1. Un soni Dafiti bi ta hakisi hënseei, di so fuu sa ta hakisi useei a di ten aki tu?

HII u tuu ta kë abi wan bööböö libi, na wan fuu ta kë abi bookohedi. Ma tökuseei so juu u ta abi bookohedi. Fëën mbei so dinima u Jehovah sa ta hakisi deseei di wan seei soni di Dafiti bi hakisi hënseei. Dafiti bi hakisi hënseei taa: „Un longi mi o ta dë ta tja di fuka aki? Un longi mi o ta dë ta tja di lö bookohedi aki?”​—Ps. 13:2

2. Andi woo taki a di woto aki?

² Hii fa u ta abi bookohedi so juu, tökuseei soni dë di u sa du, fu wa ta booko u hedi te poi. A di woto aki, woo taki u wantu soni di sa ta mbei u ta booko u hedi. Baka di dë, woo taki u sikisi soni di o heepi u fu wa ta dë pantapanta te fuka ta miti u.

3. Andi sa ta mbei u ta booko u hedi, nöö unfa u sa ta koti pasi da dee soni aki?

³ Wa sa köni te nöö wa abi bookohedi. Faandi mbei u taki sö? Wë u di hiniwan jaa a sa pasa taa soni u njan ko möön dii, soni u bisi sa ko möön dii, nasö wosu möni sa hopo gaanfa. Nasö a sa pasa taa dee sëmbë dee u ku de ta wooko a di wan kamian, nasö dee mii dee u ku de nango a di wan siköö, sa ta da u taanga fuu mindi soni, nasö fuu libi fanafiti a di së u manu ku mujëë  soni. Wa sa tapa dee sëmbë dee u ku de ta libi a di wan pisiwata, u de an du hogi. U ta abi dee bookohedi aki, u di u ta libi a wan goonliba ka sëmbë an ta libi ku dee mama wëti u Bëibel. Saatan hën ta tii di goonliba aki. Nöö a sabi taa so sëmbë, o mbei dee ’bookohedi u di goonliba aki’, tapa de u de an dini Jehovah möön (Mat. 13:22; 1 Joh. 5:19). Fëën mbei an ta bigi da u te poi, taa sömëni soni ta dë di ta da sëmbë bookohedi a di goonliba aki!

4. Andi sa pasa ku u te u ta abi sömëni bookohedi?

⁴ Te u ta abi sömëni bookohedi, nöö a sa pasa taa soni u dee bookohedi wanwan nöö u ta pakisei. Kandë u sa ta pakisei taa wa o abi möni tjika u ta bai dee soni dee u ta abi fanöudu, nasö taa woo ko suwaki, nöö di soni dë sa mbei u lasi wooko. U sa ta pakisei tu taa wa o hoi useei a Gadu te tesi miti u. Abiti möön Saatan o mbei sëmbë ko du ku dee sëmbë u Gadu. Fëën mbei u sa ta hakisi useei ee unfa woo du. Kandë u sa ta hakisi useei ee a föutu fuu ta booko u hedi ku dee soni aki.

5. Andi Jesosi bi kë taki di a bi taki taa: „Wan musu ta booko unu hedi”?

⁵ Jesosi bi piki dee bakama fëën taa: „Wan musu ta booko unu hedi” (Mat. 6:25). Di soni aki kë taki taa a bi ta piki u fu wa musu ta booko u hedi ku na wan soni ö? Wë nönö. Wë biga te u luku ën, nöö so u dee dinima u Jehovah u di ten di pasa seei, bi ta booko de hedi ku soni. Ma Jehovah bi ta feni de u bunu jeti. * (1 Kön. 19:4; Ps. 6:3). Hën da ee fuu taki ën, nöö da Jesosi bi ta da u kötöhati. An bi kë fuu ta booko u hedi ku dee soni dee u abi fanöudu sö tee taa wa ko ta buta di dini di u musu dini Jehovah a di fosu kamian a u libi möön. Wë nöö andi sa heepi u fu wa ta booko u hedi tumisi?​—Luku di pisi „ Andi sa heepi i?”

6. Te u luku di soni di sikifi a Filipi 4:6, 7, nöö andi o heepi u fu wa ta dë pantapanta te fuka ta miti u?

⁶ (1) I musu ta begi hii juu. Te wan soni ta da i bookohedi, nöö i sa begi Jehovah faa heepi i ku ën (1 Pet. 5:7). Ee i hakisi Jehovah faa heepi i, nöö a sa da i „di kötöhati [fëën] di bigi pasa hii sëmbë fusutan”. (Lesi Filipi 4:6, 7.) Jehovah ta wooko ku di santa jeje fëën u da u kötöhati, nöö di soni dë ta heepi u fu wa ta dë pantapanta.​—Gal. 5:22.

