1. Éé ní e lòbèl ea beè nèà gbẹá pọ̀bkà bõ̀ònaló mm̀ gbáá 1935 beè naá ló ene kà nvín ãa gbálà ẹ?

ENE kà nvín ãa gbálà beè toolá 18 gbáá tṍó ea beè dììa múú mm̀ gbáá 1926. A tẹ̀ nè a kà beè dũùnà gbò nvín nò Kpá Káí, ea dú bée e ba beè olòó kolí Gbò Neǹ Ditõ̀ò Jìhóvà tṍóá. Ba beè ié taà kà nvín págbálà nè bàà kà nvín pábia, e ba beè bumá va kọ bàá fã̀ Jìhóvà vaá nó Jíízọ̀s Kráìst. Nvín ãa gbálà ea bọ́ló dẹ̀lẹ̀ nyíé booí beè olòó dé fétúlú vaá ṍ míí e bà sẹẹmà sẹ̀lẹ̀nù Dè Gyã́á Ló M̀m̀-neè Bẹẹ Tẹ̀ Íeá, dì belí bé e dénè gbò nvín nò Kpá Káí tṍóá beè olòó de nágé naa. Sõò a ból dẽe sĩ́ beè nyaaá tṍó ea beè sí kẽè ene kà lòbèl e náa é tá nyíè nen ea togó bel kọ́ọ̀: “Gbele Gã́bug Nená.” J. F. Rutherford ní ea beè nè lòbèlá mm̀ gbáá 1935 gbẹá pọ̀bkà bõ̀ònaló ea beè sẹ̀ẹ̀à gbẹá Washington, D.C., U.S.A e. Éé ní e gbò nvín nò Kpá Káí beè nyimá gbẹá bõ̀ònalóá ẹ́?

2. Mókà kà kà bel ní e Vígà Rutherford beè baatẽ́ mm̀ a lòbèl e?

² Mm̀ a lòbèl, Vígà Rutherford beè baatẽ́ gbò e bà dú “gbele gã́bug nen” e bà kólí bée mm̀ kpá Kùùà Nù 7:9 á. Besĩ́ à kálá dọ̀ tṍóá, gbò nvín nò Kpá Káí beè ié bùlà kọọ̀ gbele gã́bug nená dú dõòna gbò e bàé kil káála, sõò baala náa bọ́ló dẹ̀lẹ̀ nyíé boo belí na gbò e Bàrì beè tṍ nóo bólá. Vígà Rutherford beè tú Kpá Káí bààmà tẽ́ kọọ̀ Bàrì náa sa gbele gã́bug nená kọ bàé kil káála, sõò bà dṹùnà na  gònò naanà ból * Kráìst e bàé ful zelí bá pọ̀b kpo tã̀àgã̀ vaá tõó boo kunukẽ̀í dọ̀ọ̀mà dè-dè. (Kùùà 7:14) Jíízọ̀s beè zìgà kọọ̀: “M íè dõonà gbò naanà ból e a di kele aa ló na kà gònò naanà bólí. M̀ íè ge tuna gé baála domá, vaá bà é dã́ nà mon. Bà é gbáá ló dú tẽ̀ènè gònò naanà ból e a é íe tẽ̀ènè nen kù dẽe ló.” (Jọ́ọ̀n 10:16) Gbò e bà tú doolé ló gbò naanà bólí dú Gbò Neǹ Ditõ̀ò Jìhóvà e bà bọ́ló dẹ̀lẹ̀ nyíé boo e bà íe ẹ̀b dẽe sĩ́ gè tõó mm̀ Páladaìs boo kunukẽ̀í dọ̀ọ̀mà dè-dè. (Máát. 25:31-33, 46) Naanii mè é ẹb bé e gè dã́ ból ló nakà kà kà bel ea di mm̀ Kpá Káíí beè nyaaná dùm gã́bug gbò níí Jìhóvà naa, bií ló níí vígà ea beè toolá 18 gbááá.—Ps. 97:11; Pró. 4:18.

3-4. Éé ní e gbele gã́bug nená beè nyimá ea kil ló ba ból dẽe sĩ́ gbẹá pọ̀bkà bõ̀ònaló ea beè sẹ̀ẹ̀a mm̀ gbáá 1935 e, vaá ló éé?

