1. Ni enki ecahikire aha musigazi omwe obu yahurire toku omu kiterane kihango omu mwaka gwa 1935?

OMUSIGAZI omwe akaba ayine emyaka 18 obu yabatizibwe omu mwaka gwa 1926. Abazire beye bakaba bari abegi ba Bibuli, ahabw’okuba Abahamya ba Yehova ni ko babire nibetwa omuri obwo bwire. Bakaba bine abojo bashatu n’abahara babiri, kandi bakabegesa kuhereza Yehova Ruhanga n’okutoreza Yesu Kristo. Nk’oku cabire kiri aha begi ba Bibuli bona omuri obwo bwire, ogo musigazi na we akaba nakwata aha bigeraniso buri mwaka aha Bugenyi bwa Mukama bw’omwebazo. Konka, amasiko geye gakahinduka aha bwa toku eyabire eyine omutwe oguri kugira ngu, ‘Omutwe muhango gw’abantu.’ Eyo toku ekaherezibwa omu mwaka gwa 1935 na mwenetata J. F. Rutherford omu kiterane omuri Washington, D.C., omuri Amerika. Ni kiha kintu kisya ecagambirwe omuri eco kiterane?

2. Ni gaha masiko agu mwenetata Rutherford yashoborwire omuri toku yeye?

² Omuri toku ya mwenetata Rutherford akashoborora ebiri kukwata aha ‘mutwe muhango gw’abantu’ oguri kugambwa omu Kushuuruurwa 7:9. Kuhisya omuri obwo bwire, abegi ba Bibuli bakaba nibatekateka ku ogo mutwe ari bantu babire barije kuhebwa omwanya gwa kabiri omu iguru konka babire batari abesigwa nk’abashukirweho omwika. Mwenetata Rutherford akakoresa Ebyahandikirwe yashoborora ku omutwe muhango gw’abantu batari abatorinwe kuza kutura omu iguru, ahobwe ku ni Abakristo  ab’omu zindi ntama * abarije kuhonoka ‘okubonabona kwingi’ bakatura omu nsi ebiro byona. (Kush 7:14) Yesu akaraganisa ati: ‘Nyine ezindi ntama, ezitari z’omu eri sibikiro; na zo nshemerire kuzireta, zikahurira iraka ryange, zikaba obusyo bumwe, n’omurisa akaba omwe.’ (Yoh 10:16) Ab’omu zindi ntama ni Abahamya ba Yehova b’abesigwa abine amasiko g’okwija kutura omuri paradiso omu nsi ebiro byona. (Mat 25:31-33, 46) Reka turebe oku ogo mushana g’omu buryo bw’omwika gwahindwire amasiko g’Abahamya ba Yehova bingi harimu na wa mwenetata w’emyaka 18.—Zab 97:11; Enf 4:18.

3-4. Omu kiterane c’omuri 1935, ni enki eki abantu bingi bamanyire aha masiko gabo, kandi ahabw’enki?

³ Hakabaho okushemererwa omu kiterane obu omugambi yaburize ngu: “Abine amasiko g’okuba omu nsi ebiro byona mbehi nimubasa kwemerera?” Omwe omu babire bari omuri eco kiterane akagamba ku hihi kimwe ca kabiri c’abantu 20,000 bayimukire. Bwanyima mwenetata Rutherford akagamba ati: “Nimurebe omutwe muhango!” Abantu bona bakashemererwa munonga. Abayemerire bakamanya ku bataratorinwe ngu bature omu iguru. Bakamanya ku omwika gwa Ruhanga gutarabatorine. Ah’izoba ry’ekiterane eryakuratireho, Abahamya basya 840 bakabatizibwa, kandi abingi bakaba bari ab’omu zindi ntama.

⁴ Bwanyima y’eyo toku, omusigazi owu twaba twagambireho n’abandi bantu bingi bakahika bari kwemereza kukwata aha bigeraniso aha Bugenyi bwa Mukama bw’omwebazo. Mwenetata omwe w’omucurezi akehurira nk’oku abandi bayehurire obu yagambire ati: “Ekijusyo c’omu mwaka gwa 1935 ni co ca bwanyima eki nakwatiremu ebigeraniso. Nkamanya ku Yehova atarantorine n’omwika gweye oguri kwera ngu nyije kutura omu iguru, ahobwe ku nyine amasiko g’okwija kutura omu nsi kandi nkekwatanisa omu murimo g’okugihindura paradiso.” (Rom 8:16, 17; 2 Kor 1:21, 22) Okuruga obwe, ab’omu mutwe muhango gw’abantu bakagumizamu kweyongera kandi bakagumizamu kukora hamwe n’abashukirweho omwika abacariho.

