1. Mei te Ariki ko Davida rai, eaa ta tetai pae i ui ana?

E INANGARO ana tatou pouroa i tetai oraanga marū e te ‘au. Kare e tangata e reka ana me taitaia ratou. Inara, tetai au taime, ka ngatā ia tatou i te akakoromaki i te au tu taitaia. Te tika, kua ui ana tetai au tavini o Iehova te uianga ta te Ariki ko Davida i ui kia Iehova: “Mei te aa te roa o toku eumiumi anga i roto i toku nei vaerua, ma te mamae e po ua atu te rā i roto i toku nei ngakau?”​—Sala. 13:2.

2. Eaa ta tatou ka uriuri i roto i teia apii?

² Noatu kare e rauka ia tatou i te takore takiri te tu taitaia, ka rauka rai ia tatou i te akatere i te reira. I roto i teia apii, ka akara tatou i tetai au apinga te ka akatupu i te tu taitaia. E oti, ka uriuri tatou e ono ravenga te ka tauturu ia tatou kia noo marū ua me tupu te au manamanata.

3. Eaa te au manamanata e tupu nei kia tatou, e ka rauka ainei ia tatou te akatere i te reira?

³ Penei kare e rauka ia tatou i te akatere i tetai au apinga te ka akatupu i te tu taitaia. Ei akaraanga, kare e rauka ia tatou i te akatere me akamaataia te moni o te kai, te kakau, e te are i te au mataiti rava rai; kare katoa e rauka ia tatou i te akaaere i to tatou oa apii e te oa angaanga me timataia tatou kia pikikaa e kia rave te au angaanga tau kore. E kare katoa e rauka ia tatou i te tāpu i te kino ta te tangata e rave ra i to tatou ngai. Te tupu nei teia au manamanata no te mea te noo nei tatou ki roto i tetai ao kare te aerenga manako o te tangata i akatumuia ki runga i te au kaveinga Pipiria. Kua kite katoa a Satani, te  atua o teianei ao, e kare tetai pae e tavini ia Iehova no to ratou “anoano maata i to teianei ao.” (Mata. 13:22; 1 Ioa. 5:19) No reira rai teianei ao i kī ei i te au manamanata!

4. Eaa ta tatou ka rave me maata to tatou au manamanata?

⁴ No te maata o to tatou manamanata, penei ka pou to tatou taime i te akamanako ua i te reira. Ei akaraanga, penei ka manamanata tatou no te rava kore o te moni ei akono ia tatou, me kore ka tuia tatou i te maki, e kare e tae ki te angaanga, me kore ka ngere tatou i ta tatou ngai angaanga. Ka manamanata katoa tatou e kare tatou e vai tiratiratu me timataia kia aati i te ture a te Atua. Kare e roa atu, ka tamaki a Satani e te aronga tana e akaaere ra i te iti tangata o te Atua, e penei ka manamanata tatou eaa ta ratou ka rave mai kia tatou. Kua manako ana koe, ‘E tarevake ainei kia manako taitaia au no teia au manamanata?’

5. Eaa te aiteanga o ta Iesu tuatua: “Auraka e apiapi”?

⁵ Kua akakite a Iesu ki tana au pipi: “Auraka e apiapi.” (Mata. 6:25) Ko te aiteanga ainei e kare aia e inangaro ia tatou kia manamanata no tetai ua atu apinga? Kare! E akamaara, kua tupu ana te tu taitaia ki tetai au tavini tiratiratu o Iehova i taito, inara kua rekareka ua atu rai a Iehova ia ratou. * (1 Ari. 19:4; Sala. 6:3) Te akapumaana maira a Iesu ia tatou. Kare aia i inangaro kia apiapi to tatou oraanga te ka riro ei tamanamanata i ta tatou tavini anga i te Atua. Eaa i reira te au ravenga te ka tauturu ia tatou kia akatere i to tatou tu apiapi?​—Akara i te pia “ Peea me Rave i te Reira.”

