1. Cosa el efecto del talk na un jovencito que ya dale na un convencion del 1935?

TIENE un familia de maga Estudiante del Biblia, como cosa ta llama con el maga Testigo de Jehova del antes. Tiene sila cinco anak​—tres hombre y dos mujer​—con quien sila ya enseña para sirvi con Dios Jehova y imita con Jesucristo. El uno del diila anak hombre ya bautiza na edad de 18 del 1926. Como cosa ta hace el todo Estudiante del Biblia de aquel tiempo, este fiel jovencito, ta come con el pan y ta toma con el vino cada año na Cena del Señor. Pero, ya cambia el de suyu esperanza na futuro por causa con el un importante talk que tiene titulo “El Grande Grupo.” Ese talk ya dale si J. F. Rutherford na un convencion na Washington, D.C., U.S.A., del 1935. Cosa ya revela na aquel convencion?

2. Cosa importante verdad el ya revela si Hermano Rutherford na de suyu talk?

² Na de suyu talk, si Hermano Rutherford ya hace claro si quien queda parte del “grande grupo” que ya menciona na Revelacion 7:9. De aquel tiempo, ta pensa sila que este grupo amo el segundo grupo quien subi na cielo que gendeh tanto fiel. Si Hermano Rutherford ya usa con el Escritura para  explica que nuay iscuji con el grande grupo para vivi na cielo, sino sila el otro maga carnero * del Cristo quien hay sobrevivi na “grande persecucion” o grande tribulacion y vivi hasta para cuando aqui na tierra. (Rev. 7:14) Si Jesus ya promete: “Tiene tamen yo otro maga carnero que gendeh ta queda na este turil. Necesita yo lleva tamen canila. Sila ay oi el dimio voz y ay tene lang un turil y un pastor.” (Juan 10:16) Este maga otro carnero amo el maga leal Testigo de Jehova quien tiene el esperanza que vivi hasta para cuando na Paraiso tierra. (Mat. 25:31-33, 46) Mira kita si paquemodo este nuevo entendimiento ya cambia con el vida del manada siervo de Jehova, incluido ya de aquel 18 año hermano.​—Sal. 97:11; Prov. 4:18.

3-4. Del 1935 convencion, cosa ya realiza el miles acerca na diila esperanza y porque?

³ Bien maka-alegre gayot aquel ocasion especialmente cuando el speaker ya pregunta con el maga quien ya atende: “Puede ba para aquellos quien tiene el esperanza vivi hasta para cuando na tierra?” Asegun na un hermano quien ya atende na aquel convencion, mas de media del maga 20,000 gente quien ya atende el ya para. Despues si Hermano Rutherford ya declara: “Mira ustedes! El grande grupo!” Despues de ese, todo sila ya acaba grita na alegria. Ya realiza aquellos quien ya para que nuay kanila iscuji para vivi na cielo. Sabe sila que nuay kanila iscuji el espiritu del Dios. Pagka-alamañana, 840 maga nuevo Testigo el ya bautiza y mayoria kanila parte del otro maga carnero.

⁴ Despues de aquel talk, aquel jovencito que ya menciona enante y el miles de maga persona el ya descanza come con el pan y toma con el vino na Cena del Señor. Manada el ya sinti igual con el un humilde hermano quien ya habla: “El Comemoracion del 1935 amo el ultimo vez que ya come y ya toma yo con el maga emblema. Ya realiza yo que nuay conmigo iscuji si Jehova por medio del suyu sagrao espiritu para vivi na cielo; sino, tiene yo el esperanza para vivi aqui na tierra y hace con este paraiso.” (Roma 8:16, 17; 2 Cor. 1:21, 22) Desde aquel tiempo, aquellos parte del grande grupo ya queda bien manada y junto ya trabaja con el maga iscujido quien ya queda aqui na tierra.

