຊາທີ່ຂໍໃຫ້ພວກຊີລີມາຊ່ອຍສູ້ກັບອິດສະຣາເອນອາດເບິ່ງຄືວ່າເປັນຄວາມຄິດທີ່ດີ ແຕ່ປະຊາຊົນຢູດາກໍສະຫງົບສຸກໄດ້ບໍ່ດົນ. ພະເຢໂຫວາບອກລາວຜ່ານທາງຜູ້ພະຍາກອນວ່າ: “ເພາະທ່ານໄດ້ເພິ່ງກະສັດຊີລີແລະບໍ່ໄດ້ເພິ່ງພະເຢໂຫວາພະເຈົ້າຂອງທ່ານ ເພາະເຫດນັ້ນທ່ານຈະຊະນະກອງທັບຊີລີບໍ່ໄດ້.” (2 ຂ່າວ. 16:7) ເຮົາຕ້ອງລະວັງທີ່ຈະບໍ່ໝັ້ນໃຈຕົວເອງຫຼາຍເກີນໄປຈົນຄິດວ່າເຮົາແກ້ໄຂບັນຫາໄດ້ດ້ວຍຕົວເອງໂດຍທີ່ບໍ່ເບິ່ງຄຳແນະນຳຈາກພະເຢໂຫວາທີ່ຢູ່ໃນຄຳພີໄບເບິນ. ເມື່ອມີເລື່ອງທີ່ຕ້ອງຟ້າວຕັດສິນໃຈ ເຮົາຄວນໝາຍເພິ່ງພະເຢໂຫວາ ແລ້ວເພິ່ນກໍຈະຊ່ອຍເຮົາໃຫ້ຕັດສິນໃຈໄດ້ຢ່າງຖືກຕ້ອງ.
ເບິ່ງຂໍ້ 15 *
15. ເຮົາອາດຕ້ອງເຮັດຫຍັງເມື່ອອ່ານຄຳພີໄບເບິນ?
15 (4) ຈື່ຂໍ້ພະຄຳພີ. ເມື່ອເຈົ້າເຫັນຂໍ້ຄຳພີທີ່ເວົ້າເຖິງຄວາມສຳຄັນຂອງການມີໃຈສະຫງົບແລະໝາຍເພິ່ງພະເຢໂຫວາກໍຂໍໃຫ້ຈື່ຂໍ້ເຫຼົ່ານັ້ນໄວ້. ແລະເພື່ອຈະຈື່ຂໍ້ນັ້ນໄດ້ເຈົ້າອາດຈະອ່ານອອກສຽງຫຼືຈົດໄວ້ ແລ້ວເອົາມາອ່ານຄືນອີກ. ພະເຢໂຫວາບອກໂຢຊວຍໃຫ້ອ່ານກົດໝາຍຂອງພະເຈົ້າເລື້ອຍໆເພື່ອລາວຈະຕັດສິນໃຈໄດ້ຢ່າງສະຫຼາດ. ສິ່ງທີ່ລາວອ່ານຈະຊ່ອຍລາວໃຫ້ກ້າຫານແລະບໍ່ຢ້ານທີ່ຈະນຳໜ້າປະຊາຊົນຂອງພະເຈົ້າ. (ຢຊວຍ. 1:8, 9) ມີຂໍ້ພະຄຳພີຫຼາຍຂໍ້ທີ່ຊ່ອຍເຮົາໃຫ້ມີໃຈສະຫງົບເມື່ອຮູ້ສຶກຢ້ານຫຼືອຸກໃຈ.—ເພງ. 27:1-3; ສຸພາ. 3:25, 26
ເບິ່ງຂໍ້ 16 *
16. ພະເຢໂຫວາໃຊ້ພີ່ນ້ອງໃນປະຊາຄົມເພື່ອຊ່ອຍເຮົາໃຫ້ມີໃຈສະຫງົບແລະໝາຍເພິ່ງເພິ່ນແນວໃດ?
