DILONGI 1
Ba Wuvumbama Ayi Fiatila mu Yave
MATANGU MA MVU 2021: ‘Mangolo minu matedi mu kutatamana bavumbama ayi kumfiatila.’—YESA. 30:15.
NKUNGA 3 Mangolo Mitu, Kivuvu Kitu, Lufiatu Luitu
MAMBU TUANLONGUKA *
1. Dedi ntinu Davidi, kiuvu mbi bisadi binkaka bi Yave bankuvulanga?
VASI KO mutu wunzolanga kukuazuka. Kibila befu boso tutidi kunata luzingu luvumbama ayi lu ndembama. Vayi khumbu zinkaka tumviokilanga mu mambu ma tuvanga kukuazuka. Diawu bisadi binkaka bi Yave bankuvulanga kiokiawu kiuvu Ntinu Davidi kayuvula kuidi Yave: ‘Nati thangu mbi yala nuana na mayindu ma kiunda mu ntim’ami kadika kilumbu?’—Minku. 13:2
2. Mbi tunkuiza mona mu dilongi adidi?
2 Kheti befu boso khumbu zinkaka tunkuazukanga mu kibila ki mambu mammonikanga mu nza, vayi vadi mambu tulenda vanga muingi kubika kuazuka beni. Mu dilongi adidi, theti tunkuiza mona mua mambu malenda kutu vanga kukuazuka, bosi tunkuiza tubila mambu masambanu malenda kutu sadisa kuba bavumbama bo tumviokila mu mambu ma phasi.
MAMBU MBI MALENDA KUTU VANGA KUKUAZUKA?
3. Mambu mbi malenda kutu vanga kukuazuka? Bukiedika ti tulenda tula nkaku muingi mawu mabika kumonika?
3 Befu tuisi ko bu kuyadila mambu moso ma tuvanganga kukuazuka. Dedi tuisi ko bu kutudila nkaku muingi thalu yi bidia, yi mimvuatu voti yi bibuangu bi kuzingila yibika buelama. Mvandi tuisi ko bu kutudila nkaku batu bankotanga yitu kikola voti bansalanga yitu muingi babika kutu thota mu matedi mambu ma bukhita voti ma butsuza. Ayi tuisi ko bu kutudila nkaku batu va kizunga kitu muingi babika kuvanga mambu ma buphunya. Tummonikinanga mambu amomo maphasi kibila tuidi mu kuzinga mu nza yiwedi batu bakhambu landakananga minsua mi Kibibila. Satana zebi ti batu bawombo bala bika kusadila Yave mu kibila ki ‘mayindu ma luzingu lu nza ayiyi.’ (Matai 13:22; 1 Yoa. 5:19) Diawu tukhambu kuitukilanga mu kumona mambu mawombo mambi mu nza mankuazula batu!
4. Mambu mbi malenda monika befu kukuazuka beni?
4 Befu kumanga ba keba keba tulenda kuazuka beni ayi kukhambu kubue yindula mu mambu mankaka mamboti. Dedi, tulenda kuazuka beni mu kukhambu baka zimbongo zifuana muingi kukieba zitsatu zitu. Voti tulenda mona boma ti befu kubakana kubela ḿba tusinkuiza nunga ko kubue sala voti balenda tubotula mu kisalu. Mvandi tulenda kuazuka mu kuyindula ti bo bala tuthota, tualasa tatamana ko bakuikama kuidi Nzambi. Ayi bo tunyindula ti nkadu to wunkhambu Satana wala sadila batu kankengidilanga muingi kunuanisa dikabu di Nzambi, ḿba befu tulenda kuazuka mu kuyindula mambu mbi tuala vanga mu thangu ayoyi. Diawu tulenda kuyikuvusa: ‘Didi diambu dimbi kukuazuka mu matedi mambu amomo?’
