1. Chihula muka tunahase kulihulisa, chize ahulishile Mwangana Ndavichi?

TUVOSENA twasaka kutwama mukuunda. Naumwe wauchi asaka kulizakamina. Oloze lwola lumwe tweji kulizakaminanga. Vangamba jaYehova vamwe vanahase kuhulisa chihula chize Ndavichi ahulishile Yehova ngwenyi: “Nangulizakaminanga nakulyonyinga mumuchima wami hakumbi hakumbi palanga nakumwaka uka?”—Samu 13:2.

2. Vyuma muka natushimutwila muchihande chino?

² Numba tuhu lwola lumwe tunahase kulizakamina, oloze kuli vyuma vimwe tunahase kulinga mangana tuhone kulizakamina chikuma. Muchihande chino, natuvangila kushimutwila havyuma vimwe vize vinahase kutulingisa tulizakamine. Kufumaho, natushimutwila vyuma 6 vize vinahase kutukafwa tuunde muchima kachi nge tuli nakumona ukalu.

3. Vyuma muka vinahase kutulingisa tulizakamine vize katweshi kuhasa kuhonesako?

³ Kuli vyuma vyavivulu vinahase kutulingisa tulizakamine. Kaha vyuma vimwe katweshi kuhasa kuvihonesa kusolokako. Chakutalilaho, mwaka himwaka, jindando javyakulya navyakuvwala najizuvo jakufwetela jili nakunyinyinako lika. Kaha nawa, vakwetu vaka-milimo, chipwe vakwetu vaka-shikola vanahase kutushinjila tulinge vyuma vyavipi vyakufwana nge kwonga chipwe ujila. Ulyanyi nawa uli nakuvulilako. Tuli nakumona ukalu kanou mwomwo tuli nakuyoyela mukaye kavatu vaze kavakavangiza jindongo jamuMbimbiliyako. Satana  uze apwa kalunga wakaye kano, atachikiza ngwenyi “kulizakamina hakatwamino kamyaka yino,” chinahase kulingisa vatu vamwe vechenga kuzachila Yehova. (Mateu 13:22; Yowa. 1, 5:19) Shikaho katwalikomokelako hakumona mukaye munazale ukalu uze uli nakulingisa vatu vavavulu valizakamine.

4. Uno ukalu unahase kutulingisa twivwenga ngachilihi?

⁴ Tunahase kulizakamina chikuma haukalu uze kanda uchisoloke. Chakutalilaho, tunahase kulizakamina ngwetu pamo katweshi kupwa najimbongo jakutamo jakulikafwa najoko, chipwe pamo ngwetu natuviza nakuhona kuzata milimo, chipwe ngwetu navatufumisa milimo. Tunahase kulizakamina ngwetu pamo natuhokola jishimbi jaKalunga nge tuli mucheseko. Kalinwomu Satana azachise vatu jenyi mangana valukuke vatu jaKalunga. Ngocho tunahase kulizakamina ngwetu pamo katweshi kukahasa kumikako. Tunahase kulihulisa ngwetu, ‘Uno chapwa chakuhenga kulizakamina havyuma kana tahi?’

5. Uno Yesu alumbunwine ika hakwamba ngwenyi: “Litwaminenu kulizakaminanga”?

⁵ Twatachikiza ngwetu Yesu alwezele vaka-kumukavangiza ngwenyi: “Litwaminenu kulizakaminanga.” (Mateu 6:25) Kutala Yesu apwile nakulumbununa ngwenyi katwatela kulizakamina numba chachindendeko tahi? Nduma. Anukenu ngwenu vangamba jaYehova vamwe vakushishika valizakaminyinenga. Chipwe ngocho, Yehova atwalileho lika kuvazanga. * (Vamya. 1, 19:4; Samu 6:3) Yesu apwile nakutukolezeza. Kasakile tulizakaminenga chikuma havyuma vyamukuyoya, nakuhona kuzachila kanawa Kalungako. Vyuma muka twatela kulinga nge tunalizakamina?—Talenu lipwata lyakwamba ngwavo, “ Mwakuhonesela Kulizakamina.”

