1. Hiihaa ntoko Mwene Tavite, tiheeni mmoha ti mmoha a hiyo oniikoheiye?

OOTHENE ahu ninnachuna okhalano okumi woomaaleleya. Haavo mmoha a hiyo onachuna okhala awuukhuwa. Nyenya mu ilukuluku ikina, akhweya ninnakhala awuukhuwa. Nthowa na yeeyo, akina a hiyo ninnapaka nikoho ntoko nenlo Mwene Tavite aampakenleiye Yehova ariki: “Onii ohoosheye murima aka ni okumi aka ohiyu ni othana ophiyerya liini?”—Sal. 13:2.

2. Tiheeni nnahaalaahu othokororya mmwaha yoola?

² Moothananiha hannawerya omaala okhala awuukhuwa, nyenya nnanwerya ovootha wuukhuwa. Mmwaha yoola, wuupaceryani nnahaala othokororya ichu seiyo inaneeriha okhala awuukhuwa. Voocharela, nnahaala othokororya ichu thanu nammoha, seiyo nnaphwanelaahu opaka wi ntitelele okhala oomaaleleya vaavaa nnahoolelaahu makacamiho.

3. Okhinyererya taani nnahoolelaahu, nave apwanne ninnawerya ovootha yoowo?

³ Ichu inaneeriha okhala awuukhuwa ti seiyo nihinaweryaahu ophwanya. Ntoko yootakiherya, hannawerya okukuca owalamela wa yoolya, soowara, mpuro wookhalavo, ichu seiyo sinaaceheyeryiwa eyaakha ti eyaakha; nyenya tho hannawerya wiivareryela ikwaha kavi asinthamwene oomutekoni naari ooxikola anahaalaaya oneererya wi nipake echu yoohiphwanelela naari yoocheka ni yaawo. Nave hinaanono owerya wa omaaliha ichu soonanara wi siheereyeke mmukuma nnakhalaahuwo. Ninnahoolela makacamiho yaala nthowa nawi nnakhala mu elapo yeeyo achu ancipale ahinacharihaaya malakiheryo a Piipiliya. Satana, mulamuleli elapo yeela, “sooweiha sa mwilaponi” inanwerya waahiiha achu omurumeela Yehova. (Mat. 13:22; 1 Yoh.  5:19) Tahi yootikhiniha osuwela wi elapo, yoosareya ni ichu seiyo inaneeriha okhala awuukhuwa!

4. Tiheeni enahaala weereya wakhala wi ninnatitelela okhala awuukhuwa ni makacamiho ahu?

⁴ Vaavaa nnapaceryaahu okhala awuukhuwa vooloca sa makacamiho ahu, hannasuwela echu yaweera. Ntoko yootakiherya, nnanwerya okhala awuukhuwa nthowa nawi hannawerya okhalano ikhorowa sawaakhwanela wi nikhwaaniherye soothowa sahu, naari nnamukhala awoova nthowa na ereca wi enamunihiiha olapa naari oyeleela muteko. Nnamukhala awuukhuwa nthowa na okhinyereryiwa opaka echu yeeyo ehinamuhakalaliha Muluku. Moohilekela Satana onahaala waapharihela akhaviheryi awe wi yaahiphele achu a Muluku, nave tho nnamukhala awuukhuwa nthowa na ohisuwela tiheeni enahaala weereya mu ohiphela yoowo. Akhweya nnamwiikoha, ‘apwanne ti woonanara okhala awuukhuwa ni ichu seiha?’