6. Ia Philipi 4:6, 7, eaa te ka akamarū i to tatou tu apiapi?

⁶ (1) Pure putuputu. Me tupu te manamanata ki te au Kerititiano, ka rauka ia ratou i te pure kia Iehova no te tauturu. (1 Pete. 5:7) Ka pau mai a Iehova i taau pure na te oronga anga mai i “te au o te Atua, ko tei maata ua atu i te kite tangata.” (E tatau ia Philipi 4:6, 7.) Ka akamarū a Iehova i toou manako taitaia na roto i tona vaerua tapu.​—Gala. 5:22.

7. Eaa ta tatou ka akamaara me pure tatou ki te Atua?

⁷ Me pure koe kia Iehova, e akakite kiaia i te au mea katoatoa. E akakite eaa te au manamanata ma te akamārama i toou manako no runga i te reira. Me e tauturu tetai, e pati kiaia no te pakari e te maroiroi kia kite eaa taau ka rave. Me kare ra e tauturu, e pati kia Iehova kia akamarū i toou tu apiapi. Me akakite koe i toou au manamanata, aere ua rai ka kite meitaki koe akapeea a Iehova me pau i te reira. Me kare taau pure e pau viviki ia mai, auraka e tuku i te ‘au. Inangaro a Iehova ia koe kia akakite i toou au manamanata kiaia e pera kia pure putuputu.​—Luka 11:8-10.

8. Eaa ta tatou ka taiku i roto i ta tatou pure?

⁸ Me akakite koe i toou manamanata kia Iehova na roto i te pure, e kapiti mai tetai au tuatua akameitaki. E mea meitaki kia akamanako tatou i te au akameitakianga tei rauka ia tatou noatu to tatou au manamanata. I tetai taime kare  e rauka ia tatou i te kimi i te tuatua no te akakite i to tatou mamae ngakau. E akamaara, ka pau mai a Iehova i taau pure noatu ka rauka ua ia koe i te tuatua, ‘Tauturu mai koe iaku ine!’​—2 Para. 18:31; Roma 8:26.

9. Akapeea e rauka ai ia tatou te tu rangatira?

⁹ (2) Irinaki ki to Iehova pakari, eiaa ki toou uaorai. I te tuatau o te peroveta ko Isaia, kua mataku te iti tangata o Iuda i te nuku vaeau o Asura. No te mea kare a Iuda e inangaro ia Asura kia arataki ia ratou, kua pati ratou i te tauturu a Aiphiti. (Isa. 30:1, 2) Kua akamatakite a Iehova ia ratou e me irinaki ratou kia Aiphiti, ka tupu te kino. (Isa. 30:7, 12, 13) Na roto ia Isaia, kua akakite a Iehova ki te tangata akapeea e rauka ai ia ratou te tu rangatira. Karanga aia: “Tei te akatupua ua e te irinaki [ia Iehova] e maroiroi ei kotou.”​—Isa. 30:15e.

10. Eaa tetai au turanga ka rauka ia tatou i te akaari i to tatou irinaki ia Iehova?

¹⁰ Akapeea tatou me akaari e te irinaki ra tatou ia Iehova? Akamanako i teia au akaraanga. Kua orongaia mai tetai ngai angaanga tutaki meitaki kia koe e penei ka anoano maata ia toou taime e ka tamanamanata te reira i taau tavini anga ia Iehova. Me kore penei kua akainangaro mai tetai tangata me kore vaine ia koe i ko i taau ngai angaanga, inara kare aia i te tavini kua papetitoia no te Atua. Me kore me akakite mai tetai au akaperepere i toou ngutuare: “Koai taau ka iki? Ko au me ko toou Atua?” I roto i teia au atianga tataki tai e au ikianga ngatā taau ka rave, inara ka oronga mai a Iehova i te au ravenga tauturu. (Mata. 6:33; 10:37; 1 Kori. 7:39) Teia i reira te uianga, Ka irinaki e ka akarongo ainei koe kia Iehova?

