1. Cásica rey David, ¿xi zándaca guinabadiidxaʼ caadxi xpinni Cristu yaʼ?

GUIRANU racaláʼdxinu guibáninu galán ne gápanu paz. Peru neca qué riuuláʼdxinu, nuu biaje ridxaagalunu guendanagana. Dede zándaca nuu caadxi xpinni Cristu cayuni sentir casi biʼniʼ sentir rey David, laa gunabadiidxaʼ Jehová: «¿Padxí nga gusaana de guidxibeʼ ne chuaaʼ xizaa ne gusaana de chuʼ ladxiduáʼ triste guiráʼ dxi pue?» (Sal. 13:2).

2. ¿Xi zadúʼyanu lu artículo riʼ?

² Neca nuu ora ziuʼnu xizaa o zápanu ansiedad, nuu ni zanda gúninu para guni controlarnu ni cayuni sentirnu. Lu artículo riʼ zadúʼyanu gunáʼ nga caadxi cosa ni zanda gucaa laanu chuʼnu xizaa. Despué zadúʼyanu xhoopaʼ conseju ni zacané laanu para cadi gaca lúgunu ora gápanu guendanagana.

3. ¿Xi zanda gucaa laanu chuʼnu xizaa ne xiñee qué zanda gucueezanu cani yaʼ?

³ Nuu cosa ni rucaa laanu chuʼnu xizaa ne ni qué zanda gucueezanu. Riuʼnu xizaa purtiʼ guiráʼ iza jma caru guendaró, lari ne para cuí ti yoo. Laaca qué zanda gucueezanu ora gucaa ca compañeru de dxiiñaʼ o de scuela  laanu gúninu ni cadi jneza o ni qué riuulaʼdxiʼ Dios. Ne laaca qué zanda gucueezanu para maʼ cadi chuʼ binni malu neza ra nabézanu. Guiráʼ ni bizéʼtenu riʼ rusihuínnini pabiáʼ feu nuu Guidxilayú riʼ, purtiʼ stale binni qué rinanda ca conseju zeeda lu Biblia. Binidxabaʼ, dios stiʼ Guidxilayú riʼ, nanna zudii stale binni lugar gucueeza ca «preocupación stiʼ guidxilayú riʼ» laacaʼ para cadi gúnicaʼ ni ná Jehová (Mat. 13:22; 1 Juan 5:19). Nga runi, nuu stale problema ni runi estresar binni.

4. ¿Xi zazaacanu ora riuu xhaatanu xizaa?

⁴ Ora riuu xhaatanu xizaa pur ca problema ni nápanu dede maʼ qué zanda guiníʼ íquenu sti cosa. Zándaca chuʼ xhaatanu xizaa qué gudii bueltu ni runi ganarnu para gápanu ni iquiiñenu, o gaca huaranu ne maʼ qué ganda gúninu dxiiñaʼ hasta gunítinu ni. Laaca zándaca chuʼnu xizaa guchéʼnenu Dios ora tídinu xiixa prueba o dede guiníʼ íquenu xi gúninu ora gucaalú ca xpinni Binidxabaʼ xquidxi Dios. Zándaca guinabadiidxanu: «¿Ñee malu nga chuaaʼ xhaataʼ xizaa pur ca cosa riʼ la?».

5. ¿Xi nuu Jesús guiníʼ ne ca diidxaʼ riʼ: «Cadi chuʼtu xizaa»?

⁵ Sicaríʼ gudxi Jesús ca discípulo stiʼ: «Cadi chuʼtu xizaa» (Mat. 6:25). ¿Ñee caniʼbe qué lica ziuʼnu xizaa la? Coʼ. Guyuu caadxi xpinni Jehová dxiqué laaca guyuucaʼ xizaa ne cadi pur nga maʼ qué ñuulaʼdxiʼ Jehová ni bíʼnicaʼ (1 Rey. 19:4; Sal. 6:3). * Ni nuu Jesús guiníʼ né ca diidxaʼ riʼ nga pa chuʼ xhaatanu xizaa zándaca gucaani laanu gusaana de gúninu ni ná Dios. Nga runi, ¿xi naquiiñeʼ gúninu ora chuʼ xhaatanu xizaa yaʼ? (Biiyaʼ recuadru ni láʼ « Ximodo zanda gúninu ni»).

6. Casi ná Filipenses 4:6, 7, ¿xi zacané laanu gatadxí ladxidoʼno yaʼ?

⁶ 1) Cadi gusaana de guni orarluʼ. Zatadxí ladxidoʼloʼ pa guni orarluʼ Jehová ora nápaluʼ stale problema (1 Ped. 5:7). Zacabi Jehová oración stiluʼ ra gudii paz lii «dede guirutiʼ zanda guiene ximodo ni» (biindaʼ Filipenses 4:6, 7). Riquiiñeʼ Jehová espíritu santu stiʼ para quixhedxí ladxidoʼno (Gál. 5:22).

