1. Hingana Mambo Dhavhidhi, akawanda edu angazvibvunzisa kudini?

TESE hedu tinoda kugara no upenyu wakaterama. Apana unoda kugara ecidzirhya mwoyo. Pa nguwa dzimweni, pamweni paya, tingakwanisa kudzirhya mwoyo. Ndiyo ndaa, aseenzi amweni a Djehovha angakwanisa kuita mubvunzo umwewo wakaizwawo na Mambo Dhavhidhi kuna Djehovha wekuti: “Ndicarumbwa ndecinetseka dakara riini, ndiine shungu mu mwoyo mangu zuwa no zuwa?”—Pis. 13:2.

2. Ticaonei mu fundo ino?

² Kunyazi tisikakwanisi kugara takasudzunuka pa mazwiro e kudzirhya mwoyo, tingakwanisa kuita zviri zvese kuti tionerere mazwiro aya. Mu fundo ino, ticaona zviro zvinoita kuti tidzirhye mwoyo. Pedzepo, ticareketa zviro zvitanhatu zvinotibetsera kuti tikwanisane no zvinetso zvedu.

3. Kubambidzirhwa kupi katinobatana nako uye tinokwanisa kuuonerera dakara papi?

³ Tingakwanisa kuguma pa kukonerhwa kuonerera zviya zvingakwanisa kuita kuti tidzirhye mwoyo. Ngo muezaniso, atikwanisi kuziya mare yatingapedza kuti titenge zvokurhya, macira uye kuripa nyumba pa gore rimwe na rimwe; uye atikwanisi kugara taziya kuti atinoseenza nawo uye atinofunda nawo acatiedza kudini kuti tigare anhu asikazi kugondeka kana kuti anoita uhure. Uye atikwanisi kuimisa ubhinya uri mu nharauda yatinogara. Tinobatana no zvinetso izvi ngokuti tiri kurarama mu nyika yekuti ndangariro dze anhu adzienderani no mitemo ye Bhaibheri. Sathani, mwari we nyika ino, unoziya kuti anhu amweni acatendera kuti “kudzirhya mwoyo no zviro zve nyika ino” zviapingaidze kuseenzera  Djehovha. (Mt. 13:22; 1Ju. 5:19) Azvishamisi, kuti nyika yakadzara no zviro zvinoita kuti tipisike musoro!

4. Tingakwanisa kudini kukundwa no kubambidzirhwa kakakura?

⁴ Tingakwanisa kukundwa no kubambidzirhwa zveciita kuti tidzirhye mwoyo. Ngo muezaniso, tingakwanisa kutya kuti atizogari no mare yakakwana kuti titenge zviya zvatinoda kana kuti kurhwara uye tokonerhwa kuenda kubasa, pamweni kutoruza basa. Tingakwanisawo kunetseka nge ndaa yekuti atizokwanisi kugara takagondeka paya patinoedzwa kuti tisateerere mitemo ya Djehovha. Mbai-mbai pano, Sathani ucaita kuti aya aanotonga arhwise anhu a Mwari, ngokudaro tinokwanisa kunetseka kuti ticadikana kuitei kana nguwa ii yaguma. Pamweni tingazvibvunzisa kuti, ‘zvakashata here kunetseka nge ndaa ye matambudziko aya?’

5. Djesu aida kureyei paakati: “Musadzirhye mwoyo”?

⁵ Tinoziya kuti Djesu akati ku ateeri ake: “Musadzirhye mwoyo.” (Mt. 6:25) Izvi zviri kuda kureya kuti unoetsera kuti tisambodzirhya mwoyo? Zvezvirokwazvo haiwa! Kana tikada kuona, kare aseenzi anganani a Djehovha akagondeka, akasonganawo no kudzirhya mwoyo uye awona aazi kurambwa na Djehovha. * (1Mad. 19:4; Pis. 6:3) Zvezvirokwazvo Djesu ainga ecitigondesa kuti tisagume pa kudzirhya mwoyo no zviro zve upenyu kutoguma pa kukanganisa basa ratinoitira Djehovha. Hino, makwanza api atinokwanisa kuseenzesa kuti tionerere mazwiro e kudzirhya mwoyo?—Onai bhokisi rakazwi “ Mungazviita Kudini.”

