1-تەتقىق ماقالىسى
تىنچ-خاتىرجەملىكنى ساقلاپ، يەھۋاغا تايىنىڭ!
2021-يىلنىڭ ئايىتى: «تىنچ-خاتىرجەملىكنى ساقلاپ ماڭا تايانساڭلار، كۈچلۈك بولىسىلەر».—يەشايا 30:15.
152-ناخشا كۈچىمىز، ئۈمىدىمىز ۋە يار-يۆلىكىمىز
بۇ ماقالىدە a
1. داۋۇت پادىشاھقا ئوخشاش بىز نېمىنى سورىشىمىز مۇمكىن؟
بىز ھەممىمىز تىنچ-خاتىرجەم ۋە بىخەتەر ھايات كەچۈرۈشنى خالايمىز. بىرمۇ ئادەم غەم-تەشۋىش ئىچىدە ياشاشنى خالىمايدۇ. بەزى ۋاقىتلاردا بىز غەم-تەشۋىش بىلەن كۈرەش قىلىشىمىز مۇمكىن. شۇڭا، يەھۋانىڭ بەزى خىزمەتچىلىرى داۋۇت پادىشاھقا ئوخشاش مۇنداق سورىشى مۇمكىن: «قاچانغىچە ھەر كۈنى غەم-ئەندىشە قىلىپ، يۈرىكىم قان يىغلاپ يۈرىمەن؟»—زەبۇر 13:2.
2. بۇ ماقالىدە نېمىنى كۆرۈپ چىقىمىز؟
2 غەم-تەشۋىشتىن پۈتۈنلەي قۇتۇلالمىساقمۇ، بۇنداق ھېس-تۇيغۇنى تىزگىنلەش ئۈچۈن بار كۈچىمىزنى چىقىرالايمىز. بۇ ماقالىدە، بۇنداق غەم-ئەندىشىلەرنى پەيدا قىلىدىغان بەزى نەرسىلەرنى مۇھاكىمە قىلىمىز. ئاندىن، قىيىنچىلىقلىرىمىزنى ھەل قىلغاندا، تىنچ-خاتىرجەملىكىمىزنى ساقلاش ئۈچۈن بىز قىلالايدىغان ئالتە ئەمەلىي ئۇسۇلنى كۆرۈپ چىقىمىز.
بىزنى غەم-ئەندىشىگە سالىدىغان سەۋەبلەر
3. نېمە بىزنى غەم-تەشۋىشكە سالىدۇ ۋە بىز ئۇلارنى ئۆزىمىز قانچىلىك كونترول قىلالايمىز؟
3 بىزنى غەم-ئەندىشىلەرگە سالىدىغان ئىشلار كۆپ بولۇشى مۇمكىن، ئۆزىمىز شۇنداق ئىشلارنىڭ بەزىلىرىنىڭ يۈز بېرىشىدىن ساقلىنالايمىز. مەسىلەن، ئوزۇق-تۈلۈك ۋە كىيىم-كېچەك باھاسى ۋە ئۆي ئىجارە ھەققى يىلدىن يىلغا ئۆزگۈرۈپ تۇرىدۇ، بۇ مەسىلىلەر بىزنىڭ كونتروللىقىمىز ئاستىدا ئەمەس. يەنە خىزمەتداشلىرىمىز ياكى ساۋاقداشلىرىمىز ھەمىشە بىزنى جىنسىي ئەخلاقسىزلىق ياكى يالغانچىلىق قىلىشقا ئېزىقتۇرۇشى مۇمكىن، بىز ئۇلارنى كونترول قىلالمايمىز. شۇنداقلا يەنە يۇرتىمىزدا يۈز بېرىۋاتقان جىنايەتلەرنى توختىتالمايمىز. بىز مۇقەددەس كىتاب پرىنسىپلىرىغا ماس ھايات كەچۈرمەيدىغان ئادەملەرگە تولغان دۇنيادا ياشاۋاتقاچقا، بىزمۇ مۇشۇ قىيىنچىلىقلارغا دۇچ كېلىمىز. بۇ دۇنيانىڭ خۇداسى شەيتان، بەزى ئادەملەرنىڭ «بۇ دۇنيانىڭ غەم-ئەندىشىلىرى» سەۋەبلىك، يەھۋاغا خىزمەت قىلمايدىغانلىقىنى بىلىدۇ (مەتتا 13:22؛ 1-يۇھاننا 5:19). شۇڭا، بۇ دۇنيانىڭ ئادەملەرنى غەم-تەشۋىشكە سالىدىغان قىيىنچىلىقلارغا تولغانلىقىغا ھەيران قالمايمىز!
