1. Ke potso efe e Kgosi Dafide a ileng a e botsa Jehofa e le rona re ka e botsang?

ROTLHE re batla go itumelela botshelo. Ga go na ope yo o ratang go nna a tshwenyegile. Mme gone, ka dinako dingwe mathata a botshelo a ka nna a dira gore re tlhobaele. Ka jalo, batlhanka bangwe ba ga Jehofa le bone ba ka botsa potso e Dafide a ileng a e botsa Jehofa, e e reng: “Ke tla kgaratlha mo moyeng wa me ka lobaka lo lo kae?”—Pes. 13:2.

2. Re tla tlotla ka eng mo setlhogong seno?

² Gone ka dinako dingwe rotlhe re a tle re tlhobaele mme gone, go na le dilo dingwe tse re ka di dirang gore re se ka ra tlhobaela thata. Mo setlhogong seno, re tla tlotla ka dilo dingwe tse di ka dirang gore re tlhobaele. Go tswa foo, re bo re tlotla ka dilo di le thataro tse di ka re thusang go nna re ritibetse fa re na le mathata.

3. Ke dilo dife tse di ka dirang gore re tlhobaele mme a go na le sengwe se re ka se dirang gore di se ka tsa diragala?

³ Go na le dilo di le dintsi tse di ka dirang gore re tlhobaele. Mme ga re kgone go thibela dingwe tsa dilo tseo go direga. Ka sekai, ga re kgone go thibela tlhwatlhwa ya dijo, diaparo le ya rente gore e se ka ya tlhatloga ngwaga le ngwaga. E bile ga re ka ke ra laola gore batho ba re berekang le bone kgotsa ba re tsenang sekolo le bone, ba tla re raela makgetlo a le makae gore re dire boitsholo jo bo sa siamang. Gape ga re ka ke ra thibela batho gore ba se ka ba dira bokebekwa mo re dulang gone. Dilo tseno di a re diragalela ka gonne batho ba re tshelang  le bone ga ba dire ditshwetso go ya ka melaometheo ya Baebele. Gape modimo wa lefatshe leno e bong Satane o a itse gore batho bangwe ga ba kitla ba direla Jehofa ka gonne ‘tsamaiso eno ya dilo e dira gore ba tlhobaele.’ (Math. 13:22; 1 Joh. 5:19) Ka jalo, ga re makale fa re bona lefatshe le tletse mathata a a dirang gore batho ba tlhobaele!

4. Ke eng se se ka diragalang fa re tlhobaela thata ka mathata a rona?

⁴ Re ka tlhobaela ka mathata a rona thata jaana mo re feleletsang re palelwa ke go akanya ka dilo tsa botlhokwa. Ka sekai, re ka tlhobaela ka gore ga re kitla re nna le madi a a lekaneng gore re reke dilo tse re di tlhokang. Gape re ka tlhobaediwa ke go akanya gore re ka lwala, re bo re sa kgone go ya tirong kgotsa re bo re latlhegelwa ke tiro. Mme gape re ka tlhobaediwa ke go akanya gore re tlile go palelwa ke go ikanyega fa re raelwa gore re tlole melao ya Modimo. Go ise go ye kae, Satane o tla tlhotlheletsa batho ba gagwe gore ba tlhasele batho ba Modimo. Ka jalo, re ka nna ra tshwenyega, re ipotsa gore re tlile go dira eng fa seo se direga. Gongwe re ka ipotsa gore ‘A go siame gore re tlhobaele ka dilo tseno?’

5. Jesu o ne a kaya eng fa a ne a re: “Tlogelang go tlhobaela”?

⁵ Jesu o ile a raya balatedi gagwe a re: “Tlogelang go tlhobaela.” (Math. 6:25) A Jesu o ne a raya gore ga re a tshwanela go tlhobaela ka sepe? Nnyaa, o ne a sa reye jalo. Gopola gore batlhanka bangwe ba ga Jehofa ba mo nakong e e fetileng le bone ba ne ba tlhobaela. Mme Jehofa o ne a sa ntse a ba amogela. * (1 Dikg. 19:4; Pes. 6:3) Tota fa Jesu a ne a re re tlogele go tlhobaela, o ne a re gomotsa. O ne a sa batle re tlhobaela ka dilo tse re di tlhokang, mo re ka feleletsang re sa tlhole re tlhoma mogopolo mo go direleng Jehofa. Jaanong, ke eng se re ka se dirang fa re tlhobaela?—Bona lebokoso la setlhogo se se reng, “ Se o Ka se Dirang.”