6. Maererano no Afiripi 4:6, 7, zvii zvingakwanisa kunyaradza kudzirhya mwoyo?

⁶ (1) Namatai nguwa dzese. AKristu anonga ari mukubambidzirhwa anokwanisa kugumira nyaradzo paanoita munamato we pamwoyo kuna Djehovha. (1Pe. 5:7) Mhinduro ye munamato wawo, ingakwanisa kuapasa “runyararo ra Mwari rinopinda kuzwisisa kese [ke anhu].” (Erengai Afiripi 4:6, 7.) Djehovha unonyaradza ndangariro dzedu dze kudzirhya mwoyo.—Aga. 5:22.

7. Zvinyi zvatinodikana kuziya patinoita munamato?

⁷ Pamunokhwedera dhuze na Djehovha meciseenzesa munamato, reketai zvese zviri mu mwoyo menyu kaari. Zvibudisei pamhene. Reketai dambudziko ramunaro uye panganidzai kaari kuti munozwa kudini nge zvazvo. Kana paano mhinduro, mukumbirei uzii kuti muigumire uye simba kuti muzviseenzese. Kana mhinduro yakhona isikapindirani no dambudziko ramunaro, kumbirai Djehovha amubetsere kuti musanyanye kunetseka ndizvona. Kana mukareketa zviri kumunetsai pa minamato yenyu, no kuhamba ke nguwa mucakwanisa kuona kuti Djehovha akamudaira kudini. Kana mhinduro ikatama kuguma no kukasika mumasure me kuita munamato, musarembe. Djehovha unoda kuti imwimwi mugare haiwa basi kuti murekete mazwiro enyu, asi murumbwe mecinamata.—Ru. 11:8-10.

8. Tinodikana kubatanidzei pa minamato yatinoita?

⁸ Pamunokhandira kudzirhya mwoyo kenyu kuna Djehovha ngo munamato, batanidzaiwo masoko e kutenda. Zvakanakawo kuti tiziye makomborero atiinawo, kunyazi patinonga tiri pa mugariro wakashata. Asi pamweni paya kana mukakonerhwa masoko e kureketa  mazwiro enyu anorhwadza, edzurirai kuti Djehovha unodaira minamato midoko yakadai hingana ‘Ndapota, ndibestereiwo!’—2 Mak. 18:31; Aro. 8:26.

9. Runyararo re zvirokwazvo ringaoneka kudini?

⁹ (2) Gondai ungwaru wa Djehovha, haiwa wenyu. Muzana re makore re cisere K.A.A., anhu e ciDjudha akaphikiswa no Asirya. Paaiyedza zviri zvese kuti asagare aranda e Asirya, awona akaedza kupsvaka rubetso re anhu asikanamati Mwari, aEdjipitu. (Isa. 30:1, 2) Djehovha akaangwadza kuti muitiro wawo wakashata waizopedzesera no ngozi. (Isa. 30:7, 12, 13) Eciseenzesa Isaya, Djehovha akareketa kuti anhu akaita hingana awona angaona kudini runyararo re zvirokwazvo. Iyena akati: “Simba renyu riri pa kurumbwa makaterama uye muine rugondo” kuna Djehovha.—Isa. 30:15b.

10. Magarire api e zviro atingapangidza rungondo redu kuna Djehovha?

¹⁰ Tingapangidza kudini rugondo redu muna Djehovha? Onai miezaniso minganani. Ngatitii mapaswa basa rinomare maningi, raizokumbira nguwa yakareba muri mu gwanza uye ricabata-bata urongwa wenyu we kunamata. Kana kuti munhu wamunoseenza naye anopangidza mazwiro ekumudai, asi munhu uyu amuseenzipi wa Mwari wakabhabhatidzwa. Kana kuti, rangarirai imwe ye nhengo ye mumhuri ingareketa yecimupsvinyirai yeciti: “Ndini kana kuti ndi Mwari wako.” Migarire ye zviro yakaita hingana iyi, munodikana kuita cisananguro cinoshupha, asi pa magarire ese aya e zviro Djehovha ucamupasai nhungamiriro yamunoda. (Mt. 6:33; 10:37; 1Ako. 7:39) Asi mubvunzo unomuka ndewe kuti, Mucagonda nhungamiriro iyona kuti muiseenzese here?