4. غەم-ئەندىشىلەرگە پېتىپ قالغاندا، بىز نېمە ھەققىدە ئويلىشىمىز مۇمكىن؟
4 غەم-ئەندىشىلەرگە شۇنچە چوڭقۇر پېتىپ قالىمىزكى، ھەتتا باشقا ھېچنەرسىنى ئويلىيالماي قېلىشىمىز مۇمكىن. مەسىلەن، ئېھتىياجلىرىمنى تەمىنلەش ئۈچۈن يېتەرلىك پۇل تاپالمايمەن ياكى ئاغرىپ قالسام ئىشقا بارالمايمەن، ھەتتا ئۇنىڭدىن ئايرىلىپ قالىمەن، دەپ ئەنسىرىشىمىز مۇمكىن. بەلكىم، خۇدانىڭ قانۇنىنى بۇزۇپ قويۇپ، ئۇنىڭغا ساداقەتمەنلىكىمنى ساقلاپ قالالمايمەن، دەپ غەم-ئەندىشە قىلىدىغاندىمىز. يېقىن-ئارىدا شەيتاننىڭ قول ئاستىدىكى ئادەملەر خۇدانىڭ خەلقىگە ھۇجۇم قىلىدۇ، شۇڭا بۇنىڭغا قانداق ئىنكاس قايتۇرىمىز، دەپ غەم-تەشۋىشكە چۈشىشىمىز مۇمكىن. ئۆزۈمىزدىن مۇنداق سورىساق بولىدۇ: «شۇنداق مەسىلىلەر توغرۇلۇق غەم-ئەندىشە قىلىشىم توغرىمۇ ياكى خاتامۇ؟»
5. ئەيسا ئۆز ئەگەشكۈچىلىرىگە «غەم-ئەندىشە قىلماڭلار» دېگەندە، نېمىنى كۆزدە تۇتۇپ شۇنداق دېگەن؟
5 ئەيسا ئۆز ئەگەشكۈچىلىرىگە «غەم-ئەندىشە قىلماڭلار» دېگەنلىكىنى بىلىمىز (مەتتا 6:25). بۇ ھېچنېمىدىن غەم قىلماسلىقىمىزنى بىلدۈرەمدۇ؟ ياق، بىلدۈرمەيدۇ. ئۇنتۇماڭ، قەدىمقى زاماندىكى خۇدانىڭ ساداقەتمەن خىزمەتچىلىرىدىمۇ غەم-ئەندىشىلەر بولغان، بىراق يەھۋا ئۇلاردىن يەنىلا مەمنۇن بولغان b (1-پادىشاھ. 19:4؛ زەبۇر 6:3). شەك-شۈبھىسىزكى، ئەيسا بىزنى تىنچ-خاتىرجەملىكنى ساقلاشقا دەۋەت قىلغان. ئۇ تۇرمۇشىمىزدىكى قىيىنچىلىقلار توغرۇلۇق ھەددىدىن زىيادە غەم قىلماسلىقىمىزنى خالىغان، چۈنكى بۇ خۇداغا خىزمەت قىلىشىمىزغا يامان تەسىر قىلىدىغانلىقىنى بىلگەن. قانداق ئۇسۇللار بىلەن غەم-تەشۋىش تۇيغۇلىرىمىزنى كونترول قىلالايمىز؟ — « بۇنى قانداق قىلالايمىز؟» ناملىق رامكىغا قاراڭ.