5. Bo Yesu kutuba: ‘Lubika kukuazuka’, mbi mawu mansundula?
5 Befu tuzebi buboti mambu Yesu kakamba minlandikini miandi: ‘Lubika kuazuka’ (Matai 6:25) Bukiedika ti Yesu waba tomba kutuba ti tulendi kuazuka ko mu kiuma kimvela? Ndamba! Kibila mu thangu yikhulu bisadi binkaka bi Yave bikuikama, baba kuazuka mu mambu ma luzingu vayi kheti bobo bawu batatamana kuba lunungu va meso ma Yave. * (1 Minti. 19:4; Minku. 6:3) Vayi Yesu waba tomba kutuba ti, tulendi bika ko mambu ma nza ayiyi ma tuvanga kukuazuka beni, nati mu kitesu ki kudekula kifuza tuidi mu kisalu ki Nzambi. Mambu mbi tulenda vanga muingi kununga mayindu amomo?—Tala quadro yintuba “ Buidi Tulenda Vangila Mawu.”
MAMBU MASAMBANU MANKUIZA TUSADISA KUBA BAVUMBAMA
Tala lutangu 6 *
6. Dedi bummonisina Filipi 4:6, 7, mbi bilenda kutu sadisa kuba bavumbama?
6 (1) Kutatamana kusambila. Bo wumviokila mu mambu ma kuvanga kukuazuka, sambila kuidi Yave muingi kudinda lusalusu. (1 Pete. 5:7) Ayi nandi wala tambudila minsambu miaku, mu kuvana ‘ndembama yi Nzambi, yoyi yiviokidi diela [di batu].’ (Tanga Filipi 4:6, 7.) Mvandi Yave kalenda kutu sadisa mu kusadila phevi’andi yinlongo.—Ngala. 5:22.
7. Mbi tufueti tebukanga moyo bo tunsambila kuidi Nzambi?
7 Bo wunsambila kuidi Yave, nzibudila ntim’aku. Nkamba ngudi nsamu ayi nkamba buidi widi mu kumuena. Boti zebi kudedikisa mambu beni, buna dinda nduenga kuidi Yave muingi wuzaba mbi fueti vanga ayi wubaka mangolo ma kudedikisila mawu. Vayi boti wusa zaba ko buidi bu kudedikisila mambu beni, buna dinda lusalusu kuidi Yave muingi wubika kuazuka beni. Befu kukamba Yave diambu dinluta tukuazula, bumviokila thangu tunkuiza mona buidi Yave kankuiza vanina mimvutu mu minsambu mitu. Vayi boti Yave kasimvana ko mimvutu mi minsambu mitu mu thangu yo befu tuntomba, tubika vonga. Kibila Yave wuntomba befu tutatamana kunzabikisa mu nsambu mambu ta tukuazula. —Luka 11:8-10.
8. Diambu mbi fueti tebukilanga moyo bo wumvanga nsambu?
8 Bo wunzabikisa Yave mambu ma kukuazula mu nsambu, tebukanga mvandi moyo kumvutudilanga matondo. Dedi, buboti beni kuyindulanga mu lusakumunu loso ka kuvananga kheti mu mambu maphasi widi mu kuviokila. Vayi mbi wulenda vanga boti wusa zaba ko buidi bu kusudikisila Yave, mambu ma kukuazula? Tebuka moyo ti kheti mambu to wuzebi kutuba mu thangu beni madi: ‘Lemvuka, tsadisa!’, Yave wala tambudila nsambu’aku.—2 Lusa. 18:31; Loma 8:26.
Tala lutangu 9 *
9. Mbi fueti vanga boti widi mu boma?
9 (2) Fiatila mu nduenga yi Yave kubika kuandi mu ndueng’aku. Mu sekulu yi 8 A.T.K., basi Yuda baba boma ti basi Silo balenda kuba nunga. Diawu badindila lusalusu kuidi basi Ngipiti. (Yesa. 30:1, 2) Yave wuba kamba ti makani baba ma kufiatila basi Ngipiti, mankuiza batuadisa beni ziphasi. (Yesa. 30:7, 12, 13) Mu nzila mbikudi Yesaya, Yave wuzabikisa batu mbi bafueti vanga muingi bazingila mu nsika. Nandi wutuba: ‘Mangolo minu matedi mu kutatamana bavumbama ayi kumfiatila’.—Yesa. 30:15b.
