1. Kouman roun jennjan réyaji lò i tandé roun diskour yé bay annan roun gran asanblé an 1935 ?

ROUN jennjan té gen 18 lannen lò i batizé an 1926. So papa ké so manman té Étidyan Labib-a. A konsa yé té ka aplé Témwen Jéova-ya annan sa lépòk-a. Yé té gen trwa ti bolonm ké trwa tifi, é yé anprann yé sèrvi Jéova ké imité Jézi. Kou tout Étidyan Labib-ya annan sa lépòk-a, sa jennjan-an té ka manjé dipen-an ké bwè diven-an pannan Mémoryal-a chak lannen. Mé fason i té ka wè lavi-a chanjé nèt lò i tandé roun diskour enpòrtan. A té « Granfoul-a ». A Joseph Rutherford ki fè sa diskour-a an 1935, pannan roun gran asanblé annan vil Washington, Ozétazini. Kisa Étidyan Labib-ya anprann annan sa asanblé-a ?

2. Ki bèl bagaj frè Rutherford èspliké annan so diskour ?

² Annan so diskour, frè Rutherford èspliké kimoun té ké fè parti di « granfoul-a » ouben « patché moun »-yan yé ka palé annan Révélation 7:9. Anvan sa, Étidyan Labib-ya té ka pansé ki granfoul-a a té roun ran moun ki té ké alé annan syèl-a, mé ki té mwen fidèl ki sé wen-yan. Frè Rutherford pran Labib-a pou èspliké ki granfoul-a pa ka alé annan syèl-a, mé yé sa ròt brébi * Jézi gen. Yé ké janbé « gran tribilasyon-an »  pou yé viv pou tout-tan asou latè-a (Rév. 7:14). Jézi promèt : « É mo gen ròt brébi, yé pa annan sa pak-a ; yé menm osi, a pou mo fè yé vini, é yé ké kouté mo vwa : yé ké divini rounsèl troupo, é a rounsèl bèrjé yé ké gen » (Jean 10:16). Sa brébi-ya a Témwen Jéova fidèl-ya ki gen èspwar viv pou tout-tan annan Paradi-a asou latè-a (Mat. 25:31-33, 46). Annou wè kouman sa bèl bagaj yé té fin anprann-an chanjé lavi sa frè-a ki té gen 18 an ké lavi roun patché moun annan pèp Jéova (Ps. 97:11 ; Prov. 4:18).

3-4. Annan gran asanblé ki fèt an 1935, kisa roun patché moun konprann asou yé èspwar, é poukisa ?

³ Lò i té ka fè so diskour, frè Rutherford di moun-yan ki té la : « Ès tout sa ki gen èspwar viv pou tout-tan asou latè-a pouvé lévé souplé ? » Roun frè ki té la pannan sa gran asanblé-a, di ki i wè pasé lanmotché moun ki té la lévé. Apré sa, frè Rutherford di : « Gadé, men granfoul-a ! » Apré sa, moun-yan koumansé rélé ké bat lanmen afòrs yé té kontan. Sa-ya ki té dibout té konprann ki Jéova pa té chwazi yé pou yé viv annan syèl-a : yé pa té wen ké lèspri Bondjé. Trwazyèm jou asanblé-a, 840 moun batizé. É près yé tout té annan ròt brébi-ya.

⁴ Apré sa diskour-a, jennjan-an nou ja palé anvan ké ròt patché moun, arété manjé dipen-an ké bwè diven-an pannan Mémoryal-a. A ké imilité roun frè di sa bokou té ka rousanti : « Dèrnyé kou mo manjé dipen-an ké bwè diven-an annan Mémoryal-a, a té an 1935. Mo konprann ki Jéova pa té sèrvi so lèspri sen pou bay mo èspwar viv annan syèl-a. Mé mo té gen èspwar viv asou latè-a é idé fè l’ divini roun paradi » (Rom. 8:16, 17 ; 2 Cor. 1:21, 22). Dipi sa jou-a, plizanplis moun ka vini annan granfoul-a é ka travay ansanm ké krétyen wen ki asou latè-a toujou.