تىنچ-خاتىرجەملىكنى ساقلاشقا ياردەم بېرىدىغان ئالتە نەرسە
(6-ئابزاسقا قاراڭ) c
6. فىلىپىلىكلەر 4:6، 7-ئايەتلەرگە ئاساسەن، نېمە بىزگە تىنچ-خاتىرجەملىك بېرىدۇ؟
6 (1) دائىم دۇئا قىلىش. بېسىم ئاستىدا بولغان خۇدا خىزمەتچىلىرى يەھۋاغا سەمىمىي دۇئا قىلىپ، ئۆزىنى يېنىك ھېس قىلالايدۇ (1-پېتر. 5:7). يەھۋا دۇئالىرىڭىزغا مۇنداق جاۋاب بېرىدۇ، «ھەرقانداق [ئىنساننىڭ] ئوي-پىكىردىن ئۈستۈن تۇرىدىغان خۇدانىڭ تىنچلىقى»غا ئېرىشەلەيسىز (فىلىپىلىكلەر 4:6، 7-نى ئوقۇڭ). يەھۋا مۇقەددەس روھ ئارقىلىق قەلبىڭىزگە تىنچ-خاتىرجەملىك بېرىدۇ.—گالاتىيا. 5:22.
7. دۇئا قىلغاندا بىز نېمىنى ئەستە تۇتۇشىمىز كېرەك؟
7 يەھۋاغا دۇئا قىلغاندا، ئىچ-باغرىڭىزنى تۆكۈڭ. ئېنىق دۇئا قىلىڭ. دۇئادا ئۆز قىيىنچىلىقلىرىڭىزنى ۋە ھېس-تۇيغۇلىرىڭىزنى ئۇنىڭغا ئېيتىپ چۈشەندۈرۈپ بېرىڭ. ئەگەر بۇ قىيىنچىلىقنى ھەل قىلىشنىڭ يولى بار بولسا، ئۇنى توغرا ھەل قىلىش ئۈچۈن خۇدادىن دانالىق ۋە كۈچ سوراڭ. ئەگەر بۇ قىيىنچىلىقنى ھەل قىلىش قولىڭىزدىن كەلمىسە، ئۇ چاغدا يەھۋا خۇدادىن غەم قىلماسلىققا ياردەم سوراڭ. سىز دۇئالىرىمىزدا ئېھتىياجلىق نەرسىلەرنى ئېنىق ئېيتسىڭىز، ۋاقىت ئۆتۈپ، يەھۋا بۇ دۇئالىرىڭىزغا قانداق جاۋاب بەرگەنلىكىنى كۆرىسىز. ئەگەر ئۇ دۇئالىرىڭىزغا دەرھال جاۋاب بەرمىسە، دۇئا قىلىشنى توختاتماڭ. ئۇ دۇئايىڭىزدا ئېھتىياجلىق نەرسىلەرنى ئېنىق ئېيتىشىڭىزنى ھەم توختاتماي دۇئا قىلىشىڭىزنى خالايدۇ.—لۇقا 11:8—10.
8. دۇئالىرىمىزدا نېمىنى تىلغا ئېلىشىمىز كېرەك؟
8 يەھۋاغا دۇئا قىلغاندا، ئۇنىڭغا غەم-تەشۋىشلىرىڭىزنى ئېيتىپلا قويماي، مىننەتدارلىقىڭىزنى بىلدۈرۈشنى ئۇنتۇماڭ. قىيىنچىلىقلىرىڭىزنىڭ چېچىڭىزدىن تولا بولۇشىغا قارىماستىن، ئېرىشىۋاتقان بەرىكەتلىرىڭىز ھەققىدە ئويلاڭ. چوڭقۇر ھېس-تۇيغۇلىرىڭىزنى سۆزلەر بىلەن ئىپادىلىيەلمىسىڭىز، ئېسىڭىزدە بولسۇنكى، يەھۋا خۇدا سىزنىڭ: «ياردەم بەرگىنە!»— دېگەن ئاددىي ئۆتۈنۈشىڭىزگە جاۋاب بېرىدۇ.—2-تارىخ. 18:31؛ رىملىقلار 8:26.