10. Mu mambu mbi tulenda monisina lufiatu luitu kuidi Yave?
10 Thangu mbi tufueti monisina lufiatu kuidi Yave? Dedi yindulabu ti, bama kuvana kisalu wunkuiza bakilanga zimbongo ziwombo. Vayi vankuiza tombulu ngie kusala bilokolo biwombo binkuiza kutula nkaku mu kusadila Yave. Voti mutu wunsalanga yaku wuku tomba makangu ayi nandi kasi ko Mbangi yi Yave wubotama. Ove yindulabu musi dikanda ngie wunkinzikanga beni vayi wuku kamba ti wunkuiza kuyekula ngie kutatamana kusadila Yave. Mu matedi mambu amomo, ngie wulenda mona beni phasi kubaka makani. Vayi Yave kalenda kuvana zithuadusulu wuntomba. (Matai 6:33; 10:37; 1 Koli. 7:39) Vayi kiuvu kiawu akiki: Wunkuiza fiatila mu Yave ayi kutumamana zithuadusulu ziandi?
Tala lutangu 11 *
11. Binongo mbi bi Kibibila wulenda longuka muingi wutatamana wuvumbama kheti bo wumviokila mu zithotolo?
11 (3) Longuka mu bifuani bimboti ayi bimbi. Mu Kibibila muidi bifuani biwombo bimmonisa nkinza wu kubanga wuvumbama ayi kufiatila mu Yave. Bo wunlonguka matedi binongo abiobio, fiongunina mbi bisadisa bisadi abiobio bi Nzambi, kutatamana bavumbama kheti mu zithotolo baba viokila. Dedi, bo nzo yi lufundusu yilutidi ku Yuda bakandimina bapostolo muingi babika kubue samuna, bawu basa ba ko mu boma. Mu kibakala bawu batuba: ‘Bulutidi mboti mu tumukina theti Nzambi, bika batu.’ (Mava. 5:29) Kheti bo baba tuta khuba, bapostolo batatamana bavumbama. Kibila mbi? Kibila bawu bazaba ti Yave wuba va khonzo’awu ayi nandi wuyangalala beni bo bawu batatamana kusamuna zitsangu zimboti. (Mava. 5:40-42) Bobuawu mvandi, bo baba vonda Stefano mu kibila ki lukuikumunu luandi mu Nzambi, nandi wutatamana wuvumbama ayi ‘kizizi kiandi kiaba lezama buka kizizi ki mbasi.’ (Mava. 6:12-15) Kibila mbi? Kibila nandi wuzaba ti wuba lunungu va meso ma Yave.
12. Dedi bummonisina 1 Petelo 3:14 ayi 4:14, kibila mbi tufueti bela mu mayangi bo tumviokila mu zithotolo?
12 Bapostolo bamona bivisa ti Yave wuba yawu. Kibila nandi wuba vana lulendo lu kuvanga mangitukulu. (Mava. 5:12-16; 6:8) Bubu, Yave katu vananga ko lulendu luandi muingi kuvanga mangitukulu. Vayi kheti bobo, Yave wunkanikisa mu nzila Diambu diandi Kibibila ti, befu kukuikama mu thangu tumviokila mu ziphasi, nandi wunkuangalalanga beni ayi wala tuvana phevi’andi muingi yitu sadisa. (Tanga 1 Petelo 3:14; 4:14.) Diawu, bika kuazuka ko beni mu mambu tuala vanga mu bilumbu binkuiza kuntuala mu thangu bala tuthota. Vayi kindisa lufiatu luitu ti Yave wala tusadisa ayi wala tuvukisa. Dedi bo minlonguki mu thangu yikhulu bavangila, befu mvitu tulenda ba lufiatu mu lukanu lu Yesu: ‘Yela luvana bikuma ayi nduenga, yoyi zimbeni zinu zioso va kimueka balasa nunga ko ayi balasa finda ko ziphaka.’ Tuidi lufiatu mu mambu amama: ‘Mu kibila ki lukuikumunu luinu, luela vukisa luzingu luinu.’ (Luka 21:12-19) Tebuka moyo ti Yave kazimbakananga ko bisadi biandi bafuila mu kibila ki lukuikumunu luawu mu nandi ayi widi beni phuila muingi kuba vulubusa.
