1. Ku fana na Hosi Davhida, hi xini xivutiso lexi van’we kwezru va xi hambaka?

HINKWEZRU ha swi djula ku hanya wutomi bya ku zrula. A nga kone lweyi a zrandzraka ku hlatiyela. Nambitanu, minkama yimbeni, hi pfana hi lwisana ni ku hlatiyela. Xileswo, malandzra mambeni ya Yehovha ma nga ha hamba xivutiso xa ku fana ni lexi Hosi Davhida a xi vutisiki Yehovha, lexi liki: ‘A hika dzranga dzri ta tihlatiyelisa ku yisa kwini xana, na mbilu yanga yi ni ku vaviseka siku hinkwadzru?’​—Ps 13:2.

2. I yini leswi hi taka bula ha swone ka xidondzro lexi?

² Nambileswi hi ngeke na ku swi kota ku tsrhika ku hlatiyela hi lani ku heleliki, hi nga yentxa swinyingi akuva hi lawula matitwela wolawu. Ka xidondzro lexi, ku sungula hi ta tiva mintxhumu ya kukazri leyi nga hi yentxaka hi hlatiyela. Hi ta gama hi kambisisa 6 wa tindlela leti nga hi pfunaka ku tsrhama na hi zrulile loko hi kumana ni swikazratu.

3. Hi yini mintshikilelo leyi hi langutanaka na yone, nakone hi nga yi lawula ku ya gama kwini?

³ Mintxhumu yimbeni leyi yi hi hlatiyelisaka, hi nga swi kota ku yi lawulanyana, kambe yimbeni a hi nge yi lawuli nikutsrongo. Hi xikombiso, a hi nge swi koti ku lawula ku dula ka swakuda, mpahla, ni switizro swa ku yaka loku ku yengeselekaka lembe ni lembe. Nakone a hi nge swi koti ku lawula makhambi lawa vatizrikulozri, kumbe vadondzrikulozri va xikole va taka hi dzringa ha wone akuva hi nga dumbeki kumbe hi nhingenela mahanyela ya ku biha. Nakone a hi nge swi koti ku helisa wugevenga lebyi humelelaka mugangeni wezru. Hi lavisana ni swikazratu leswi hinkwaswu hi mhaka ya leswi hi hanyaka a misaveni leyi vhanu vanyingi va nga kongomisiwiki hi minsinya  ya milawu ya Bibele. Sathana, xikwembu xa misava leyi, awa swi tiva leswaku vhanu vambeni va ta pfumelela ‘a ku hlatiyela ka nkama lo’, ku va sivela ku tizrela Yehovha. (Mt 13:22; 1Yh 5:19) Xileswo, a swi hlamalisi leswi misava leyi yi taliki hi mintxhumu leyi hlomulanaka mbilu!

4. I yini leswi hi nga ha swi yentxaka loko hi titwa na hi mitiwa hi swikazratu?

⁴ Loko hi kumana ni swikazratu leswikulu, hi nga ha mitiwa hi ku hlatiyela lakakuva hi nga ha pimisi hi swimbeni. Hi xikombiso, hi nga kazrateka hi leswaku hi ta yi kumisa kuyini mali ya ku tihanyisa. Hi nga tlhela hi txhava leswaku a ku vabya ku hi yentxa hi nga ha swi koti ku tizra, kumbe hi lahlekeliwa hi ntizru. Hi nga ha tlhela hi kazrateka hi leswaku hi ta hluleka ku dumbeka loko hi dzringiwa leswaku hi tlula milawu ya Xikwembu Nkulukumba. Ha swi tiva leswaku ku nga li khale Sathana a ta hlohlotela lava a va lawulaka leswaku va hlasela vhanu va Xikwembu Nkulukumba. Xileswo, hi nga ha kazrateka hi leswaku hi ta yentxa yini loko va hi hlasela. Hi nga ha tivutisa leswi: ‘Xana swi bihile ku va ni kazrateka hi mintxhumu ya ku fana ni leyo?’