³ Nyíè pá vígà beè palàge ẹẹ gbẹá pọ̀bkà bõ̀ònalóá tṍó e Vígà Rutherford kọ́ nè gbò e bà géè pãanée tṍ ló kọọ̀: “Dénè gbò e bà íe ẹ̀b dẽe sĩ́ gè tõó boo kunukẽ̀í dọ̀ dè-dè á elá èla.” Ene kà vígà ea beè di bõ̀ònalóá kọ́ọ̀ à monìè tṍó e nú ea é sígá ló báà sĩ́ gbò e ba beè di kĩá élá èla. Tṍóá Vígà Rutherford beè gbóó kọọ̀: “Neenii gbele gã́bug nenáí!” Níá beè naa kọọ̀ dénè gbò e ba beè di kĩá á vulí kpã́ mm̀ zààvà. Gbò e ba beè elá èlaá beè gbóó nyimá kọọ̀ Jìhóvà gáà saẹ̀ va kọ bàé kilìè káála. Ba beè gbóó nyimá kọọ̀ Bàrì gáà tõè va nóo ból. Deé ea bẽene gbẹá bõ̀ònalóá, 840 nen beè dììa múú, vaá gã́bug gbòí dṹùnà na gònò naanà bólá.

⁴ Tṍó e lòbèla íná kùbmà, nvín ãa gbálà e beè kọ́ nú ea kilíé lóá nè gã́bug dõòna gbò náa beè kpáá de ná fétúlúá nè ge ṍ ná mííá gbẹá kẽè sẹ̀lẹ̀nù Dè Gyã́á Ló M̀m̀-neè Bẹẹ Tẹ̀ Íe. Ene kà vígà págbálà beè kìlmà kpá ló kẽ vaá kọ́ bé e nu beè tọá ló gã́bug nen naa tṍó ea kọ́ọ̀: “Sẹ̀lẹ̀nù Ge Kẽ̀èa Boo Ú Kráìst ea beè sẹ̀ẹ̀a mm̀ gbáá 1935 a, ní ea dú dee deè nvéè ní e nda beè dé fétúlúá vaá ṍ mííá ẽ́. Nda beè gbóó nyimá kọọ̀ Jìhóvà gáà sàm tení dú ló a nyómá kọ m̀ḿ kil káála; tãa vó, m̀ gbóò ié ẹ̀b dẽe sĩ́ gè tõó boo kunukẽ̀í vaá dõ̀ònà tõ̀ò ló gè sí tóm ló boo kunukẽ̀í naamá páladaìs.” (Róm̀ 8:16, 17; 2 Kọ́r. 1:21, 22) Lọl tṍóá ààmà, gbele gã́bug nená beè gbóó kilsĩ́ gè olòó bọọ dọ ló vaá olòó zọ̀ gbò e Bàrì beè tṍ nóo bólá siá tóm.

5. Jìhóvà ólò ẹ̀b gbò e bà náa dé ná fétúlúá vaá õ ná mííá gbẹá kẽè sẹ̀lẹ̀nù Ge Kẽ̀èa Boo Ú Kráìst naa vàẹ?

⁵ Jìhóvà ẹb gbò e bà náa beè dé ná fétúlú vaá õ ná míí gbẹá kẽè sẹ̀lẹ̀nù Ge Kẽ̀èa Boo Ú Kráìst tṍó e gbáá 1935 ni téní naa vàẹ? Vaá èé kọ́ vàẹ be à gá náa vaá neǹ Kráìst ea beè dììa múú à kilsĩ́ gè dé fétúlúá vaá ṍ mííá gbẹá kẽè sẹ̀lẹ̀nù Dè Gyã́á Ló M̀m̀-neè Bẹẹ Tẹ̀ Íe aa mm̀ õ̀òa bùlà, sõò tṍó e tṍó téní à gbóó nyimá kọọ̀ náa dṹùnàè gbò e Bàrì beè tṍ nóo ból é? (1 Kọ́r. 11:28) Sìgà gbò ólò dé fétúlúí vaá ṍ mííí boo béè kọọ̀ bà náa dã́ ból ló ba ból dẽe sĩ́. Sõò tṍó e bà nyímá kọ bà lọẹ̀, naa ní e bà aa ló ge dè vaá kilsĩ́ ge fã̀ Jìhóvà mm̀ bọ́ọ̀ló dẹ̀lẹ̀ nyíé boo, Jìhóvà é bugí va nvee gbàà na gònò naanà bólá. Náa kal ló béè kọọ̀ bà náa gé dé ná fétúlúá vaá õ ná mííá, bà ólò si nágé kẽè sẹ̀lẹ̀nù Ge Kẽ̀èa Boo Ú Kráìst boo béè kọọ̀  bà palàge zààva ló nú e Jìhóvà nè Jíízọ̀s náa nè va.