5. Kouman Jéova ka wè sa-ya ki ka arété pran dipen ké diven-an pannan Mémoryal-a ?

⁵ Kouman Jéova ka wè sa-ya ki arété pran dipen ké diven-an pannan Mémoryal-a apré 1935 ? É kisa i ka pansé di roun Témwen jòdla ki ka krè ki i divèt manjé dipen-an ké bwè diven-an pannan Mémoryal-a, mé ki apré, ka konprann ki i pa wen ké lèspri sen-an ? (1 Cor. 11:28). Sèrten pran dipen-an ké diven-an paské yé pa té byen konprann ki èspwar yé té gen. Mé si yé ka rékonnèt ki yé tronpé yé kò, yé ka arété pran dipen-an ké diven-an é yé ka kontinyé sèrvi Jéova ké fidélité, asiré pa pitèt, i ké asèpté yé é yé ké fè parti di ròt brébi-ya. Menm si yé pa ka pran dipen-an ké diven-an, yé ka alé annan Mémoryal-a kanmenm, paské yé gen bokou rékonésans pou sa Jéova ké Jézi fè pou yé.

6. Annan Révélation chapit 7, kisa Jézi di zanj-ya fè ?

⁶ Kou gran tribilasyon-an ka vin titalò, i bon pou nou rouwè sa Révélation chapit 7 ka di asou krétyen wen-yan ké granfoul-a. Annan sa chapit-a, Jézi  ka di zanj-ya kontinyé tchenbé kat van dèstriksyon-an. Yé pa divèt lésé sa van-yan pati asou latè-a jistan tout krétyen wen-yan sélé, sa lé di jistan Jéova di ki yé fidèl (Rév. 7:1-4). Krétyen wen-yan ké rousouvwè yé rékonpans, yé ké divini rwa ké prèt ansanm ké Jézi annan syèl-a (Rév. 20:6). Asiré, tout sa ki ka fè parti di fanmi Bondjé annan syèl-a ké kontan wè 144 000-ya rousouvwè yé rékonpans annan syèl-a.

7. Dapré Révélation 7:9, 10, kimoun Jan ka wè annan so vizyon, é kisa yé ka fè ? (gadé zimaj-a anlè prémyé paj-a).

⁷ Apré i fini wè sa 144 000 rwa ké prèt-ya, Jan ka wè roun bagaj entérésan : roun « granfoul » ki janbé Armagédon. Sa dé group-ya diféran, paské annan granfoul-a i gen bokou plis pasé 144 000 moun, é nou pa savé konmyen yé ké fika (li Révélation 7:9, 10). Yé gen « gran ròb blan anlè yé », sa ka montré ki yé « pa lésé » monn Satan-an « sali » yé é ki yé rété fidèl douvan Bondjé ké Jézi Kris (Jacq. 1:27). Yé ka rélé ki si yé sové a gras a sa Jéova ké Jézi, Timouton-an, fè-a. É an menm tan, yé gen fèy palmyé annan yé lanmen. Sa ka montré ki a ké tchò kontan yé ka asèpté Jézi kou rwa Jéova chwazi (gadé Jean 12:12, 13).

8. Dapré Révélation 7:11, 12, kouman fanmi Jéova annan syèl-a ka réyaji lò yé ka wè granfoul-a ?

⁸ (Li Révélation 7:11, 12.) Kouman yé ka réyaji annan syèl-a ? Jan ka wè fanmi Jéova annan syèl-a kontan toubonnman lò yé ka wè granfoul-a é yé ka louwé Bondjé. Fanmi Jéova ki annan syèl-a ké kontan wè kouman sa vizyon-an ka réyalizé lò granfoul-a ké soti di gran tribilasyon-an vivan.

9. Dapré Révélation 7:13-15, kisa sa-ya ki annan granfoul-a ka fè aprézan ?

⁹ (Li Révélation 7:13-15.) Jan ékri ki granfoul-a « lavé yé gran ròb é yé fè yé vin blan annan disan Timouton-an ». Sa lé di ki yé gen roun konsyans ki pròp é Jéova kontan sa yé ka fè (Is. 1:18). Yé sa dé krétyen vouwé ké batizé. Yé lafwa annan sakrifis Jézi fò é Jéova ka wè yé kou so zanmi (Jean 3:36 ; 1 Pierre 3:21). A pou sa yé pouvé dibout douvan tronn Bondjé pou bay li roun « sèrvis sakré lannwit kou jou » isi-a, asou latè-a. Menm aprézan, yé gen bokou balan é a yé ka fè près tout travay prédikasyon-an ké fè disip, paské rwayonm Bondjé-a, a sa ki pi enpòrtan pou yé (Mat. 6:33 ; 24:14 ; 28:19, 20).

