1. Саво вопросо амэндэ можэт тэ авэл?

ВСАВОРЭ амэ камас тэ жувас тихо и спокойно. Но дэкала амэнди прижалпэ пала варисо тэ пэрэжываем. Дэсавэ лэ Иеговастирэ мануша пушэнас кода жэ, со пушля и о Давидо: «Скати инке через и пэрэжывания авэла ԥарэс мэрнэ одести? И андэ мэрнэ деса на авэла радость?» (Пс. 13:2).

2. Пала со подаса дума андэ кадэя статья?

² Амэндэ на вижала тэ на пэрэжываем. Но амэ можэм тэ стерас кадя, кай тэ на пэрэжываем фартэ. Андэ кадэя статья, амэ спэрва уӷанаса, васо амэндэ моӷут тэ авэн пэрэжывании. Ай потом подаса дума пала шов лашэ советоря, савэ поможына тэ авас спокойни, кала фартэ ԥарэс.

3. Через со амэ можэм тэ пэрэжываем и можэм амэ када тэ улас чи най?

³ Амэндэ исин пэрэжывании через кода, со най па амаро зор тэ парувас. Например, када, кай барёл и цэмин по хамос, пэ ӥда, пэ цэра. Кадяжэ и мануша, савэнца амэ терас бути или однокласникоря тасавэн пар мэндэ, кай амэ тэ хохавас или тэ терас билажавардимос. Тэ улас и преступность котэ, кай амэ жувас, амэ тожэ нэ можэм. Амэндэ исин кадэва ԥаримос, важ кода кай амэ жувас андэ люма, кай и мануша на жувэн кадя,  сар пистромэ андэ Библия. О Сатана, саво хулаий кадэла люмаса, ӷанэн, кай дэсавэ мануша через и пэрэжывании на лэна тэ служын лэ Иеговасти (Матф. 13:22; 1 Иоан. 5:19). Акэ васо и мануша кадя бут пэрэжывают.

4. Васо амэндэ моӷут тэ авэн пэрэжывании?

⁴ Через о ԥаримос, саво исин андэ жызня, амэ часто пэрэжываем. Варико пэрэжывает, кай на хутилэла ловэ пэ кода, со трэбуй. Ай авэр пэрэжывают, кай через о насвалимос нэ смоӷут тэ терэн и бути или хасарэна ла. Ай дэко пэрэжывает, кай через варисо на уӷодия лэ Дэвлэсти. Инке амэ можэм тэ пэрэжываем, сар амэ пэс андяраса, кала и мануша, савэнца хулаий о Сатана, жана по Дэвлэско народо. Амэ можэм тэ пушас пэстар: «Драго, кай мэ пэрэжываю пала када чи най?»

5. Со сыкавэн лэ Иисусостирэ алава: «Нэ пэрэжывайте»?

⁵ О Иисусо ԥэндя пэстирэ учениконэнди: «Нэ пэрэжывайте» (Матф. 6:25). Сыкавэл када, кай амэнди на трэбуй ни пала со тэ пэрэжываем? Канешно, най! Дэлмут, кай дэсавэ лэ Иеговастирэ служытеля сас пэрэжывании. Но о Иегова на отԥэндёлас лэндар (1 Цар. 19:4; Пс. 6:3) *. И алава, савэ ԥэндя о Иисусо, фартэ амэн подритярэн. Во на камэлас, кай и служэния лэ Дэвлэсти тэ авэл амэндэ по дуйто ҭан через и пэрэжывании пала кода, со трэбуй важ и жызня. Со амэнди поможыя фартэ тэ на пэрэжываем? (Диқэн и рамка « Сар када тэ терэс?»).

6. Со, сар пистромэ андэ Филиппийцам 4:6, 7, поможыя тути тэ на пэрэжываеш?

⁶ 1. Часто мангпэ. Мангпэ лэ Иеговасти, кала ту пала варисо пэрэжываеш (1 Пет. 5:7). Тоди о Дэл дэла тути покоё по ди, «саво май баро, чем всаворэ гиндоря». (Адиносар Филиппийцам 4:6, 7.) О Иегова дэла тути пэско баро зор, када о свынто духо, саво поможыя тэ на пэрэжываеш (Гал. 5:22).