16 (5) ຄົບຫາກັບພີ່ນ້ອງ. ພະເຢໂຫວາໃຊ້ພີ່ນ້ອງເພື່ອຊ່ອຍເຮົາໃຫ້ມີໃຈສະຫງົບແລະໝາຍເພິ່ງເພິ່ນເຊັ່ນ: ຢູ່ການປະຊຸມເຮົາໄດ້ຮັບປະໂຫຍດຈາກຄຳບັນລະຍາຍແລະຄວາມຄິດເຫັນຂອງພີ່ນ້ອງ ແລະເຮົາຍັງໄດ້ຮັບກຳລັງໃຈເມື່ອໄດ້ລົມກັບເຂົາເຈົ້າ. (ຮຣ. 10:24, 25) ນອກຈາກນັ້ນ ເຮົາຍັງໄດ້ຮັບກຳລັງໃຈຫຼາຍເມື່ອລົມເລື່ອງທີ່ເຮົາກັງວົນໃຫ້ກັບໝູ່ໃນປະຊາຄົມຟັງ. “ຄຳເວົ້າດີໆ” ຈາກໝູ່ຈະຊ່ອຍເຮົາໃຫ້ມີກຳລັງໃຈແລະອຸກໃຈໜ້ອຍລົງ.—ສຸພາ. 12:25, ລ.ມ.
ເບິ່ງຂໍ້ 17 *
17. ຕາມເຮັບເຣີ 6:19 ຄວາມຫວັງເລື່ອງການປົກຄອງຂອງພະເຈົ້າຊ່ອຍເຮົາແນວໃດໃຫ້ມີໃຈສະຫງົບເມື່ອມີບັນຫາທີ່ເຮັດໃຫ້ອຸກໃຈ?
17 (6) ຄິດເຖິງຄວາມຫວັງຂອງເຈົ້າຢູ່ສະເໝີ. ຄວາມຫວັງເລື່ອງການປົກຄອງຂອງພະເຈົ້າ “ເປັນຄືກັບສະໝໍເຮືອຂອງຊີວິດ” ທີ່ຊ່ອຍເຮົາໃຫ້ມີໃຈສະຫງົບເມື່ອເຈິບັນຫາທີ່ເຮັດໃຫ້ອຸກໃຈ. (ອ່ານເຮັບເຣີ 6:19) ໃຫ້ຄິດເຖິງຄຳສັນຍາທີ່ພະເຢໂຫວາໃຫ້ໃນອະນາຄົດວ່າຈະບໍ່ມີຄວາມອຸກໃຈອີກເລີຍ. (ເອຊາ. 65:17) ໃຫ້ນຶກພາບວ່າໂຕເຈົ້າເອງຢູ່ໃນໂລກໃໝ່ທີ່ມີແຕ່ຄວາມສະຫງົບສຸກແລະບໍ່ມີສິ່ງທີ່ບໍ່ດີ. (ມີເກ 4:4) ໃຫ້ບອກເລື່ອງຄວາມຫວັງນີ້ກັບຄົນອື່ນໂດຍປະກາດແລະຊ່ອຍຄົນໃຫ້ເຂົ້າມາເປັນລູກສິດເທົ່າທີ່ເຮັດໄດ້. ຖ້າເຈົ້າເຮັດແບບນີ້ “ຄວາມຫວັງຂອງເຈົ້າຈະເປັນຈິງໃນທີ່ສຸດ.”—ຮຣ 6:11
18. ເຮົາຈະເຈິຫຍັງໃນອະນາຄົດແລະເຮົາຈະເຮັດແນວໃດ?