5. Tiheeni Yesu aachuneiye oloca ni masu awi: “Muhiipiwe murima”?

⁵ Hiyaano noosuwela yeeyo aaleenleiye oomuchara awe ariki: “Muhiipiwe murima.” (Mat. 6:25) Apwanne Yesu aachuna oloca wi hannaphwanela wiipiwa murima ni echu vyakala? Mweeparipari hooye! Ophiyerya wi alapeli oororomeleya a Yehova akhalai yaahihoolela nikacamiho na okhala awuukhuwa, nyenya hiyaayelenle weemereryiwa ni Yehova. * (1 Mam. 19:4; Sal. 6:3) Mweeparipari Yesu aamunihakararya. Owo hanachuna wi nikhale awuukhuwaxa ni ichu sa okumi ahu ophiyerya wi evolowele omurumeela wahu Muluku. Vano tiheeni nnaphwanelaahu weera wi nivoothe wuukhuwa?—Moone ekaaxa “ Nni Neereno Hai.”

6. Mwawiiwanana ni Filipi 4:6, 7, tiheeni enahaala onikhaviherya okhala oomaaleleya?

⁶ (1) Mvekele moohihiyererya. Vaavaa munakhalaanyu awuukhuwa muveke nikhaviheryo wa Yehova. (1 Ped. 5:7) Owo onahaala woovahaani “murecele wa Muluku, yoowo opwanhe wuupuwela wahu woothene wa [omuchu].” (Mwaalakhanye Filipi 4:6, 7.) Moorweela wa munepa awe waweela Yehova onamunimaaliha ni wuukhuwa wahu.—Gal. 5:22.

7. Tiheeni nnaphwanelaahu wuupuwela vaavaa nnavekelaahu wa Muluku?

⁷ Vaavaa munamwaacamelaanyu Yehova mu nivekelo, muhule murima nyu. Muloce mooluluwanya. Mmuleele nikacamiho nanyu, nave muloce moonelo anyu vooloca sa nikacamiho nanyu. Wakhala wi hamunawerya omaliha nikacamiho nanyu, mumveke Yehova miruku wi musuwele echu yaweera ni mukhalelo wa weerano. Wakhala wi hamunawerya omaliha nikacamiho nanyu, mumveke Yehova nikhaviheryo wi muhikhale awuukhuwaxa vooloca sa nikacamiho nanyu. Vaavaa munalocaanyu nikacamiho nanyu mooluluwanya mu nivekelo moovira wa elukuluku munanwerya woona mookwakwaleya naakhulo na Yehova. Wakhala wi naakhulo na nivekelo haniphin’ye mwawaakuveya, muhiceecheye. Yehova hanachuna wi pahiru mukhaleke ooluluwanya mmavekelo anyu, nyenya tho owo onachuna wi mutitelele ovekela.—Luka 11:8-10.

8. Tiheeni nnaphwanelaahu ophitaanyerya mmavekelo ahu?

⁸ Vaavaa munamuleelaanyu Yehova sawuukhula sanyu mu nivekelo, muroromele wi moophitaanyerya masu a othamalela. Vaavaa nnahoolelaahu makacamiho mancipale, nnanwerya othamalela ichu soothene saphaama nryaahuno. Wakhala wi hamunasuwela echu yooloca, muupuwele wi Yehova onanwerya waakhula nivekelo vyakala nookhweya, ntoko  ‘Khwoo Yehova mukikhaviherye!’—2 Math. 18:31; Aro. 8:26.

9. Nni niphwanye woowi okhapeleleya weeparipari?

⁹ (2) Muroromele miruku sa Yehova, ohiya sawinyu. Mmahiku a mulipa a miririmu Isaiya, Ayuta yaanoopopihiwa ni Asiriya. Ayuta yaanawoova Asiriya ophiyerya wi yaahiveka nikhaviheryo ni Ayikuputu. (Isa. 30:1, 2) Yehova aahaalopola wi woona wi yaaroromela Ayikuputu awo yaahaala wiiruuhela makacamiho. (Isa. 30:7, 12, 13) Orweela wa mulipa a miririmu Isaiya, Yehova aahaaleela Ayuta ti woowi yaahaalaaya ophwanyawo okhapeleleya weeparipari. Owo oriye: “Ikuru sanyu inii ikhale moorweela wa otitelela omaaleleya ni okhalano nroromelo mwa Yehova.”—Isa. 30:15b.