6. Éé ní e Jíízọ̀s beè nè log gbò nyómá tóm kọ bàá naa ẽ́?

⁶ Boo béè kọọ̀ pọ̀b kpo tã̀àgã̀ e gé naaá, àé dú nu sìà kpóó ló gè ló sọ́l boo nú e kpá Kùùà Nù 7 togó kọ́ ea kil ló gbò níí Kráìst e Bàrì beè tṍ nóo ból nè gbele gã́bug nená. Jíízọ̀s beè nè log gbò nyómá tóm kọ bàá kilsĩ́ gè sii fọ́ọ́lọ́ kyọ̀à sĩ́ ea aa ténì gá bàlà boo. Bà náa é sọ bá fọ́ọ́lọ́á dọ̀ọ̀mà tṍó e bàé nveè kpíi ló gbò e Bàrì beè tṍ nóo bólá lọ̀l, níà ge kọọ̀ Jìhóvà a ténmà va kọ bà bọ́ló dẹ̀lẹ̀ nyíé boo. (Kùùà 7:1-4) Boo béè kọ bà bọ́ló dẹ̀lẹ̀ nyíé boo, pá vígà Kráìst e Bàrì beè tṍ nóo bólí é gbóó zọ̀ẹ bẹ̀l dì belí gbò méné nè gbò vààla gyọ́ọ gbẹá káála. (Kùùà 20:6) Nyíè Jìhóvà, Jíízọ̀s, nè gbò nyómá tóm é palàge ẹẹ tṍó e bàé mon 144,000 gbò nen e Bàrì beè tṍ nóo bólá e ba ni íe ba kpẽ́ gè kil káála.

7. Dẹ̀ẹ̀a boo nú ea di mm̀ kpá Kùùà Nù 7:9, 10, bà mée ní e Jọ́ọ̀n beè mòn mm̀ mòà nu dẽe ẽ́, vaá éé ní e bà géè naa ẽ́? (Ẹ̀b fùtó ea di boo kóó kpáí.)

⁷ Tṍó e Jọ́ọ̀n kọ́ nu ea kil ló 144,000 gbò nen e bà dú gbò méné nè gbò vààla gyọ́ọá lọ̀l, a beè kpáá mòn dõòna kà nú ea ẹ́ẹ̀lẹ̀ẹ nyíe, ea dú “gbele gã́ bug nen” e bà ful zelí bá Ámàgídòn. Na gbòí dú kele ló 144,000 gbò nená, boo béè kọọ̀ bà palàge bọọ́ gã́bug èl va, vaá née é láá nyimá gã́bug e bà tóólá. (Bugi Kùùà Nù 7:9, 10.) Bà “nvèà ẹ́ẹ́ vọ̀b kọ̀là ló,” ea zógè kọọ̀ ba beè kpòòlà ba lóó sẹlẹ́ kele naa ní e bàlà boò Sétàní ‘náa é láá kyọ̀ va,’ vaá kìl nàgé sĩ́ gè bọ́ló dẹ̀lẹ̀ nyíé boo kilma ló Bàrì nè Kráìst. (Jém̀z 1:27) Ba beè vulí kpã́ kọ ba dùùà aa bá Jìhóvà nè Jíízọ̀s ea dú Nvín Naanà Ból Bàrìa. Ba beè faalá nágé laà gyoo, ea zógè kọọ̀ nyíé va ẹ́ẹ kọọ̀ Jìhóvà a tú Jíízọ̀s naamá Méné.—Doolé ló Jọ́ọ̀n 12:12, 13.

8. Éé ní e kpá Kùùà Nù 7:11, 12 kọ́ nèi ea kil ló gbò e bà di káála ẹ́?