13. Buidi tulenda bakila ndandu mu binongo bi batu, bakhambu ba bavumbama ayi bakhambu fiatila mu Yave?
13 Tulenda longuka mvandi matedi bisadi bi Yave mu thangu yikhulu bakhambu ba bavumbama ayi bamanga kumfiatila. Befu kulonguka matedi bifuani abiobio bimbi, mala tusadisa kubika kubue vutukila zinzimbala bawu bavanga. Bo ntinu Asa katona kuyala ku Yuda, zimbeni ziawu basi Etiopi bayiza na nkangu wunneni wu masodi muingi kuba nuanisa. Vayi nandi wufiatila mu Yave ayi Yave wuba sadisa banunga mvita. (2 Lusa. 14:9-12) Vayi kuntuala, bo mua nkangu wu masodi ma ntinu Baesa kayenuanisa ntinu Asa, nandi kasa fiatila ko mu Yave dedi bo kavangila mu khumbu yitheti. Vayi nandi wufuta masodi ma Silo muingi bambuela mioko mu mvita. (2 Lusa. 16:1-3) Ayi bo kayiza bakana kimbevo kingolo, nandi kasa fiatila ko mu lusalusu lu Yave.—2 Lusa. 16:12.
14. Mbi tulenda longuka mu zinzimbala zi ntinu Asa?
14 Va thonono ntinu Asa wufiatila mu Yave bo kaba viokila mu ziphasi. Kuntuala, nandi kasa fiatila ko mu lusalusu lu Nzambi’andi, vayi wufiatila mu diela diandi veka. Va thonono, makani ma ntinu Asa ma kudinda lusalusu kuidi masodi ma Silo, malenda monika buka ti madi mamboti. Vayi ndembama ntinu wu Isaeli kaba tomba yisa kadidila ko mu thangu yiwombo. Yave wunkamba mu nzila mbikudi’andi: ‘Bo wufiatidi ntinu Silo ayi wukhambu fiatila Yave Nzambi’aku, diawu nkangu wu masodi ma Silo matinini mu mioko miaku.’ (2 Lusa. 16:7) Tufueti ba keba keba muingi tubika vangila mambu mu phil’itu, mu khambu kheti fiongunina Diambu di Nzambi Kibibila. Kheti bo mambu matu monikina mu kinzimbukulu, buboti beni kubanga bavumbama ayi kufiatila mu lusalusu lu Yave.
Tala lutangu 15 *
15. Mbi tulenda vanga bo tuntanga Kibibila?
15 (4) Lunda va kilunzi matangu ma Kibibila. Bo wumbakula matangu ma Kibibila mantuba ti mangolo mitu mankuizilanga mu kuba bavumbama ayi kufiatila mu Yave, tomba kulunda mawu va kilunzi. Ngie wulenda tanga mawu mu mbembo yinangama voti kusonika mawu vama wunkuiza tebukilanga mawu moyo khumbu zioso. Yave wukamba Yosua katanganga Diambu Diambu kadika kilumbu mu mbembo yivumbama, muingi kasadila mambu moso mu nduenga. Mambu katanga mvandi mayiza kunsadisa kubika ba boma vayi kuba kibakala bo kantuadisa dikabu di Nzambi. (Yosua 1:8, 9) Vadi matangu mawombo ma Kibibila malenda kuku sadisa kuba wuvumbama bo wumviokila mu mambu ma kuvanga kukuazuka voti ma kutula boma.—Minku. 27:1-3; Zinga. 3:25, 26.
Tala lutangu 16 *
16. Buidi Yave kansadilanga zikhomba mu kimvuka muingi kutu sadisa kuba bavumbama ayi kumfiatila?
16 (5) Fikama dikabu di Nzambi. Yave wunsadilanga zikhomba zitu zi kiphevi muingi kutu sadisa kuba bavumbama ayi kumfiatila. Mu zikhutukunu zitu, befu tumbakanga beni ndandu mu masolo ayi mbonosono zikhomba bamvanganga. Mvandi tumbakanga ndandu mu masolo tumbanga na zikhomba zitu ava lukutukunu lutona ayi kutsuka lukutukunu. (Ebe. 10:24, 25) Tumbakanga beni khindusulu bo tunkamba bakundi bitu ba fikama mu kimvuka mambu ma tukuazula. “Diambu dimbote” ditubulu kuidi nkundi wu lufiatu, dilenda tusadisa kubika kuazuka beni.—Zinga. 12:25.