11. I ngano dzipi dziri mu Bhaibheri dzingakwanisa kutibetsera kuti tirumbwe takaterama patinonga teciphikiswa?

¹¹ (3) Fundirai no miezaniso yakanaka uye yakashata. Mu Bhaibheri muno ngano dzakawanda dzinopangidza kuti ngei zvakana kugara takaterama uye tecigonda Djehovha. Paticafunda zviitiko izvi, onai kuti zvinyi zvakabetsera aseenzi a Mwari kuti arumbwe akaterama paainga ari mukupikiswa kakakura. Ngo muezaniso, atongi e ciDjudha paakabvunza afundi kuti aime kuparidzira, awona aazi kutya. Pane kudaro, no ushingi awona akati: “Pakutanga tinodikana kuzwira Mwari hinga mutongi, pane kuzwira anhu.” (Zvi. 5:29) Mumasure me kubvengwa, afundi aazi kutya. Ngei? Ngokuti awona aiziya kuti Djehovha ainga ari ku dii rawo. Djehovha akapfara ndiwona. Ngokudaro, awona akarumbwa eciparidzira masoko anopfadza. (Zvi. 5:40-42) Nge mushobo umwewo, mufundi Estefani paaida kuuraiwa, iyena akarumbwa akaterama uye asikanetseki zvekuti hope yake yaiita “hingana hope ye ngirozi.” (Zvi. 6:12-15) Ngei? Ngekuti iyena ainga atenderhwa na Djehovha.

12. Maererano na 1 Pedru 3:14 uye 4:14, ngei tecidikana kupfara paya patinonga teciteerhwa?

¹² Aphostori ainga ano rugondo rekuti Djehovha ainga anawo. Ayena akaapasa simba re kuita zvishamiso. (Zvi. 5:12-16; 6:8) Izvi andizvopi zviri kuitika nyamasi uno. Kunyazi zvakadaro, eciseenzesa Soko rake, Djehovha unotigondesa no rudo kuti, kana tecishuphika nge ndaa ye rudo, ayena unopfara ndizvo uye mwiya wake una isusu. (Erengai 1 Pedru 3:14; 4:14.) Ngokudaro, pane kuti tirangarire kuti tingashingirira kudini miedzo yo nguwa ye mberi, tinodikana kukanda ndangariro dzedu pakuti tinodikana kuitei  kuti tiwake rugondo redu rekuti Djehovha uno simba re kutiriritira uye re kutinunura. Hingana zvakaizwa no afundi e kare, tinodikana kugonda rugondeso ra Djesu rekuti: “Ndicakupasai masoko no ungwaru ucaita kuti azondi enyu ese akabatana akonerhwe kuzviramba kana kuzviphikisa.” Tinorugondo rekuti: ‘Nge kushingirira kedu, ticaponesa upenyu wedu.’ (Ru. 21:12-19) Uye musambokanganwa kuti Djehovha unocengeta zvese zvine cokuita no aseenzi ake anofa akagondeka kaari. Ngekuedzurira kaanoita, ayena acaamutsa.

13. Tingabetsereka kudini nge kufunda zvakaitika kuno aya akakonerhwa kuterama uye kugonda Djehovha?

¹³ Tingafundawo nge miezaniso ye aya akakonerhwa kurumbwa akaterama uye kugonda Djehovha. Kufunda miezaniso ii yakashata, kucatibetsera kuti tisaphindewo zviya zvaakaita. Ngo muezaniso, mukutanga ke kutonga ka, Mambo Asa we ciDjudha akagonda Djehovha paaida kurhwa no uto guru, uye Djehovha akamukomborera nge kukunda. (2 Mak. 14:9-12) Asi pa nguwa imweni, uto doko re hondo ra Mambo Bhaasha we Israeri paakauya koorhwa naye, Asa akaripa uto re aSiriya kuti riabetsere, pane kuti apsvake ruponeso ra Djehovha, hingana zvaakaita pakutanga. (2 Mak. 16:1-3) Uye paaiga ari dhuze kuti afe, nhenda yaainga anayo payaibambirira, iyena aazi kugonda Djehovha kuti amubetsere.—2 Mak. 16:12.