5. Xana Yesu a a djula ku hlaya yini loko a ku: ‘N’wi nga hlatiyeleleni wutomi byenu’?

⁵ Ha swi tiva leswaku Yesu a byele valandzreli vakwe a ku: ‘N’wi nga hlatiyeleleleni wutomi byenu.’ (Mt 6:25) Xana Yesu a a djula ku hlaya leswaku a hi nga fanelanga ku kazrateka ha ntxhumu? Nikutsrongo! Phela vatizreli vambeni va Yehovha va ku dumbeka va khale, va langusane ni swikazratu, nakone Yehovha a nga tsrhikanga ku va zrandzra. * (1Th 19:4; Ps 6:3) Ku hlaya ntiyiso, Yesu a a li ku hi txhaveleleni. A a nga swi djuli kuva hi kazrateka ngopfu hi leswi hi swi vilelaka a wuton’wini lakakuva hi siya wugandzreli a ntsrhaku. Kutani ke, he tini tindlela leti hi nga lawulaka ha tone ku hlatiyela kwezru?​—Vona bokisi ledzri liki: “ Tindlela Ta Ku Lawula Ku Hlatiyela.”

6. Hi ku ya hi Ba-le-Filipi 4:6, 7, i yini xi nga hi pumbelaka ku hlatiyela?

⁶ 1) Khongota nkama ni nkama. Vakriste lava titwaka na va kandzreteliwa hi xiyimu, va nga khongota ka Yehovha na swi sukela mbilwini leswaku a va pfuna. (1Pe 5:7) Yehovha a ta hlamula swikhongoto swaku hi ku ku nyika ‘ku zrula ka Xikwembu Nkulukumba, loku tlulaka ku yanakanya hinkwaku’. (Dondzra Ba-le-Filipi 4:6, 7.) Yehovha a nga hi nyika ku zrula hi ku tizrisa moya wakwe wa ku xwenga lowu nga ni ntamu swinene.​—Ga 5:22.

7. Hi fanela ku dzrimuka yini loko hi khongota ka Xikwembu Nkulukumba?

⁷ Loko u khongota ka Yehovha, mu pfulele xifuva xaku. Hlaya hi ku kongoma leswi u swi twaka. Mu byele leswi swi ku kazrataka u tlhela u mu tlhamuxela ndlela leyi u titwaka ha yone. Loko ku ni ndlela ya kukazri ya ku swi lulamisa, mu kombeli wutlhazri ni ntamu lowu vilelekaka akuva u kota ku yentxa tanu. Loko u nge na ndlela ya ku lulamisa swikazratu swaku, kombela Yehovha akuva a ku pfuna leswaku u nga hlatiyeli ku tlula mpimu. Loko swikhongoto swezru swi kongoma mhaka, hi ku famba ka nkama swi ta hi nabyalela ku vona ndlela leyi Yehovha a swi hlamulaka ha yone. Loko nhlamulo ya swikhongoto swaku yi nga tekeli ku buya, u nga godoli. Yehovha a nga djuli kuva swikhongoto swi kongoma mhaka kambe a djula leswaku u tlhela u khinyela a ku khongoteni.​—Lk 11:8-10.

8. Hi fanela ku patsra yini ka swikhongoto swezru?

 ⁸ A nkama u khongotaka u byela Yehovha leswi ku hlatiyelisaka, lwela ku patsra ni mazritu ya ku khensa. Ku dzrimuka matovoko lawa hi ma kumaka swi nga hi pfuna nambi loko xiyimu xi hi bindzrela swinene. Nambi loko minkama yimbeni u vaviseka ku tlula mpimu lakakuva u hluleka ku hlaya leswi u swi djulaka, dzrimuka leswaku Yehovha awa hlamula nambi swikhongoto swa ku fana ni leswi: ‘Ni kombela u ni pfuna!’​—2Mk 18:31; Ro 8:26.