(9-ئابزاسقا قاراڭ) d
9. ھەقىقىي بىخەتەرلىككە قانداق ئېرىشكىلى بولىدۇ؟
9 (2) ئۆزىڭىزنىڭ دانالىقىغا ئەمەس، يەھۋا خۇدانىڭ دانالىقىغا تايىنىش. مىلادىدىن ئىلگىرىكى سەككىزىنچى ئەسىردە، يەھۇدا خەلقى ئاسسۇرىيەلىكلەرنىڭ ھۇجۇم قىلىشىدىن قورققان. يەھۇدا خەلقى ئاسسۇرىيەلىكلەرنىڭ قۇلى بولۇپ قېلىشنى خالىمىغاچ، ئۇلار بۇتلارغا سەجدە قىلىدىغان مىسىرلىقلاردىن ياردەم سورىغان (يەشايا 30:1، 2). يەھۋا مىسىرلىقلارغا تايىنىشنىڭ يەھۇدا خەلقىگە پاجىئەلىك ئاقىۋەت ئېلىپ كېلىدىغانلىقى ھەققىدە ئاگاھلاندۇرغان (يەشايا 30:7، 12، 13). يەشايا پەيغەمبەر ئارقىلىق يەھۋا ھەقىقىي بىخەتەرلىككە قانداق ئېرىشكىلى بولىدىغانلىقىنى ئېيتقان. ئۇ مۇنداق دېگەن: «تىنچ-خاتىرجەملىكنى ساقلاپ، [يەھۋاغا] تايانساڭلار، كۈچلۈك بولىسىلەر».—يەشايا 30:15.
10. قايسى بەزى ۋەزىيەتلەردە يەھۋاغا بولغان ئىشەنچىڭىزنى كۆرسىتەلەيسىز؟
10 يەھۋاغا ئىشەنچىمىزنى قانداق كۆرسىتەلەيمىز؟ بەزى مىساللارنى كۆرۈپ چىقايلى. مەسىلەن، سىزنى يۇقىرى مائاشلىق ئىشقا تەكلىپ قىلدى دەيلى، بىراق بۇ ئىش كۆپ ۋاقىتنى تەلەپ قىلىدۇ ۋە روھىي ئىشلار بىلەن مەشغۇل بولۇشىڭىزغا كاشىلا بولىدۇ. ياكى بولمىسا، ئىشىڭىزدا خۇداغا خىزمەت قىلمايدىغان ئادەم سىزگە ئاشىق بولۇپ، ئۆز كۆڭلىنى ئىپادىلەيدۇ. تەسەۋۋۇر قىلىپ كۆرۈڭ، ئائىلىڭىزدىكى ئەڭ سۆيۈملۈك ئادىمىڭىز سىزدىن «مېنى ياكى خۇدايىڭنى» ئىككىدىن بىرنى تاللا، دەپ بېسىم قىلىدۇ. مۇنداق ھەربىر ۋەزىيەتتە قارار چىقىرىش قىيىن بولىدۇ، لېكىن يەھۋا ھەربىر ۋەزىيەتتە كېرەكلىك يول-يورۇقنى بېرىدۇ (مەتتا 6:33؛ 10:37؛ 1-كورىنت. 7:39). ئۇنداقتا سىزگە سوئال، يەھۋاغا تايىنىپ، ئۇنىڭ يول-يورۇقىغا ئەمەل قىلامسىز؟
(11-ئابزاسقا قاراڭ) e
11. بىز قارشىلىقلارغا ئۇچرىغاندا، تىنچ-خاتىرجەملىكنى ساقلاش ئۈچۈن مۇقەددەس كىتابتىكى قايسى مىساللارنى تەتقىق قىلساق بولىدۇ؟
11 (3) ياخشى ۋە يامان ئۈلگىلەردىن ساۋاق ئېلىش. مۇقەددەس كىتابتا يەھۋاغا تايىنىشنىڭ ۋە تىنچ-خاتىرجەملىكنى ساقلاپ قېلىشنىڭ مۇھىملىقىنى كۆرسىتىدىغان مىساللار بار. بۇ مىساللارنى تەتقىق قىلغاندا، خۇدانىڭ خىزمەتچىلىرىنىڭ قارشىلىقلارغا قارىماي، تىنچ-خاتىرجەملىكنى ساقلاپ قېلىشىغا نېمە ياردەم بەرگەنلىكىگە دىققەت قىلىڭ. مەسىلەن، يەھۇدىيلارنىڭ ئالىي سوتى ئەلچىلەرنىڭ ۋەز قىلىشىنى مەنئىي قىلغاندا، ئۇلار قورقۇپ كەتمىگەن. ئەكسىنچە، ئۇلار باتۇرلۇق بىلەن مۇنداق دېگەن: «بىز ھۆكۈمران سۈپىتىدە ئىنسانلارغا ئەمەس، بەلكى خۇداغا بويسۇنۇشىمىز كېرەك» (ئەلچى. 5:29). ھەتتا ئۇلار قامچىلانغاندىن كېيىنمۇ، ھودۇقۇپ قورقۇپ كەتمىگەن. نېمە ئۈچۈن؟ چۈنكى، ئۇلار يەھۋانىڭ ئۆزلىرى تەرەپتە ئىكەنلىكىنى بىلگەن. خۇدا ئۇلاردىن مەمنۇن بولغان ئىدى. شۇنداق قىلىپ، ئۇلار خۇش خەۋەرنى ئېيتىشنى داۋاملاشتۇرغان (ئەلچى. 5:40—42). شۇنىڭغا ئوخشاش، شاگىرت ئىستىپانمۇ ئۆلۈمى ئالدىدا، تىنچ-خاتىرجەملىكنى ساقلىغان بولۇپ، «يۈزى خۇددى پەرىشتىنىڭ يۈزىدەك» نۇرلۇق كۆرۈنگەن (ئەلچى. 6:12—15). نېمە ئۈچۈن؟ چۈنكى، ئۇ يەھۋانىڭ ئۇنىڭدىن رازى ئىكەنلىكىگە ئىشەنچى كامىل بولغان.