11. Eaa te au tua Pipiria te ka tauturu ia tatou kia noo ‘au ua me takinokinoia tatou?

¹¹ (3) Apii mei te au akaraanga meitaki e te kino. E maata te au tua i roto i te Pipiria te akaari maira i te puapinga kia noo marū ua e te irinaki ia Iehova. Me akara oonu tatou ki roto i teia au tua, ka kite mai tatou eaa tei tauturu i te au tavini o te Atua kia vai marū ua me takinokinoia mai ratou. Ei akaraanga, te akaueanga te akavaanga ngateitei o te ngati Iuda i te au apotetoro auraka e tutu aere akaou, kare ratou i mataku ana. Kua akakite ratou: “Ko te Atua ta matou e akarongo e tikaʼi auraka te tangata.” (Anga. 5:29) I muri ake i to ratou pāpāia anga kare te au apotetoro i mataku rutetetete ana. Eaa te tumu? No te mea kua kite ratou, te tauturu maira e te mareka ra Iehova ia ratou. No reira, kua tutu aere ua atu ratou i te nuti meitaki. (Anga. 5:40-42) Mei te reira rai, te vaitata anga a Setephano i te tamateia, kua noo ‘au e te marū ua aia e kua aite tona mata “mei te mata o te angela ra.” (Anga. 6:12-15) Eaa te tumu? No te mea kua papu ia Setephano e kua mareka a Iehova iaia.

12. Ia 1 Petero 3:14 e te 4:14, eaa ra tatou ka mataora ai me takinokinoia tatou?

¹² Kua papu meitaki i te au apotetoro e te tauturu maira a Iehova ia ratou. Kua oronga aia kia ratou te mana kia rave i te au temeio. (Anga. 5:12-16; 6:8) Kare a Iehova i oronga mai i tona mana kia tatou i teia tuatau no te rave i te au temeio. Inara, akakite mai a Iehova na roto i tana Tuatua, me takinokinoia tatou no te tuatua tika, te mareka maira aia e ka oronga mai aia i tona vaerua. (E tatau ia 1 Petero 3:14; 4:14.) No reira auraka tatou e manata eaa ta tatou ka rave me  takinokinoia tatou a te tuatau ki mua. Mari ra, e akaketaketa i to tatou irinakianga, e ka tauturu e ka akaora mai a Iehova ia tatou. Mei ta te au pipi mua i rave, ka anoanoia tatou kia irinaki ki ta Iesu taputou: “Naku oki e oronga atu i te vaa no kotou e te pakari, kare rava e tika i to kotou au enemi kia akakore mai e kia patoi mai.” Akapapu mai aia: “E ora ra kotou kia mou tamou marie.” (Luka 21:12-19) Auraka e ngaropoina, ka maara ia Iehova te au mea rikiriki no runga i tona au tavini tei mate tiratiratu. E ka akatuakaou mai aia ia ratou.

13. Eaa ta tatou ka apii mai mei te akaraanga o te aronga kare i noo marū ua e te irinaki ia Iehova?

¹³ Ka kite katoa tatou i te apiianga mei te aronga kare i noo marū ua e te irinaki ia Iehova. Me apii tatou i teia au akaraanga kino, ka tauturu te reira ia tatou kia kopae i te au tarevake ta ratou i rave. Ei akaraanga, te riro anga mai a Asa ei Ariki no Iuda, kua irinaki aia ia Iehova i te tamaki anga mai tetai nuku vaeau maata e kua akameitaki a Iehova iaia na te oronga anga i te re. (2 Para. 14:9-12) Inara i muri mai, te tamaki anga mai te Ariki o Iseraela ko Baasa e tona nuku vaeau meangiti, kua tutaki a Asa i te nuku vaeau o Arama no te tauturu e kare i akara kia Iehova mei tana i rave i mua ana. (2 Para. 16:1-3) I te openga o tona oraanga, kua tupu tetai maki kino kiaia e kare aia i kimi ia Iehova no te tauturu.—2 Para. 16:12.

14. Eaa ta tatou ka apii mai mei te tarevake o Asa?

¹⁴ I te akamataanga, kua kimi a Asa ia Iehova no te tauturu i tona au manamanata. Inara i muri mai kare aia i irinaki ia Iehova, kua tauta aia i te akatikatika i tona uaorai manamanata. I te akaraanga, e mea meitaki no Asa i te pati tauturu kia Arama no te tamaki atu ia Iseraela. Inara kare te reira i puapinga ana. Na roto i tetai peroveta kua akakite a Iehova kiaia: “No te mea kua irinaki koe i te ariki o Arama ra, kare i irinaki i to Atua ia Iehova, e teianei, kua ora te nuku o te ariki o Arama i to rima na.” (2 Para. 16:7) Kia matakite, auraka e manako e ka rauka ia tatou te akatikatika i to tatou uaorai manamanata ma te kore e pati i te tauturu a Iehova. Me tupu poitirere tetai apinga kia tatou, e irinaki kia Iehova e ka oronga mai aia i te tauturu.