9. Xana hi fanela ku yentxa yini loko hi li ku txhaveni?

⁹ 2) Dumba wutlhazri bya Yehovha, ku nga li byaku. Hi nkama wa muprofeta Ezaya, Vayuda a va txhava ku hlaseliwa hi Vaasiriya. Leswi afaka va tsremeke nhlana hi ku txhava ku ndzruluka swikazrawa swa Vaasiriya, va tsrutsrumele ka Vaegipta va ya kombela mpfunu, vhanu lava a va nga li vagandzreli va Yehovha. (Eza 30:1, 2) Yehovha a va kawukile leswaku ku dumba Vaegipta a swi ta va tisela khombo. (Eza 30:7, 12, 13) Hi ku tizrisa Ezaya, Yehovha a byele Vayuda leswi a va fanela ku swi yentxa akuva va sizreleleka. A te: “Ntamu wenu wu ta va ka kuva mi zrula ni ku tlhela mi dumba.”​—Eza 30:15b, TNM.

10. I ka swiyimu muni lani hi fanelaka ku dumba Yehovha?

¹⁰ Xana hi fanela ku dumba Yehovha ka swiyimu muni? Vona swikombiso swi nga li swingani. A hi nge va ku dumbisa ntizro lowu mali vo to ko yentxa hi ku ku nunsela kambe wu taka ku tekela nkama wunyingi lowu swoswi u wu tizriselaka ku gandzrela Yehovha. Kumbe mutizrikuloni lweyi a nga liki mugandzreli wa Xikwembu Nkulukumba lwa babatisiwiki, a navela ku tekana na wene. Kumbe xaka dzraku dzra le kusuhi dzri ku byela leswi: “Kumbe u langa mine kumbe Xikwembu xaku.” Ka xiyimu ha xin’we, a xiboho a xi nge ti nabyala, kambe Yehovha a ta ku nyika nkongomiso lowu u wu vileleka. (Mt 6:33; 10:37; 1Ko 7:39) Xivutiso hi lexi: Xana u ta mu dumba Yehovha u tlhela u landzra nkongomiso wakwe?

11. Hi wani madzrungula ya Bibele lawa hi nga ma dondzraka akuva hi tsrhama na hi zrulile loko hi lavisana ni nkaneto?

¹¹ 3) Dondzra ka swikombiso leswinene ni swa ku biha. A Bibele dzri ni swikombiso swinyingi leswi hi pfunaka ku vona lisima dzra ku tsrhama na hi zrulile hi tlhela hi dumba Yehovha. Loko u dondzra madzrungula lawo, vona ndlela leyi malandzra ya Yehovha ma tamiki ma tsrhama na ma zrulile ha yone nambi loko ma lavisana ni nkaneto lowukulu. Hi xikombiso, loko huvo leyikulu ya wuyavanyisi ya Yuda, yi leleta vapostola leswaku va tsrhika ku zrezra, a va txhavisiwanga. A matsrhan’wini ya leswo, hi xixixi va te: ‘Swi fanekeli ku yingela Xikwembu Nkulukumba ku tlula vhanu.’ (Min 5:29) Nambi loko va biwile, vapostola a va tsremekanga nhlana. Ha yini? Hikusa a va swi tiva leswaku Yehovha a a li na vone nakone a a nyonxile hi leswi va swi yentxiki. Xileswo, va ye mahlweni va zrezra madzrungula lamanene. (Min 5:40-42) Hi ku fanana, loko mudondzrisiwa Stefanu a li kusuhi ni ku dlayiwa, a tame a tikomba na a zrulile, lakakuva ‘vuso byakwe byi swanga hi bya ni xizrun’wa’. (Min 6:12-15) Ha yini? Hikusa a a tiyiseka leswaku Yehovha a a nyonxa hi leswi a swi yentxiki.