12. 1-پېترۇس 3:14 ۋە 4:14-ئايەتلەرگە ئاساسەن، نېمە ئۈچۈن زىيانكەشلىككە ئۇچرىساقمۇ، خۇشال بولالايمىز؟
12 يەھۋانىڭ ئەلچىلەرنى قوللاپ-قۇۋۋەتلىگەنلىكىگە، ئۇلاردا ئېنىق ئىسپاتلار بولغان. ئۇ ئۇلارغا مۆجىزە قىلىش كۈچىنى بەرگەن (ئەلچى. 5:12—16؛ 6:8). بۈگۈنكى كۈنلەردە ئۇ بىزلەرگە مۆجىزە قىلىش كۈچىنى بەرمەيدۇ. شۇنداق بولسىمۇ، بىز ھەققانىيلىق يولىدا ماڭغىنىمىز ئۈچۈن زىيانكەشلىككە ئۇچرىغاندا، ئۇ بىزدىن خۇرسەن بولىدىغانلىقىغا ۋە ئۇنىڭ روھى بىز بىلەن بىللە بولىدىغانلىقىغا يەھۋا ئۆز سۆزى ئارقىلىق بىزنى ئىشەندۈرىدۇ (1-پېترۇس 3:14؛ 4:14-نى ئوقۇڭ). شۇڭا، كەلگۈسىدە زىيانكەشلىككە ئۇچرىساق، قانداق قىلىمىز، دەپ غەم-تەشۋىش قىلىپ يۈرۈشنىڭ ئورنىغا، يەھۋانىڭ بىزنى قوللاپ-قۇۋۋەتلەپ، قۇتقۇزۇشقا قادىر ئىكەنلىكىگە بولغان ئىشەنچىمىزنى مۇستەھكەملەش ئۈچۈن بىز بۈگۈنكى كۈندە نېمە قىلىشىمىز كېرەك دېگەنگە كۆڭۈل بۆلۈشىمىز كېرەك. ئۆتمۈشتىكى ئەلچىلەرگە ئوخشاش ئەيسانىڭ ۋەدىسىگە چوقۇم ئىشىنىشىمىز كېرەك. ئۇ مۇنداق دېگەن: «سىلەرگە شۇنداق سۆز قابىلىيىتى ۋە دانالىق بېرىمەنكى، بارلىق دۈشمەنلىرىڭلار بىرلىشىپ سىلەرگە قارشى چىقالمايدۇ ۋە ئىنكارمۇ قىلالمايدۇ». بىزدە مۇنداق كاپالەت بار: «پەقەت سەۋر-تاقەتلىك بولساڭلار، جېنىڭلارنى ساقلاپ قالىسىلەر» (لۇقا 21:12—19). شۇنى ھېچقاچان ئۇنتۇماڭكى، يەھۋا ئۆزىگە ساداقەتمەنلىكنى ساقلاپ ئۆلۈپ كەتكەن خىزمەتچىلىرىنى تىرىلدۈرۈش ئۈچۈن ئۇلار ھەققىدىكى ئۇششاق-چۈششەك تەپسىلاتلارنى ئېسىدە ساقلايدۇ.