⁸ Bugi Kùùà Nù 7:11, 12. Éé ní ea beè naaá tṍó e gbò e bà di káála mon gbele gã́bug nená ẽ́? Jọ́ọ̀n beè mòn kọọ̀ nyíè kọ̀láá gbò e bà di káála beè ẹẹ tṍó e bà mon gbele gã́bug nená e bà gé leelà Bàrì. Nyíè gbò e bà di káála é palàge ẹẹ ge mòn tṍó e mòà nù dẽeí é nááá vaá gbele gã́bug nená é dí dùm vaá fùl zelí bá pọ̀b kpo tã̀àgã̀.

9. Dẹ̀ẹ̀a boo nú ea di mm̀ kpá Kùùà Nù 7:13-15, éé ní e gbò e bà dṹùnà gbele gã́bug nená gé náa kátogóí é?

⁹ Bugi Kùùà Nù 7:13-15. Jọ́ọ̀n beè emí kọọ̀ gbele gã́bug nená “beè tú mii Nvín Naanà Ból logmá ba vọ̀b kọ̀là ló ẹẹlẹ̀.” Níí tõó dọ̀ kọọ̀ bà íe õ̀òa bug vaá dú gbò lé lab dògò kèsĩ́ Jìhóvà. (Àìz. 1:18) Bà dú gbò níí Kráìst e ba beè kìn lóó nè vaá dììa múú, e bà íe zìgà mm̀ vààa gyọ́ọ̀ Jíízọ̀s, vaá dú kóò Jìhóvà. (Jọ́ọ̀n 3:36; 1 Pít. 3:21) Níà nú ea náa vaá nyíè Bàrì à ẹẹ́ vá ló naa ní e bà láá “di kè sĩ́ kpò té méné Bàrì e bà gé tú bílá dee nè ẹ́ẹ́ èlà simá tóm nèe gbẹá m a tọ káí é.” Bà dì e bà gé kilsĩ́ gè tú bẹ̀à sã́ bùlà kọọmá kpẹ̀a vaá naa kọọ̀ gbò nen á nyoone nvéè Kráìst boo béè kọọ̀ Boǹ Méné Bàrì ní e bà náámá túá kà nú mm̀ dùm ẽ.—Máát. 6:33; 24:14; 28:19, 20.

10. Éé ní e gbele gã́bug nená agàla boo é, vaá mókà zìgànù ní e bàé monmà dẽè a m̀m̀-me ẽ́?

¹⁰ Gbele gã́bug nen e bà ful zelí bá pọ̀b kpo tã̀àgã̀a agàla boo kọọ̀ Bàrì é kilsĩ́ gè ẹbvìè nú ea kilìè vá ló, boo béè kọọ̀ “nen e a di ĩ́ì tẽ́ boo kpò té ménéá é sẹlẹ́va sĩ́ boo.” Zìgànù e na gònò naanà bólá géè ẹ̀bmà dẽe gè iéá é beè gé naaá, ea kọ́ọ̀: “[Bàrì] é fãanà dénè ba gĩ́i tó lọ̀l. Ú náa é dinà, bãàgà náa é dinà, tó náa é dinà, nyaa ló náa é dinà.”—Kùùà 21:3, 4.

11-12. (a) Dẹ̀ẹ̀a boo nú ea di mm̀ kpá Kùùà Nù 7:16, 17, mókà tã́áná dee bá ní e gbele gã́bug nená é íe mm̀ dì deè sĩ́ àla ẹ́? (b) Éé ní e na gònò naanà bólá é láá naa gbẹá kẽè sẹ̀lẹ̀nù Ge Kẽ̀èa Boo Ú Kráìst e, vaá ló éé?