7. ¿Xi cadi naquiiñeʼ guiaandaʼ lii ora guni orarluʼ Dios?

⁷ Ora guni orarluʼ Jehová, bixheleʼ ladxidoʼloʼ nezalube. Gudxi laabe xi problema nápaluʼ ne xi rucaa cani lii guni sentirluʼ. Pa zanda gaca chaahuiʼ ni, gunabaʼ laabe guendabiaaniʼ ne stipa para guni chaahuiluʼ ni. Ne pa qué zanda gaca chaahuiʼ ni, gunabaʼ laabe gacanebe lii cadi chuʼ xhaataluʼ xizaa. Pa gábiluʼ Jehová xi peʼ cazaacaluʼ ora guni orarluʼ, ra tidiʼ tiempu zuuyaluʼ ximodo guicábibe lii. Pa gúʼyaluʼ cadi cacábibe lii, cadi guireeluʼ gana. Racalaʼdxiʼ Jehová gábiluʼ laa xi guiráʼ cazaacaluʼ ora guni orarluʼ ne cadi gusaana de gúniluʼ ni (Luc. 11:8-10).

8. ¿Xiruʼ naquiiñeʼ guininu lu oración stinu?

⁸ Ora guni orarluʼ Jehová para gábiluʼ laa xi guiráʼ cazaacaluʼ, laaca risaca guietenaláʼdxiluʼ ca cosa galán ni nápaluʼ ne gudiiluʼ xquixe peʼ laabe pur laacani neca nápaluʼ problema. Ziuu ora qué zadxélaluʼ diidxaʼ para guiniʼluʼ xi guiráʼ cayuni sentirluʼ. Peru cadi guiaandaʼ lii zacabi  Jehová ca oración stiluʼ neca ni ganda si gábiluʼ laabe nga: «¡Gucané naa por favor!» (2 Crón. 18:31; Rom. 8:26).

9. ¿Xi naquiiñeʼ gúninu ora cadxíbinu?

⁹ 2) Gupa confianza Jehová ne cadi laca lii. Lu siglu xhono ante de ca dxi stinu, nabé bidxibi guidxi Judá nucaalú ca asiriu laacaʼ ne ñácacaʼ esclavu stícabe dede gunábacaʼ Egipto gacané laacaʼ (Is. 30:1, 2). Gudxi Jehová laacabe zacanácabe pa gúnicabe ni (Is. 30:7, 12, 13). Ne biquiiñeʼ Jehová profeta Isaías para gabi xquidxi xi zanda gacané laacaʼ. Sicaríʼ gudxi Isaías laacabe: «Zápatu stipa pa cadi gaca lúgutu ne gápatu confianza» Jehová (Is. 30:15b).

10. Bizeeteʼ pora nga zanda gusihuínninu nápanu confianza Jehová.

¹⁰ Guzéʼtenu pora nga zanda gusihuínninu nápanu confianza Jehová. Bixuiʼlú cudiicabe lii ti dxiiñaʼ ra ziáxaluʼ galán peru zagúʼbani stale tiempu stiluʼ dede maʼ qué zanda gúniluʼ xhiiñaʼ Jehová. O zándaca ti binni ni runineluʼ dxiiñaʼ ni cadi Testigu chuulaʼdxiʼ lii. O tobi de ca familia stiluʼ ni nadxiiluʼ gabi lii: «Gulí, ¿Dios stiluʼ la? o naa?». Nagana nga gudxíʼlunu cani bizéʼtenu riʼ, peru lu cada tobi de laacani zacané Jehová laanu para gánnanu xi gúninu (Mat. 6:33; 10:37; 1 Cor. 7:39). Yanna, ¿zusihuínninu nápanu confianza laabe ne zúninu ni nabe la?

11. ¿Xi ejemplu zeeda lu Biblia zanda guni estudiarnu para cadi guidxíbinu ora gucaalúcabe laanu?

