1. Биске кандыг айтырыг тургустунуп болур?

КИЖИ бүрүзү сагыш амыр чурттаксаар, ынчалза-даа дөмей-ле дүвүрелдер бисти чамдыкта хөме аптар. Ынчангаш Бурганның чамдык бараалгакчылары, Давид хаан ышкаш: «Кажанга дээр ындыг бодалдар мени хинчектээрил? Хүннү бадыр сеткил-чүрээм качыгдап тур» — деп айтырыгларны Аңаа салып турар (Ыд. ыр. 12:3).

2. Бо статьяга чүнү сайгарар бис?

² Дүвүрелдерден долузу-биле дезип шыдавас-даа болзувусса, оларга алыспас дээш, хөй чүүлдү кылып шыдаар бис. Эгезинде бо статьяга бисти дүвүредип турар каш чылдагааннарны тодараткаш, дараазында берге байдалдарда биске оожургалдыг болурунга ажыктыг алды сүмени сайгарар бис.

3. Чүү дээш дүвүреп болур бис база ол бүгү бистен хамааржыр бе?

³ Дүвүрелдерниң чылдагааннары аңгы-аңгы бооп болур. Чижээ: аъш-чем, идик-хеп, бажың-балгат өртээ чылдан чылче аартап-ла турар. А кады ажылдап турар улузувус азы чаңгысклассчыларывыс бисти шын эвес алдынарынче азы эр-херээжен чорукту кылырынче ыдалап турар чадавас. Оон ыңай чурттап турар девискээривисте кем-херек үүлгедиишкиннерин база соксадып шыдавас бис. Ол бүгү бистен хамаарышпас, чүге дизе бис Бурганның дүрүм-хоойлузун сагывайн турар улустуң аразында чурттап чоруур  бис. Бо делегейниң чагырыкчызы, Эрлик, «амгы амыдыралының ажаанзырал-човаа» чамдык улуска Иеговага бараалгаарынга шаптыктаар деп билир (Мф. 13:22; 1 Ин. 5:19). Ынчангаш улустуң дүвүреп чоруурунда кайгамчык чүве чок!

4. Кижи бүрүзү чүү дээш дүвүреп болурул?

⁴ Чуртталгавыста берге байдалдар бисти дүвүредип болур. Чижээлээрге, шалыңым эң херек чүүлдерге чедер бе дээш дүвүреп болур бис. Чамдык улус аарый бергеш, ажылдап шыдавас мен азы шуут-ла ажыл чок артып каар мен дээш дүвүрээр боор. А бир өскелери күткүлгеге таварышкаш, Бурганның хоойлузун-даа үрептейне дээш дүвүреп чоруур. Кажан Эрлик каржы делегейни Бурганның чонунче халдаар кылдыр ыдалаптарга, ол байдалда канчаар алдынар мен дээш сагышсырап болур бис. «Ооң дугайында дүвүреп турарымда багай чүве бар бе?» деп, айтырыг база тургустунуп кээр.

5. Иисус «сагыш човаваңар» дээни-биле чүнү чугаалаксааныл?

⁵ Иисус бодунуң өөреникчилеринге «сагыш човаваңар» деп чугаалаан (Мф. 6:25). Ол дээрге биске кандыг-даа сагышсыралдар турбас дээни ол бе? Чок, болбайн канчаар. Бурганның бурунгу үеде шынчы бараалгакчылары база сагышсырап, дүвүреп турганнар, ынчалза-даа Иегова олардан хая көрүнмээн (3 Хаан. 19:4; Ыд. ыр. 6:4) *. Иисустуң сөстери, шынап-ла, бисти оожургадып турар. Бистиң хүн бүрүде хереглелдеривис дээш сагышсырал бисти тудуп чий бербес ужурлуг. Оон башка Бурганга бараалгал чуртталгавыска чугула черни ээлевейн баар. (« Ону канчаар кылыр?» деп көзенекти көрүңер.)

6. Филипчилерге 4:6, 7-ден алырга, сагышсыралдарга алыспазынга биске чүү дузалаар?