7. Пала со трэбуй тэ сэрэс, кала мангэспэ лэ Иеговасти?

⁷ Кала мангэспэ лэ Иеговасти, росԥэн вся, со тутэ по ди. Росԥэн, саво именно тутэ ԥаримос и васо ту пала лэстэ пэрэжываеш. Если ту можэш тэ улэс кадэва ԥаримос, тоди манг кай о Иегова мудрость, кай тэ полэс, сар лэс тэ улэс и манг зор, кай тэ стерэс кадя, сар лэсти уӷодно. Ай если ту нэ можэш тэ улэс кадэва ԥаримос, тоди манг лэ Иеговас тэ поможый тути, кай фартэ тэ на пэрэжываеш. Если ту мангэспэ пала варисо конкретно, тоди тути авэла май вушэро тэ додиқэс, сар о Иегова пэ када атвечает. Ай кала атвето пэ молитва нинай сразу, на умэк и вас. О Иегова камэл, кай ту тэ мангэспэ конкретно, и тэ на парашэс пала када тэ мангэспэ (Луки 11:8—10).

8. Пала со ту можэш тэ ԥэнэс андэ молитва?

⁸ Кала росԥэнэс лэ Иеговасти пала пэстирэ пэрэжывании, старысав най кати варисо тэ мангэс, но и тэ блаӷодарис лэс. Саво бы тэ на авэл ԥаримос, авелоп драго тэ гиндосарэс пала лашимос, саво о Иегова терэл важ тутэ. Дэкала найвушэро тэ росԥэнэс андэ молитва вся, со  по ди, но на бистэр, кай о Иегова атветит, дажэ если ту просто ԥэнэса лэсти: «Мангав тут, поможысар!» (2 Лет. 18:31; Рим. 8:26).

9. Со трэбуй тэ терас, если исин варисави дар?

⁹ 2. Патя, кай о Иегова май мудро чем амэ. Андо 8 вико жы кай о И. Х. и сирийцоря камлэ тэ жан пэ иудеёря. Важ када иудеёря, кай тэ спасынпэ, манглэ помощь кай о Египто (Ис. 30:1, 2). О Иегова ԥэндя, кай через о доӷоворо лэ Египтоса, лэндэ авэла бида (Ис. 30:7, 12, 13). Кай и иудеёря тэ спасынпэ па чачимастэ, о Иегова ԥэндя через о пророко Исаия: «Тумаро зор андэ кода, кай тэ ашэнпэ спокойни и тэ сыкавэн, кай патян» лэ Иеговасти (Ис. 30:15б).

10. Кала ту можэм тэ сыкавас, кай патяс лэ Иеговасти?

¹⁰ Андэ савэ ситуацыи ту можэм тэ сыкавас, кай патяс лэ Иеговасти? Ԥэнаса, тут ақарэн пэ бути, кай драго потинэн, но вой залэла кодэя время, сави акана ту отдэс важ и служэния лэ Иеговасти. Или пэ бути о мануш, саво най лэ Иеговаско свидетелё сыкавэл, кай ту лэсти чалёс. Ай можэт андо ери о мануш, саво тути фартэ куч ԥэнэн: «Витидэ, или мэ или тиро Дэл». Андэ всаворэ кадэла найвушэри маменторя о Иегова поможыя тути тэ полэс, сар правильно пэс тэ андярэс (Матф. 6:33; 10:37; 1 Кор. 7:39). Вопросо кати андэ кода, патяса ту лэ Иеговасти и кандэса лэс чи най?

11. Савэ библейски примероря поможына тути тэ авэс спокойно, кала амэн преследуют?

