1. Ntoko Mwene Davidi, akina a hiyo aniikoha exeeni?

OTHEENE ahu ninniphavela okhala oomaaleleya ni okhalana murettele. Tthiri khuuvo mutthu oniphavela oxanka. Masi hata vari siiso, okathi mukina hiyo ninnixanka. Nto akina a hiyo anniikoha ntoko Mwene Davidi yoowo aamukonhe Yehova wira: “Mpakha lini kihawaka murohoni mwaka? Kiripiwaka murima othana n’uhiyu? Mpakha lini kihaxiwaka n’awanani aka?”—Esal. 13:3.

2. Mwaha ola, ninrowa othokorerya exeeni?

² Mooriipiha murima, hata niimananihaka vanceene khaninwerya okhala nihixankaka. Masi hata vari siiso, hiyo nnoowerya opaka etthu wira niwerye ovukula oxanka wahu. Mwaha ola, wanipacerya ninrowa oweha itthu sinniiriha oxanka. Nuumala-vo, ninrowa oweha inamuna 6 sinrowa onikhaliherya okathi ninxanka ahu.

3. Itthu xeeni sooxankiha ninkumana ahu, niireke ninniwerya okhoottiherya itthu iyo?

³ Sookhala itthu sinceene, sinniiriha oxanka. Masi itthu sikina hiyo khaninwerya osyaka. Mwa ntakiheryo, khula mwaakha hiyo khaninwerya okhoottiherya wuncerereya epereso ya yoolya, ikuwo, ni opuro wookhala. Nave hiyo khaninwerya okasoopa aahiiso osuwela ikwaha sotheene ale anivarana ahu muteko aahiiso ale anisomana ahu oxikola anrowa aya oneehererya opaka itthu soohiloka wala orupihana woohiloka. Nave khaninwerya okhoottiherya wira sihiiraneye ikrime muttetthe ninkhala ahu. Mixankiho iyo sookhala mwaha woowi ninkhala olumwenku atthu anceene ahiniiwelela aya malakiheryo a mBiibiliyani. Satana yoowo ori  muluku a olumwenku ola onnisuwela wira oxanka mwaha wa itthu sa valaponi onniwiiriha atthu akina ohiya omurumeela Yehova. (Math. 13:22; 1 Yoh. 5:19) Nto khanintikinihiwa woona olumwenku ola osareyale ene itthu sooxankiha!

4. Nnoonela sai vaavo ninkhalana ahu mixankiho sinceene?

⁴ Okathi ninkhalana ahu mixankiho sinceene, hiyo pooti oxanka vanceene. Mwa ntakiheryo, hiyo pooti oxankiheya mwaha woowi khanrina musurukhu oniphiyerya othuma itthu sinnithowa. Nave, hiyo pooti woovaka nuupuwelaka wira enooniphwanya eretta enrowa oniiriha ohiwerya ovara muteko aahiiso enrowa oniiriha woomoliwa omutekoni. Ohiya-vo, hiyo pooti woovaka sooweha saarowa oniiriha ohimwiiwelela Muluku. Nave moohipisa Satana onoowiiriha atthu ale animukhaliherya waatuphela atthu a Muluku. Nto hiyo pooti oxanka nuupuwelaka moota ninrowa ahu woonela okathi ninrowa ahu otupheliwa. Woonasa wene, nyuwo munniikoha so: ‘Niireke ti voohiloka oxanka mwaha wa itthu iyo?’

5. Yesu aaphavela ohimya exeeni ni masu oowi: “Muhiye oxanka”?

⁵ Hiyo ninnisuwela wira Yesu, aahaaleela atthareli awe wira: “Muhiye oxanka”. (Math. 6:25) Niireke Yesu aaphavela ohimya wira hiyo khivanireerela oxanka? Nnaari! Arumeyi akina oororomeleya a Yehova a khalai, yaahiwanana mixankiho saawiiriha oxanka. Masi hata vaari siiso, awo yaneemereriwa ni Yehova. * (1 Mam. 19:4; Esal. 6:4) Vannooneya wira Yesu aaphavela onimaaliha. Maana owo khoniphavela wira nitepeke oxanka mpakha ohiya omurumeela Yehova. Nto itthu xeeni nikhanle ahu oopaka wira nihitepeke oxanka? Nwehe ekaaxa eni: “Munrowa Owerya Sai Opaka Eyo?”

6. Moovarihana ni aFilipi 4:6, 7, etthu xeeni enrowa onikhaliherya oomaaleleya?

⁶ (1) Nvekeleke ikwaha sinceene. Okathi muntepa anyu oxanka munvekeleke Yehova wira ookhaliheryeni. (1 Ped. 5:7) Owo onimoovahani “murettele wa Muluku, yoowo onvikana osuwela wotheene wa apinaatamu”. (Mmusome aFilipi 4:6, 7.) Nto orumeelaka munepa awe woowaarya, ikuru seiyo siri sootepexa owerya, Yehova onimoomaalihani.—aGal. 5:22.