5. Ni bata oku Yehova ari kureba abayemerize kukwata aha bigeraniso by’Ekijusyo?

⁵ Yehova nareba ata abarekire kukwata aha bigeraniso by’Ekijusyo bwanyima y’omwaka gwa 1935? Kandi shi nareba ata Omuhamya ori kukwata aha bigeraniso aha Bugenyi bwa Mukama bw’omwebazo konka akija kumanya ku ataratorinwe? (1 Kor 11:28) Abamwe nibakwata aha bigeraniso ahabw’okutamanya amasiko gabo. Konka ku bari kumanya enshobe yabo bakareka kukwata aha bigeraniso kandi bakagumizamu kuba abesigwa ahari Yehova, nayija kuguma ari kubareba nk’ab’omu zindi ntama. N’obu batari kurya aha mugati n’okunywa ahari vinyo, nibija aha Kijusyo ahakuba nibasima Yehova na Yesu ahabw’ebi babakorire.

6. Ni enki eki Yesu yaragire ba marayika kukora?

⁶ Ahabw’okuba okubonabona kwingi kuri hihi kuhika, nikitugaruramu amani twashwijuma oku ebiri omu Kushuuruurwa  ekicweka ca 7 biri kugamba aha bashukirweho omwika n’aha mutwe muhango gw’ezindi ntama. Yesu akaragira ba marayika okuguma bakwasire emiyaga ina y’okucwekereza ensi. Tibarirekura eyo miyaga omu nsi kuhisya obu abashukirweho omwika bona baritebwaho akamanyiso, ni okugamba kwikirizibwa na Yehova. (Kush 7:1-4) Abw’okuba benishe ba Kristo abashukirweho omwika bari kuguma bari abesigwa nibija kutunga ekiconco c’okutegeka na we bari abagabe n’abatambi omu iguru. (Kush 20:6) Bona abari omu ka ya Ruhanga y’omu iguru nibija kushemererwa ku barireba abantu 144,000 bari kutunga ekihembo cabo ec’omu iguru.

7. Nk’oku biri kugambwa omu Kushuuruurwa 7:9, 10, ni baha abu Yohaana yarebire omu korekwa, kandi shi bakaba nibakora ki? (Reba Ekishushani c’aha Kishembeso.)

⁷ Yohaana ku yamazire kugamba aha bagabe n’abatambi 144,000, akareba ‘omutwe muhango gw’abantu’ abarije kuhonoka Haramagedoni. Ogo mutwe muhango go gukaba gutari nk’og’okubanza, ahakuba go gukaba gurimu abantu bingi abatari kubasa kubarwa. (Shoma omu Kushuuruurwa 7:9, 10.) Bakaba ‘bajwire ebijwaro ebiri kwera,’ ekiri kwereka ku batarayikirize kugira “amabara” g’ensi ya Sitaane kandi bakaguma bari abesigwa ahari Ruhanga na Kristo. (Yak 1:27) Bakaba nibatera orwari bari kugamba ku bacungwirwe ahabw’eki Yehova na Yesu, Omwana gw’entama gwa Ruhanga, babakorire. Nambwenu, bakaba bine amatagi g’enkindo omu ngaro zabo, ekiri kwereka ku babire bashemererirwe okumanya ku Yesu ari we owu Yehova yatorine ngu abe Omugabe.—Geranisa n’ebiri omuri Yohaana 12:12, 13.

8. Omu Kushuruurwa 7:11, 12 nihatugambira ki aha ka ya Yehova y’omu iguru?

⁸ Shoma omu Kushuuruurwa 7:11, 12. Ni enki ecabireho omu iguru? Yohaana akareba ab’omu ka ya Yehova y’omu iguru bona bashemerirwe ku barebire ab’omu mutwe muhango gw’abantu kandi bahimbisa Ruhanga. Ab’omu ka ya Yehova y’omu iguru nibija kushemererwa munonga ku barireba omutwe muhango gw’abantu bari kucungurwa bakaruga omu kubonabona kwingi bahurire.

9. Tukuratize ebiri omu Kushuruurwa 7:13-15, ni enk eki omutwe muhango gw’abantu bari kukora omuri obu bwire?

⁹ Shoma omu Kushuuruurwa 7:13-15. Yohaana akagamba ku omutwe muhango gw’abantu ‘bayogize ebijwaro byabo omu shagama y’Omwana gw’entama, bikera.’ Eco nikimanyisa ku bagumire bine omuntuwomunda murungi kandi bakaguma bari abari kwera omu misho ga Yehova. (Isa 1:18) Ni Abakristo abayehire Yehova, bakabatizibwa, bakikiriza ekitambo ca Kristo batari kubanganisa, kandi bakagumizamu kugira obunywani na Yehova. (Yoh 3:36; 1 Pet 3:21) Ni yo nshonga Ruhanga ari kubikiririza kumuhereza nyomushana na nyekiro omuri hekalu yeye y’omu buryo bw’omwika. Na hati, nibakora omurimo g’okuburira n’okuhindura abantu abegi, kandi bata Obukama bwa Ruhanga omu mwanya g’okubanza.—Mat 6:33; 24:14; 28:19, 20.