¹¹ 3) Biziidiʼ de ca ejemplu stiʼ ca binni ni bibani dxiqué. Lu Biblia zeeda stale ejemplu galán ne ni cadi galán, ne rusihuínnicani xiñee risaca nga cadi guidxíbinu ne gápanu confianza Jehová. Ora guni estudiarluʼ ca ejemplu galán ca, biiyaʼ xi gucané ca xpinni Dios para cadi guidxíbicaʼ ora guyuu tu bicaalú laacaʼ. Qué nidxibi ca apóstol dxi bicueeza tribunal supremo stiʼ ca judíu laacaʼ para cadi guni predicarcaʼ. Lugar de ñanadxicaʼ, sicaríʼ guniʼcaʼ: «Jma naquiiñeʼ guzúʼbadu stiidxaʼ Dios casi gobernante que guzúʼbadu stiidxaʼ hombre» (Hech. 5:29). Qué nidxíbicaʼ neca gudíñecabe laacaʼ. ¿Xiñee yaʼ? Purtiʼ nánnacabe nuu Jehová pur laacabe ne riuulaʼdxiʼ ni rúnicabe. Ngue runi qué nusaana de ñuni predicárcabe ca noticia galán (Hech. 5:40-42). Zaqueca bizaaca discípulo Esteban dxi chiguuticabe laa, qué nidxibi dede «rihuinni lube casi lu ti ángel» (Hech. 6:12-15). ¿Xiñee yaʼ? Purtiʼ nánnabe riuulaʼdxiʼ Jehová ni rúnibe.

12. Casi ná 1 Pedro 3:14 ne 4:14, ¿xiñee zanda chuʼnu nayecheʼ ora sanándacabe laanu?

¹² Gunna dxichi ca apóstol nuu Jehová pur laacaʼ, purtiʼ bidii poder laacabe para gúnicabe milagru (Hech. 5:12-16; 6:8). Neca tiempu riʼ qué rudii Jehová poder laanu para gúninu milagru, riquiiñebe Biblia para gábibe laanu zacanebe ne zudiibe espíritu stibe laanu pa cayacananu pur cayúninu ni jneza (biindaʼ 1 Pedro 3:14; 4:14). Nga runi cadi naquiiñeʼ guiníʼ íquepenu xi guizaacanu despué pa sanándacabe laanu, ni jma jneza nga guidúʼyanu xi zanda gúninu para gápanu jma confianza zacané ne zulá Jehová laanu. Cásica biʼniʼ ca discípulo que, naquiiñeʼ guietenaláʼdxinu promesa stiʼ Jesús ora guníʼ: «Zudieeʼ laatu ni guiniʼtu ne zudieeʼ laatu guendabiaaniʼ, ne  guiráʼ ca enemigu stitu qué zadxélacaʼ xi guiniʼcaʼ». Ne laaca guniʼbe: «Pa guni huantartu zulatu xpídatu» (Luc. 21:12-19). Ne cadi guiaandaʼ laanu ora rati ti xpinni Jehová, rietenalaʼdxiʼ ximodo laabe ne zusibani laabe.

13. ¿Xi zanda guizíʼdinu de ni bizaaca ca binni ni guca luguʼ ne qué ñapa confianza Jehová?

¹³ Laaca zanda guizíʼdinu de ni bizaaca ca binni ni guca luguʼ ne qué ñapa confianza Jehová. Ora guni estudiarnu ca ejemplu riʼ zacaneni laanu para cadi gúninu ni biʼniʼ ca binni riʼ. Guzéʼtenu ti ejemplu, dxi bizulú biʼniʼ mandar rey Asá de Judá, gupa confianza Jehová dxi gudindené ti ejércitu naroʼbaʼ ne gucané Jehová laabe para biʼniʼ ganarbe (2 Crón. 14:9-12). Peru ¿xi bizaaca dxi bidxiilube rey Baasá de Israel, ni napa ti ejércitu jma nahuiiniʼ yaʼ? Lugar de nuyúbibe Jehová cásica bíʼnibe ni ante laga gudíxebe ca siriu para gacanecaʼ laabe (2 Crón. 16:1-3). Ne dxi guca huarabe ne mayaca gátibe, qué nuyúbibe ñacané Jehová laabe (2 Crón. 16:12).

14. ¿Xi zanda guizíʼdinu de ca cosa ni cadi jneza biʼniʼ Asá?

¹⁴ Dxi bizulú Asá biʼniʼ mandar, biyúbibe Jehová para gacané laabe ora nápabe problema. Peru gudiʼdiʼ si tiempu maʼ qué nuyúbibe Dios para gacané laabe ne maʼ bíʼnibe ca cosa ca modo nabe. Ruluíʼ jneza ngue ni biʼniʼ Asá ora gunabaʼ gacané ca siriu laa para tindené rey de Israel. Peru despué bihuinni cadi biaʼsi ni bíʼnibe. Biquiiñeʼ Jehová ti profeta para gabi laabe ca diidxaʼ riʼ: «Cumu gúpaluʼ confianza rey stiʼ Siria ne qué ñápaluʼ confianza Jehová, Dios stiluʼ la? nga runi maʼ zeʼ rey stiʼ Siria de lu naluʼ» (2 Crón. 16:7). Laanu laaca naquiiñeʼ chuʼnu cuidadu cadi gúninu ca cosa ca modo rábinu, lugar de nga la? guyúbinu gacané Jehová laanu né Stiidxaʼ. Nuu biaje naquiiñeʼ guicaanu decisión nagueenda. Neca zacá pa qué gaca lúgunu ne gápanu confianza Jehová zacaanu decisión jneza.

