1. Xi wħud mill-​qaddejja taʼ Ġeħova liema mistoqsija jaf jistaqsu?

KULĦADD jixtieq ikollu ħajja trankwilla. Ħadd minna ma jixtieq ikun inkwetat. Imma xi kultant, nistgħu nħossuna ansjużi ħafna. Fil-​fatt, xi wħud mill-​qaddejja taʼ Ġeħova jaf jistaqsu l-​istess mistoqsija li staqsa s-​Sultan David lil Ġeħova: “Kemm se ndum nirreżisti waħdi, bi swied taʼ qalb il-​jum kollu?”—Salm 13:2.

2. X’se niddiskutu f’dan l-​artiklu?

² Minkejja li xi kultant ilkoll inħossuna ansjużi, hemm xi affarijiet li nistgħu nagħmlu biex nikkontrollaw l-​ansjetà. F’dan l-​artiklu, l-​ewwel se niddiskutu xi affarijiet li jġegħluna nkunu ansjużi. Imbagħad, se niddiskutu sitt affarijiet li nistgħu nagħmlu biex jgħinuna nibqgħu kalmi meta jkollna l-​problemi.

3. Liema affarijiet jistgħu jġegħluna nkunu ansjużi, u aħna għandna kontroll fuqhom?

³ Hemm affarijiet li jistgħu jġegħluna nkunu ansjużi u xi wħud minnhom m’għandniex kontroll fuqhom. Pereżempju, aħna m’għandniex kontroll fuq kemm jogħla l-​prezz tal-​ikel, tal-​ħwejjeġ, u tal-​kera. Ukoll, ma nistgħux nikkontrollaw kemm-​il darba dawk li jaħdmu magħna jew tal-​iskola jipprovaw iġegħluna nkunu diżonesti jew nagħmlu affarijiet immorali. U ma nistgħux inwaqqfu lin-​nies milli jwettqu l-​kriminalità. Aħna qed niffaċċjaw dawn il-​problemi għax ngħixu f’dinja fejn il-​biċċa  l-​kbira tan-​nies ma jiħdux deċiżjonijiet fi qbil mal-​prinċipji tal-​Bibbja. Satana, l-​alla taʼ din id-​dinja, jaf li xi nies se jħallu “l-​ansjetà taʼ din is-​sistema” żżommhom milli jaqdu lil Ġeħova. (Mt. 13:22; 1 Ġw. 5:19) Mela mhux taʼ b’xejn li d-​dinja hi mimlija problemi li jġiegħlu n-​nies jinkwetaw.

4. X’jistaʼ jiġri jekk inkunu inkwetati żżejjed dwar il-​problemi tagħna?

⁴ Aħna nistgħu tant inkunu inkwetati dwar il-​problemi tagħna li ma nkunux nistgħu niffokaw fuq affarijiet oħrajn. Pereżempju, nistgħu ninkwetaw li mhux se naqilgħu biżżejjed flus biex nixtru l-​bżonnijiet tagħna. Jew ninkwetaw li nimirdu u ma nkunux nistgħu mmorru x-​xogħol jew saħansitra nitilfu l-​impjieg tagħna. Forsi ninkwetaw ukoll li mhux se nibqgħu leali lejn Ġeħova meta niġu ttantati biex nagħmlu xi ħaġa ħażina. Satana dalwaqt se jġiegħel lil dawk taħt il-​kontroll tiegħu biex jattakkaw lin-​nies t’Alla, għalhekk forsi ninkwetaw dwar kif se naġixxu għal dan l-​attakk. Forsi naħsbu, ‘Huwa ħażin li ninkwieta dwar dawn l-​affarijiet?’

5. Ġesù x’ried ifisser meta qal: “Tibqgħux tkunu ansjużi”?

⁵ Aħna nafu li Ġesù qal lid-​dixxipli tiegħu: “Tibqgħux tkunu ansjużi.” (Mt. 6:25) Ifisser dan li Ġesù qalilna biex ma ninkwetaw fuq xejn? Le! Ftakar, li xi qaddejja leali taʼ Ġeħova fil-​passat ukoll ħassewhom ansjużi. Imma Ġeħova xorta kien kuntent bihom. * (1 Slat. 19:4; Salm 6:3) Meta Ġesù qal dan il-​kliem kien qed jinkuraġġina. Hu ma jridniex noqogħdu ninkwetaw dwar l-​affarijiet li jkollna bżonn tant li ninsew kemm hu importanti li naqdu lil Ġeħova f’ħajjitna. Allura x’nistgħu nagħmlu meta nħossuna ansjużi?—Ara l-​kaxxa “ Kif Tagħmel Dan.”