10. Mmikhalelo taani nnahaalaahu wooniherya wi ninnamuroromela Yehova?

¹⁰ Nni nooniherye hai wi ninnamuroromela Yehova? Muupuwele sootakiherya inacharela. Muupuwele wi munnavahiwa muteko yoowo waahaala woolivakaani ikhorowa sincipale nave tho onamaliha elukuluku yincipale yeeyo mwaahaalaanyu omalihaka mmuteko wa Yehova. Mwaanyiherye wi nthamwene anyu oomutekoni onnooniherya nchuno na wookhwelaani nave owo tahi muchu opatisiwe naari onamurumeela Yehova. Naari mwaanyiherye wi muchu a veemusini munamusivelaanyu onnoohiihaani omurumeela Yehova ariki: “Omuthanle onamuchunaawe miyaano naari Muluku.” Mmikhalelo ntoko seiya, onakhala woovila opaka yoolakelela nyenya Yehova onamunivaha nikhaviheryo nenlo nnachunaahu. (Mat. 6:33; 10:37; 1 Kor. 7:39) Vano ninnakhumelela nikoho nawi, Apwanne munahaala omuroromela Yehova ni ochariha ohoolela wawe?

11. Sootakiherya taani sa Mpiipiliyani munaphwanelaanyu ohuserya wi mutitelele okhala oomaaleleya vaavaa munahoolelaanyu wiiciwa?

¹¹ (3) Muhuserya orweela wa sootakiherya saphaama ni soonanara. Piipiliya ookhalano saweereya inahaala onikhaviherya otitelela okhala oomaaleleya ni omuroromela Yehova. Vaavaa munahuseryaanyu saweereya seiya, moone tiheeni yaakhavihenrye alapeli a Muluku otitelela okhala oomaaleleya naamwi ehoolelaka wiiciwa. Ntoko yootakiherya, vaavaa alamuleli o Yuteya yeerenryaaya waamaaliha Arummwa wi emaale olaleerya, awo hiyomve. Moolipa murima, awo yaaloca eriki: “Onnakhweleya omwiiwelela Muluku, opwaha achu.” (Saw. 5:29) Naamwi emanle owaxuliwa, arummwa hiyaari oothanana. Ntakhara heeni? Nthowa nawi awo yaanasuwela wi Yehova aahaala waakhaviherya mweelukuluku yeele. Awo yaanasuwela wi Yehova aari mmakupa aya. Nthowa na yeeyo, awo yaahititelela olaleerya michaka saphaama. (Saw. 5:40-42) Yootakiherya ekina ti ya oohuserya Estefanu, ahaalaka okhwa, Estefanu aahititelela okhala oomaaleleya ophiyerya wi ‘ethoi awe yaanooneya ntoko ya munkeelo.’ (Saw. 6:12-15) Ntakhara heeni? Nthowa nawi owo aanasuwela wi Yehova aahihakalala ni yene.