 ¹¹ Bugi Kùùà Nù 7:16, 17. Kà lèlà kátogóí, sìgà gbò gyóòlo Jìhóvà gé mon tã̀àgã̀ bá tá kói boo béè kọọ̀ bà náa íe kpègè ea gbõomá vá ló gè zalmá gyã́á àbèè boo béè bé ea di ba bálá sĩ́. Sìgà gbò di tọọ̀ kpọ́gọ́lọ́ boo béè ba zìgà. Sõò, nyíè gbele gã́bug nená ẹ́ẹ boo béè kọọ̀ bà nyímá kọọ̀ tṍó e ba ni fulìè zelí bá pọ̀b kpo tã̀àgã̀a, bàé íèè gã́bug gyã́á ge dè nè gbò búma ea aa bá Jìhóvà. Jìhóvà é kpenà gbele gã́bug nená lọl bá a súng ea bélí “sã́” ea é tẹ́lẹ boo gbò nen tṍó ea é kyọsĩ́ bàlà boò Sétàní. Tṍó e pọ̀b kpo tã̀àgã̀ ni íná kùbmà, Jíízọ̀s é gbóó tulè gbò e bà ful zelí báá siimá ló “múú e a é néva dùm [e bè náa tá].” Nyimá kọọ̀ gbele gã́bug nená ié ból dẽe sĩ́ ea dú dũ̀ùnè. Gbàà gã́bug dẹ̀ gbò nen e bà ni tõó dùm boo kunukẽ̀í, baala náa é ú ná!—Jọ́ọ̀n 11:26.

¹² Na gònò naanà bólá íe ból dẽe sĩ́ ea náa kọ bàá olòó õá Jìhóvà nè Jíízọ̀s zaa! Náa kal ló béè kọọ̀ Jìhóvà náa sá va naamá gbò e bàé kil káála, à vulè va belí bé ea vulè nàgé gbò ea beè tṍ nóo ból naaá. Gbò e Bàrì beè tṍ nóo ból nè na gònò naanà bólá é láá gbá lèèlà Bàrì nè Kráìst. Enè sĩ́deè e bà ólò naa vó dú gè sí kẽè sẹ̀lẹ̀nù Dè Gyã́á Ló M̀m̀-neè Bẹẹ Tẹ̀ Íe.

13-14. Éé ní ea náa vaá à bọ́ló kọọ̀ gbò e Bàrì beè tṍ nóo ból nè na gònò naanà bólá á gbá sí kẽè sẹ̀lẹ̀nù Ge Kẽ̀èa Boo Ú Kráìst e?

¹³ Mm̀ gbò gbáá ea kil nvéeá, kiẽ́e e 1,000 nen dì, sìgà tṍó áá enè nen ní ea ólò dé fétúlúá vaá ṍ mííá ẽ́, àbèè kọọ̀ tọ́ọ̀ nen náa é dé vaá õ̀. Níá tõó dọ̀ kọọ̀ gã́bug bõ̀ònatõ̀ò ea di bàlà booí náa ólò ié nen ea é dé fétúlúá vaá ṍ mííá gbẹá kẽè sẹ̀lẹ̀nù Ge Kẽ̀èa Boo Ú Kráìst. Gã́bug gbò e bà sí kẽè sẹ̀lẹ̀nù Ge Kẽ̀èa Boo Ú Kráìst íe ból dẽe sĩ́ gè tõó boo kunukẽ̀í. Beè vó, éé ní ea náa vaá bà ólò sí kẽè sẹ̀lẹ̀nù Ge Kẽ̀èa Boo Ú Kráìst e? Tẽ̀ènè kà bug ea náa vaá bà ólò sí kẽè sẹ̀lẹ̀nù ílà dóm nè va ní ea ólò faalá va siimá ẽ́. Bà ólò sí boo béè ge naa kọọ̀ gbò e bà gé íláá á nyimá kọ bà vulèè va vaá nveenìè va sãa kúm. Mm̀ tẽ̀ènè sĩ́deèá, gbò e bà dṹùnà na gònò naanà bólá ólò sí kẽè sẹ̀lẹ̀nù Ge Kẽ̀èa Boo Ú Kráìst, boo  béè kọọ̀ bà gbĩ́ gè zogè kọ bà vulèè vaá nveenìè sãa kúm Kráìst nè gbò e Bàrì beè tṍ nóo ból. Vaá bà ólò zogè kọ bà zaavà nàè gé ló vààa gyọ́ọ̀ Jíízọ̀s tení dú ló gè sí kẽè sẹ̀lẹ̀nù Ge Kẽ̀èa Boo Ú Kráìst, ea dú sẹ̀lẹ̀nù ea é náa kọ á láá valí vá ló gè tõó dùm boo kunukẽ̀í dọ̀ọ̀mà dè-dè.