⁶ 1. Хөй катап мөргүңер. Бир эвес силерни дүвүредип турар чүүлдер бар болза, ону Бурганга чугаалап бериңер (1 Пет. 5:7). Ынчан «улустуң угаап-билиптер шаандан ажа бээр Бурганның амыр-тайбыңын» миннир силер. (Номчуптуңар: Филипчилерге 4:6, 7.) Иегова силерге ыдыктыг сүлдезин элбээ-биле бээрге, сагышсыралдарга алыспас силер (Гал. 5:22).

7. Иеговага мөргүп тургаш, чүнүң дугайында сактыр болзувусса эки?

⁷ Иеговага мөргүп тургаш, чүрээңерде бар чүүлдерни чажырбайн, шуптузун үлежиңер. Мөргүлдериңер тодаргай боор ужурлуг: Иеговага силерни чүү база чүге дүвүредип турарын чугаалаңар. Бир эвес ону шиитпирлеп шыдаар болзуңарза, Бургандан мерген угаанны болгаш күштү дилеңер. А бир эвес бергени шиитпирлеп шыдавас болзуңарза, ооң дугайында эмин эрттир сагышсыравас дээш, Иеговадан дузаны дилеңер. Силерниң мөргүлдериңер тодаргай боор болза, Иегованың аңаа канчаар харыылап бергенин тода көрүп каар силер. А бир эвес мөргүлдериңерге Иегова дораан харыылавас болза, дүжүп бербеңер. Чүге дизе Бурган силерни Оон салдынмайн, катап-катап дилээриңерни күзеп турар (Лк. 11:8—10).

8. Дүвүрелдеривистен аңгыда, чүнүң дугайында мөргүүр болзувусса эки?

⁸ Иеговага дүвүрелдеривистен аңгыда, Аңаа четтиргенивисти база чугаалаар болзувусса эки. Дыка берге үелерде безин, Иегованың биске кылып турар эки чүүлдериниң дугайында боданыры биске ажыктыг  боор. Сагыш-сеткиливисте чүү болуп турарын чамдыкта үндүр чугаалаары берге апарып болур. Ындыг үеде бистер кысказы-биле: «Дузалажып көрем!» деп чаннып дилээр-даа болзувусса, Иегова дузалажып бээр (2 Чыл. 18:31; Рим. 8:26).

9. Бир-ле чүүлден коргуп турар болзувусса, чүнү канчаар болза эки?

⁹ 2. Бодуңарга идегевейн, Иеговага идегеңер. Бистиң эрага чедир сески векте ассирийжилер Иуданың чурттакчыларынче халдаар деп барган. Олар корткаш, Египеттен дуза дилээр деп шиитпирлеп алганнар (Иса. 30:1, 2). Египеттен дуза дилээри иудейлерге эки чүге-даа чедирбес деп, Иегова сагындырган (Иса. 30:7, 12, 13). Иудейлерге боттарын ёзулуг айыыл чок кылдыр минниринге чүү дузалаарын Иегова Исайя медээчини таварыштыр тайылбырлаан: «Силерниң күжүңер — сагыш амыр боорунда, Меңээ идегээринде» (Иса. 30:15б).

10. Кандыг байдалдарда Иеговага идегеп турарыңарны көргүзүп болур силер?

¹⁰ Иеговага идегеп турарывысты канчаар көргүзер бис? Элээн каш байдалды сайгарыптаалыңар. Силерге хөй шалыңныг, ынчалза-даа хөй үе чиир ажылды сүмелээн дижик. Бир эвес аңаа ажылдай бээр болзуңарза, Иеговага эвээш бараалгаар апаар силер. Азы ажылыңарда Иегованың Херечизи эвес кижи силерни сонуургап турар. Чок болза, силерниң чоок кижиңер: «Мени азы Бурганыңны шилип алыр сен бе?» деп айтырыгны чидии-биле көдүрүп болур. Бо шупту байдалдарда шын шиитпирни хүлээп алыры берге, ынчалза-даа Иеговага идегээр болзуңарза, Ол канчаар шын алдынарын силерге айтып бээр (Мф. 6:33; 10:37; 1 Кор. 7:39). А силер Ону дыңнаар силер бе?

11. Удурланыышкыннарга таварышкаш, дүвүрел чок артарынга Библиядан кандыг чижектер биске дузалаар?