15. ¿Xi zanda gúninu ora maʼ cadúʼndanu Biblia?

¹⁵ 4) Biʼniʼ stipa guiziidiluʼ versículo zeeda lu Biblia de memoria. Ora gúʼndaluʼ ti relatu ni zeeda lu Biblia ra riete cadi gaca lúgunu ne gápanu confianza Jehová zudiini stipa laanu, nga runi biʼniʼ stipa guiziidiluʼ caadxi versículo ni zeeda lu relatu ca de memoria. Laaca galán gúʼndaluʼ cani en voz alta, gucaaluʼ ni biziidiluʼ ne guni repasarluʼ cani gatigá. Biʼniʼ mandar Jehová Josué guʼndaʼ libru ra cá Ley dxi né gueelaʼ ne guni meditar ni zeeda luni ti guni ni jneza. Ti gacaneni laabe para cadi guidxíbibe pur guiráʼ ni cazaacabe tiempu que (Jos. 1:8, 9). Lu Stiidxaʼ Dios zanda guidxélanu ni zacané laanu para cadi gaca lúgunu ora guidxaagalunu xiixa ni cuʼ laanu xizaa o ni guchibi laanu (Sal. 27:1-3; Prov. 3:25, 26).

16. ¿Ximodo riquiiñeʼ Jehová ca hermanu de congregación para gacané laanu cadi gaca lúgunu ne gápanu confianza laa?

¹⁶ 5) Guyuu gaxha de ca hermanu. Riquiiñeʼ Jehová laacabe para cadi gaca lúgunu ne gápanu confianza laa. Lu ca reunión stinu rizíʼdinu stale de ca discursu ne de ca comentariu ni rudii ca hermanu stinu ne ora ruínenu laacaʼ diidxaʼ (Heb. 10:24, 25). Pa gábinu ti xhamígunu de congregación stinu xi riguu xizaa laanu zanda cuʼ gana laanu. «Ti diidxaʼ  galán» ni gabi ti xhamígunu laanu zanda gacané ni laanu ne maʼ cadi chuʼ xhaatanu xizaa (Prov. 12:25).

17. Casi ná Hebreos 6:19, ¿ximodo zanda guinaaze dxiichiʼ esperanza stiʼ Reinu laanu neca nápanu problema?

¹⁷ 6) Cadi guiaandaʼ lii esperanza stiluʼ. Esperanza ni nápanu Reinu stiʼ Dios naaze dxiichiʼ ni «xpídanu, cásica rinaaze dxiichiʼ ti ancla barcu», racané esperanza riʼ laanu neca nápanu problema ne nuunu xizaa (biindaʼ Hebreos 6:19). Cadi guiaandaʼ lii maʼ biʼniʼ prometer Jehová maʼ qué zaníʼ íquenu cosa ni riguu laanu xizaa lu ca dxi ni zeeda ca (Is. 65:17). Bixuiʼlú ndaaniʼ guidxilayú cubi maʼ qué ziuu cosa malu ne maʼ zapa binni paz (Miq. 4:4). Stiʼ cosa ni zacané laanu cadi gusiaandanu esperanza stinu nga guinínenu xcaadxi binni de laani. Nga runi biʼniʼ predicar biaʼ gándatiʼ ne gucané binni gaca discípulo. Pa gúniluʼ ni, zanda gápaluʼ confianza zaca ni cabézaluʼ «dede dxi gueeda fin» (Heb. 6:11).

18. ¿Xi cabeza laanu lu ca dxi ni zeeda ca, ne xi zacané laanu?

¹⁸ Ra jma mayaca guiluxe Guidxilayú riʼ, jma zápanu problema ne ziuʼnu xizaa, ne laaca zándaca guidxíbinu o gápanu ansiedad. Textu stiʼ iza 2021 rusietenaláʼdxini laanu naquiiñeʼ gápanu confianza Jehová para gudxíʼlunu ca problema stinu, cadi gaca lúgunu ne cadi gápanu confianza laca laanu. Lu iza riʼ, guiranu gusihuínninu pur ca ni gúninu nápanu fe promesa stiʼ Jehová ni ná: «Zápatu stipa pa cadi gaca lúgutu ne gápatu confianza» (Is. 30:15).