13. يەھۋا خۇداغا تايانمىغان ۋە تىنچ-خاتىرجەملىكنى ساقلىيالمىغان ئادەملەرنىڭ مىساللىرىنى تەتقىق قىلىپ قانداق ساۋاققا ئىگە بولالايمىز؟
13 يەھۋاغا تايانمىغان ۋە تىنچ-خاتىرجەملىكنى ساقلىيالمىغان ئادەملەرنىڭ مىساللىرىدىنمۇ ساۋاقلارغا ئىگە بولالايمىز. بۇ سەلبىي ئۈلگىلەرنى تەتقىق قىلىش بىزنىڭ ئۇلار ئۆتكۈزگەن خاتالىقلارنى قايتىلماسلىقىمىزغا ياردەم بېرىدۇ. مەسىلەن، يەھۇدا پادىشاھى ئاسا ئۇنىڭغا قارشى زور بىر قوشۇن ھۇجۇم قىلىپ كەلگەندە، يەھۋاغا تايانغان ۋە ئۇنىڭ بەرىكەتلىشىگە ئېرىشىپ، جەڭدە غەلبە قازانغان (2-تارىخ. 14:9—12). بىراق، كېيىنرەك ئاسا پادىشاھقا ئىسرائىل پادىشاھى بائاشا كىچىكرەك قوشۇن بىلەن قارشى چىققاندا، ئۇ ئىلگىرىكىدەك يەھۋا تايىنىپ، قۇتقۇزۇلۇشنىڭ ئورنىغا، ھەق تۆلەپ سۇرىيەلىكلەردىن ھەربىي ياردەم سورىغان (2-تارىخ. 16:1—3). ئۇ ھاياتىنىڭ ئاخىرىدا ئېغىر كېسەلگە دۇچار بولغاندىمۇ، يەھۋانىڭ ياردىمىگە تايانمىغان.—2-تارىخ. 16:12.
14. ئاسانىڭ خاتالىقلىرىدىن نېمىنى ئۆگىنەلەيمىز؟
14 باشتا ئاسا قىيىنچىلىقلارغا دۇچ كەلگەندە، يەھۋا خۇداغا كۆز تىككەن. ئەمما، كېيىنرەك ئاسا خۇدادىن ياردەم سورىماي، مەسىلىلەرنى ئۆز ئالدىغا ھەل قىلىشنى خالىغان. قارىماققا، ئاسانىڭ ئىسرائىل پادىشاھلىقىغا قارشى تۇرۇش پىلانى، يەنى سۇرىيەلىكلەردىن ياردەم سوراش ئۆزلىرى ئۈچۈن ئەڭ ياخشى ئامالدەك كۆرۈنگەن. بىراق، ئۇلارنىڭ تىنچلىقى ئۇزۇن داۋام قىلمىغان. يەھۋا خۇدا ئۆز پەيغەمبىرى ئارقىلىق پادىشاھ ئاساغا مۇنداق دېگەن: «سەن خۇدايىڭ يەھۋاغا ئەمەس، سۈرىيە پادىشاھىغا تاياندىڭ. شۇڭا، سۇرىيە پادىشاھىنىڭ قوشۇنى قولۇڭدىن قېچىپ قۇتۇلدى» (2-تارىخ. 16:7). بىز خۇدانىڭ سۆزىدىكى كۆرسەتمىلەرگە قۇلاق سالماي، ئۆزۈمىزگە ھەددىدىن زىيادە ئىشەنچ قىلىپ، مەسىلىلەرنى ئۆز ئالدىمىزغا ھەل قىلىشتىن قەتئىي پەخەس بولۇشىمىز كېرەك. ھەتتا تېز قارار چىقىرىش كېرەك بولسىمۇ، تىنچ-خاتىرجەملىكنى ساقلاپ يەھۋاغا تايىنىشىمىز كېرەك، شۇ چاغدا ئۇ توغرا قارار چىقىرىشىمىزغا ياردەم بېرىدۇ.