10. Di kisa granfoul-a sir, é ki promès yé ké wè ké yé wéy ?

¹⁰ Granfoul-a pouvé sir ki Bondjé ké kontinyé pran swen di yé apré gran tribilasyon-an, paské « Sa-la ki asiz asou tronn-an ké louvri so tant asou yé ». Yé ké wè sa promès-a ké yé wéy : « [Bondjé] ké swiyé tout dlo di yé wéy é i pa ké gen lanmò ankò, ni dèy, ni kri, ni doulèr » (Rév. 21:3, 4).

11-12. a) Dapré Révélation 7:16, 17, ki bénédiksyon granfoul-a ké rousouvwè dimen ? b) Poukisa ròt brébi-ya ka alé annan Mémoryal-a ?

¹¹ (Li Révélation 7:16, 17.) Jòdla, sèrten annan pèp Jéova ka soufri, yé fen paské yé pa gen asé soumaké pou achté manjé yé bézwen ouben paské i gen lagèr annan yé koté. I gen ròt  ki lajòl akoz di yé lafwa. Mé sa-ya ki annan granfoul-a gen tchò kontan paské yé savé ki lò Bondjé ké fin krazé sa monn méchan-an, yé ké toujou gen roun patché bagaj pou manjé é Jéova ké anprann yé roun patché bagaj. É lò Jéova ké détrwi monn méchan Satan-an, i ké protéjé granfoul-a pou so kòlè ki kou « chalò ka boulé » pa manyen yé. Apré gran tribilasyon-an, Jézi ké mennen yé òbò « sours dlo lavi [pou tout-tan-an] ». Ès to ka randé to kò kont, granfoul-a gen roun èspwar èspésyal : asou milyar moun ki viv asou latè-a, a yé sèl pitèt ki pa ké janmen mouri ! (Jean 11:26).

¹² Ròt brébi-ya gen roun bèl èspwar é yé gen bokou rékonésans pou Jéova ké Jézi pou sa. Menm si Jéova pa chwazi yé pou viv annan syèl-a, i kontan yé menm fason i kontan wen-yan. Wen-yan ké ròt brébi-ya pouvé louwé Bondjé ké Kris. Yé ka fè sa lò yé ka alé annan Mémoryal-a.

13-14. Poukisa ni krétyen wen-yan ni ròt brébi-ya divèt alé annan Mémoryal-a ?

¹³ Dipi plizyèr lannen, asou 1 000 moun ki ka alé annan Mémoryal-a, apéprè roun moun ka pran diven ké dipen-an. Sa lé di ki annan laplipar asanblé-ya asou latè-a, i pa gen pésonn ki ka manjé dipen-an ké bwè diven-an pannan Mémoryal-a. Sa ka montré ki près tout moun ki ka alé annan Mémoryal-a gen èspwar viv asou latè-a. Atò, poukisa yé ka alé annan Répa Sényèr-a ? A kou lò roun moun ka alé annan maryaj so zanmi. I ka alé paské i lé montré i kontan é i ka soutni so zanmi ka maryé. Donk ròt brébi-ya ka alé annan Mémoryal-a paské yé lé montré yé kontan é yé ka soutni Kris ké wen-yan. Yé ka alé osi paské yé gen rékonésans pou sakrifis Jézi. Gras a sa sakrifis-a, yé ké pouvé viv pou tout-tan asou latè-a.

 ¹⁴ Ròt brébi-ya ka alé osi annan Mémoryal-a paské yé lé obéyi koumannman Jézi. Lò Jézi fè prémyé Répa Sényèr-a ké so apot fidèl-ya i di yé : « Kontinyé fè sa pou sonjé mo » (1 Cor. 11:23-26). Donk, ròt brébi-ya ké kontinyé alé annan Répa Sényèr-a jistan i pa ké gen pyès krétyen wen vivan asou latè-a ankò. É yé ka envité tout moun vini annan Mémoryal-a ké yé.