5. Cosa el mirada de Jehova con aquellos quien ya descanza come y toma con el maga emblema na Comemoracion?

⁵ Cosa el mirada de Jehova con aquellos quien ya descanza come y toma con el maga emblema na Comemoracion despues del 1935? Y paquemodo si el un bautizao Testigo ahora sincero ta come y ta toma con el pan y vino na Cena del Señor pero na uliji ya realiza le que gendeh le iscujido? (1 Cor. 11:28) El cuanto, ta come y ta toma con el maga emblema cay nuay sila entende si onde gayot el diila esperanza. Pero si honesto sila admiti con el diila kamali, descanza come y toma con el maga emblema y continua sirvi fiel con Jehova, asigurao hay acepta le kanila junto na otro maga carnero. Maskin pa gendeh mas sila ta come y ta toma con el pan y vino, ta atende sila siempre na Comemoracion cay ta  aprecia gayot sila con el cosa ya hace si Jehova y si Jesus para kanila.

6. Cosa ya manda si Jesus con el maga angel?

⁶ Ciendo bien cerca ya el grande tribulacion, puede kanaton anima si discuti kita con el cosa ta habla el Revelacion capitulo 7 acerca con el maga iscujido Cristiano y el grande grupo de otro maga carnero. Si Jesus ya manda con el maga angel que continua sangga con el cuatro viento de destrozo. Gendeh sila debe larga con aquel maga viento na tierra hasta el todo iscujido Cristiano hay queda sellao, quierre decir aprobao sila de Jehova. (Rev. 7:1-4) Como un premio na diila lealtad, el maga iscujido hermano del Cristo hay queda rey y sacerdote junto con ele na cielo. (Rev. 20:6) Todo aquellos parte del familia de Jehova na cielo alegre mira con el 144,000 iscujido ricibi con el diila premio na cielo.

7. Na Revelacion 7:9, 10, con quien ya mira si Juan na vision y cosa sila ta hace? (Mira con el letrato na cover.)

⁷ Despues cunta acerca con el 144,000 rey y sacerdote, tiene cosa ya mira si Juan que bien bonito, el “bien mucho maga gente” o grande grupo quien ya sobrevivi na Armagedon. Gendeh igual con el primer grupo, bien manada este segundo grupo y nuay pijo numero. (Le con el Revelacion 7:9, 10.) “Ta visti sila blanco camisa” que ta dale mira que ya “desaleja [sila] con todo maga cosa-cosa malo” y ya esta leal con Dios y con el Cristo. (Sant. 1:27) Ta grita sila cay ya salva sila por causa na cosa ya hace si Jehova y si Jesus, el Cordero del Dios. Ta agarra tambien sila maga rama de palma que ta indica que alegre sila ta acepta con Jesus como iscujido Rey de Jehova.​—Compara na Juan 12:12, 13.

8. Cosa ta habla kanaton el Revelacion 7:11, 12 acerca con el familia de Jehova na cielo?

⁸ Le con el Revelacion 7:11, 12. Cosa el reaccion na cielo? Ya puede mira si Juan con el todo familia de Jehova na cielo que lleno de alegria y ya alaba sila con Dios cuando ya mira sila con el grande grupo. Hay queda bien alegre el familia de Jehova na cielo que puede mira con el cumplimiento de este vision cuando el grande grupo hay sale salvao na grande tribulacion.

9. Asegun na Revelacion 7:13-15, cosa ta hace el grande grupo ahora?

⁹ Le con el Revelacion 7:13-15. Si Juan ya escribi que el grande grupo “ya lava el diila camisa y ya hace blanco con ese na sangre del Carnero.” Este quierre decir que tiene sila un limpio conciencia y alegre si Jehova kanila. (Isa. 1:18) Este sila amo maga dedicao y bautizao Cristiano quien tiene fuerte fe na sacrificio de Jesus y tiene un cerca relacion con Jehova. (Juan 3:36; 1 Ped. 3:21) Poreso, cualificao sila para adelante na trono del Dios para “sirvi con Ele na disuyo templo de dia y de noche” aqui na tierra. Maskin ahora pa lang, activo ya sila ta hace con el mayoria del trabajo predicacion y hacida de dicipulo cay el Reino del Dios amo el de con todo importante cosa para kanila.​—Mat. 6:33; 24:14; 28:19, 20.