(15-ئابزاسقا قاراڭ) f
15. مۇقەددەس كىتابنى ئوقۇغاندا نېمە قىلىشىمىز كېرەك؟
15 (4) مۇقەددەس كىتابتىكى ئايەتلەرنى ئەستە ساقلاش. تىنچ-خاتىرجەملىكنى ساقلاش ۋە يەھۋاغا تايىنىشنىڭ قانچىلىك مۇھىم ئىكەنلىكىنى كۆرسىتىدىغان مۇقەددەس كىتابتىكى ئايەتلەرنى ئوقۇغاندا، ئۇلارنى ئېسىڭىزدە ساقلىۋېلىشقا تىرىشىڭ. بۇ ئايەتلەرنى يادقا ئېلىۋېلىش ئۈچۈن ئۇلارنى ئۈنلۈك ئوقۇش ياكى يېزىۋالغان ئايەتلەرنى دائىم ئوقۇپ تۇرۇش پايدىلىق بولىدۇ. يەھۋا يەشۇئاغا دانا بولۇش ئۈچۈن قانۇننى تۆۋەن ئاۋازدا دائىم ئوقۇش كېرەكلىكىنى ئېيتقان. يەشۇئانىڭ تەۋراتتىن ئوقۇغانلىرى ئۇنىڭغا قورقماسلىققا ۋە خۇدا خەلقىگە يېتەكچىلىك قىلىشقا ياردەم بەرگەن (يەشۇئا 1:8، 9). ئادەتتە ئەندىشىگە ۋە قورقۇنچقا سالىدىغان ۋەزىيەتلەرگە ئۇچرىغاندا، خۇدا سۆزىدىكى كۆپلىگەن ئايەتلەر سىزگە تىنچ-خاتىرجەملىك بېرىدۇ.—زەبۇر 27:1—3؛ پەند. نە 3:25، 26.
(16-ئابزاسقا قاراڭ) g
16. يەھۋا بىزگە ئېتىقادداشلىرىمىز ئارقىلىق تىنچ-خاتىرجەملىكنى ساقلاپ قېلىشقا ۋە ئۇنىڭغا تايىنىشقا قانداق ياردەم بېرىدۇ؟
16 (5) خۇدا خەلقى بىلەن ئارىلىشىش. يەھۋا بىزگە ئېتىقادداشلىرىمىز ئارقىلىق تىنچ-خاتىرجەملىكنى ساقلاپ قېلىشقا ۋە ئۇنىڭغا تايىنىشقا ياردەم بېرىدۇ. يىغىلىشلىرىمىزدا سەھنىدىن ئېيتىلغان مەسلىھەتلەردىن، قېرىنداشلارنىڭ جاۋابلىرى ۋە ئىلھام بېرىدىغان گەپ-سۆزلىرى بىزگە تەسەللىي بېرىدۇ (ئىبرانىي. 10:24، 25). جامائەتتىكى ئىشەنچىلىك دوستلارغا غەم-تەشۋىشلىرىمىزنى ئېيتقاندا يېنىكلىشىپ قالىمىز. چۈنكى، دوست ئېيتقان «ياخشى سۆز» غەم-ئەندىشىنى باسار.—پەند. نە 12:25.
(17-ئابزاسقا قاراڭ) h
17. ئىبرانىيلار 6:19-ئايەتكە ئاساسەن، ئېغىر ۋاقىتلاردا خۇدا پادىشاھلىقىغا بولغان ئۈمىدىمىز بىزگە تىنچ-خاتىرجەملىكنى ساقلاشقا قانداق ياردەم بېرىدۇ؟
17 (6) ئۈمىدنى مەھكەم ساقلاش. ئېغىر ۋاقىتلاردا خاتىرجەملىكنى ساقلاشقا ياردەم بېرىدىغان خۇدا پادىشاھلىقىغا باغلىغان ئۈمىدىمىز «ھاياتىمىز ئۈچۈن كېمە لەڭگىرىدەك» بولىدۇ (ئىبرانىيلار 6:19-نى ئوقۇڭ). يەھۋا ۋەدە قىلغان كېلەچەكتە سەلبىي ئوي-پىكىرلەر بولمايدىغانلىقى ھەققىدە ئويلىنىڭ (يەشايا 65:17). ئۆزىڭىزنى ئازاب-ئوقۇبەتسىز يەنە ئازاب-ئوقۇبەتلەر بولمايدىغان يېڭى دۇنيادا تەسەۋۋۇر قىلىڭ (مىكاھ 4:4). باشقىلارغا ئۈمىدىڭىز توغرىسىدا ئېيتسىڭىز، ئۆز ئۈمىدىڭىزنى تېخىمۇ مۇستەھكەملىيەلەيسىز. ۋەز خىزمەتتە ۋە شاگىرت تەييارلاش ئىشىدا قولۇڭىزدىن كەلگەننىڭ ھەممىسىنى قىلىڭ. بۇنى قىلسىڭىز، ‹پۈتۈن ئۈمىدىڭىز ئەمەلگە ئېشىشى ئۈچۈن . . . ئاخىرىغىچە› ئىشەنچىڭىز مۇستەھكەم بولىدۇ.—ئىبرانىي. 6:11.