¹⁴ Dõòna kà lé bug ea náa vaá na gònò naanà bólá ólò sí kẽè sẹ̀lẹ̀nù Ge Kẽ̀èa Boo Ú Kráìst dú boo béè ge gbàn tṍ ló log Jíízọ̀s. Tṍó e Jíízọ̀s beè zọ̀ pá a gbò tóm ié túá kà sẹ̀lẹ̀nùa, a beè kọ́ nè va kọọ̀: “Olòó dei naamá gè kẽeam̄í boo.” (1 Kọ́r. 11:23-26) Vóà naa, na gònò naanà bólá ólò kilsĩ́ gè zọ̀ gbò níí Kráìst e Bàrì beè tṍ nóo ból e bà di dí dùm boo kunukẽ̀í sẹlẹ sẹ̀lẹ̀nù Dè Gyã́á Ló M̀m̀-neè Bẹẹ Tẹ̀ Íe. Kàsĩ́, bà ólò kolí nágé dõòna gbò kọ bàá dù gé zọẹ̀ va sí kẽ.

15. Éé ní eé láá naa mm̀ ge lèèlà Bàrì nè Kráìst gbẹá kẽè sẹ̀lẹ̀nù Ge Kẽ̀èa Boo Ú Kráìst e?

¹⁵ Gbẹá kẽè sẹ̀lẹ̀nù Ge Kẽ̀èa Boo Ú Kráìst, è íè nèà deè ge lèèlà Bàrì nè Kráìst tení dú ló gè ọlí sọ́l nè ge tã̀àgã ló Bàrì. Togó bel lòbèl ea é nèà gbááí kọ́ọ̀: “Zogè Kọ Ò Íèè Zààvà Ló Nú E Bàrì Nè Kráìst Ni Náa Nè Ni!” Àé bọọvẹ̀ bẹẹ zààvà kilma ló Jìhóvà nè Kráìst. Boo tṍó e bà gé ténmà fétúlú nè mííá, àé náa kọ é kẽ̀èa boo kọọ̀ fétúlúá nè mííá tõó dọ̀ nom̀ kpá ló Kráìst nè a mii. Àé náa kọọ̀ é kẽ̀èa boo íb vulè e Jìhóvà íe kìlmàí ló tení dú ló gè sọ̀tọ́ deè kọ a Sã́áná á úí boo. (Máát. 20:28) À ólò leemá kọ̀láá nen ea vulè bẹẹ Tẹ̀ ea di káála nè a Sã́áná gè sí kẽè sẹ̀lẹ̀nù Ge Kẽ̀èa Boo Ú Kráìstí.

16. Mm̀ mókà gbò sĩ́deè ní e gbò e Bàrì beè tṍ nóo ból nè na gònò naanà bólá bélá ẹ́?

¹⁶ Mm̀ sìgà sĩ́deè, kele á gé zẹ̀ẹ̀ gbò e Bàrì beè tṍ nóo ból nè na gònò naanà bólá. Jìhóvà náa vulè enè gbò èlmà na gbòa. Tẽ̀ènè íb ka ní e Bàrì nvee ló pálàa gbòí é. È nyímà níí boo béè kọọ̀ tẽ̀ènè kà gã́ ki, ea dú vààa gyọ́ọ̀ a Sã́áná ea vulè ní ea beè zalmá pálàa gbòí é. Kele ea di zẹ̀ẹ̀ pálàa gbòí dú kọọ̀ ba ból dẽe sĩ́ náa dú tẽ̀ènè íb. Pálàa gbòí é íè ge kilsĩ́ gè bọ́ló dẹ̀lẹ̀ nyíé boo nè Bàrì nè Kráìst. (Ps. 31:23) Kẽ̀èa boo kọọ̀, nyómá káí Bàrì é láá tú dénè bẹ̀ì siimá tóm mm̀ sĩ́deè ea kunà. Níí tõó dọ̀ kọọ̀ Jìhóvà ólò nè a nyómá káí buù nen dẹ̀ẹ̀a boo bé ea dú bíi ló nená naa.

17. Éé ní e gbò e Bàrì beè tṍ nóo ból e bà sígá boo kunukẽ̀í gé ẹbmà dẽè ẽ́?