15. Eaa ta tatou ka rave me tatau i te Pipiria?

¹⁵ (4) Tamou ngakau i tetai au irava Pipiria. Me kite mai koe i tetai au irava Pipiria te akaari maira te puapinga kia noo marū ua e te irinaki ia Iehova, e tauta i te tamou ngakau i te reira. Ei tauturu ia koe, penei e tatau maata me kore tata e te tatau putuputu i te reira. Kua akaueia a Iosua kia tatau putuputu i te puka ture na roto i te reo marū, i reira aia e manuia ai. Ka riro tana i tatau i te tauturu iaia kia kore e mataku e kia ngakau toa i te aratakianga i te iti tangata o te Atua. (Iosu. 1:8, 9) E maata te au irava i roto i te Tuatua a te Atua te ka tauturu ia tatou kia noo marū ua me tupu te tu taitaia me kore me mataku tatou.​—Sala. 27:1-3; Mase. 3:25, 26.

16. Akapeea a Iehova me taangaanga i te putuputuanga kia tauturu ia tatou kia noo marū ua e te irinaki iaia?

¹⁶ (5) Kapiti ki te iti tangata o te Atua. E taangaanga ana a Iehova i to tatou au taeake e te au tuaine kia tauturu ia tatou kia noo marū ua e te irinaki iaia. I ko i ta tatou au uipaanga, ka puapingaia tatou mei te au ako ka orongaia mai, te au  paupau anga a te katoatoa, e te au tuatua akamaroiroi ta te au taeake e te au tuaine ka oronga mai. (Ebe. 10:24, 25) Ka rauka katoa mai te akamaroiroi me akakite tatou i to tatou manamanata ki tetai oa irinakiia i roto i te putuputuanga. Ka riro te “tuatua meitaki” a tetai oa i te tauturu ia tatou kia akaiti mai i to tatou tu taitaia.​—Mase. 12:25.

17. Ia Ebera 6:19, akapeea te manakonakoanga no te Patireia me tauturu ia tatou kia noo marū ua i te au tuatau taitaia?

¹⁷ (6) Akaketaketa i toou manakonakoanga. Ka riro to tatou manakonakoanga no te Patireia ei “tutau no te [oraanga]” e kia kore tatou e ngaueue noatu te au turanga ngatā e te au manako apiapi. (E tatau ia Ebera 6:19.) Akamanako oonu i ta Iehova taputou no te tuatau ki mua, e kare tatou e akamaara akaou i te au manako taitaia. (Isa. 65:17) Akamanako ana ia koe i roto i tetai ao ou e te ‘au ua, e kare e apinga kino e tupu akaou. (Mika 4:4) E me akakite koe i te reira ki tetai ke, ka akaketaketa katoa ia toou manakonakoanga. E tauta i te rave i taau ka rauka i roto i te angaanga tutu aere e te akariroanga i te tangata ei pipi. Me pera koe, ka rauka ia koe “te irinaki kite pu tikai e tae ua atu ki te openga.”​—Ebe. 6:11.

18. Eaa te ka tupu a te tuatau ki mua, e eaa ta tatou ka rauka i te rave?

¹⁸ No te mea te vaitata maira te openga o teia akatereanga, ka maata mai to tatou au manamanata te ka akatupu i te tu taitaia. Ka tauturu ta tatou irava mataiti no 2021 ia tatou kia noo marū ua me tupu te au manamanata. Auraka e irinaki i to tatou uaorai maroiroi mari ra kia irinaki ia Iehova. I teia mataiti, kia akaari tatou na roto i ta tatou ka rave e te irinaki ra tatou i ta Iehova taputou: “Tei te akatupua ua e te irinaki e maroiroi ei kotou.”​—Isa. 30:15.