Tala lutangu 17 *
17. Dedi bummonisina Ebeleo 6:19, buidi kivuvu mu Kintinu ki Nzambi kilenda tusadisila kuba bavumbama bo tumviokila mu mambu maphasi?
17 (6) Kindisa kivuvu kiaku. Kivuvu tuidi mu Kintinu ki Nzambi kidi buka ‘kisengu kinsikimisanga muel’itu.’ Kiawu kitu kindisanga kheti mu ziphasi tumviokila voti bo tuidi mayindu ma tuvanga kukuazuka. (Tanga Ebeleo 6:19.) Yindula mu lukanu Yave ka tuvana mu matedi bilumbu binkuiza kuntuala. Mu thangu beni ni mutu kalasa ba ko bibila muingi kukuazuka. (Yesa. 65:17) Yindula phila tuala zingila mu ndembama mu nza yimona. Mambu moso mambi matu kuazulanga bubu, mala mana. (Mika 4:4) Kivuvu kiaku kinkuiza kindama mvandi, bo wumbuela kifuza kiaku mu kulonga bankaka zitsangu zimboti. Vanga mamoso wulenda nunga mu kisalu ki kusamuna ayi ki kuvanga minlonguki. Ngie kuvanga mawu, wala ba ‘diana diduka nati kutsuka.’—Ebe. 6:11.
18 Bo tuidi mu kuefikamanga ku tsuka nza ayiyi, tuala monikina mambu mawombo maphasi mala tuvanga kukuazuka. Matangu ma mvu awuwu 2021 malenda kutu sadisa kununga ziphasi ayi kutatamana bavumbama kubika kuandi mu mangolo mitu veka vayi mu kufiatila mu Yave. Ayi tuala monisa mu mavanga mitu, ti befu tuidi lufiatu mu lukanu lu Yave: ‘Mangolo minu matedi mu kutatamana bavumbama ayi kumfiatila’—Yesa. 30:15.
NKUNGA 8 Yave Kisuamunu Kitu
^ Lut. 5 Matangu ma mvu awuwu 2021, mammonisa nkinza wu kufiatila mu Yave bo tumviokila mu mambu ma tuvanga kukuazuka bubu ayi mu bilumbu binkuiza kuntuala. Dilongi adidi, dinkuiza monisa ziphila ziwombo tulenda sadila dilongi didi mu matangu ma mvu awuwu.
^ Lut. 5 Zikhomba zinkaka zi babakala ayi zi bakieto, badi kimbevo ki kukhambu ba nsika voti ki kukuazuka beni. Kimbevo akiokio voti phila ayoyi yi kukuazukila yidi beni disuasana na kukuazuka Yesu katubila.
^ Lut. 63 MAMBU MADI MU ZIFIKULA: (1) Khumbu ziwombo mu kilumbu, khomba yimueka yinkieto wumbotula thangu muingi kusambila mu mambu ma kunkuazula.
^ Lut. 65 MAMBU MADI MU ZIFIKULA: (2) Mu phundulu yi kisalu bo kandia, nandi wuntanga Diambu di Nzambi muingi kabaka nduenga.
^ Lut. 67 MAMBU MADI MU ZIFIKULA: (3) Nandi wunyindula mu bifuani bimboti ayi bimbi bidi mu Kibibila.
^ Lut. 69 MAMBU MADI MU ZIFIKULA: (4) Nandi wumbabika nkanda kasonika matangu ma Kibibila mu geleira muingi kabambukilanga moyo.
^ Lut. 71 MAMBU MADI MU ZIFIKULA: (5) Nandi wunkuangalala mu nkangulu wumboti na khomba widi yandi mu kisalu ki kusamuna.
^ Lut. 73 MAMBU MADI MU ZIFIKULA: (6) Nandi wunkindisa kivuvu kiandi mu kuyindula mu lusakumunu kala tambula mu bilumbu binkuiza kuntuala.