6. Skont Filippin 4:6, 7, x’jistaʼ jgħinek biex tħossok kalm?

⁶ (1) Itlob spiss. Meta tkun inkwetat dwar xi problema, int tistaʼ titlob lil Ġeħova għall-​għajnuna. (1 Pt. 5:7) Ġeħova jistaʼ jwieġeb it-​talb tiegħek billi jagħtik “il-​paċi t’Alla li tisboq kull ħsieb.” (Aqra Filippin 4:6, 7.) Ġeħova se jagħtik din il-​paċi permezz tal-​ispirtu qaddis.—Gal. 5:22.

7. Meta nitolbu lil Alla, x’għandna nżommu f’moħħna?

⁷ Meta titlob lil Ġeħova, għidlu dak kollu li qed tħoss. Kun speċifiku. Għidlu x’inhi l-​problema u kif qed tħossok dwarha. Jekk hu possibbli li ssolvi din il-​problema, itolbu biex jagħtik l-​għerf ħalli tkun taf x’għandek tagħmel u jagħtik is-​saħħa biex tagħmilha. Jekk ma tistaʼ tagħmel xejn dwarha, itlob lil Ġeħova biex jgħinek tikkontrolla l-​ħsibijiet u l-​ansjetà tiegħek. Meta tkun speċifiku fit-​talb tiegħek, maż-​żmien se tkun tistaʼ tara kif Ġeħova wieġbu. Jekk Ġeħova ma jweġibx it-​talb tiegħek mill-​ewwel, tiqafx titlob. Ġeħova mhux biss iridek tkun speċifiku imma jridek tibqaʼ titolbu.—Lq. 11:8-​10.

8. Xi rridu nsemmu wkoll fit-​talb tagħna?

⁸ Meta titfaʼ l-​ansjetà tiegħek fuq Ġeħova permezz tat-​talb, kun ċert li tirringrazzjah ukoll. Huwa tajjeb li naħsbu  dwar l-​affarijiet tajbin li għandna, anki meta jkollna ħafna problemi. Imma x’għandek tagħmel jekk ma tafx x’se tgħid lil Ġeħova dwar kif qed tħossok? Ftakar li Ġeħova se jwieġeb it-​talba tiegħek, anki jekk tgħidlu sempliċement ‘Ġeħova, jekk jogħġbok, għinni!’—2 Kron. 18:31; Rum. 8:26.

9. Xi trid tagħmel meta tkun qed tibżaʼ?

⁹ (2) Strieħ fuq l-​għerf taʼ Ġeħova u mhux fuq fehmtek stess. Fi żmien il-​profeta Isaija, in-​nies f’​Ġuda bdew jibżgħu li se jiġu attakkati mill-​Assirjani. Huma ma ridux li l-​Assirjani jirbħulhom, u għalhekk talbu lill-​Eġizzjani biex jgħinuhom. (Is. 30:1, 2) Ġeħova wissiehom li jekk jafdaw fl-​Eġizzjani kien se jaħbtilhom ħażin. (Is. 30:7, 12, 13) Permezz taʼ Isaija, Ġeħova qal lin-​nies x’kellhom jagħmlu biex ma jibżgħux. Hu qalilhom: “Se tkunu setgħanin jekk ma tinkwetawx u jkollkom il-​fiduċja” f’Ġeħova.—Is. 30:15b.

10. F’liema sitwazzjonijiet nistgħu nuru li nafdaw f’Ġeħova?

¹⁰ Kif nistgħu nuru li nafdaw f’Ġeħova? Ejja nikkunsidraw xi eżempji. Ejja ngħidu li offrewlek xogħol b’paga aħjar, imma se jkollok taħdem ħafna iktar sigħat u b’hekk mhux se tkun tistaʼ taqdi lil Ġeħova daqs kemm qed taqdih issa. Jew forsi xi ħadd fuq ix-​xogħol jieħu grazzja miegħek, imma din il-​persuna mhijiex Xhud taʼ Ġeħova. Jew xi ngħidu jekk membru tal-​familja ma jkunx irid jaf iżjed bik jekk tibqaʼ taqdi lil Ġeħova? F’kull sitwazzjoni se jkollok tieħu deċiżjoni diffiċli, imma Ġeħova se jagħtik id-​direzzjoni li jkollok bżonn. (Mt. 6:33; 10:37; 1 Kor. 7:39) Il-​mistoqsija hi, se tafda f’Ġeħova u tobdi d-​direzzjoni tiegħu?