12. Mwawiiwanana ni 1 Pedro 3:14 ni 4:14, ntakhara heeni nnaphwanelaahu okhala oohakalala naamwi nihoolelaka wiiciwa?

¹² Arummwa yaanaroromela wi Yehova aari mmakupa aya. Owo aanaavaha ikuru wi ewerye opaka sootikhiniha. (Saw. 5:12-16; 6:8) Eyo heneereya ni hiyaano olelo. Orweela Mmasu awe, Yehova onnanroromeliha wi wakhala wi ninnahooxeya nthowa na ororomeleya wahu, owo onnahakalala ni mukhalelo ahu nave onnanivaha munepa awe waweela. (Mwaalakhanye 1 Pedro 3:14; 4:14.) Mwawiihiiha, muhikhale awuukhuwa nthowa na ohisuwela tiheeni enahaala weereya vaavaa yoohooxa etokotoko enahaalaaya opacerya, ohiya yeeyo, mutikitheryeye mu yeeyo munaphwanelaanyu opaka wi mulipihe nroromelo nanyu mwa Yehova yoowo onahaala wookhaviheryaani ni  owoopolaani. Hiihaa ntoko arummwa oopacerya munaphwanela ororomela yoolaiherya ya Yesu yawi: “Yoomi ene kinamoovahaani masu ooloca ni miruku soohiwerya okhoociwa naari ovaanyiwa ti amwiicani.” Nave ninnaroromela masu a Yesu awi: “Mwa nthiti nanyu, muneeraanyu mwaakhele okumi anyu.” (Luka 21:12-19) Hannaphwanela ocuwala wi alapeli oororomeleya yaawo akhwile nivano Yehova onnawuupuwela. Ni masuwelelo yaawo oreiyeno, owo onahaala waaviiha mookhwani.

13. Tiheeni nnahuseryaahu orweela wa sootakiherya sa yaale yahaatitelenle okhala oomaaleleya ni omuroromela Yehova?

¹³ Hiyaano tho nnanwerya ohuserya orweela wa saweereya sa yaale yaahin’ye okhala oomaaleleya ni omuroromela Yehova. Ohuserya sootakiherya seiya soonanara inamunikhaviherya ohipaka soohesa imohamoha seiyo yaapankaaya. Ntoko yootakiherya, omapacereryo wa olamulelo wa Mwene Asa nikhuuru ntokweene na anakhoco naahirwa wi niwane ni Ayuta, nthowa na omuroromela Yehova Asa aahiwerya ovootha. (2 Math. 14:9-12) Ohoolo waya, nikhuuru ntokweene na anakhoco naahooleliwa ni Mwene Baasha o Isarayeli aahiwoopopiha Ayuta. Woona wi Asa Mwene a Ayuta aarino anakhoco vakhaani, owo haamuroromenle Yehova ntoko enreiye woopaceryani ophiyerya wi aahaathuma anakhoco a Asiriya wi emukhaviherye. (2 Math. 16:1-3) Wookuchulani wa okumi awe, vaavaa aapacenryeiye wiiceliwa Asa haavenke tho nikhaviheryo na Yehova.—2 Math. 16:12.

14. Tiheeni nnahuseryaahu orweela wa soohesa sa Asa?

¹⁴ Wuupaceryani, Asa aanaavya nikhaviheryo na Yehova vaavaa aahooleleiye makacamiho. Nyenya voocharela, owo aalakelela omaliha makacamiho awe meekheiye. Wuupaceryani, vaavaa Asa aalakelenleiye oveka nikhaviheryo wa Asiriya, yaakhala ntoko wi aahikhumelela phaama. Nyenya okhumelela wawe phaama waari wa elukuluku tonto. Orweela mwa mulipa a miririmu awe, Yehova aahimuleela Asa ariki: “Vawi woomuroromela mwene a aAraamu, ohiya waahaamela Apwiya Muluku aa, ti vaavanto oyeleenlaa ovootha muloko wakhoco wa mwene a Araamu.” (2 Math. 16:7) Hiyaano tho nnaphwanela okhalano ekaasoope wi nihererye omaliha makacamiho ahu meekhihu nihaanvye ohoolela wa Yehova orweela Mmasu awe Piipiliya. Naamwi ochuneyaka opaka yoolakelela mwawaakuveya, nnaphwanela okhala oomaaleleya ni omuroromela Yehova, nave owo onamunikhaviherya opaka yoolakelela yaphaama.