12. Hi ku ya hi 1 Petros 3:14 na 4:14, ha yini hi fanela ku nyonxa nambi loko hi xanisiwa?

¹² Vapostola va ve ni wumboni bya le livaleni bya leswaku Yehovha a a na vone. A a va nyike ntamu wa ku yentxa mahlolana. (Min 5:12-16; 6:8) Kambe hine namunhla a hi hambi mahlolana. Nambitanu, Yehovha awa hi byela Zritwini dzrakwe leswaku nambi hi xanisiwa  hi konta ya wululami, awa nyonxa a tlhela a hi seketela hi ku tizrisa moya wakwe. (Dondzra 1 Petros 3:14; 4:14.) Xileswo, a hi fanelanga hi tsrhamela ku yanakanya hi leswi hi taka swi yentxa a nkameni lowu taka loko hi lavisana ni nxanisa lowukulu. A matsrhan’wini ya leswo, hi fanela ku yentxa leswi hi nga swi kotaka akuva hi tiyisa ku dumba kwezru ka leswaku Yehovha a nga hi seketela ni ku hi huluxa. Ku fana ni vadondzrisiwa va Yesu va dzana dzra ku sungula, hi fanela ku tiseketela hi xidumbiso xa Yesu, lexi liki: ‘Mine ndzri ta n’wi nyika nomu ni wutlhazri lebyi a valala venu hinkwavu va taka hluleka ku byi kaneta ni ku byi yangula ntxhumu.’ Yesu a hi dumbise leswi: ‘Hi ku tiyisela kwenu n’wi ta huluxa mahika yenu.’ (Lk 21:12-19) U nga dzrivali leswaku Yehovha a bekisa miyanakanywini yakwe wutsrhokotsrhoko hinkwabyu bya malandzra yakwe lama faka na ma dumbekile nakone a ta tlhela a ma pfuxa.

13. Hi nga pfunekisa kuyini ka swikombiso swa lava hlulekiki ku tsrhama na va zrulile ni ku dumba Yehovha?

¹³ Hi nga tlhela hi dondzra swa kukazri ka lava hlulekiki ku tsrhama na va zrulile ni ku dumba Yehovha. Ku dondzra hi swikombiso leswo swa ku biha, swi ta hi pfuna ku tivhikela akuva hi nga yentxi swihoxo leswi fanaka. Hi xikombiso, a ku sunguleni ka wuhosi byakwe, hosi Asa wa Yuda a dumbe Yehovha loko a hlaseliwa hi khandzra ledzrikulu nakone Yehovha a mu tovokisile hi ku mu yentxa a hlula. (2Mk 14:9-12) Kambe hi ku famba ka nkama, loko a hlaseliwa hi khandzra ledzritsrongo swinene dzra hosi Baxa wa le Israyele, Asa a hakele khandzra dzra Siriya akuva dzri mu pfuna a matsrhan’wini ya ku dumba ku huluxiwa ha Yehovha ku fana ni le ku sunguleni. (2Mk 16:1-3) Nambi loko a li kusuhi ni ku fa, na a vabya ngopfu, Asa a nga dumbanga leswaku Yehovha a a ta mu pfuna.​—2Mk 16:12.

14. Hi nga dondzra yini ka swihoxo swa Asa?

¹⁴ A ku sunguleni, Asa a a djula mpfunu wa Yehovha loko a lavisana ni swikazratu. Kambe ntsrhaku, a hlawule ku lulamisa timhaka hi ndlela yakwe. A kungu dzra Asa dzra ku tsrutsrumela ka Vasiriya leswaku a kombela mpfunu wa ku lwisana na Israyele, a dzri tikomba ingiki dzra pfuna kambe ku humelela kwakwe a ku tatanga nkombe. Hi ku tizrisa muprofeta wa kukazri, Yehovha a byele Asa a ku: ‘Leswi u dumbiki hosi ya Aram [Siriya], u nga dumbangakiki Yehovha, Xikwembu Nkulukumba waku, hi leswo ke a yimpi ya hosi ya Aram yi phonyokile a mavokweni yaku.’ (2Mk 16:7) Hi fanela ku tivonela akuva hi nga dumbi ku tlula mpimu ndlela yezru ya ku lulamisa timhaka, lakakuva hi dzrivala ku djula nkongomiso wa Yehovha lowu nga Bibeleni. Nambi loko swi sindzrisa ku teka xiboho xa kola ni kola, loko hi zrula hi tlhela hi dumba Yehovha, a ta hi pfuna ku teka xiboho lexinene.