6. Kweseka naWavaka-Fwilipi 4:6, 7, chuma muka chinahase kutukafwa tuunde muchima?

⁶ (1) Lombenunga shimbu yosena. Nge munalizakamina havyuma vimwe, kaha lombenu kuli Yehova amikafwe. (Petu. 1, 5:7) Yehova nahase kukumbulula kulomba chenu hakumihana “kuunda chaKalunga chize chahambakana kunangakana [chavatu] chosena.” (Tangenu Wavaka-Fwilipi 4:6, 7.) Yehova mwaunjisa michima yetu hakutuhana shipilitu yenyi yajila.—Ngale. 5:22.

7. Vishina muka twatela kwanuka nge tuli nakulomba kuli Kalunga?

⁷ Nge muli nakulomba kuli Yehova, mulwezenu vyuma vyosena vili kumuchima wenu. Mulwezenu ukalu muli nawo, nakumulumbunwina omwo muli nakwivwa haukalu kana. Mulombenu amihane mangana, mangana muwane mwakuukumishila. Nge mwakukumishila ukalu kana mwauchi, mulombenu Yehova amikafwe muhone kuhomba. Nge namumulweza vyuma vyosena vili kumuchima wenu, kaha mukuhita chalwola namutachikiza mujila nakumbulwilamo kulomba chenu. Kaha nge kamikumbulwile washiko, kanda kwecha kulombako. Yehova asaka nawa mumulombenga naluzema.—Luka 11:8-10.

8. Vyuma muka twatela kuvuluka hakulomba kuli Yehova?

⁸ Omu namulombanga kuli Yehova nakumulweza kulizakamina chenu, anukenunga nawa kumusakwilila. Chapwa chamwaza kushinganyeka havyuma vyamwaza atulingila numba tuhu tuli nakumona ukalu. Lwola lumwe chinahase kumikaluhwila kuwana mazu akuzachisa hakumulumbunwina  omwo muli nakwivwa. Chipwe ngocho, anukenu ngwenu Yehova nahase kukumbulula kulomba chenu numba nge munambe kaha ngwenu ‘Ngukafwe.’—Miji. 2, 18:31; Loma 8:26.

9. Tunahase kuwana ngachilihi mukingo wamwenemwene?

⁹ (2) Pendaminenunga hamangana aYehova. Mulikulukaji lyamyaka lyakusokesa 8 B.C.E., vaYuta vavevwishile woma kuli vaAsulya. Kavasakile kuvafungulula kuli vaAsulyako, ngocho valombele vaEjipitu vavakafweko. (Isa. 30:1, 2) Yehova avahuhumwine ngwenyi kufwelela vaEjipitu nachivanehela ukalu. (Isa. 30:7, 12, 13) Yehova alwezele vaYuleya mwakuwanyina mukingo wamwenemwene. Avalwezele kuhichila muli Isaya ngwenyi: “Namukwata ngolo kachi nge namuunda nakungufwelela.”—Isa. 30:15b.

10. Hanenu vyakutalilaho vyakusolola lwola twatela kusolola ngwetu twafwelela Yehova.

¹⁰ Natusolola ngachilihi ngwetu twafwelela Yehova? Achishinganyekenu havyakutalilaho vino: Namulinga ngachilihi nge munawane milimo yajimbongo jajivulu, yize nawa nayimililanga lwola lwakulinga vyuma vyakushipilitu? Nyi ngachilihi nge mukwenu muka-milimo, mwatonda mukalimbate oloze ikiye kapwa Chinjiho wakumbapachisako? Nyi ngachilihi nge kausoko uze mwafwelela, mwamilweza ngwenyi nge namutwalaho kuzachila Yehova, kaha usoko naufwa? Halwola lwakufwana ngana, chinahase kumikaluhwila kusakula vyakulinga, oloze Yehova mwamikafwa. (Mateu 6:33; 10:37; Koli. 1, 7:39) Kutala namufwelela Yehova nakwitavila amikafwe tahi?