11. Liema rakkonti tal-​Bibbja tistaʼ tistudja biex tibqaʼ kalm meta tiffaċċja l-​oppożizzjoni?

¹¹ (3) Tgħallem mill-​eżempji tajbin u ħżiena. Fil-​Bibbja nsibu ħafna rakkonti li juruna kemm hu importanti li nibqgħu kalmi u nafdaw f’Ġeħova. Hekk kif tistudja dawn ir-​rakkonti, innota x’għen lill-​qaddejja t’Alla jibqgħu kalmi waqt li ffaċċjaw oppożizzjoni minn oħrajn li opponewhom. Pereżempju, meta l-​qorti suprema Lhudija ordnat lill-​appostli biex ma jibqgħux jippritkaw, huma ma beżgħux. Minflok, bil-​kuraġġ wieġbu: “Jeħtieġ li aħna nobdu lil Alla bħala ħakkiem u mhux lill-​bnedmin.” (Atti 5:29) Anki wara li ġew imsawtin, l-​appostli baqgħu kalmi. Għala? Għax huma kienu jafu li Ġeħova qiegħed magħhom u li kien kuntent bihom. B’hekk, huma baqgħu jippritkaw l-​aħbar tajba. (Atti 5:40-​42) U anki meta d-​dixxiplu Stiefnu kien se jiġi maqtul, hu baqaʼ kalm tant li wiċċu “kien bħal wiċċ t’anġlu.” (Atti 6:12-​15) Għala? Għax hu kien ċert li Ġeħova kien kuntent bih.

12. Skont l-​1 Pietru 3:14 u 4:14, għala nistgħu nkunu ferħanin meta nkunu ppersegwitati?

¹² L-​appostli kellhom evidenza ċara li Ġeħova kien qiegħed magħhom. Hu kien tahom il-​qawwa biex jagħmlu l-​mirakli. (Atti 5:12-​16; 6:8) Ġeħova lilna ma jagħtiniex il-​qawwa biex nagħmlu l-​mirakli. Però, permezz tal-​Kelma tiegħu, Ġeħova jgħidilna li meta nkunu ppersegwitati minħabba s-​sewwa, hu jkun kuntent bina u l-​ispirtu tiegħu jkun magħna. (Aqra l-​1 Pietru 3:14; 4:14.) Allura, m’għandniex ninkwetaw dwar x’se nagħmlu jekk fil-​futur inkunu ppersegwitati.  Minflok, għandna nagħmlu l-​almu tagħna biex insaħħu l-​fiduċja tagħna li Ġeħova jistaʼ jgħinna u jsalvana. Bħalma għamlu d-​dixxipli tal-​bidu, aħna rridu nafdaw fil-​wegħda taʼ Ġesù: ‘Nagħtikom kliem u għerf, li dawk kollha li jopponukom ma jkunux jistgħu jiqfulkom jew imerukom.’ Hu qalilna: “Bis-​sabar tagħkom tiksbu ruħkom.” (Lq. 21:12-​19) Qatt tinsa li Ġeħova jibqaʼ jiftakar sal-​inqas ħaġa li jagħmlu l-​qaddejja tiegħu li jmutu leali lejh, biex b’hekk ikun jistaʼ jirxoxtahom.

13. Kif nistgħu nibbenefikaw meta nistudjaw dwar dawk li ma baqgħux kalmi u ma fdawx f’Ġeħova?

¹³ Aħna nistgħu nitgħallmu wkoll mill-​esperjenzi taʼ dawk li ma baqgħux kalmi u ma fdawx f’Ġeħova. Billi nistudjaw dawn l-​eżempji ħżiena, se nkunu nistgħu nevitaw li nagħmlu l-​istess żbalji tagħhom. Pereżempju, meta Asa sar is-​sultan taʼ Ġuda u armata kbira ġiet biex tattakkah, hu straħ fuq Ġeħova. (2 Kron. 14:9-​12) Imma iktar tard, meta Bagħsa, is-​sultan taʼ Iżrael, ġie biex jattakkah b’armata ħafna iżgħar, hu ma straħx fuq Ġeħova bħalma għamel qabel. Minflok, ħallas lis-​Sirjani biex jgħinuh. (2 Kron. 16:1-​3) Ukoll, fl-​aħħar taʼ ħajtu meta kien marid serjament, hu ma straħx fuq Ġeħova biex jgħinu.—2 Kron. 16:12.