¹⁷ Gbò níí Kráìst e Bàrì beè tṍ nóo ból náa beè ié ból dẽe sĩ́ gè kil káála deé e ba beè mèà. Bàrì ní ea ólò nè va ból dẽe sĩ́í ẽ́. Bà ólò bugi togó boo ba ból dẽe sĩ́, tã̀àgã ló Bàrì kilma ló, vaá di kpènà ló gè ié ba kpẽ́ gè kil káála. Bà náa é láá dòòmà dẽe  ló bé e ba nom̀ kpá ló é meà naa gbẹá káála. (Fíl. 3:20, 21; 1 Jọ́ọ̀n 3:2) Kọbèè vó, bà ólò ẹ̀bmà dẽè ge di ló Jìhóvà, Jíízọ̀s, gbò nyómá tóm, nè na gbò e Bàrì beè tṍ nóo bólá. À tań va gè dì vá zẹ̀ẹ̀ gbẹá káála.

18. Éé ní e na gònò naanà bólá gé ẹbmà dẽe ẽ́?

¹⁸ Na gònò naanà bólá ẹb dẽe sĩ́ gè tõó dùm boo kunukẽ̀í dọ̀ọ̀mà dè-dè. Níì tàn e kọ̀láá nen ólò ié. (Ẹ̀klì. 3:11) Bà ólò ẹ̀bmà dẽè tṍó e bàé nveè bá gè naa kọọ̀ zivè kà boo kunukẽ̀í á dú páladaìs. Bà ólò ẹ̀bmà dẽè deé e bàé láá tìb baálà tọ, fó nu, vaá bumá ba gbò nvín mm̀ gbõ̀òme válá ló. (Àìz. 65:21-23) Bà ólò ẹ̀bmà dẽè tṍó e bàé láá kyã̀à iná gã́bug ketõ̀ò ea di boo kunukẽ̀í, gé moǹgì gù, kọ̀l, nè pène, vaá nó nú ea kil ló dénè nú e Jìhóvà beè dèm. Bọọ èlmà tõ̀ò, à palàge ẹẹlẹ̀ va nyíe gè nyimá kọọ̀ ba gbaa ló kilma ló Jìhóvà é kilsĩ́ gè bọọ dọ ló.

19. Mókà nèà deè ní e sẹ̀lẹ̀nù Ge Kẽ̀èa Boo Ú Kráìst kuulà nè buù bẹ̀ì e, vaá mó dee ní e níí gbááí é sẹẹà ẹ?

¹⁹ Jìhóvà a tú kà dũ̀ùnè ból dẽe sĩ́ nè kọ̀láá kà pá a gyóòlo e ba beè kìn lóó nèe. (Jèr. 29:11) Sẹ̀lẹ̀nù Ge Kẽ̀èa Boo Ú Kráìst dú kà kele íb nèà deè ea dì nè buù bẹ̀ì ge lèèmà Bàrì nè Kráìst boo béè nú e bà náa nèi ea é náa kọ é láá dé kpéè ló dùm e bè náa tá. Sẹ̀lẹ̀nù Ge Kẽ̀èa Boo Ú Kráìst ní ea dú kà pọ̀bkà sẹ̀lẹ̀nù ea tõo lọ̀l vaá à lee e kà kà gbò níí Kráìst ólò sẹlẹ́ buù gbáá ẹ́. Àé sẹẹ̀a ló èlà deè Saturday, March 27, 2021. Níí gbááí, gã́bug nen di gbò dó e bà íe dì pọ́ì ge láá sì. Dõòna gbò é sí nágé kọbèè bà gé náa uú vá boo. Sìgà gbò é sẹlẹ sẹ̀lẹ̀nùí gbẹá tọọ̀ kpọ́gọ́lọ́. Boo tṍó e Jìhóvà, Jíízọ̀s, gbò nyómá tóm, nè gbò e Bàrì beè tṍ nóo ból dì e bà gé ẹbvii, è kọ́ọ̀ nè kọ̀láá kà bõ̀ònatõ̀ò, ńkem̀ gbò e bà bṍóná nè buù nen ea sẹlẹ nakà sẹ̀lẹ̀nù Ge Kẽ̀èa Boo Ú Kráìstí, kọ á dé kpéè ló!