7. Andi u musu hoi a pakisei te woo begi?

⁷ Te joo begi Jehovah, nöö konda hii soni di dë a i hati dëën. Konda dëën unfa i ta fii. Konda finifini dëën andi da di soni di ta toobi i. Ee a dë wan soni di sa seeka a di ten aki, nöö hakisi ën faa da i di köni ku di kaakiti fii sa seekëën. Ma ee an dë wan soni di sa seeka a di ten aki, nöö hakisi ën faa heepi i fu ja ta booko i hedi tumisi. Te i ta konda finifini da Jehovah andi da di fuka fii, nöö joo sa si te a piki di begi fii. Ee an piki di begi fii wantewante dë, nöö ja musu lasi hati. A dë sö tuu taa Jehovah kë fii ta konda finifini dëën andi da dee fuka fii, ma a kë taa i musu ta konda de dëën hiniwan juu baka.​—Luk. 11:8-10.

8. Andi wa musu fëëkëtë te u ta begi?

⁸ Te woo konda dee bookohedi fuu da Jehovah, nöö wa musu ta fëëkëtë u dëën tangi tu. Wa musu fëëkëtë dee bunu soni dee Jehovah bi du da u, aluwasi soni ko ta taanga da u. A sa dë sö taa ja sabi unfa i musu konda da Jehovah unfa i ta fii tjika. Ma hoi a pakisei taa Jehovah sa piki di begi fii tu, aluwasi i piki ën nöö taa: ’Taata heepi mi!’​—2 Klon. 18:31; Lom. 8:26.

9. Andi sa heepi u te u ta fëëë?

 ⁹ (2) Wooko ku di köni u Jehovah, ma na langi a di u fii seei köni. A di ten di di tjabukama Jesaaja bi dë a libi, dee sëmbë u Juda bi ta fëëë taa dee Asilia sëmbë bi o ko feti ku de. U di de bi ta fëëë taa dee Asilia sëmbë bi o feti wini de, mbei de bi go suku heepi a dee Egepiti sëmbë (Jes. 30:1, 2). Jehovah bi bai de taa ee de bi buta futoou a dee Egepiti sëmbë, nöö soni an bi o waka bunu da de (Jes. 30:7, 12, 13). Jehovah bi mbei di tjabukama Jesaaja piki dee sëmbë u Juda andi de bi musu du, u de an dë pantapanta. Jehovah bi mbei Jesaaja piki de taa: „Un dë piii, nöö un futoou mi, nöö woon feni taanga.”​—Jes. 30:15b.

10. Na un ten u sa lei taa u ta futoou Jehovah?

¹⁰ Na un ten u sa lei taa u ta futoou Jehovah? Wë buta pakisei a dee soni aki. Kandë i feni wan wooko ka de o ta paka i hia möni, ma di wooko dë o ta tapa i fu ja feni ten möön fii dini Jehovah kumafa i bi naa. Nasö kandë wan sëmbë di i ku ën ta wooko a di wan kamian ta pidi i, ma di sëmbë dë an dë wan dopudopu dinima u Jehovah. Nasö kandë wan famii fii piki i taa ee ja disa di Gadu fii u dini, nöö ja musu hulu ën möön. Wë ee dee soni aki ko pasa, nöö a sa taanga da i fii sabi andi i musu du. Ma Jehovah o heepi i fii sa sabi andi i musu du (Mat. 6:33; 10:37; 1 Kol. 7:39). Ma joo futoou Jehovah tjika fii du soni kumafa a taki ö?