10. Cosa puede asigura el grande grupo y cosa promesa sila puede mira cumpli?

¹⁰ El grande grupo quien hay travesa na grande tribulacion, puede asigura que el Dios hay continua kanila cuida cay “Aquel sintao na trono ay protege canila.” El promesa que ya dura ya ta espera el otro maga carnero hay queda ya gayot deverasan: “Ay limpia [el Dios] el lagrimas na diila maga ojos y nunca mas ay tene muerte, ni dolor, ni tristeza.”​—Rev. 21:3, 4.

11-12. (a) Asegun na Revelacion 7:16, 17, cosa maga bendicion hay ricibi el grande grupo na futuro? (b) Cosa puede hace el otro maga carnero na Comemoracion y porque?

 ¹¹ Le con el Revelacion 7:16, 17. Ahora, el cuanto na maga siervo de Jehova ta sufri por causa na hambre cay falta el sen para cumpra comida o por causa na guerra. El otro yan preso por causa na diila fe. Pero bien alegre el grande grupo cay sabe sila que despues sila sobrevivi na destrozo de este mal mundo, hay tiene sila firmi abundancia de fisical y espiritual comida. Si destroza ya con el sistema de Satanas, hay asigura si Jehova que hay protege le con el grande grupo desde na de suyu rabia que igual na “fuerte calor.” Despues del grande tribulacion, hay guia si Jesus con aquellos quien ya sobrevivi “para na maga tuburan de agua vivo” o para na vida eterna. Pensa este: El grande grupo tiene especial esperanza. Na billones del maga gente quien ya vivi, posible sila gendeh muri!​—Juan 11:26.

¹² El otro maga carnero tiene un bonito esperanza y ya rindi gayot sila gracias con Jehova y con Jesus. Maskin pa nuay iscuji si Jehova kanila para vivi na cielo, ta ama le kanila igual si paquemodo le ta ama con el maga iscujido. Este dos grupo puede alaba con Dios y con el Cristo. El un manera que ta puede sila este hace amo si ta atende sila con el Cena del Señor.

13-14. Porque debe atende el todo na Comemoracion del Muerte del Cristo?

¹³ Del reciente maga año, 1 na 1,000 del quien ta atende na Comemoracion el quien ta come y ta toma con el pan y vino. Nuay quien ta come y ta toma con el maga emblema na mayoria del maga congregacion. El mayoria del quien ta atende na Comemoracion tiene el esperanza aqui na tierra. Pero, porque sila ta atende na Cena del Señor? Ta atende sila por causa na igual razon si porque el maga gente ta atende na casamiento del diila amigo. Ta atende sila cay quierre sila dale mira el diila amor y suporta con aquel quien hay casa. Poreso, el otro maga carnero ta atende na Comemoracion cay quierre sila dale mira el diila amor y suporta para con el Cristo y con el maga iscujido. Ta atende tambien sila para dale mira el diila apresacion na  sacrificio que ya hace si Jesus que ya hace posible para vivi sila hasta para cuando aqui na tierra.

¹⁴ El otro importante razon si porque el otro maga carnero ta atende con el Comemoracion amo cay quierre sila obedece con el mandamiento de Jesus. Cuando ya hace si Jesus con el primer Cena del Señor junto con el de suyu fiel apostoles, ele ya habla kanila: “Hace ustedes este para acorda conmigo.” (1 Cor. 11:23-26) Poreso, ta continua sila atende na Comemoracion mientras tiene pa maga iscujido quien ya queda aqui na tierra. Gane, ta invita el otro maga carnero con el todo para atende junto kanila.