¹¹ 3. Сытюв кодэлэндар, ко терэлас правильно и нэправильно. Андэ Библия исин бут разни ситуацыи, андэ савэ дицол, сар лэ Дэвлэстирэ служытеля ашэнаспэ спокойни и патянас лэсти. Кала пала када гиндос, старысав тэ полэс, со лэнди поможыяс тэ ашэнпэ спокойни, кала лэн фартэ преследовали. Например, кала Синедрионо ԥэндя лэ апостолонэнди тэ на росԥэнэн и лащи новость, вонэ на пэрэдарайлэ и ԥэндэ: «Амэ трэбуй тэ кандас лэ Дэвлэс, сар правителёс, ай най лэ манушэн» (Деян. 5:29). Дажэ, кала лэн мардэ, вонэ на пэрэдарайлэ, важ кода кай вонэ ӷанэнас, кай о Иегова лэнца и вонэ лэсти уӷодин. Через када, вонэ на парашэнас тэ росԥэнэн и лащи новость (Деян. 5:40—42). Кадяжэ, кала лэ Стефанос камлэ тэ умарэн, во сас кацаво спокойно, кай о муй лэстэ сас, сар кай о анӷело (Деян. 6:12—15). Васо? Во патялас, кай о Иегова лэса и во лэсти уӷодий.

12. Васо, сар ԥэнэнпэ андэ 1 Петра 3:14 и 4:14, амэ можэм тэ авас бахталэ, кала амэн преследуют?

¹² Кода, кай о Иегова подритярэлас лэ апостолонэн, дицолас андэ кода, кай вонэ моӷли тэ терэн чудеса (Деян. 5:12—16; 6:8). Адес и христианоря на терэн чудеса, но через и Библия, о Иегова дэл алав, кай хоть амэ виритярас о ԥаримос важ и праведность, амэ можэм тэ авас бахталэ, важ кода кай амэ радуисарас лэско ди и во дэл пэско свынто духо. (Адиносар 1 Петра 3:14; 4:14.) Важ када на трэбуй пэрэжывать, виритяраса амэ кода, кай лэна тэ преследовать чи най. Фэдэр ужэ акана тэ терас вся, кай тэ патяс, кай о Иегова можэт амэн тэ подритярэл и тэ спасый. Сар и  кодэла христианоря, амэ трэбуй тэ патяс лэ Иисусостирэ алавэнди. Во ԥэндя: «Важ када, кай мэ дава тумэнди кацавэ алава и мудрость, через савэ всаворэ тумарэ враӷоря нэ смоӷут ни тэ жан против, ни тэ ԥэнэн варисо против тумэндэ». Инке о Иисусо дэл алав: «Тумэ фэрина пэстири жызня кодэлэса, кай виритярэна о ԥаримос» (Луки 21:12—19). Кадяжэ о Иегова сэрэл вся пала пэстирэ служытеля, савэ на парашэнас лэс тэ кандэн и рия лэн каринг и жызня.

13. Сави польза авэла, кала гиндосарас пала кодэла, ко на ашэляпэ спокойно и на патяя лэ Иеговасти?

¹³ Кадяжэ амэ можэм тэ гиндосарас пала кода со сас кодэлэнца, ко на ашэляпэ спокойно и на патялас лэ Иеговасти, кай тэ на терас кадя сар вонэ. Погиндосарам пала царё Аса. Кала пэ Иуда жыля о фартэ баро эфиопско войско, во патяя лэ Иеговасти и о Дэл лэсти поможысардя тэ победий (2 Лет. 14:9—12). Но кала прожыля время и пэ Иуда жыля о Израильско царё Вааса пэстирэ май цыкнэ войскоса, о Аса на мангля помощь кай о Иегова. Во потиндя лэ сирийцонэнди, кай кодэла тэ поможын лэсти андэ война (2 Лет. 16:1—3). Дажэ англа пэстири смэрть, кала о Аса сас фартэ насвало, во на мангля помощь кай о Иегова (2 Лет. 16:12).

14. Сости амэ можэм тэ сытювас анда ошыбки, савэ стердя о Аса?