15. Tiheeni nnaphwanelaahu opaka vaavaa nnamwaalakhanyaahu Piipiliya?

¹⁵ (4) Muupuweleke soorepa sa Mpiipiliyani. Vaavaa munamwaalakhanyaanyu Piipiliya mweererye ophwanya soorepa seiyo inahaala wookhaviheryaani otitelela okhala oomaaleleya ni omuroromela Yehova. Enamukhala ya mphurelo waalakhanya ni nsu noovuwa naari orepela wi okhaleke wookhweya ophwanya soorepa seiyo. Yehova aahimulamulela Yosuwa wi amwaalakhanyeke liivuru a Nlamulo moohihiyererya ni masu avathivathi. Eyo yaamukhaviherya ohiya pahiru opaka ichu mwamiruku nyenya tho ovootha woova yoowo akhweya aahaaleiye ohoolela mmuteko awe. (Yos. 1:8, 9) Moolikana, Soorepa sa Mpiipiliyani inamookhaviheryaani okhala oomaaleleya mmikhalelo seiyo saahaala oweerihaani okhala awuukhuwa naari awoova.—Sal. 27:1-3; Masi. 3:25, 26.

16. Yehova onapharihela hai muloko wi onikhaviherye okhala oomaaleleya ni otitelela omuroromela Yoowo?

¹⁶ (5) Mukhaleke vamoha ni achu a Muluku. Yehova onnaapharihela anna ni arokora wi enikhaviherye otitelela okhala oomaaleleya ni omuroromela yene. Mmithukumano,  ninnaphura mahusiheryo yaawo anaperekhiwa orweela mmiyaha, maakhulo aalipa oowiriyana, ni ochekula woolipiha yoowo nnakhalaahuno ni anna ni arokora ahu. (Ahe. 10:24, 25) Nnanwerya tho okhala oolipiheya vaavaa nnalocaahu moonelo ahu wa asinthamwene oororomeleya a mmulokoni. “Masu aphaama” anarweela wa asinthamwene ananwerya onikhaviherya wi nihikhale awuukhuwaxa.—Masi. 12:25.

17. Mwawiiwanana ni Ahebri 6:19, ewehereryo ahu enanikhaviherya hai otitelela okhala oomaaleleya mu ilukuluku sookacamiha?

¹⁷ (6) Mulipihe ewehereryo anyu. Ewehereryo ahu enalikana ni “aankora” yeeyo enanlipiha moohipwacha mikhalelo soovila naari wuukhuwa yoowo nnahoolelaahu. (Mwaalakhanye Ahebri 6:19.) Muupuweleke sa omwaahiyu yoowo Yehova ororomelinheiye mu elukuluku yeeyo muchu ori oothene oneereiye ahikhale awuukhuwa. (Isa. 65:17) Mwaanyiherye muri mmureceleni mu elapo evyaani mummo ichu soonanara sihinahaalaaya weereyakamo. (Mik. 4:4) Nyuwo munahaala olipiha ewehereryo anyu vaavaa munaalelaanyu akina vooloca sa elapo evyaani. Mpake soothene ophiyerya munaweryelaanyuvo mmuteko woolaleerya ni waapaka oohuserya. Mweerano hiiha, munanwerya ophwanya waakhwanela wa “owehererya ophiyerya womaliheryani.”—Ahe. 6:11.

18. Tiheeni enahaala weereya muhoolo, nave tiheeni nnaphwanelaahu weera?

¹⁸ Vaavaa elapo ela enaphiyaaya omakuchuweloni, nnahaala ohoolela makacamiho mancipale yaawo anahaala oneeriha okhala awuukhuwa. Yoorepa ahu ya eyaakha ya 2021 enanwerya onikhaviherya ohoolela makacamiho yaala, ni otitelela okhala oomaaleleya ohiya orweela wa ikuru sahu, nyenya moorweela wa omuroromela Yehova. Variyari va eyaakha yeela, hankooni nooniherye mu saweera sahu wi ninnaroromela yoolaiherya ya Yehova yeeyo eni: “Ikuru sanyu inii ikhale moorweela wa otitelela omaaleleya ni okhalano nroromelo.”—Isa. 30:15, TNM.