18 ຍ້ອນລະບົບນີ້ໃກ້ຈະເຖິງຈຸດຈົບແລ້ວ ເຮົາຈຶ່ງມີບັນຫາຫຼາຍຢ່າງທີ່ເຮັດໃຫ້ອຸກໃຈ. ຂໍ້ພະຄຳພີປະຈຳປີ 2021 ຊ່ອຍເຮົາໃຫ້ອົດທົນກັບບັນຫາ ມີໃຈສະຫງົບ ແລະໃຫ້ເພິ່ງພະເຢໂຫວາບໍ່ແມ່ນເພິ່ງຕົວເອງ. ໃນລະຫວ່າງປີ 2021 ນີ້ໃຫ້ເຮົາສະແດງໃຫ້ເຫັນວ່າເຮົາເຊື່ອໃນຄຳສັນຍາຂອງພະເຢໂຫວາທີ່ວ່າ: “ຖ້າພວກເຈົ້າມີໃຈທີ່ສະຫງົບແລະໄວ້ວາງໃຈເຮົາ ພວກເຈົ້າກໍຈະມີຄວາມເຂັ້ມແຂງ.”—ເອຊາ. 30:15, ລ.ມ.
ເພງ 8 ພະເຢໂຫວາເປັນທີ່ເພິ່ງຂອງພວກເຮົາ
^ ຂໍ້ 5 ຂໍ້ພະຄຳພີປະຈຳປີ 2021 ເນັ້ນວ່າເປັນເລື່ອງສຳຄັນຫຼາຍທີ່ເຮົາຈະເພິ່ງພະເຢໂຫວາເມື່ອມີບັນຫາທີ່ເຮັດໃຫ້ອຸກໃຈທັງໃນຕອນນີ້ແລະໃນອະນາຄົດ. ໃນບົດຄວາມນີ້ຈະເວົ້າເຖິງບາງຢ່າງທີ່ຊ່ອຍໃຫ້ເຮົາເອົາຄຳແນະນຳໃນຂໍ້ພະຄຳພີປະຈຳປີນີ້ໄປໃຊ້.
^ ຂໍ້ 5 ພີ່ນ້ອງທີ່ສັດຊື່ບາງຄົນກໍຮູ້ສຶກວິຕົກກັງວົນຫຼາຍ. ຄວາມຮູ້ສຶກແບບນີ້ເປັນພະຍາດຊະນິດໜຶ່ງ ແລະບໍ່ແມ່ນຄວາມອຸກໃຈໃນແບບທີ່ພະເຢຊູເວົ້າເຖິງ.
^ ຂໍ້ 63 ຄຳອະທິບາຍຮູບພາບ: (1) ຕະຫຼອດມື້ນັ້ນພີ່ນ້ອງຍິງຄົນໜຶ່ງໄດ້ອະທິດຖານຫຼາຍເທື່ອກ່ຽວກັບເລື່ອງທີ່ລາວອຸກໃຈ.
^ ຂໍ້ 65 ຄຳອະທິບາຍຮູບພາບ: (2) ຕອນກິນເຂົ້າສວາຍ ລາວໄດ້ອ່ານຄຳພີໄບເບິນ.
^ ຂໍ້ 67 ຄຳອະທິບາຍຮູບພາບ: (3) ລາວໄດ້ຄິດຕຶກຕອງເຖິງຕົວຢ່າງທີ່ດີແລະຕົວຢ່າງທີ່ບໍ່ດີທີ່ຢູ່ໃນຄຳພີໄບເບິນ.
^ ຂໍ້ 69 ຄຳອະທິບາຍຮູບພາບ: (4) ລາວຂຽນຂໍ້ຄຳພີທີ່ໃຫ້ກຳລັງໃຈທີ່ລາວຢາກຈື່ ແລ້ວຕິດໄວ້ຝາຕູ້ເຢັນ.
^ ຂໍ້ 71 ຄຳອະທິບາຍຮູບພາບ: (5) ລາວມີຄວາມສຸກທີ່ໄດ້ເຮັດວຽກປະກາດກັບໝູ່.
^ ຂໍ້ 73 ຄຳອະທິບາຍຮູບພາບ: (6) ລາວໄດ້ຄິດເຖິງຄວາມຫວັງໃນອະນາຄົດຢູ່ສະເໝີ.