15. Paquemodo kita puede alaba con Dios y con el Cristo na Comemoracion?

¹⁵ Na Comemoracion, tiene kita el oportunidad para alaba con Dios y con el Cristo por medio na cancion y rezo. El titulo del talk que hay dale na este año amo “Aprecia si Cosa Ya Hace el Dios y el Cristo Para Contigo.” Hay hace este hondo con el diaton apresacion para con Jehova y con el Cristo. Mientras ta hace pasa con el maga emblema, hay hace este acorda kanaton na cosa este ta representa​—el cuerpo y sangre de Jesus. Hay acorda kita que si Jehova ya permiti con el de suyu Anak que muri para puede kita obtene vida. (Mat. 20:28) Quierre gayot atende na Comemoracion el todo quien ta ama con el diaton Tata na cielo y con el de suyu Anak.

16. Na cosa maga manera semejante el maga iscujido na maga otro carnero?

¹⁶ Ta semeja na cuanto manera el maga iscujido y el otro maga carnero. Igual sila precioso con Dios. Gane, igual el valor que ya paga le para cumpra con el maga iscujido y con el otro maga carnero​—el vida del de suyu Anak con quien le ta ama. El diferencia kanila amo el diila esperanza. Este dos grupo debe esta leal con Dios y con el Cristo. (Sal. 31:23) Y acorda que ta dale si Jehova sagrao espiritu con el cada individual asegun na cosa le necesita, iscujido man le o otro carnero.

17. Cosa ta esperanza el maga iscujido quien taqui pa na tierra?

¹⁷ Nuay nace el maga iscujido Cristiano que tiene ya el esperanza vivi na cielo. El Dios el quien ta pone con ese na corazon diila. Ta pensa sila acerca na diila esperanza, ta reza acerca con este y bien alegre sila ricibi con el diila premio na cielo. No sabe sila si cosa el diila cuerpo na cielo. (Fil. 3:20, 21; 1 Juan 3:2) Maskin pa ansina, ta esperanza sila que puede mira con Jehova y con Jesus, con el maga angel y con el otro pa maga iscujido y man junto kanila na Reino na cielo.

18. Cosa ta esperanza el otro maga carnero?

 ¹⁸ Ta esperanza el otro maga carnero que vivi na tierra hasta para cuando. Amo este el deseo que tiene el todo maga gente. (Ecl. 3:11) Ta esperanza sila con el tiempo que puede sila ayuda para hace paraiso con el entero planeta. Con ansias sila ta espera con el dia que puede sila planta con el diila mismo maga casa, siembra na diila maga jardin y hace engranda maga anak con perfecto salud. (Isa. 65:21-23) Ta esperanza sila pasia na entero tierra​—na maga monte y mar​—y estudia con el maga creacion de Jehova. Pero mas pa, bien alegre sila sabe que el diila relacion con Jehova hay continua queda mas fuerte.

19. Cosa oportunidad kita tiene na Comemoracion y cuando este hace na este año?

¹⁹ Ya dale si Jehova un bonito esperanza para na futuro con el cada uno del de suyu maga siervo. (Jer. 29:11) Na Comemoracion del Muerte del Cristo, el cada uno kanaton tiene el grande oportunidad para alaba con Dios y con el Cristo na cosa sila ya hace para puede kita obtene vida hasta para cuando. El Comemoracion amo el de con todo importante ocasion donde man junto el maga verdadero Cristiano. Hay hace este na Sabado, Marzo 27, 2021, despues abaja el sol. Este año, manada el puede atende na este importante ocasion na maga lugar que tiene libertad para hace con ese. El otro hay atende maskin tiene oposicion. El otro hay hace con el Comemoracion na preso. Mientras ta mira si Jehova, si Jesus y el familia del Dios na cielo, ojala el cada congregacion, grupo y individual hay puede atende na este especial ocasion de Comemoracion!