11. Mijimbu muka yamuMbimbiliya yize tunahase kulinangula mangana yitukafwe tuundenga muchima nge vanatufumbukila?

¹¹ (3) Linangulenu kuvyakutalilaho vyamwaza nevi vyavipi. MuMbimbiliya mwatwama mijimbu yayivulu yize yasolola kulema chakuunda muchima nakufwelela Yehova. Omu namulinangula mijimbu kana, namumona omwo Kalunga akafwilenga vangamba jenyi vaunde michima halwola vavafumbukililenga. Chakutalilaho, omu vaka-zango yayinene yavaYuleya vakanyishile vaposetolo kwambulula, vakiko kavevwile womako, oloze vahamukile nakuvakumbulula ngwavo: “Twatela kwononoka Kalunga hakupwa ikiye muka-kuyula, kuhambakana vatu.” (Vili. 5:29) Nahanyima yakuvaveta, vaposetolo kavalizakaminyineko. Mwomwo ika? Mwomwo vatachikijile ngwavo Yehova apwile kusali yavo, kaha nawa avevwililile uselewa. Ngocho vatwalileho kwambulula mujimbu wamwaza. (Vili. 5:40-42) Kaha nawa omu kambaji Setefwano vapwile nakumuveta, aunjile muchima, ngocho kumeso enyi “kwapwile nge kumeso akangelo.” (Vili. 6:12-15) Mwomwo ika? Mwomwo atachikijile ngwenyi Yehova amwivwililile uselewa.

12. Kweseka naWaPetulu 1, 3:14 na 4:14, mwomwo ika twatela kupwa vakuwahilila nge vali nakutuyanjisa?

¹² Vaposetolo vatachikijile chikupu ngwavo Yehova apwile navakiko, mwomwo avahanyine ngolo jakulinga vyuma vyakukomwesa. (Vili. 5:12-16; 6:8) Oloze makumbi ano, Yehova katuhana ngolo jakulinga vyuma vyakukomwesako. Chipwe ngocho, atufwelelesa kuhichila muMazu enyi ngwenyi kachi nge navatuyanjisa mwomwo yakulinga chuma chakwoloka, mwatwivwila kuwaha nakutuhana shipilitu yenyi. (Tangenu WaPetulu 1, 3:14; 4:14.) Muchishishisa chakulizakamina haluyanjisa natukamona kulutwe, twatela kushinganyeka havyuma twatela kulinga oholyapwa mangana tufwelele chikuma Yehova ngwetu mwakatukafwa nakutuyovola. Twatela kulondezeza tumbaji vakulivanga  hakufwelela mazu atushika Yesu ngwenyi: “Nangukamihana mazu namangana aze navakahona vaka-kumimanyina nakole vosena kulingulula chipwe kuhamikako.” Yesu atufwelelesa nawa ngwenyi: “Hakukakachila chenu hakiko vene namukalwila myono yenu.” (Luka 21:12-19) Twatela kwanuka nawa ngwetu Yehova kavulyama vangamba jenyi vaze veji kushishikanga swi nakukufwako. Shikaho mwakavasangula.

13. Uno kulinangula vyakutalilaho vyavaze vahonene kuunda muchima nakufwelela Yehova nachitukafwa ngachilihi?

¹³ Tunahase nawa kulinangula kuvyakutalilaho vyavatu vaze vahonene kuunda michima nakufwelela Yehova. Kulinangula vyakutalilaho kana nachitukafwa tuhone kulimbenja, ngana muze valimbenjele vakiko. Chakutalilaho, omu Mwangana Asa wamuYuta aputukile kuyula, apendaminyine hali Yehova omu vamulukukile kulizavu lyalinene lyamaswalale, ngocho Yehova amukafwile afungulule vaka-kole jenyi. (Miji. 2, 14:9-12) Oloze kutwala muze, omu vamulukukile kulizavu lyalindende lyamaswalale jaMwangana wavaIsalele Mbasha, Asa afwetele maswalale javaSulya mangana vamukafwe kulwa jita muchishishisa chakupendamina hali Yehova, ngana muze alingile hakavanga. (Miji. 2, 16:1-3) Kaha nawa omu avijile musongo waunene wakufwa nakuyoya, kapendaminyine hali Yehova amukafweko.—Miji. 2, 16:12.

14. Chishina muka natulinangula kuvyuma alimbenjele Asa?

¹⁴ Hakavanga Asa apendaminyinenga hali Yehova omu amwenenga ukalu, oloze kutwala muze echele kupendamina hali Kalunga amukafwe, nakufwila jino kukumisa ukalu mungolo jenyi. Kufweta vaSulya vamukafwe kulwa navaIsalele, chasolokele nge hijila yimwe yakukumishilamo ukalu. Oloze jino ukalu kawakumineko. Yehova amulwezele kuhichila muli kapolofweto ngwenyi: “Hakuwana nge kawafwelelanga muli Yehova Kalunga koveko, oloze wafwelelanga muli Mwangana waSulya, ngocho maswalale jaMwangana waSulya vanakuchinyi.” (Miji. 2, 16:7) Nayetu nawa katwatela kufwila kukumisanga ukalu mungolo jetuko oloze twatela kupendamina hali Yehova atutwaminyine kuhichila muMazu enyi. Twatela kuunda muchima nakupendamina hali Yehova, numba tuhu tuli muukalu uze uli nakusakiwa kuwana washi mwakulingila, kaha mwatukafwa tusakule kanawa vyakulinga.

