1. ¿Diosta sirvijcunaca rey David shina imatataj tapurinchij?

TUCUICUNAMI tranquilos, alli causanata munanchij. Pero maipica sinchi llaquicunatami ahuantana canchij. Huaquinpica rey David shinami sintirinchij. Paica Jehová Diostaca: “¿Maicamataj ñucaca llaquita apacushalla? ¿Maicamataj punllanta ñuca shungupi llaquilla cashari?” nishpami tapurca (Salmo 13:2).

2. ¿Cai yachaipica imacunallatataj yachashun?

² Llaquicunamanta mana anchuri tucushpapish tranquilomi causai tucunchij. Cai yachaipimi imacunallamanta yallitaj sustari tucushcata ricushun. Qꞌuipaca problemacunahuan cashpapish tranquilo sintiringapajca 6 yuyaicunatami ricushun.

3. ¿Maipica imacunallamantataj sustarinchij?

³ Maipica ima llaquicunata mana anchuchi tucushcamantami sustarinchij. Por ejemplo, micunacunapish, churanacunapish, arriendocunapish huatan huatanmi subishpa catin. Trabajopipish, escuelapipish compañerocunaca mai ratoca mana allita rurachunmi obligasha ningacuna. Ñucanchij causan lugarcunapipish ama shuhuachun, ama millai cosascunata rurachunca mana jarcai tucunchijchu. Achcacunaca Biblia yachachishcacunata mana catishcamantami chashna millaita rurashpa causancuna. Satanasca cai mundopi tiyaj llaquicunamanta  yallitaj sustarishpa Diosta sirvinata saquichunmi munan (Mateo 13:22; 1 Juan 5:19). Chaimantami cai mundopica achca llaquicuna tiyan.

4. ¿Cai mundopi llaquicunata ricushpaca ima shinataj sintirinchij?

⁴ Cai mundopi llaquicunata ricushpami maipica dimastij sustarinchij. Por ejemplo, tal vez minishtirishca cosascunata randingapaj mana cullquita charishachu o ungushpami trabajota pirdisha nishpami sustari tucunchij. Mana cashpaca ima tentacioncunamanta mana jarcarishpami Yayitu Diosta llaquichisha nishpachari yuyanchij. Satanaspish, paita catijcunapish ñucata llaquichijpica mana ahuantai tucushachu nishpachari sustarinchij. ¿Chashna sustarinaca allichu canga?

5. ¿Jesusca ama sustarichijchu nishpaca imatataj nisha nirca?

⁵ Jesusca paipaj discipulocunataca ama sustarichijchu nircami (Mateo 6:25). Cashna nishpaca imamantapish mana preocuparina cashcataca mana nicurcachu. Ñaupa punllacunapipish Diosta huaquin sirvijcunaca llaquicunata charishcamantami sustarircacuna. Sustarishpapish Diospaj ñaupajpi allimi ricurircacuna (1 Reyes 19:4; Salmo 6:3). * Jesusca ama sustarichijchu nishpaca llaquicunamanta mana yallitaj sustarishpa Diosta sirvinata mana saquichunmi chashna nirca. Chaimanta, ¿ama yallitaj sustaringapajca imatataj rurana canchij? (“ Caita rurashunchij” nishca recuadrota ricui).

6. Filipenses 4:6, 7-pi nishca shinaca ¿tranquilo sintiringapajca imatataj rurana canchij?

⁶ 1) Yaya Diosta mañarashunchij. Problemacunahuan cashpaca tucui shunguhuanmi Yaya Diosta cutin cutin mañana canchij (1 Pedro 5:7). Paita mañanata mana saquijpica ‘shungupipish, yuyaipipish tranquilo sintirichunmi’ Diosca paipaj espíritu santohuan ayudanga (Filipenses 4:6, 7-ta liyipai; Gálatas 5:22).

7. ¿Diosta mañacushpaca imacunallamantataj parlana canchij?