15. Hi fanela ku yentxa yini loko hi li ku dondzreni ka Bibele?

¹⁵ 4) Bekisa tindzrimana ta Bibele a miyanakanywini. Loko u kuma tindzrimana ta Bibele leti kombisaka lisima dzra ku zrula ni ku dumba Yehovha, lwela ku tibeka miyanakanywini. Swi nga ku pfuna ku ti dondzra hi zritu dzra ku tlakuka kumbe ku ti tsrala ka n’wambangu akuva u ti pfuxeta nkama ni nkama. Yoxuwa a leletiwe ku dondzra buku dzra nawu nkama ni nkama hi zritu dzra le hansi akuva a kota ku yentxa mintxhumu hi wutlhazri. Leswi a a swi dondzra a nawini, a swi ta tlhela swi mu pfuna akuva a nga txhavi kambe a va ni xixixi xa ku zrangela vhanu va Xikwembu Nkulukumba. (Yš 1:8, 9) Tindzrimana tinyingi ti kumekaka a Zritwini dzra Xikwembu Nkulukumba, ti nga ku nyika ku zrula ka miyanakanyu  a swiyin’wini leswi hi ntolovelo afa swi ta ku txhavisa swi tlhela swi ku hlatiyelisa.​—Ps 27:1-3; Pr 3:25, 26.

16. Xana Yehovha a dzri tizrisisa kuyini bandla akuva a hi pfuna ku tsrhama na hi zrulile ni ku mu dumba?

¹⁶ 5)Titlhanganise ni vhanu va Xikwembu Nkulukumba. Yehovha a tizrisa vamakwezru akuva va hi pfuna ku tsrhama na hi zrulile hi tlhela hi mu dumba. A mintlhanganwini, hi pfuniwa hi wukaneli lebyi bekiwaka, tinhlamulo leti nyikeliwaka hi vahlaleli ni mabulu lama yakaka a xikazri ka vamakwezru. (Hb 10:24, 25) A bandleni hi nga tlhela hi tiyisiwa swinene hi ku pfulela xifuva vanghanu vezru lava dumbekaka hi va byela leswi hi kazrataka. A ‘zritu ledzrinene’ ledzri humaka ka munghanu dzri nga hi pfuna ngopfu swinene ku pumba ku hlatiyela.​—Pr 12:25.

17. Hi ku ya hi Ba-Heberu 6:19, xana a dumbo dzrezru mayelanu ni Mfumu, dzri nga hi tiyisa hi ndlela yini nambi loko hi lavisana ni swikazratu?

¹⁷ 6) Tiyisa dumbo dzraku. Ku lavisela kwezru ka Mfumu, ku tizra swanga ‘nsoma ya hika,’ leyi yi hi tiyisaka nambi loko hi lavisana ni swiyimu leswi hi kazrataka kumbe ku hlatiyela ka miyanakanyu. (Dondzra Ba-Heberu 6:19.) Xileswo, yanakanyisisa hi xidumbiso xa Yehovha mayelanu ni wumundzruku. Hi nkama lowo, a nga kone lweyi a taka va ni lexi mu hlatiyelisaka. (Eza 65:17) Tivone na u li misaveni leyimpswha, leyi nga ni ku zrula lokukulu, lani swiyimu leswi hlomulanaka mbilu swi nge he tiki va kone. (Mik 4:4) U nga tlhela u tiyisa dumbo dzraku hi ku dzri byela vambeni. Yentxa hinkwaswu leswi u nga swi kotaka a ntizrweni wa ku zrezra ni wa ku yentxa vadondzrisiwa. Loko u yentxa leswo, a ku ‘lavisela kwaku ku va loku tiyiki ku tlhasa wugamu’.​—Hb 6:12.

18. I yini swi nga ha humelelaka a nkameni lowu taka nakone hi nga yentxa yini akuva hi lavisana na swone hi va hi hlula?

¹⁸ Leswi wugamu bya xiyimu lexi xa mintxhumu byi yaka byi tsrhindzrekela, hi ta lavisana ni swikazratu leswi taka hi pfuxela ku hlatiyela. Tsralwa dzrezru dzra lembe dzra 2021 dzri nga hi pfuna ku lavisana ni swikazratu leswo ni ku tsrhama na hi zrulile, ku nge hi ntamu wezru, kambe hi ku dumba Yehovha. Lembe ledzri taka, a hi kombiseni hi mintizro leswaku hi ni lipfumelo ka xidumbiso xa Yehovha, lexi liki: “Ntamu wenu wu ta va ka kuva mi zrula ni ku tlhela mi dumba.”​—Eza 30:15, TNM.