7. Etthu xeeni ninreerela ahu wuupuwela okathi ninvekela ahu?

⁷ Vaavo muninvekela anyu, mmutthukuleleke murima anyu Yehova. Nave mmuleeleke itthu mooluluwanya. Mmuleeleke muxankiho anyu ni moota munoonela anyu. Akhala wira yookhala etthu mukhanle anyu oopaka wira mmalihe muxankiho anyu, munvekeleke Yehova wira ookhaliheryeni woona etthu yoopaka ni woovahani ikuru wira nvarihele muteko malakiheryo awo. Masi, akhala wira muxankiho anyu khamunoona etthu yoopaka wira mmalihe, munvekeleke Yehova wira ookhaliheryeni ohitepexa oxanka. Vaavo munivekela anyu mooluluwanya, munniwerya oweha oratteene moota Yehova onaakhula awe mavekelo anyu. Nto akhala wira Yehova khonaakhula moowaakuveya nivekelo nanyu, muhikhulumuwe, muhaana otthikela ovekela. Musuweleke wira Yehova khoniphavela paahi wira munvekeleke mwa enamuna yooluluwanya, masi-tho oniphavela wira muthipeleleke ovekela.—Luka 11:8-10.

8. Etthu xeeni ninreerela ahu ohela muhina vaavo ninvekela ahu?

⁸ Vaavo munimuleela anyu Yehova oxanka wanyu, nave-tho mmuxukhureleke. Ti vooloka, hiyo owehexexa itthu sooloka nrina ahu hata nrina ene mixankiho sinceene. Akhala wira owanoni woowuumani, nnakhala muhinoona etthu  yoohimya, muupuweleke wira Yehova onnaakhula hata mavekelo ookhuveya ntoko wira: ‘Xontte mukikhaliherye!’—2 Wah. 18:31; aRom. 8:26.

9. Ninrowa ophwannya woowi ovareleleya wekeekhai?

⁹ (2) Mwaaroromeleke ankhili a Yehova ohiya awinyu. Mahiku a profeta Yesaya atthu ooYuda yaanoopopihiwa vanceene ni aSiria. Awo yaahoova vanceene mpakha ovekela okhaliheriwa ni atthu a wExiitu. (Yes. 30:1, 2) Yehova aahaalopola wira waaroromela atthu a wExiitu waamukumiherya mixankiho sinceene. (Yes. 30:7, 12, 13) Omurumaka profeta Yesaya, Yehova aahaaleela atthu a oYuda nipuro yaakhanle aya oophwanya ovareleleya wekeekhai. Owo aahimmye so: “Mwakiroromela ni murima, munolipa”.—Yes. 30:15b.

10. Mixankiho xeeni ninreerela ahu omuroromela ni murima wotheene Yehova?

¹⁰ Ninrowa wooniherya sai wira ninnimuroromela Yehova? Nkahaya muupuwele matakiheryo ala: Muupuwele wira ookhala oniphavela woovahani muteko munrowa anyu oliviwaka musurukhu munceene. Masi munrowa ovirihaka okathi ni ikuru sanyu sinceene mwaarowa anyu orumeelaka wira nvare miteko sa omunepani. Aahiiso, nkahaya muupuwele ole munivarana anyu muteko yoowo onoophavelani, masi khonimurumeela Yehova. Wala mmuupuwele mmusi anyu yoowo munimphenta anyu vanceene masi onniweehereryani ohimyaka wira: “Muthanle, Muluku anyu aahiiso miyo”. Khula muxankiho nihimmye ahu va khivanikhweya opaka yoothanla. Masi Yehova onimoovahani malakiheryo anrowa wookhaliheryani vanceene. (Math. 6:33; 10:37; 1 aKor. 7:39) Nikoho ninkhumelela tinla: Niireke munoomuroromela Yehova ni murima wotheene ni otthara malakiheryo awe?