⁷ Ima problemata charishpaca ima shina sintirishcataca tucuita Jehová Diosman huillashunchij. Problemata allichi tucushpaca alli yuyaita cuchun, fuerzasta cuchun mañashunchij. Cutin chai problemata mana allichi tucushpaca chai problemamanta ama yallitaj sustaringapaj ayudachun nishpami mañana canchij. Chashna cutin cutin Yayitu Diosta mañashpaca tiempohuanca pai ima shina ayudashcatami cuentata cushun. Yayitu Dios ñucanchij mañashcacunata mana utca cutichijpipish ama shaicurishunchij. Jehová Diosca paita mañarashpa catichunmi munan (Lucas 11:8-10).

8. ¿Yayitu Diosta mañacushpaca imacunallamantataj agradicina canchij?

⁸ Llaquicunahuan cashpa Yayitu Diosta mañacushpaca ñucanchij causaipi alli cosascunata charishcamantami agradicina canchij. Maipica ima shina sintirishcata Yayitu Diosman tucuita huillanaca sinchimi canga. Shinapish susto pena cashcamanta Jehová Diosta ayudahuai nijllapica paica ayudangami (2 Crónicas 18:31; Romanos 8:26).

9. ¿Manchaihuan cashpaca pitataj ayudachun mañana canchij?

⁹ 2) Ñucanchijllapi confianapaj randica Jehová Diospi confiashunchij. Profeta Isaías causashca punllacunapica Judá llajtapi causajcunaca asiriocuna tucuchinga nishpami manchajcuna carca. Shinallataj paicunapaj esclavosmi tucushun nishpami Egiptota  ayudachun mañarcacuna (Isaías 30:1, 2). Pero Jehová Diosca paicunataca Egiptopaj ayudataca ama mashcaichijchu nishpami advirtirca (Isaías 30:7, 12, 13). Yaya Diosca paipaj pueblo tranquilo sintirichunmi Isaiasman cashna huillachun cacharca: ‘Jehovapi shunguta churashpa, casijlla causajpica muyujta pirca shinami cancunataca paillataj cuidanga’ (Isaías 30:15b).

10. ¿Imacunallapitaj Jehová Diospi confiashcata ricuchina canchij?

¹⁰ ¿Imacunallapitaj Jehová Diospi confiashcata ricuchina canchij? Caipi yuyashun: cantachari achca cullquita ganai tucushca trabajopi trabajachun invitan. Pero cashna trabajopi trabajai callarishpaca Jehová Diostaca ña manachari tanto sirvi tucungui. Mana cashpaca cambaj trabajopica Diosta mana sirvij compañero, compañerachari canhuan llujshinata munan. Cambaj cꞌuyashca familiapish Jehová Diosta sirvishpaca ña mana ñucanchij familiachu cangui ningacunachari. Cashna shina jarcaicunata chꞌimbapuranaca sinchimi can. Pero Jehová Diosmi ñucanchijtaca alli decidichun ayudanga (Mateo 6:33; 10:37; 1 Corintios 7:39). Chaimanta Jehovapi confiashpa, paipaj nishcacunata cazushunchij.

11. ¿Tranquilo sintiringapajca picunapaj ejemplomantataj yachana canchij?

¹¹ 3) Ñaupa punllapi Diosta sirvijcunapaj ejemplomanta yachashunchij. Bibliapica Diosta alli sirvijcunapaj o mana alli sirvijcunapaj ejemplocunami tiyan. Huaquincunapaj ejemploca ama yallitaj sustarichun, Jehová Diosllapi confiachunmi ayudan. Bibliapica Diosta alli sirvijcuna sinchi jarcaicunahuan chꞌimbapuracujpi Jehová Dios ima shina ayudashcatami ricui tucunchij. Por ejemplo, apostolcuna ama huillashpa catichunmi Jerusalenpi tiyaj autoridadcunaca jarcarcacuna. Pero paicunaca mana manchashpami: “Runacunata cazunapaj randica, Taita Diostami cazuna canchij” nircacuna (Hechos 5:29). Paicunata macajpipish paicunaca mana mancharcacunachu. ¿Imamantataj mana mancharcacuna? Paicunaca Jehová Dios paicunata apoyacushcamantami mana mancharcacuna. Chaimi paicunaca mana manchashpa, predicashpa catircacuna (Hechos 5:40-42). Shinallataj Jesusta catij Estebanpish paita huañuchinata yachashpapish paica tranquilomi sintirirca. Chaimantami paipaj ñahuica ‘angelpaj ñahui shina carca’ (Hechos 6:12-15). ¿Imamantataj Estebanca tranquilo sintirirca? Paica Jehová Dios tucuipi ayudacushcataca tucui shunguhuanmi crirca.