14. X’nistgħu nitgħallmu mill-​iżbalji taʼ Asa?

¹⁴ Fil-​bidu meta Asa kellu l-​problemi, hu mar għand Ġeħova għall-​għajnuna. Imma iktar tard, hu ma straħx fuq Alla għall-​għajnuna. Minflok, prova jsolvi l-​problemi tiegħu hu. Meta Asa talab l-​għajnuna mingħand l-​Assirjani biex jiġġieled kontra Iżrael forsi kienet tidher idea tajba. Imma, il-​paċi f’Iżrael ma damitx wisq. Permezz taʼ profeta, Ġeħova qallu: “Talli striħajt fuq is-​sultan tas-​Sirja u ma striħajtx fuq Ġeħova Alla tiegħek, il-​qawwa militari tas-​sultan tas-​Sirja ħarbitlek minn idejk.” (2 Kron. 16:7) Aħna rridu noqogħdu attenti u ma naħsbux li nistgħu nsolvu l-​problemi aħna stess mingħajr ma nitolbu lil Ġeħova biex jiggwidana permezz tal-​Kelma tiegħu. Anki meta jkollna bżonn nieħdu deċiżjoni malajr, aħna rridu nistrieħu fuq Ġeħova, u hu se jgħinna biex nieħdu d-​deċiżjoni t-​tajba.

15. X’tistaʼ tagħmel meta taqra l-​Bibbja?

¹⁵ (4) Tgħallem bl-​amment versi mill-​Bibbja. Meta ssib versi mill-​Bibbja li juru kemm hu importanti li tibqaʼ kalm u tafda f’Ġeħova, ipprova tgħallimhom bl-​amment. Jekk taqrahom b’leħen għoli jew tiktibhom u tarahom spiss, jistaʼ jgħinek biex tiftakarhom iktar. Ġeħova kmanda lil Ġożwè biex jaqra l-​ktieb tal-​Liġi minn taħt l-​ilsien kuljum biex jaġixxi b’mod għaqli. Dak li qara mil-​Liġi kien se jgħinu wkoll biex ma jibżax u bil-​kuraġġ imexxi lin-​nies t’Alla. (Ġoż. 1:8, 9, ntt.) Ħafna versi mill-​Bibbja jistgħu jgħinuk tibqaʼ kalm f’sitwazzjonijiet li spiss tħossok ansjuż jew beżgħan.—Salm 27:1-​3; Prov. 3:25, 26.

16. Ġeħova kif juża l-​aħwa biex jgħinna nibqgħu kalmi u nafdaw fih?

¹⁶ (5) Agħmilha man-​nies t’Alla. Ġeħova juża lill-​aħwa biex jgħinna nibqgħu kalmi u nafdaw fih. Fil-​laqgħat tagħna, aħna nistgħu nibbenefikaw mit-​taħditiet, mill-​kummenti, u mill-​konversazzjonijiet inkuraġġanti li jkollna mal-​aħwa. (Ebr. 10:24, 25) Aħna nistgħu nkunu inkuraġġiti wkoll meta ngħidu lill-​ħbieb  tal-​qalb fil-​kongregazzjoni dak li qed jinkwetana. ‘Kelma tajba’ mingħand ħabib tistaʼ tgħinna biex ma nħossuniex inkwetati żżejjed.—Prov. 12:25.

17. Skont Ebrej 6:19, it-​tama tagħna fis-​Saltna kif tistaʼ tgħinna nibqgħu kalmi fi żminijiet diffiċli?

¹⁷ (6) Żomm it-​tama tiegħek soda. It-​tama tagħna fis-​Saltna hi “bħal ankra għal ruħna,” għax tgħinna nibqgħu sodi minkejja l-​isfidi jew il-​ħsibijiet li jinkwetawna. (Aqra Ebrej 6:19.) Aħseb u mmedita dwar il-​futur li wegħedna Ġeħova. F’dak iż-​żmien, ħadd mhu se jkollu fuq xiex jinkwieta. (Is. 65:17) Immaġina lilek innifsek f’dinja mimlija paċi, fejn mhux se jkun hemm iktar affarijiet ħżiena. (Mik. 4:4) Int se tkompli ssaħħaħ it-​tama tiegħek meta titkellem m’oħrajn dwar id-​dinja l-​ġdida. Agħmel dak kollu li tistaʼ fl-​ippritkar u fix-​xogħol taʼ li tagħmel dixxipli. Jekk tagħmel hekk, inti se ‘jkollok fiduċja sħiħa fit-​tama sat-​tmiem.’—Ebr. 6:11.

18. X’se niffaċċjaw fil-​futur, u aħna x’nistgħu nagħmlu?

¹⁸ Minħabba li qegħdin viċin it-​tmiem taʼ din is-​sistema, se niffaċċjaw iktar problemi li jagħmluna ansjużi. L-​iskrittura għas-​sena 2021 tistaʼ tgħinna niffaċċjaw dawn il-​problemi u nibqgħu kalmi, mhux bis-​saħħa tagħna, imma billi nafdaw f’Ġeħova. Matul din is-​sena, ejja nuru bl-​azzjonijiet tagħna li għandna fidi fil-​wegħda taʼ Ġeħova: “Se tkunu setgħanin jekk ma tinkwetawx u jkollkom il-​fiduċja.”—Is. 30:15.