6. Bafilipi 4:6 le 7 ya re ke eng se se ka re thusang go nna re ritibetse?

⁶ (1) Rapela ka metlha. Fa o tshwenyegile ka sengwe, kopa Jehofa gore a go thuse. (1 Pet. 5:7) Jehofa a ka araba dithapelo tsa gago ka go go naya “kagiso ya Modimo e e gaisang kakanyo yotlhe” ya batho. (Bala Bafilipi 4:6, 7.) Jehofa o tla re naya kagiso a dirisa moya wa gagwe o o boitshepo.—Bagal. 5:22.

7. Re tshwanetse go nna re gopotse eng fa re rapela Jehofa?

⁷ Fa o rapela Jehofa, mmolelele sengwe le sengwe se se go tshwenyang. O se ka wa potapota. Mmolelele gore bothata jwa gago ke eng, o bo o mo tlhalosetsa gore o ikutlwa jang. Fa bothata jwa gago bo ka kgona go baakanyega, mo kope gore a go neye botlhale jwa gore o ka dira eng le maatla a go dira selo seo. Mme fa bothata jwa gago bo ka se kgone go baakanyega, mo kope gore a go thuse gore o se ka wa tlhobaela thata. Fa o sa potapote fa o rapela mme o bolelela Jehofa ka tlhamalalo gore bothata jwa gago ke eng, o tla kgona go lemoga fa Jehofa a araba dithapelo tsa gago. Fa Jehofa a sa arabe dithapelo tsa gago ka yone nako eo, o se ka wa tlogela go rapela. Jehofa o batla gore o se ka wa potapota fa o mmolelela mathata a gago gape o batla gore o se ka wa kgaotsa go mo rapela.—Luke 11:8-10.

8. Ke eng se re sa tshwanelang go se lebala fa re rapela?

⁸ Fa o bolelela Jehofa mathata a gago, o se  ka wa lebala go mo leboga. Le fa re na le mathata, go botlhokwa gore re akanye ka dilo tse di molemo tse re nang le tsone. Mme o tshwanetse go dira eng fa o sa itse gore o bolelele Jehofa mathata a gago jang? Gopola gore Jehofa a ka kgona go araba dithapelo tsa gago, le fa selo se le sengwe fela se o kgonang go se bua ka nako eo e le: ‘Ke kopa gore o nthuse.’—2 Ditir. 18:31; Bar. 8:26.

9. Ke eng se re tshwanetseng go se dira fa re ikutlwa re sa sireletsega?

⁹ (2) Ikaege ka Jehofa e seng ka botlhale jwa gago. Ka motlha wa ga moporofeti Isaia, Bajuda ba ne ba tshogile gore ba tlile go tlhaselwa ke Baasiria. Ba ne ba sa batle go fenngwa, ka jalo, ba ne ba kopa gore Baegepeto ba ba thuse. (Isa. 30:1, 2) Jehofa o ne a ba bolelela gore ba ne ba tlile go ipakela mathata fa ba ka ikanya Baegepeto. (Isa. 30:7, 12, 13) Jehofa o ile a dirisa Isaia go ba bolelela gore ba ka dira eng gore ba bone tshireletsego ya mmatota. Isaia o ile a ba raya a re: “Maatla a lona a tla tlisiwa fela ke go nna lo sa tshwenyege le go ikanya” Jehofa.—Isa. 30:15b.

10. Ke mo maemong afe a re tshwanetseng go bontsha gore re tshepa Jehofa?

¹⁰ Ke mo maemong afe a mo go one re ka bontshang gore re tshepa Jehofa? Akanya ka dikai tseno. A re re o newa tiro e e duelang madi a mantsi mme tiro eo e go tlhoka gore o bereke diura di le dintsi. Ka jalo, seo se tla dira gore o se ka wa direla Jehofa ka tsela e o neng o mo direla ka yone pele. Kgotsa motho yo o berekang le wena o simolola go go kgatlhegela mme motho yoo ga se Mosupi wa ga Jehofa. Kgotsa mongwe wa losika o go bolelela gore ga a tlhole a batla go dirisana le wena fa e le gore o tla tswelela o direla Jehofa. Mo maemong ano otlhe, o tla tlhoka go dira tshwetso mme gone, Jehofa o tla go thusa go dira tshwetso e e siameng. (Math. 6:33; 10:37; 1 Bakor. 7:39) Mme gone, a o tla tshepa Jehofa le go ikobela kaelo ya gagwe?