12. 1 Pedro 3:14 y 4:14-pi nishca shinaca ¿ñucanchijta catirashpa llaquichijpipish imamantataj cushilla cai tucunchij?

¹² Jehová Diosca apostolcunamanca milagrocunata rurachunmi poderta cushca carca. Chaimantami paicunaca Jehová Dios ayudacushcata crircacuna (Hechos 5:12-16; 6:8). Cunan tiempocunapica Jehová Diosca ñucanchijcuna milagrocunata rurachunca mana poderta cushcachu. Shinapish Jehová Diosca ñucanchijta catirashpa llaquichijpica paipaj espíritu santohuanmi cashna llaquicunata chꞌimbapurachun ayudan (1 Pedro 3:14; 4:14-ta liyipai). Shamuj punllapi ñucanchijta catirashpa llaquichinapi yuyacunapaj randica ñucanchij crishcacunata sinchiyachishunchij. Chashnami Jehová Dios ñucanchijta quishpichinata tucui shunguhuan crishun. Ñucanchijpish Jesuspaj discipulocuna shinallatajmi Jesús ima nishcapi yuyana canchij. Paica: ‘Cancunamanca ñucami imallata rimanata, yachaitapish cusha. Chaipica cancunata pꞌiñajcunaca imata mana juchachi tucushpa  upalla saquiringallami. Ñucata catirajcunaca quishpiringuichijmi’ nircami (Lucas 21:12-19). Diosca paita sirvijcuna huañujpipish paipaj yuyaipimi charin. Chaimantami paicunataca causachingalla.

13. ¿Imamantataj Diospi mana confiajcunapaj ejemplomanta estudiana canchij?

¹³ Huaquincunaca Diosta sirvishpapish ama yallitaj sustaringapajca Diospi mana confiarcacunachu. Paicuna shina ama pandaringapajmi paicunapaj ejemplomanta estudiana canchij. Por ejemplo, rey Asaca Judá llajtata mandai callarishpaca chai llajtata achca soldadocuna llaquichinaman shamujpica Jehová Diospimi confiarca. Chaimantami Jehová Diosca contracunata mishachun ayudarca (2 Crónicas 14:9-12). Pero asha tiempo qꞌuipa Israelmanta mandaj Baasa paipaj asha soldadocunahuan macanacunaman shamujpica ¿Asaca imatataj rurarca? Paica ñaupa punlla shinaca mandaj Baasata mishangapajca Jehová Diospica mana confiarcachu. Ashtahuanpish Siria llajtata mandaj ayudachunmi pagarca (2 Crónicas 16:1-3). Shinallataj Asaca sinchi ungüihuan cashpapish, huañunata yachashpapish Jehová Diospaj ayudataca mana mashcarcachu (2 Crónicas 16:12).

14. ¿Mandaj Asá pandarishcamantaca imatataj yachai tucunchij?

¹⁴ Callaripica rey Asaca ima problemacunata charishpaca Jehová Diostami mashcaj carca. Pero asha tiempo qꞌuipaca Jehová Dios ayudachunca mana mashcarcachu. Ima cosascunata rurangapajpish pai munashca shinami rurai callarirca. Rey Asaca israelitacunata mishangapajpish siriocunatami ayudachun mañarca. Chaita ruranaca paipajca alli shinami ricurishcanga. Shinapish pai chashna rurashcacunaca imapaj mana valircachu. Jehová Diosca shuj profetamanca: “Canca canta Mandaj Dios ayudachun paipi shunguta churanapaj randica, Siria llajtata jatun mandajtamari ayudachun mañashcangui. Chaimi Siria llajtata jatun mandajpaj soldadocunaca, cambaj maquimanta quishpirishpa ringacuna” nishpami huillachirca (2 Crónicas 16:7). Ñucanchijpish imata ruracushpapish mana ñucanchijllapi confianachu canchij. Chaipaj randica Jehová Dios paipaj Shimihuan ayudachunmi mashcana canchij. Huaquinpica ratochari ima decisionta agllana tucunga. Pero alli decidingapajca mana yallitaj sustarishpami Jehová Diospi confiana canchij.