11. Sowiiraneya xeeni sa mBiibiliyani ninreerela ahu osoma wira nihihiye omaaleleya hata nilupatthiwaka?

¹¹ (3) Mwiixutteke ni matakiheryo ooloka ni oohiloka. Biibiliya ookhalana sowiiraneya sinceene sinttittimiherya otthuneya waya okhala oomaala ni omuroromela Yehova. Vaavo munsoma anyu sowiiraneya iyo nweheke etthu yaakhalihenrye arumeyi a Muluku ovikaniha okhala oomaala hata yaarina mixankiho sinceene. Mwa ntakiheryo, okathi akhulupale a aYuda yaakhoottinhe aya arummwa olaleerya awo khiyoovale etthu. Masi moolipa murima, awo yaahimmye so: “Hiyo nihaana omwiiwelela Muluku, ohiya atthu”. (Mit. 5:29) Hata nuumala omaniwa vanceene, arummwa khiyaatempe oxanka. Mwaha wa xeeni? Mwaha woowi awo yaanisuwela wira Yehova aanaakhaliherya ni aanihakalala mwaha wa mweettelo aya. Nto eyo yaahaakhaliherya ohihiya olaleya ihapari sooreera. (Mit. 5:40-42) Ntakiheryo nikina nooloka ti na murummwa Siteefano. Okathi aahala awe vakhaani wiiviwa, Siteefano khaatempe oxanka. Ohiya-vo, owiitho wawe waalikana ni “owiitho wa nlaikha”. (Mit. 6:12-15) Mwaha wa xeeni? Mwaha woowi, owo aanisuwela wira aanimuhakalaliha vanceene Yehova.

12. Moovarihana ni 1 Pedru 3:14; 4:14, xeeni ninhakalala ahu okathi ninlupatthiwa ahu?

¹² Saahikhala itthu sinceene saakupaliha arummwa wira Yehova aanaakhaliherya. Awo yaahivahiwa owerya ni Muluku woopaka miiriirya. (Mit. 5:12-16; 6:8) Olelo-va, hiyo khanimpaka miiriirya. Hata vari siiso, orumeelaka Nuulumo nawe Biibiliya, Yehova onninlipiherya wira vaavo ninhaawa ahu mwaha woweettela exariya, owo onnihakalala mwaha wa mweettelo ahu wooloka ni onninivaha munepa awe wowaarya. (Mmusome 1 Pedru 3:14; 4:14.) Nto muhitepeke wuupuwela moota munrowa anyu woonela, aahiiso etthu munrowa  anyu opaka okathi munrowa anyu olupatthiwaka. Ohiya-vo, mwiimananiheke oweha etthu mukhanle anyu oopaka niinaano-va wira muncererye omuroromela wanyu Yehova ni okupali wanyu wira onoonoopola. Niira siiso, ntoko maKristau a eseekulu yoopacerya hiyo nnoororomelaka yooleiherya ya Yesu eni: “Kinimoovahani ankhili ni kinimookhaliheryani osuwela etthu yoohimya. Nto awanani anyu khanrowa owerya owaakhulani etthu”. Nave mukupaliki ni murima wotheene wira: “Vakhala wira munoovilela mpakha wookiseryani munimoopola ikumi sanyu”. (Luka 21:12-19) Nto muhikhala-khale muliyalaka wira hata murumeyi oororomeleya a Yehova okhwaaka, owo khonrowa omuliyala. Nto okhala wira onnimusuwela oratteene onrowa omuhihimuxa.

13. Ntakiheryo na atthu ele yahaavikaninhe okhala oomaala ni omuroromela Yehova, ninniixuttiha exeeni?

¹³ Hiyo pooti wiixutta itthu sinceene ni atthu ale yahaatthanre miruku sa okhala oomaala ni omuroromela Yehova. Osoma matakiheryo awo oohiloka anoonikhaliherya ohipaka itthu iyo soohiloka atthu awo yaapanke aya. Mwa ntakiheryo, wanipacerya wa olamulelo wa Mwene Asa, muttitthi muulupale wa anakhotto waahirwa owana ni Asa oYuda, masi Asa aahimuroromela Yehova ni murima wotheene nto Yehova aahimukhaliherya oxintta ekhotto ele. (2 Wah. 14:8-11) Masi muhoolo mwaya, okathi Mwene Bayexa a wIsarayeli aarwiiye awe omutuphela ni anakhotto vakhaani owo khaamuroromenle Yehova ntoko aapanke awe khalai. Ohiya omuroromela Yehova ntoko aamuroromenle awe khalai, Asa ahaaliva anakhotto a oSiria wira amukhaliherye. (2 Wah. 16:1-3) Ohalaka vakhaani okhwa, Asa aahiwereiwa vanceene, nave-tho okathi ole Asa khaaroromenle okhaliheriwa ni Yehova.—2 Wah. 16:12.