11. Ke dipego dife tsa Baebele tse re ka di balang, tse di ka re thusang go nna re ritibetse fa re bogisiwa?

¹¹ (3) Ithute mo dikaong tse di molemo le tse di sa siamang. Go na le dipego di le dintsi mo Baebeleng tse di re bontshang botlhokwa jwa go nna re ritibetse le go ikanya Jehofa. Fa o ntse o bala dipego tseno, akanya ka se se ileng sa thusa batlhanka ba Modimo go nna ba ritibetse le fa batho ba ne ba ba ganetsa. Ka sekai, baaposetoloi ga ba a ka ba boifa fa kgotlatshekelo ya Bajuda e ne e ba laela gore ba tlogele go rera. Go na le moo, ba ile ba bua ba le pelokgale ba re: “Re tshwanetse go utlwa Modimo e le mmusi bogolo go batho.” (Dit. 5:29) Ga ba a ka ba tshoga le fa ba sena go itewa. Ka ntlha yang? Ka gonne ba ne ba itse gore Jehofa o ba eme nokeng. Le gore o ne a ba amogela. Ka jalo, ba ile ba tswelela go rera dikgang tse di molemo. (Dit. 5:40-42) Setefane le ene o ne a ritibetse fa a ne a tloga a bolawa. Ka ntlha ya seo, Baebele ya re sefatlhego sa gagwe se ne “se tshwana le sefatlhego sa moengele.” (Dit. 6:12-15) Goreng Setefane a ne a ritibetse? Ka gonne o ne a tlhomamisegile gore Jehofa o a mo amogela.

12. Go ya ka 1 Petere 3:14 le 4:14, goreng re ka kgona go itumela le fa re bogisiwa?

¹² Baaposetoloi ba ne ba na le bosupi jwa gore Jehofa o ba eme nokeng. O ne a ba neile maatla a go dira dikgakgamatso. (Dit. 5:12-16; 6:8) Mme gompieno Jehofa ga a re neye maatla a go dira dikgakgamatso. Le fa go ntse jalo, o dirisa Lefoko la gagwe go re bolelela gore fa re bogisiwa ka ntlha ya go bo re dira dilo tse di siameng, re ka kgona go itumela ka gonne re itse gore re a mo itumedisa le gore moya wa gagwe o o boitshepo o tla re thusa. (Bala 1 Petere 3:14; 4:14.) Ka jalo, ga re a tshwanela go tshwenyega ka gore re tla dira  eng fa re bogisiwa mo nakong e e tlang. Go na le moo, re tshwanetse go nonotsha tumelo ya rona mo go Jehofa gore o tla re ema nokeng le go re thusa. Fela jaaka barutwa ba ga Jesu, le rona re tshwanetse go tshepa se Jesu a ileng a se bua. O ile a re: “Ke tla lo naya molomo le botlhale, tse baganetsi ba lona botlhe ba le mmogo ba se kitlang ba kgona go emelelana le tsone kgotsa go di ganetsa.” Gape o ile a re solofetsa gore: “Lo tla bona meya ya lona ka go itshoka ga lona.” (Luke 21:12-19) O se ka wa lebala gore Jehofa o gopola le dilo tse dinnye tse di sa reng sepe ka batlhanka ba gagwe ba ba tlhokafetseng, gore a tle a kgone go ba tsosa.

13. Re ka thusiwa jang ke go bala le go ithuta ka batho ba ba ileng ba se ka ba ikanya Jehofa?

¹³ Gape re ka ithuta mo dikaong tsa batho ba ba ileng ba palelwa ke go nna ba ritibetse le go tshepa Jehofa. Fa re bala le go ithuta ka bone, seo se ka re thusa gore re se ka ra dira diphoso tse ba ileng ba di dira. Ka sekai, fa Asa a sena go nna Kgosi ya Juda o ne a tlhaselwa ke masole a le mantsi. Ka nako eo, o ile a ikanya Jehofa mme Jehofa o ile a mo segofatsa a bo a dira gore a fenye. (2 Ditir. 14:9-12) Moragonyana Kgosi ya Iseraele e bong Baasha, o ile a ya go tlhasela Asa ka masole a le mannye. Mme mo lekgetlong leno, Asa ga a ka a ikaega ka Jehofa. Go na le moo, o ile a kopa gore Basiria ba mo thuse. (2 Ditir. 16:1-3) Gape fa Asa a ne a lwala e bile a tloga a swa, ga a ka a kopa thuso kwa go Jehofa.—2 Ditir. 16:12.