15. ¿Bibliata liyicushpaca imatataj rurana canchij?

¹⁵ 4) Bibliamanta versocunata de memoria yachashunchij. Bibliata liyicushpaca tranquilo sintirinamanta, Yayitu Diospi confianamanta parlaj versocunatami de memoria yachai tucunchij. Chai versocunata alta vozpi liyishpa, escribishpa o repasashpami yachai tucunchij. Jehová Diosca Josuetaca pai Quillcachishcacunata liyichun, liyishcapi punllapish, tutapish cutin cutin yuyarichunmi mandarca. Chashnami paica mana manchashpa Diospaj pueblota ñaupajman alli pusharca (Josué 1:8, 9). Ñucanchijpish imamantapish ama yallitaj sustaringapajmi de memoria huaquin versocunataca yachai tucunchij (Salmo 27:1-3; Proverbios 3:25, 26).

16. ¿Jehová Diosca huauqui panicunahuan tranquilo sintirichun, paipi confiachunca ima shinataj ayudan?

¹⁶ 5) Huauqui panicunahuan pasangapaj tiempota surcushunchij. Jehová Diosca huauqui panicunahuanmi tranquilo sintirichun, paipi confiachun ayudan. Tandanacuicunapica ñaupajmanta yachachijcunamanta, huauqui panicunapaj comentariocunamanta, tucui huauqui panicunahuan parlanacushcamantami  beneficiarinchij (Hebreos 10:24, 25). Congregacionpipish ñucanchij amigocunamanca ima shina sintirishcatami parlana canchij. Paicuna cꞌuyaj shimihuan parlashpaca tranquilo, cushilla sintirichunmi ayudangacuna (Proverbios 12:25).

17. ¿Problemacunahuan chꞌimbapurangapajca imamantataj Dios cusha nishcacunapi yuyailla causana canchij?

¹⁷ 6) Dios cusha nishcapi yuyailla causashunchij. Diospaj Gobiernopi shuyanaca barcota charicuj fierro shinami ñucanchijtaca sinchita ruran. Problemacunata charishpapish ama yallitaj sustarichunmi ayudan (Hebreos 6:19-ta liyipai). Chaimanta shamuj punllacunapi paraíso Allpapi tranquilo causai tiyanapi, mana alli cosascunaca ña mana tiyanapi yuyashunchij (Isaías 65:17; Miqueas 4:4). Yayitu Dios imallata ruragrishcatapish shujtajcunaman huillashunchij. Shujtajcunatapish Jesuspaj discipulocuna tucuchun ayudashunchij. Caicunata rurashpaca ñucanchij shuyacushcacuna pajtaringacamami seguros cashun (Hebreos 6:11).

18. a) ¿Cai tucuri punllacuna cꞌuchuyamucushcamantaca imacunahuantaj chꞌimbapurashun? b) ¿Chai sinchi punllacunapi ahuantachunca imataj ayudanga?

¹⁸ Cai tucuri punllacuna cꞌuchuyamucushcamantami ashtahuan problemacunata, preocupacioncunata charishun. 2021 huatapaj versoca problemacunata charishpapish mana yallitaj sustarishpa Jehová Diospi confiachunmi ayudan. Chaimanta tucui cai huatapica Isaías 30:15-pi ima nishcata yuyashunchij. Chaipica Jehová Diosca: “Ñucapi shunguta churashpa, casijlla causajpica muyujta pirca shinami casha” ninmi.