18. كېلەچەكتە بىز قانداق قىيىنچىلىقلارغا دۇچ كېلىمىز ۋە ئۇلارغا بەرداشلىق بېرىش ئۈچۈن نېمە قىلىشىمىز كېرەك؟
18 زاماننىڭ ئاخىرى يېقىنلىشىۋاتقانسېرى، بىزنى غەم-تەشۋىشكە سالىدىغان كۆپ قىيىنچىلىقلارغا دۇچ كېلىشىمىز مۇمكىن. 2021-يىلنىڭ يىللىق ئايىتى بۇ قىيىنچىلىقلارغا بەرداشلىق بېرىشكە ۋە تىنچ-خاتىرجەملىكنى ساقلىشىمىزغا ياردەم بېرىدۇ. بۇنى ئۆز كۈچىمىز بىلەن ئەمەس، يەھۋاغا تايىنىپ قىلالايمىز. كېلىڭ، 2021-يىلىدا، يەھۋا خۇدانىڭ ۋەدىسىگە ئىشىنىدىغانلىقىمىزنى ئىش-ھەرىكەتلىرىمىز بىلەن كۆرسىتەيلى: «تىنچ-خاتىرجەملىكنى ساقلاپ ماڭا تايانساڭلار، كۈچلۈك بولىسىلەر».—يەشايا 30:15.
49-ناخشا يەھۋا — بىزنىڭ پاناھگاھىمىز
a 2021-يىلىنىڭ ئايىتى، يەھۋاغا ئىشىنىشنىڭ قانچىلىك مۇھىم ئىكەنلىكىنى كۆرسىتىدۇ. سەۋەبى، بىزنى ھازىر ۋە كېلەچەكتە غەم-تەشۋىشكە سالىدىغان قىيىنچىلىقلارغا دۇچ كېلىمىز. بۇ ماقالىدە، مۇشۇ يىللىق ئايەتتىكى ئەمەلىي مەسلىھەتلەرنى قوللىنىش ئۈچۈن نېمە قىلالايدىغانلىقىمىزنى كۆرۈپ چىقىمىز.
b بەزى سادىق قېرىنداشلار ھەددىدىن زىيادە غەم-قايغۇ ياكى ۋەھىمە ھېس قىلغاچ، ئازاب-ئوقۇبەت چېكىدۇ. شۇڭا، بۇ بىر خىل كېسەللىك تۈرى. بۇ ئەلۋەتتە ئەيسا ئېيتقان غەم-ئەندىشىلەردىن پەرقلىق.
c سۈرەتتە: 1. بىر كۈننىڭ ئىچىدە قېرىندىشىمىز غەم-تەشۋىشلىرى ھەققىدە قىزغىن دۇئا قىلىۋاتىدۇ.
d سۈرەتتە: 2. ئۇ ئىشتا چۈشلۈك تاماق ۋاقتىدا، دانالىققا ئىگە بولۇش ئۈچۈن مۇقەددەس كىتابنى ئوقۇۋاتىدۇ.
e سۈرەتتە: 3. ئۇ مۇقەددەس كىتابتىن ئوقۇغان ياخشى ۋە يامان ئۈلگىلەر ئۈستىدىن ئويلىنىۋاتىدۇ.
f سۈرەتتە: 4. يادىدا ساقلىۋېلىش ئۈچۈن ئىلھام بېرىدىغان ئايەتنى توڭلاتقۇغا چاپلاۋاتىدۇ.
g سۈرەتتە: 5. دوستلىرى بىلەن خىزمەتتە بولغانلىقىدىن مەمنۇن بولىۋاتىدۇ.
h سۈرەتتە: 6. كېلەچەك ھەققىدە ئويلاپ، ئۈمىدىنى مۇستەھكەملەۋاتىدۇ.