11. Un woto u Bëibel sa heepi u fu wa dë pantapanta, te sëmbë ta du ku u?

¹¹ (3) Lei soni a dee sëmbë dee an bi du soni a wan bunu fasi, ku dee bi du soni a wan bunu fasi. Sömëni woto dë a Bëibel di ta lei u unfa a dë fanöudu tjika fuu ta dë piii ta wakiti Jehovah, te sëmbë ta du ku u. Te joo luku dee woto aki, nöö buta pakisei a di soni di bi heepi dee dinima u Gadu u de dë piii ta wakiti ën, te sëmbë bi ta du ku de. Di dee sëmbë u di kuutuwosu u dee Dju bi bai dee apösutu u de an peleiki möön, nöö di soni dë an bi mbei de fëëë. Ma de bi piki dee sëmbë u di kuutuwosu taa: „Masa Gadu buka hën u musu piki möön gaanfa möön libisëmbë buka e” (Tjab. 5:29). Bakaten de bi wipi dee apösutu, ma tökuseei di soni aki an bi mbei de fëëë. Faandi mbei an bi mbei de fëëë? Wë u di de bi sabi taa Jehovah dë ku de a wan së. Jehovah bi ta heepi de. Fëën mbei de bi paaja di bunu buka go dou? (Tjab. 5:40-42) Sö nöö di de bi kë kii Sitefani, nöö a bi dë u si seei taa an bi ta fëëë. Fesi fëën bi ko dë kuma wan „basia u Masa Gadu köndë” (Tjab. 6:12-15). Unfa a du waka taa fesi fëën bi ko dë sö? Wë u di a bi dë seiki taa Jehovah ta feni ën u bunu.

12. Te u luku di soni di sikifi a 1 Petuisi 3:14 ku 4:14, nöö faandi mbei u sa taki taa u sa ta dë waiwai, hii fa sëmbë ta du ku u?

¹² Dee apösutu bi ta si gbelingbelin taa Jehovah bi dë ku de. A bi da de kaakiti u de bi sa ta du foombo soni (Tjab. 5:12-16; 6:8). Ma a di ten aki, Jehovah an ta mbei u du foombo soni. Ma Jehovah ta wooko ku di Wöutu fëën u mbei u sabi taa te sëmbë ta du ku u di u ta du bunu soni hedi, nöö a ta wai ku. Söseei a o ta heepi u ku di santa jeje fëën. (Lesi 1 Petuisi 3:14; 4:14.) Hën da wa musu ta booko u hedi ku di fasi fa woo du soni te sëmbë o du ku u a di ten di ta ko. Ma u musu mbei möiti fuu ko ta möön futoou taa Jehovah o heepi u, söseei taa a o tjubi u. Jesosi bi paamusi dee bakama fëën taa: „Miseei o da unu dee wöutu dee fuun taki. Mi o da unu fusutan fuun sabi unfa fuun piki de. Nöö te un fan te un kaba kaa, nöö na wan u dee felantima fuunu o feni soni u piki möön.” Dee bakama u Jesosi bi ta biibi di soni aki, nöö sö useei musu ta biibi ën  tu. Jesosi bi paamusi u tu taa: „Ee un hoi a di biibi go dou, nöö woon feni di libi u teego” (Luk. 21:12-19). Nöö hoi a pakisei taa Jehovah ta mëni hiniwan soni u dee dinima fëën dee bi hoi deseei nëën u te de dëdë, nöö a o weki de ko a libi baka.

13. Un wini u ta feni te u ta öndösuku woto u dee sëmbë dee an bi dë piii ta wakiti Jehovah?

¹³ U sa lei soni tu a woto u sëmbë di an bi dë piii ta wakiti Jehovah. Te u ta öndösuku woto u dee lö sëmbë aki, nöö a o heepi u fu wa mbei dee seei föutu di de bi mbei. Di Könu Asa bi ko dë könu u Juda, hën wanlö gaan hia sodati bi ko feti ku ën. Ma a bi lei taa a ta futoou Jehovah (2 Klon. 14:9-12). Bakaten, Könu Bajeisa u Isaëli bi ko feti ku Könu Asa ku wan möön piki kulupu sodati. A di ten dë, Asa an bi buta futoou a Jehovah kumafa a bi du ën a di ten di pasa (2 Klon. 16:1-3). Ma a bi paka dee Silia sodati u de ko heepi ën. Söseei di Asa bi o dëdë, u di a bi ko siki wan gaan siki, nöö an bi go suku heepi a Jehovah tu.​—2 Klon. 16:12.

14. Andi u sa lei a dee föutu dee Asa bi mbei?

¹⁴ Bigibigi, Asa bi ta suku heepi a Jehovah te fuka bi ta miti ën. Ma bakaten, an bi ta suku heepi a Jehovah möön, ma a bi ta suku u du soni kumafa hënseei pakisei. Di Asa bi go hakisi dee Silia sodati u de heepi ën feti ku dee Isaëli sëmbë, nöö soni bi waka bunu u wan pisiten, ma an bi dë sö u nöömö. Jehovah bi manda wan tjabukama fëën go piki Asa taa: „U di ja suku heepi a Jehovah di Gadu fii, ma i go suku heepi a di Könu u Silia, mbei ja o sa feti wini dee sodati u di könu u Silia” (2 Klon. 16:7). U musu köni fu wa ko ta futoou useei te nöö u ko ta du soni kumafa useei ta pakisei, söndö fuu luku andi di Wöutu u Jehovah ta taki. So juu a sa pasa taa u musu du wan soni hesihesi. Ma u musu tei ten luku andi di Wöutu u Jehovah ta taki, nöö Jehovah o mbei soni waka bunu da u.