14. Yoovonya ya Mwene Asa enniixuttiha exeeni?

¹⁴ Wanipacerya Asa aahimphavela Yehova wira omukhaliherye okathi aakumana awe mixankiho. Masi muhoolo mwaya owo aahithanla ophuka mixankiho sawe mekhaweru. Wanipacerya palano a Asa a ophavela okhaliheriwa ni aSiria aakhala ntoko wira aari palano aakhumela saana, masi eyo khiyaavirinhe okathi munceene. Omurumeelaka profeta awe, Yehova aahimuleela Asa wira: “Okhala wira momuroromela mwené òSiria, muharoromelaka Apwiya Muluku anyu, anakhotto a mwené òSiria àtthyawa mmatatani mwanyu”. (2 Wah. 16:7) Hiyo nave, nihaana okhalana ephoole wira nihiimananiheke ophuka mixankiho sahu mekhihuru nihiphavelaka otthara malakiheryo a Yehova ari mBiibiliyani. Hata vatthuneyaka opaka yoothanla moowakuveya, mukhaleke oomaala ni mmuroromeleke Yehova, owo onimookhaliheryani okhumela saana.

15. Nihaana opaka exeeni vaavo nimmusoma ahu Biibiliya?

¹⁵ (4) Muheleke mmuru soolepa sa mBiibiliyani. Vaavo munimusoma anyu Biibiliya, mwaphwanya soolepa sinittittimiherya otthuneya waya okhala oomaaleleya ni omuroromela Yehova muheleke mmuru. Nyuwo pooti osoma soolepa iyo moorunya ni olepa nipuro vanrowa aya wookhweelakani oweha. Yehova aahimuruma Yoxuwa osoma moohirunya eliivuru ya Nlamulo khula nihiku. (Yox. 1:8, 9) Opaka eyo yammukhaliherya ohiya paahi opaka itthu mwa miruku masi-tho oxintta woova wawe vaavo aavare awe yoothanleliwa awe. Mwa enamuna emosaru, iversiikulu sinceene sa mBiibiliyani, pooti wookhaliheryani okhala oomaaleleya okathi munikumanana anyu mixankiho saarowa owiirihani okhala mutthu oowoova.—Esal. 27:1-3; Mir. 3:25, 26.

16. Yehova onirumeela sai muloko wira onikhaliherye ohihiya okhala oomaaleleya ni omuroromela?

¹⁶ (5) Muthukumaneke ni atthu a Muluku. Wira onikhaliherye ovikaniha okhala oomaaleleya ni omuroromela yena, Yehova onnaarumeela anna ni arokora. Okathi wa mithukumano hiyo ninnilipihiwa  vanceene ni ipantte sinilavuliwa, ikomentaario ni ovaanela woolipiha wa anna ni arokora. (aHeeb. 10:24, 25) Ohiya-vo, etthu ekina enrowa onikhaliherya okhala saana ori waatthukulela murima ahu apatthani nnaaroromela ahu a mmulokoni. Maana “nulumo” nooreera ninlavuliwa ni mpatthani ahu, pooti onikhaliherya ovukula oxanka wahu.—Mir. 12:25.

17. Moovarihana ni aHeeberi 6:19, nlipelelo na Omwene ninnivaha sai ikuru hata nrina ene mixankiho?

¹⁷ (6) Mulipihe nlipelelo nanyu. Nlipelelo nahu na Omwene “nri ntoko nankura a okumi ahu”, owo onninivaha ikuru wira nivilele mixankiho sinniphwanya mookumini mwahu. (Mmusome aHeeberi 6:19.) Nto okathi wotheene muupuweleleke nlipelelo Yehova onivanhe awe na muhoolo. Mwiira siiso, muupuwelo woohiloka onoolakaseya. (Yes. 65:17) Mwiimananiheke wuupuwela muri ene elapo esya ya murettele sihinrowa aya okhala mixankiho soovelaveliha. (Mik. 4:4) Nave nyuwo pooti olipiha nlipelelo nanyu mwaaleelaka atthu akina. Nto mwiimananiheke wiirela mpantta muteko woolaleya ihapari ni waapaka awiixutti. Mwiira siiso, nyuwo munrowa ‘ororomelaka voomalela mpakha wookiseryani’.—aHeeb. 6:11.

18. Etthu xeeni enrowa wiiraneya muhoolo, ni nihaana opaka exeeni?

¹⁸ Vaavo olumwenku ola wootakhala onrowa aya waattamela aka wanikisa, ninrowa okumanaka mixankiho seiyo sinrowa onixankihaka vanceene. Nto yoolepa ya mwaakha wa 2021 enoonikhaliherya ovilela mixankiho iyo ni ohihiya okhala oomaaleleya, ohiya ni ikuru sahu masi mwaha wa omuroromela Yehova ni murima wotheene. Tivonto, mwaakha ola mooniherye ni miteko sanyu wira nyuwo munnaamini ni murima wotheene yooleiherya ya Yehova eni: “Mwakiroromela ni murima, munolipa”.—Yes. 30:15.