15. Vyuma muka twatela kulinga nge tuli nakutanga Mbimbiliya?

¹⁵ (4) Laminenunga Visoneka mumutwe. Kachi nge munatange mujimbu wamuMbimbiliya, uze wasolola kulema chakuunda muchima nakufwelela Yehova, kaha fwilenu kwanukangako jivesi jimwe nakujilamina mumutwe. Chuma nachimikafwa kwanukanga jivesi kana shina kutangilanga helu chipwe kujisoneka nakujitanganga kuswa kumwe. Yoshuwa vamulwezele atangenga mukanda waJishimbi lwola lwosena nalizu lyamwishi mangana alingenga mwakwoloka. Vyuma atangilenga mumukanda waJishimbi vyamukafwile ahone kwivwa woma, oloze apwile wakumika nakutwaminyina vatu jaKalunga. (Yoshu. 1:8, 9) MuMbimbiliya mwatwama jivesi jize jinahase kumikafwa muunde muchima, numba tuhu kunasoloka vyuma vize vyatelanga kumilingisa mulizakamine chipwe kwivwa woma.—Samu 27:1-3; Vishi. 3:25, 26.

16. Yehova eji kuzachisanga ngachilihi vandumbwetu muchikungulwilo hakutukafwa tuunde muchima nakumufwelela?

¹⁶ (5) Likatenunga navatu jaKalunga. Yehova eji kuzachisanga vandumbwetu mangana atukafwe tuunde muchima nakumufwelela. Nge tunayi kukukunguluka, tweji kunganyalanga  kuvihande veji kuhanjikanga vandumbwetu nakukumbulula chavo, nahakushimutwila navo vyuma vyakulikolezeza. (Hepe. 10:24, 25) Vandumbwetu nawa vanahase kutukolezeza kachi nge natuvalwezanga vyuma vize vili nakutulingisa tulizakamine. “Mazu amwaza” aze navatulweza anahase kutulingisa tukeheseko kulizakamina.—Vishi. 12:25.

17. Kweseka naWavaHepeleu 6:19, vyuma twatalilila vize naukatulingila Wangana, navitukafwa ngachilihi tuunde muchima chamokomoko naukalu?

¹⁷ (6) Zamisenu lutalililo lwenu. Vyuma twatalilila vize naukatulingila Wangana vyapwa nge “chikungo chawato chakwimikisa myono yetu.” Kaha vyeji kutukafwanga tuunde muchima chamokomoko nakumona ukalu. (Tangenu WavaHepeleu 6:19.) Shinganyekenunga havyuma atushika kukatulingila Yehova kulutwe. Halwola kana kakweshi kukapwa vyuma vyakukatulingisa tukalizakamineko. (Isa. 65:17) Shinganyekenu muli mukaye kakahya kakuunda muze kamweshi kukapwa vyuma vyavipiko. (Mika 4:4) Lutalililo lwenu lunahase nawa kuzama kachi nge namulwezangako vakwenu vyakaye kakahya. Zatenu noho hakumina ngolo jenu mumulimo wakwambulula, nakunangula vatu vapwenga tumbaji. Nge namulinga ngocho, kaha namupwa “nalutalililo lwamwenemwene palanga nakusongo.”—Hepe. 6:11.

18. Uno ukalu muka tunahase kumona kulutwe, kaha vyuma muka twatela kulinga nge unasoloka?

¹⁸ Omu tuli nakupandama kukukuma chakatwamino kamyaka yino, natumonanga ukalu wauvulu wakutulingisa tulizakamine. Chisoneka chamwaka wa 2021, nachitukafwa tuundenga muchima hakufwelela Yehova, keshi mungolo jetuko. Shikaho mumwaka uno wa 2021, tufwilenu kusolola ngwetu twafwelela mazu atushika Yehova ngwenyi: “Namukwata ngolo kachi nge namuunda nakungufwelela.”—Isa. 30:15.