14. Re ka ithuta eng mo diphosong tsa ga Asa?

¹⁴ Fa Asa a ne a simolola go busa, o ne a ikanya Jehofa fa a ne a na le mathata. Mme moragonyana ga a ka a dira jalo. Go na le moo, o ne a leka go itharabololela mathata a gagwe. Kwa tshimologong, go ne go lebega e kete leano la ga Asa la go kopa Basiria gore ba mo thuse go lwa le Iseraele, le ne le tlile go bereka. Mme gone, ga go a ka ga nna le kagiso ka lobaka lo loleele mo Juda. Jehofa o ile a bua le Asa a dirisa moporofeti wa gagwe a re: “Ka gonne o ne wa ikaega ka kgosi ya Siria mme wa se ka wa ikaega ka Jehofa Modimo wa gago, ka lebaka leo mophato wa sesole wa kgosi ya Siria o falotse mo seatleng sa gago.” (2 Ditir. 16:7) Ka metlha fa re lebana le mathata, re tshwanetse go kopa gore Jehofa a re kaele a dirisa Lefoko la gagwe, go na le go leka go itharabololela mathata a rona. Le fa re tlhoka go dira tshwetso ka bonako, re tshwanetse go ikaega ka Jehofa mme o tla re thusa go dira tshwetso e e siameng.

15. Ke eng se re ka se dirang fa re bala Baebele?

¹⁵ (4) Tshwara ditemana tsa Baebele ka tlhogo. Fa o kopana le ditemana tsa Baebele tse di bontshang botlhokwa jwa go nna o ritibetse le go tshepa Jehofa, leka go di tshwara ka tlhogo. Gongwe o ka thusiwa ke go di balela kwa godimo kgotsa wa di kwala o bo o di bala nako le nako. Jehofa o ile a bolelela Joshua gore a nne a balele buka ya Molao kwa tlase gore a tle a kgone go dira ditshwetso tse di siameng. Se a neng a se bala se ne se tla mo thusa gore a se ka a boifa mme a nne pelokgale gore a kgone go etelela batho ba Modimo pele. (Josh. 1:8, 9) Ditemana di le dintsi tsa Baebele di ka go thusa gore o nne o ritibetse fa o lebana le maemo a gantsi a ka dirang gore o tlhobaele kgotsa o tshoge.—Pes. 27:1-3; Dia. 3:25, 26.

16. Jehofa o dirisa jang phuthego ya gagwe go re thusa gore re nne re ritibetse le go mo ikanya?

¹⁶ (5) Fetsa nako le batho ba ba direlang Jehofa. Jehofa o dirisa bakaulengwe le bokgaitsadi go re thusa go nna re ritibetse le go mo ikanya. Fa re le kwa dipokanong re solegelwa molemo ke dipuo tse di neelwang, dikarabo  tsa bakaulengwe le bokgaitsadi le go tlotla ka dilo tse di kgothatsang le bone. (Baheb. 10:24, 25) Gape re ka thusiwa ke go bolelela ditsala tsa rona gore ke eng se se re tshwenyang. ‘Mafoko a a molemo’ kgotsa a a kgothatsang a a tswang kwa tsaleng ya gago, a ka go thusa gore o se ka wa tshwenyega thata.—Dia. 12:25.

17. Bahebera 6:19 ya re tsholofelo e re nang le yone e ka re thusa jang go nna re ritibetse le fa re lebana le mathata?

¹⁷ (6) Nonotsha tumelo ya gago. Tsholofelo ya rona e tshwana le “tshetledi ya moya.” E re thusa gore re itshoke le fa re kopana le maemo a a thata kgotsa a a dirang gore re tlhobaele. (Bala Bahebera 6:19.) Akanya ka botshelo jo Jehofa a re solofeditseng jone. Ka nako eo, o tla bo o tshela go sena sepe se o tshwenyegang ka sone. (Isa. 65:17) Ipone o tshela kwa lefatsheng le lesha le le nang le kagiso, le kwa go lone go se kitlang go direga dilo tse di bosula e bile matshwenyego a gago e le dilo tsa maloba. (Mika 4:4) Gape o ka nonotsha tumelo ya gago ka go bolelela ba bangwe ka tsholofetso ya go tshela kwa lefatsheng le lesha. Dira ka natla mo tirong ya go rera le ya go dira batho barutwa. Fa o dira jalo o tla nna o ‘tlhomamisegile ka tsholofelo e o nang le yone go fitlha . . . kwa bokhutlong.’—Baheb. 6:11.

18. Re ka diragalelwa ke eng mo nakong e e tlang mme re ka dira eng fa seo se direga?

¹⁸ E re ka re le gaufi le bokhutlo jwa tsamaiso eno ya dilo, re tlile go nna le mathata a le mantsi a a ka dirang gore re tlhobaele. Temana ya ngwaga ya 2021 e ka re thusa go nna re ritibetse fa re lebana le mathata le go ikanya Jehofa, e seng maatla a rona. Mo ngwageng ono, a re bontsheng gore re tshepa mafoko a ga Jehofa a a reng: “Maatla a lona a tla tlisiwa fela ke go nna lo sa tshwenyege le go ikanya.”—Isa. 30:15.