¹⁴ Спэрва, кала сас ԥарэс, о Аса мангэлас помощь кай о Иегова, но потом во парашэля кадя тэ терэл. Кода, кай о Аса банделя пала помощь кай и сирийцоря, здэласпэ, годявэрнэс, но о лашимос, саво кадэлэстар вижыля, сас най пэ долӷонэстэ. О Иегова ԥэндя лэсти через пэско пророко, васо кадя вижыля: «Ту патяян лэ сирийсконэ царёсти, ай най тирэ Дэвлэсти лэ Иеговасти» (2 Лет. 16:7). Амэ трэбуй тэ сэрас, кай амэндэ вижала тэ улас пэско ԥаримос, кати если ласа тэ родас помощь андэ Библия. Дажэ тоди, кала ӥто трэбуй тэ прилас ришэния, амэнди трэбуй тэ авас спокойни и тэ патяс лэ Иеговасти. Тоди во поможыя амэнди тэ стерас вся правильно.

15. Со авелоп драго тэ терэс, кала адиносарэс и Библия?

¹⁵ 4. Висытюв наизусть и библейски стихоря. Кала ту диқэн библейски стихоря, савэ поможын тэ авэс спокойни и тэ патяс лэ Иеговасти, висытюв лэн наизусть. Сар када тэ терэс? Адиносар лэн вслух или випистросар и сто лэн, кай тэ авэн по видно ҭан. О Иегова приԥэндя, кай о Иисусо Навино вся и время полокэс тэ адиной и книӷа, андэ сави сас о законо. Када поможысардоп лэсти андэ вся тэ андярэл пэс мудро. Кадяжэ када поможысардоп лэсти тэ на дарал и смило тэ андярэл лэ Дэвлэстирэ народос (Иис. Н. 1:8, 9). Андэ Библия исин бут стихоря, савэ дэн зор тэ авас спокойни тоди, кала амэ пала варисо пэрэжываем чи дарас (Пс. 27:1—3; Прит. 3:25, 26).

16. Сар о Иегова через и собрания поможыя амэнди тэ авас спокойни и тэ патяс лэсти?

¹⁶ 5. Общяйся лэ Дэвлэстирэ служытелёнэнца. Через и ԥрала и ԥэя о Иегова поможый, кай амэ тэ авас спокойни и тэ патяс лэсти. И собрания анэн амэнди бут лашимос. Амэн подритярэн и библейски речи, лэ ԥралэндирэ и лэ ԥэяндирэ  каминтарии и общения лэнца (Евр. 10:24, 25). Кадяжэ можно тэ росԥэнас лэ друӷости анда собрания, пала со амэ пэрэжываем. И лашэ алава амарэ друӷостирэ, моӷут тэ поможын, кай по ди тэ авэл май спокойно (Прит. 12:25).

17. Сар и надежда по Царство, пала сави ԥэнэнпэ андэ Евреям 6:19, поможыя тэ авэс спокойно андэ ԥари время?

¹⁷ 6. Тер вся, кай май фартэ тэ патяс, кай авэла лашимос. И надежда по Царство, «сар якорё важ оди», вой поможый, кала ԥаримос, тэ авэс спокойно. (Адиносар Евреям 6:19.) Со важ када трэбуй тэ терэс? Гиндосар пала время, андэ сави, сар ԥэндя о Иегова, на авэна пэрэжывании (Ис. 65:17). Представляй пэс андо раё пэ ԥув, кала на авэла нисаво ԥаримос по ди (Мих. 4:4). Тэ патяс май фартэ, кай авэла о лашимос, кадяжэ поможыя кода, кала росԥэнэс аврэнди пала лэстэ. Присто вся о зор, кай тэ росԥэнэс лащи новость и тэ сытярэс лэ манушэн, кай вонэ тэ авэн ученикоря. И тоди тутэ вижала састэс тэ патяс и тэ аштярэс о лашимос до конца (Евр. 6:11).

18. Со авэла англэ, и со дэла зор тэ виритярас када?

¹⁸ Со май пашэ и время кадэла найлащя люмати, со май ԥарэс авэла и со май бут пэрэжывании. И алава анда стихо по 2021 бэрш поможына амэнди, кай тэ авас спокойни и тэ надеисавас по Иегова, ай най пэр пэстэ. Давайте вся о бэрш тэ сыкавас пэ дила, кай патяс кодэлэсти, со ԥэндя о Иегова: «Тумаро зор андэ кода, кай тэ ашэнпэ спокойни и тэ сыкавэн, кай патян» (Ис. 30:15).