¹¹ 3. Эки-даа, багай-даа чижектерден өөрениңер. Иеговага идегеп, сагыш амыр боорунуң чугулазын бадыткап турар элээн каш чижектерни Библияда бижээн. Ооң дугайында ханы боданыр болзувусса, Бурганның бараалгакчылары дүвүревейн, каржы-дошкун удурланыышкыннарны канчаар ажып эртип чораанын билип алыр бис. Чижээ, кажан Дээди иудей чөвүлел элчиннерни суртаалдаарын хоруп каарга, олар корга бербээннер. Харын-даа олар дидими-биле мынча дээннер: «Кижилерге эвес, а Бурганга колдадыр чагыртыр ужурлуг бис» (Аж.-ч. 5:29). Оларны эттеп-согарга-даа, олар коргушка алыспаан. Чүге? Чүге дизе олар «Иегова бистиң-биле кады, Ол бисти көргеш, өөрүп турар» деп чүүлдү билип турганнар. Ынчангаш олар буянныг медээни суртаалдаарын соксатпааннар (Аж.-ч. 5:40—42). Ол ышкаш Стефанны өлүрер деп турда, ол көңгүс дүвүревээн, «ооң арны, дээрниң төлээзиниң арны дег, чырып келген» (Аж.-ч. 6:12—15). Чүге дизе Иегова аңаа ээ көрнүп турар деп, ол быжыг бүзүреп турган.

12. 1 Пётр 3:14 биле 4:14-тен алырга, бисти истеп сүрүп турда, чүге аас-кежиктиг бооп болур бис?

¹² Иегова элчиннерни деткип, хуулгаазыннар кылыр күштү берип турган (Аж.-ч. 5:12—16; 6:8). Амгы үеде Бурганның бараалгакчыларының хуулгаазыннар кылыр күжү чок-даа болза, Иегова Бодунуң Сөзүн таварыштыр оларны бүзүредип турар: «Чөптүг-шынныг чорук дээш хилинчек көрүп турар-даа болзуңарза, аас-кежиктиг силер, чүге дээрге Мээң чүрээмни өөртүп турар силер база Мээң сүлдем силерде». (Номчуптуңар: 1 Пётр 3:14; 4:14.)  Ынчангаш каржы-хажагай истеп сүрүүшкүннү ажып эртип шыдаар ирги мен бе дээш дүвүрээн ажыы чок. Ооң орнунга Иегова бисти деткиир база камгалаар деп, амдыгааштан тура быжыг бүзүрелдиг боор ужурлуг бис. Чүге дээрге: «Мен силерге удурланыкчыларның кайызы-даа удур туржуп база чаргылдажып шыдавазы чечен дылды болгаш мерген угаанны бээр мен» — деп, Иисустуң баштайгы христианнарга берген аазаашкынынга бүзүрээр ужурлуг бис. «Ол бүгүнү шыдажып эртер болзуңарза амы-тыныңарны камгалап алыр силер» — деп, ол магадылаан (Лк. 21:12—19). Иегова төнчүзүнге чедир шынчы арткан бараалгакчыларын черле утпас, Ол оларны албан диргизиптер деп сактып чоруур болзувусса эки.

13. Иеговага ынанмайн турган улустуң чижээ биске чүзү-биле ажыктыг?

¹³ Иеговага ынанмайн барган улустуң чижээ бистерге оваарындырыг бооп турар. Чижээ, Аса хаанны сактып кээлиңер. Иудаже хөй санныг эфиоптар халдап кээрге, ол долузу-биле Иеговага ынанырга, Ол аңаа тиилелгени берген (2 Чыл. 14:9—12). Ынчалзажок үе эртерге, Иудаже Израиль хаан Вааса эвээш санныг аг-шерии-биле тура халыырга, Аса Иеговадан дуза дилевейн, а сирийжилерден дуза дилээн (2 Чыл. 16:1—3). Сөөлүнде ол аар аарый бергеш безин, Иеговадан дуза дилевээн (2 Чыл. 16:12).

14. Асаның частырыгларындан чүнү өөренип ап болур бис?