10. Ni enki eki ab’omu zindi ntama bari kwesiga batari kubanganisa, kandi shi ni eha migisha eyi barije kubona eri kubahikaho?

¹⁰ Omutwe muhango gw’abantu abarije kuhonoka okubonabona kwingi nibesiga batari kubanganisa ku Ruhanga arigumizamu kubafaho, ahabw’okuba ‘oshutami aha kitebe c’Obukama aryabasangira n’ihema rye.’ Emigisha eyi ab’ezindi ntama bategerize neyija kubahikaho obu Ruhanga ariragaza amarira  gona aha misho gabo. Omuri obwo bwire, ‘tiharibaho kufa bundi, n’obu kwakuba okucura nari okurira nari obusaasi.’—Kush 21:3, 4.

11-12. (a) Nk’oku biri kugambwa omu Kushuuruurwa 7:16, 17, ni eha migisha eyi ab’omutwe omuhango babikirwe? (b) Ni enki eki ab’ezindi ntama bari kukora aha Kijusyo kandi ahabw’enki?

¹¹ Shoma Omu Kushuuruurwa 7:16, 17. Omuri obu bwire, bamwe omu bahereza ba Yehova nibabonabona ahabw’okubura esente z’okugura eby’okurya ninga shi ebizibu ebiri kubahikaho ahabw’entaro. Abandi bo basibirwe ahabw’okwikiriza kwabo. Konka, ab’omutwe omuhango nibashemerererwa kumanya ku obu barije kuhonoka obu ensi ya Sitaane eriba eri kucwecerezibwa, bariba bine ebyokurya by’omubiri n’eby’omwika ebiri kumara. Obu Yehova ariba ari kucwecereza ensi ya Sitaane, ab’entama ezindi baryarindwa ekiniga ca Yehova eki arije kushuka aha mahanga. Bwanyima y’okubonabona kwingi, Yesu aryayebembera abariba bahonokire abahisye aha ‘mizi g’amagara agatahwaho.’ Ab’omutwe omuhango bine amasiko g’omutano. Abantu bingi abariba bariho tibarifa!—Yoh 11:26.

¹² Ab’omutwe omuhango bine amasiko agari kutangaza ahabw’okwereka ku nibasima Yehova na Yesu! N’obu Yehova atarabatorine kuza kutura omu iguru, na bo ni ab’omuhendo ahari Yehova. Ab’omu mitwe yombi nibahimbisa Ruhanga na Kristo. Oburyo bumwe obu bari kukikoramu ni okwija omu Bugenyi bwa Mukama bw’omwebazo.

13-14. Ahabw’enki buri omwe ashemerire kwija aha Kijusyo c’okufa kwa Kristo?

¹³ Omu myaka ya juba, ogeranisize omuntu 1 omu bantu 1000 abari kwija aha Kijusyo narya aha mugati anywa n’ahari vinyo. Omu bibina byingi tihariho n’omwe ori kukwata aha bigeraniso. Abingi abari kwija aha Kijusyo bine amasiko g’okutura omu nsi. Mbwenu shi ahabw’enki bari kwija aha Bugenyi bwa Mukama bw’omwebazo? Nibaba bari nk’abantu abari kutaha embaga ya munywani wabo. Nibaba bari kwenda kwereka omushija n’omukazi abaza kugitwa ku bari kubakunda kandi ku bari kubashagika. Obwe rero, ab’omu zindi ntama nibija aha Kijusyo ahabw’okuba  nibaba bari kwenda kwereka ku nibakunda Kristo n’abashukirweho omwika kandi ku bari kubashagika. Nambwenu ab’omu zindi ntama nibija aha Kijusyo bari kwenda kwereka ku nibasima ahabw’ekitambo ca Yesu ekiri kutuma twatunga amasiko g’okuba omu nsi ebiro byona.

¹⁴ Nambwenu endijo nshonga y’omugasho eri kutuma ab’omu zindi ntama bayija aha Kijusyo, ni okwereka ku niborobera ekiragiro ca Yesu. Obu Yesu yatandikisize Obugenyi bwa Mukama bw’omwebazo n’entumwa zeye eziri kwesigwa, akazigambira ati: ‘Mugume mukore muti okunyijukiraho.’ (1 Kor 11:23-26) Obwe rero ab’omu zindi ntama nibagumizamu kwija omu Bugenyi bwa Mukama bw’omwebazo, abashukirweho omwika baba bacari omu nsi. Kandi ab’omu zindi ntama, nibeta abandi bantu kugira ngu bekwatanise na bo aha Kijusyo.