14. Tinofundei pa zvishaishi zva Mambo Aza?

¹⁴ Pekutanga, Aza wakanangira kuna Djehovha paakosongana no zvinetso. Asi pedzepo iyena wakakonerhwa kukumbira rubetso kuna Mwari wake, ecisanangura kupedza ega matambudziko ake. Kana tikada kuona, zano ra Aza rekupsvaka rubetso ku Asiriya riri kuita hingana kuti rinoseenza. Asi kuseenza karo kakaseenza padoko. Djehovha akareketa naye eciseenzesa muphorofiti: “Ngokuti wagonda mambo we Asiriya, watama kugonda na Djehovha Mwari wako, uto ra mambo we Siriya rapukunyuka mu nyara dzako.” (2 Mak. 16:7) Tinodikana kungwarirawo kuti tisagume pa kunyasa kudzigonda kuti ticapedza tega matambudziko edu uye totama kupsvaka rubetso ra Djehovha teciseenzesa Soko rake. Kunyazi kana tikabatana no cisananguro cekukasika, kana tikagonda Djehovha, uye ayena acatibetsa kuti tibudirire.

15. Zvinyi zvatinodikana kuita paya patinoerenga Bhaibheri?

¹⁵ (4) Cengetai tsamba dze Bhaibheri. Pamunoona tsamba dze Bhaibheri dzinopangidza kuti simba rinobva pakuterama uye kugonda muna Djehovha, edzai kucengeta tsambedzo mu mundangariro dzenyu. Zvingabetsera kana mukaerenga no izwi guru kana kuti kutarira uye mophinda-phinda kudzierenga. Ndizvona zvakabvunzwa Djoshuwa kuti aerenge bhuku re Mutemo mazuwa ese no izwi riri pasi, kuti akwanise kuita zvisananguro no ungwaru. Zviedzuriro izvi zvaizomubetsera kuti asatye pa zviya zvaaizosongana nazvo mumagarire ake e zviro. (Djos. 1:8, 9) Masoko akawanda atinogumira mu Soko ra Mwari angakwanisa kumupasai runyararo re mwoyo mu mamagarire e zviro ekuti aizoita kuti tidzirhye mwoyo kana titye.—Pis. 27:1-3; Zvie. 3:25, 26.

16. Djehovha anoseenzesa kudini ungano kuti itibetsere pakurumbwa takaterama uye tecimugonda?

¹⁶ (5) Shamwaridzanai no anhu a Mawri. Djehovha anoseenzesa hama no hanzvadzi dzedu kuti dzitibetsere kuti tirumbwe takaterama uye tecimugonda. Pa misangano yedu, tinobetsereka no miezaniso inoizwa pa cikuwa, no mhinduro dzinoizwa no apurutani  uye no makani anobambisa atinoita no hama no hanzvadzi dzedu. (Ahe. 10:24, 25) Tingakwanisa kubambiswawo patinoreketa mazwiro edu kuno shamwari dzatinogonda dze mu ungano. “Soko rakanaka” re shamwari ringakwanisa kutibetsera kuti tisanyanye kudzirhya mwoyo.—Zvie. 12:25.

17. Maererano na Ahebheru 6:19, kariro yedu ye Umambo, ingatipasa kudini simba kunyazi pa migariro ye zviro inoshupha?

¹⁷ (6) Rumbwai muine kutenda kakabamba. Kariro yedu ye Umambo inoseenza hingana “ciro cinotsigira mwiya,” yecitipasa simba, kunyazi pa migariro ye zviro yakashata kana kuti mazwiro e kudzirhya mwoyo. (Erengai Ahebheru 6:19.) Nyasai kurangarira pa rugondeso ra Djehovha pa nguwa yekuti panonga pasisina mazwire akashata. (Isa. 65:17) Rangarirai muri munyika ipsva ino runyararo, umo mugariro we zviro unotyisa munonga musisina. (Mik. 4:4) Mungakwanisa kubambisa kariro yenyu nge kubvunzawo amweni. Itai zvese zvamunokwanisa mu basa re kuparidzira uye pa kuita afundi. Kana mukaita izvi mucakwanisa “kugara no rugondo rakakwana re kariro dakara kumugumo.”—Ahe. 6:11.

18. Matambudziko api atingakwanisa kusongana nawo mu nguwa yo mberi, uye tingaakunda kudini?

¹⁸ Nyika ino paicaguma kumapeto, ticabatana no matambudziko akakura maningi angakwanisa kubara mazwiro e kudzirhya mwoyo. Tsamba yedu ye gore ra 2021 icatibetsera pa kubatana no matambudziko aya uye kuti tirumbwe takaterama, haiwa nge simba redu, asi nge rugondo redu muna Djehovha. Dakara pa gore rinouya, ngatipangidzei no maitiro edu kuti tino kutenda mu rugondeso ra Djehovha rekuti: “Simba renyu riri pa kurumbwa makaterama uye muine rugondo.”—Isa. 30:15.