¹⁴ Эгезинде Аса берге байдалдар тургустунуп кээрге, Иеговага идегеп турган. Ынчалза-даа сөөлүнде ол бодунга ынанып эгелээн. Сактырга Асаның сирийжилерден дуза дилээни шын ышкаш болган. Ынчалза-даа ооң чедип алган амыр-тайбыңы үр болбаан. Иегова Бодунуң медээчизи таварыштыр Асага: «Сен арамей хаанга идегеп, бодуңнуң Бурганың Дээрги-Чаяакчыга ынанмаан бооруңга» ындыг болган дээн (2 Чыл. 16:7). Бурганның Сөзүнден арга-сүме дилевейн, боттарывыс угаанывыс-биле бергелерни шиитпирлевес болзувусса эки. Кыска үе дургузунда шиитпир үндүрер апарзывысса-даа, дүвүревейн, Иеговага ынаныр ужурлуг бис. Ынчан Ол биске шын алдынарынга дузалаар.

15. Библияны номчуп тургаш, ажыктыг боор кылдыр, чүнү канчап болур бис?

¹⁵ 4. Библиядан шүлүктерни шээжилеп алыңар. Библияны номчуп тургаш, Бурганга ынанып, дүвүрелге алыспазының дугайында шүлүктер тып алзыңарза, ону шээжилеп алырын кызыңар. Ону канчаар кылып болур? Ыыткыр номчуңар азы ушта бижээш, көскү черге салып алыңар. Иегова Иисус Навинге Хоойлу номун үргүлчү номчуурун дужааган. Ооң ачызында ол мерген угаанныг алдынып, коргушка алыспайн, Бурганның чонун эрес-дидим удуртуп болур турган (Иис. 1:8, 9). Дүвүренчиг байдалдарда бисти оожургадып болур шүлүктер Бурганның Сөзүнде хөй (Ыд. ыр. 26:1—3; У. ч. 3:25, 26).

16. Иегова биске дүвүрелдерге алыспайн, Аңаа ынанып өөренип алырынга акы-угбалар таварыштыр канчаар дузалап турар?

¹⁶ 5. Бурганның бараалгакчылары-биле аралажыңар. Иегова биске дүвүрелдерге алыспайн, Аңаа ынанып өөренип алырынга акы-угбалар таварыштыр база дузалап турар. Чижээ, чыыштар биске дыка ажыктыг: библейжи илеткелдерден, акы-угбаларывыстың харыыларындан, бот-боттарывыс-биле аралажып, чугаалашкаш, деткимчени алыр бис (Евр. 10:24, 25). Оон аңгыда, чыышта чоок эштеривиске дүвүрелдеривисти  чугаалап берип болур бис. Ынчан эживистиң эки сөзү бисти оожургадыр (У. ч. 12:25).

17. Еврейлерге 6:19-тан алырга, Бурганның Чагыргазынга идегеливис берге үелерде сагыш амыр артарынга канчаар дузалаар?

¹⁷ 6. Идегелиңерни быжыктырыңар. Бурганның Чагыргазынга идегеливис, «сеткил-хөңнүвүстүң айыыл чок быжыг якору дег», берге үелерде сагыш амыр артарынга дузалап турар. (Номчуптуңар: Еврейлерге 6:19.) Сагыш-сеткилиңерни аартып чоруур, багай сактыышкыннар турбас келир үениң дугайында боданыңар (Иса. 65:17). Силерни моон соңгаар чүү-даа дүвүретпес чаа делегейниң дугайында сагыштаалаңар (Мих. 4:4). Оон ыңай буянныг медээни өскелер-биле үлежип тургаш, идегеливисти быжыктырып ап болур бис. Суртаал ажылынга болгаш өөреникчилер белеткээр ажылга кызымаккай киржиңер, «ынчан идегелиңер бүрүн боттаныр деп магадылалды алыр силер» (Евр. 6:11).

18. Келир үеде кандыг бергелер бисти манап турар база ону ажып эртеринге биске чүү дузалаар?

¹⁸ Бо делегейниң төнчүзү чоокшулап орар болганда, оон-даа хөй бергелерге таваржып, дүвүрелдерге алзып болур бис. 2021 чылдың шүлүү боттарывыска эвес, а Иеговага ынанып, сагыш амыр боорунга дузалап турар. «Силерниң күжүңер — сагыш амыр боорунда, Меңээ идегээринде» дээн Иегованың сөстеринге чигзинмейн турарывысты бүдүн чылдың дургузунда ажыл-херээвис-биле бадыткаалыңар (Иса. 30:15).