15. Ni bata oku buri omwe ari kubasa kwereka ku nahimbisa Ruhanga na Kristo aha Kijusyo?

¹⁵ Aha Kijusyo, nituba twine omugisha g’okuhimbisa Ruhanga na Kristo, turi kweshongora n’okushaba. Toku y’Ekijusyo y’omuri ogu mwaka negira ngu: “SIMA RUHANGA NA KRISTO AHABW’EBI BATUKORIRE!” Neyija kutuma twakizaho kusima Yehova na Kristo. Ebigeraniso ku biriba biri kutambuzibwa, nitwija kwijuka eki biri kugeranisa, ni okugamba omubiri gwa Yesu n’eshagama yeye. Nitwija kwijuka ku Yehova yayikirize ngu Omwana weye afe omu mwanya gwitu kugira ngu tutunge amagara. (Mat 20:28) Buri omwe ori kukunda Tata witu w’omu iguru n’Omwana weye, nayija kwija omu Kijusyo.

16. Ni buha buryo obu abashukirweho omwika n’ab’omu zindi ntama bari kushushana?

¹⁶ Entanisa eri ahagati y’abashukirweho omwika n’ezindi ntama ti co Ruhanga ari kureba nka kikuru. Bona ni ab’omuhendo ahari we. Ni yo nshonga yahireyo amagara g’Omwana weye, kugira ngu ashashurire abashukirweho omwika n’ab’omu zindi ntama bona. Entanisa eri ahagati yabo ni oku batine amasiko gamwe. Bona bashemerire kuguma bari abesigwa ahari Ruhanga na Kristo. (Zab 31:23) Kandi oyijuke ku omwika gwa Ruhanga twena guri kubasa kutukoresa. Eco nikimanyisa ku Yehova ari kuha buri omwe omwika gweye oguri kwera akuratize ebi ari kwetenga.

17. Ni enki eki abashukirweho omwika abasigire binire ekihika?

¹⁷ Abakristo abashukirweho omwika tibari kuzarwa bine amasiko g’okwija kutura omu iguru. Ruhanga ni we ori kugata omu mitima yabo. Nibatekateka aha masiko gabo, bashaba, kandi nibaba bine ekihika c’okwija kutunga ekihembo cabo omu iguru. Tibari  kumanya oku emibiri yabo erije kuba eri omu iguru. (Fil 3:20, 21; 1 Yoh 3:2) Konka nabwo, bine ekihika c’okwija kubugana na Yehova, Yesu, ba marayika, n’abandi abashukirweho omwika. Bine ekihika c’okutura na bo omu Bukama bw’omu iguru.

18. Ni enki eki ab’omu zindi ntama binire ekihika?

¹⁸ Ab’omu zindi ntama bine amasiko agu twena twazarinwe g’okutura omu nsi ebiro byona. (Mub 3:11) Bine ekihika c’okwija kwekwatanisa omu kuhindura ensi yona paradiso. Bategerize obwire obu barije kombeka amaju gabo, bakahinga emisiri yabo, kandi bakarera abana babo bine amagara agahikirire. (Isa 65:21-23) Bine ekihika c’okwija kurambura ensi, baketegereza emishozi, amahamba, enyanja, kandi bakamanya ebihangirwe byona bya Yehova. Kandi ekiri kukira byona, nibashemerererwa kumanya ku obunywani bwabo na Yehova burikizaho kweyongera.

19. Ni guha mugisha ogu Ekijusyo kiri kuha buri omwe omuri itwe, kandi shi ni ryari obu Ekijusyo kiribaho omuri ogu mwaka?

¹⁹ Yehova akaha buri muhereza weye owamwehire amasiko g’omutano g’ebiro by’omu misho. (Yer 29:11) Okwijuka okufa kwa Yesu nikuha buri omwe omuri itwe omugisha g’okuhimbisa Ruhanga na Kristo ahabw’ebi batukorire ngu tubeho ebiro byona. Hatariho okubanganisa, Ekijusyo ni obugenyi bw’omugasho obu Abakristo bari kubuganiramu buri mwaka. Nikija kubaho izoba ryarenga aha Rwamukaga, ebiro 27 Okwakashatu, 2021. Omuri ogu mwaka abingi nibija kwekwatanisa omu Kijusyo bine obusinge. Abandi nibija kuba bari kuhiganisibwa. Abandi bo nibija kubugana ekizibu c’okwekwatanisa omu Kijusyo bari omu kihome. Nka Yehova, Yesu, n’ab’omu ka ya Ruhanga y’omu iguru, nitwendeza ebibina byona, emitwe, na buri omwe, Ekijusyo kirungi!