15. Kisa nou pouvé fè pou louwé Bondjé ké Kris pannan Mémoryal-a ?

¹⁵ Pannan Mémoryal-a, nou pouvé louwé Bondjé ké Kris lò nou ka chanté ké priyè ansanm. Diskour nou ké tandé sa lannen-an a ké « Annou montré nou rékonésans pou sa Bondjé ké Jézi fè pou nou ». Sa diskour-a ké fè nou gen plis rékonésans pou Jéova ké Jézi. Lò yé ké fè dipen-an ké diven-an pasé, nou ké pouvé sonjé sa yé ka réprézanté, sa lé di kò Jézi ké so disan. Nou ké pouvé sonjé osi ki Jéova lésé so Pitit mouri pou nou, pou nou gen lavi pou tout-tan (Mat. 20:28). Tout sa ki kontan Jéova ké so Pitit ka alé annan Mémoryal-a, yé pa ka lésé sa pasé.

16. Poukisa nou pouvé di ki krétyen wen-yan ké ròt brébi-ya pa tèlman diféran ?

¹⁶ Krétyen wen-yan ké ròt brébi-ya gen menm valò pou Bondjé. Jéova pa plis kontan roun group pasé ròt-a. Nou savé sa paské a menm pri i péyé pou achté yé toulédé : lavi so Pitit i kontan. A vré, sa dé group-ya pa gen menm èspwar-a, mé yé tout divèt rété fidèl douvan Bondjé ké Kris (Ps. 31:23). É sonjé ki lèspri Bondjé pouvé aji asou yé tout ké menm fòrs-a. Sa lé di ki Jéova ka bay so lèspri sen pou chak moun dapré sa sa moun-an bézwen.

17. Kisa krétyen wen-yan présé wè ?

¹⁷ Krétyen wen-yan pa ka fèt ké èspwar viv annan syèl-a. A Bondjé ki mété sa èspwar-a annan yé tchò. Yé ka sonjé sa èspwar-a, yé ka priyè pou sa é yé présé rousouvwè yé rékonpans annan syèl-a. Yé pa savé kouman yé kò ké fika annan syèl-a (Phil. 3:20, 21 ; 1 Jean 3:2). Mé yé présé pou yé alé jwenn Jéova, Jézi, zanj-ya ké larèstan wen-yan, é pou yé pouvé ansanm ké yé annan Rwayonm-an annan syèl-a.

18. Kisa ròt brébi-ya présé wè ?

 ¹⁸ Ròt brébi-ya ka antann roun bagaj tout moun lé : viv pou tout-tan asou latè-a (Eccl. 3:11). Yé présé wè jou-a yé ké pouvé idé pou fè tout latè-a divini roun paradi. Yé dan ka fè sik lò yé ka sonjé jou-a yé ké pouvé fè yé kaz, planté yé bati é lévé yé timoun ké roun bon santé (Is. 65:21-23). Yé présé pou alé tout koté pou wè tout montangn, danbwa ké lanmè i gen asou latè-a é pou chaché konnèt plis bagaj asou tousa Jéova fè. Mé sa ki pi bèl-a, a ki yé kontan toubonnman paské yé savé ki yé lanmityé ké Jéova ké divini plizanpli fò.

19. Kisa Mémoryal-a ka pèrmèt nou tout fè, é kitan i ké fèt sa lannen-an ?

¹⁹ Jéova ka bay tout so sèrvitèr-ya roun bèl èspwar pou dimen (Jér. 29:11). Kouman nou pouvé di Jéova ké Jézi mèrsi pou tousa yé fè ? Mémoryal lanmò Jézi Kris ka pèrmèt nou chak louwé yé. Mémoryal-a, a réinyon pi enpòrtan-an vré krétyen-yan gen chak lannen. An 2021, i ké fèt sanmdi 27 mars, apré solèy-a kouché. Sa lannen-an, bokou moun ké pouvé alé annan sa réinyon enpòrtan-an kou yé lé. Ròt ké alé menm si moun ka chaché anpéché yé. Sèrten ké fè sa Mémoryal-a lajòl. Ki nou tousèl, ki nou annan roun group ouben ké nou asanblé, annou pa bliyé ki Jéova, Jézi, zanj-ya ké wen-yan ké kontan gadé nou. Atò, annou tout sélébré Mémoryal-a ké tchò kontan !