15. Andi u sa ta du te u ta lesi di Bëibel?

¹⁵ (4) Hoi Bëibel tëkisi a hedi. Te i ta lesi di Bëibel, hën i ko si tëkisi di ta lei faandi mbei a dë fanöudu fuu ta dë piii ta wakiti Jehovah, nöö mbei möiti fii hoi de a hedi. Fii sa möön hoi de a hedi, nöö kandë a bi o möön bunu fii lesi de taanga, nasö fii sikifi de buta a wan kamian. Jehovah bi piki Josua taa a bi musu ta lesi di wëti buku hii juu. A bi musu ta lesi ën sapisapi, faa bi sa du soni a wan köni fasi. Dee soni dee Josua bi o ta lesi a di wëti buku, bi o heepi ën tu fu an ta dë fëëëfëëë, ma a bi o sa abi di degihati u tii dee sëmbë u Gadu (Jos. 1:8, 9). Soni dë di sa miti i di sa mbei i fëëë. Ma sömëni tëkisi dë a di Wöutu u Gadu di sa heepi i fu ja fëëë, hii fa dee soni dë ta miti i.​—Ps. 27:1-3; Nöng. 3:25, 26.

16. Unfa Jehovah ta heepi u ku di kemeente fuu sa dë piii ta wakiti ën?

¹⁶ (5) I musu ta dë makandi ku dee sëmbë u Gadu. Jehovah ta tei dee baaa ku dee sisa fuu u heepi u fuu sa dë piii ta wakiti ën. A dee komakandi, u ta feni wini u dee taki di de ta hoi. U ta feni taanga a dee piki di de ta da, söseei u ta feni degihati te u ta fan ku dee baaa ku dee sisa fuu (Heb. 10:24, 25). U ta feni wini tu, te u ta konda da dee mati fuu dee u abi a di kemeente andi da dee bookohedi fuu. Te wan mati fuu ta fan ku u „a wan suti fasi”, nöö a sa heepi u fu wa ta booko u hedi tumisi.​—Nöng. 12:25.

17. Te u luku Hebelejën 6:19, nöö unfa dee soni dee Gadu paamusi u ta heepi u fuu dë piii ta wakiti Jehovah, te soni ta taanga da u?

¹⁷ (6) I musu ta mëni dee soni dee Gadu paamusi u. Dee soni dee Gadu paamusi u „dë kuma wan hanka di ta hoi u a libi”. De ta heepi u fuu taanpu gingin, aluwasi fuka ta miti u, nasö aluwasi u abi bookohedi. (Lesi Hebelejën  6:19.) Kai pakisei a dee soni dee Jehovah paamusi u taa a o du da u a di ten di ta ko. Biga a di ten dë, an o dë u sëmbë ta booko de hedi möön (Jes. 65:17). Pakisei unfa joo ta dë bööböö a di njunjun goonliba, ka soni an o dë di ta da sëmbë bookohedi möön (Mik. 4:4). Joo ko ta möön biibi dee soni dee Gadu paamusi u, te i ta konda de da wotowan. Mbei hii möiti fii ta du di peleikiwooko, söseei fii ta heepi sëmbë u de ko dë bakama u Keesitu. Te i du sö, ’nöö joo sabi gbelin taa joo kisi dee bunu u Gadu nöömö dee a abi da u a bakaten’.​—Heb. 6:11.

18. Andi u sa dë ku di mëni taa o pasa a di ten di ta ko, nöö andi u sa du?

¹⁸ Möön di kaba u di goonliba aki ta ko zuntu, möön soni o ta dë di ta da u bookohedi. Di tëkisi u di jaa 2021 o heepi u fuu dë piii ta wakiti Jehovah te dee fuka aki o miti u. Wa o sa du di soni aki ku useei kaakiti, ma woo sa du ën u di u ta futoou Jehovah. Boo lei a hii di jaa 2021, ku dee soni dee u ta du, taa u ta biibi di soni di Jehovah paamusi u. A paamusi u taa: „Un dë piii, nöö un futoou mi, nöö woon feni taanga.”​—Jes. 30:15.