1. 1935-antlea odhivexonant dil’lea eka bhaxonnacho eka tornnatteacher koslo probhav poddlo?

18 VORSACHEA eka tornnattean, 1926-ant bautizm ghetlo. Tache avoi-bapui Jehovache Sakxi asle ani tednam tankam Bible Videarthi mhunnttale. Tankam tin chedde ani don cheddvam aslim. Tankam tannim Jehova Devachi seva korunk ani Jezu Kristachea dekhin cholonk xikoilolem. Tednam sogle Bible Videarthi kortale toxe, ho tornnatto pasun dor vorsak Somiachea Rat-jevnna vellar unddo ani soro ghetalo. Punn tannem “Vhodd Zomo” hem ek mhotvachem bhaxonn aikolem tednam tachem soglem chitop bodol’lem. Hem bhaxonn, J. F. Rutherford-an 1935 hea vorsa Washington, D.C., U.S.A.-nt zalolea odhivexonant dil’lem. Hea odhivexonant kitem kollon ailem?

2. Bhav Rutherford-achea bhaxonnant kosli novi somzonni mell’lli?

² Bhav Rutherford-an aplea bhaxonnant Prokasovnni 7:9-ant sanglolo “vhodd zomo” (King James Version), vo “vhodd lokanchi urponz” mhunnttlear konn te somzailem. Tednam meren ho zomo pasun sorgar voicho asa ani hea zomeantlim obhixikt Kristanvam titlim visvaxi naslim mhunn Bible Videarthi chintale. Punn vhodd zomeak sorgar vochonk vinchun kaddunk nant mhunn Bhav Rutherford-an Bible-antlean somzailem. Tor vhodd zomo Kristachim her menddram * zaun asat, jim ‘vhodd sontapa’ thuan salvar zaun hea prithumer sasnak jielotolim. (Prok. 7:14)  Jezun sanglem: “Mhaka anink-ui menddram asat, tim hea oddpantlim nhoi, tankam-i Hanvem haddunk zai. Tim mhozo tallo aikotolim. Ani oso ekuch hindd zatolo ani ekunch Gonvlli.” (Juanv 10:16) Him menddram Jehovachim visvaxi Sakxim zaun asat, zankam hea Sobit Bag zalolea prithumer sasnank jieunk mellttolem. (Mt. 25:31-33, 46) Tor Bible-antlea sotachi hi novi somzonni mell’llea uprant Jehovachea lokanchem ani toxench tea 18 vorsanchea bhavachem chintop koxem bodol’lem tem polloum-ia.—St. 97:11; Mho. 4:18.

3-4. 1935-ant zal’lea odhivexonant hozaramnim bhav-bhoinnank aplea bhorvonxea vixim kitem kollon ailem, ani kiteak?

³ Tea odhivexonant bhaxonn diupean ho prosn vicharlo: “Jea konnank hea sonvsaracher sasnak jieuncho bhorvonso asa tim matxim ubim ravtolim?” Tea odhivexonak hajir zalolea eka bhavan mhunnttlem, ki thoim aslolea 20,000-antle ordea-von chodd lok ube ravle. Tednam Bhav Rutherford-an mhunnttlem: “Polloiat! Ek vhodd zomo!” Tea vellar soglim khuxalkaien arddunk laglim. Ubim ravlolim tankam sorgar vochonk vinchun kaddunk nant mhunn kollon ailem. Tankam Devachea povitr xokte vorvim obhixikt korunk nant mhunn koll’llem. Tea odhivexonachea fuddlea disa 840 zannamnim bautizm ghetlo, zantuntlim choddxim zannam her menddrantlim aslim.

⁴ Tea bhaxonnam uprant, to tornnatto bhav zache vixim ami poilim uloilolim ani hozaramnim her zannamnim Somiachea Ra-jevnna vellar unddo khavop ani dakhancho soro pievop bond kelem. Zaiteank hea eka bhavan sanglolea sarkem dislem. Tannem khaltikaien mhunnttlem: “1935-a uprant Ugddas Disa hanvem kednanch dakhancho soro pieunk vo unddo khaunk na. Jehovan aplea povitr xokte udexim sorgar jieuncho bhorvonso mhaka diunk na mhunn kollon ailem. Bodlek, prithumer jieuncho bhorvonso mhaka asa ani hi prithum ek sobit bag korchem kam mhaka asa mhunn somzolem.” (Rom. 8:16, 17; 2 Kor. 1:21, 22) Tednam thaun aiz meren vhodd urponjecho ankddo vaddot gela ani tim prithumer aslolea urlolea obhixiktam sangata kam korit asat.

5. Ugddas Disa bhag ghevop bond kortat tanchea vixim Jehovak koxem dista?

⁵ 1935-a uprant Ugddas Disa unddo khavop ani dakhancho soro pievop bond keloleam vixim Jehovak koxem dista? Ani zor eklo Jehovacho Sakxi adim Somiachea Rat-jevnna vellar unddo khatalo ani dakhancho soro pietalo, punn atam taka apunn obhixikt nhoi mhunn kollon ieta, tache vixim Jehova kitem chinta? (1 Kor. 11:28) Thoddeank aplea bhorvonxea vixim sarki somzonni nasli dekhun tim Ugddas Disak Somiachea Rat-jevnnant bhag ghetat. Punn tim apli chuk manun ghetat, Ugddas Disa bhag ghevop bond kortat ani visvaxiponnim Jehovachi seva korit ravtat zalear, Jehova tankam her menddram modlim eklim mhunn manun ghetolo. Tim Ugddas Disa bhag ghenant zalear pasun, tea disa tim hajir zatat zalear Jehovan ani Jezun tanchea pasot jem kitem kelam tem valor kortat mhunn tim dakhoitat.

6. Jezun ainzank kitem korchi adnea dilea?

⁶ Beginuch vhodd sontap suru zauncho asa. Tor Prokasovnni 7 odheai-ant obhixikt  Kristanvam vixim ani vhodd lokanche urponje vixim kitem sanglam tacher bhasabhas korop gorjechem. Sonvsarchea nisonttonache charui vare addaun dovrunk Jezu ainzank adnea dita. Tor soglea obhixikt Kristanvank nimanno xik’ko mello porian mhunnche Jehovachi maniotai mello porian tannim ho varo addaun dovrunk zai aslo. (Prok. 7:1-4) Obhixikt Kristanv visvaxi ravtat zalear te sorgar Krista sangata raza ani iadnik mhunn seva kortole. (Prok. 20:6) Hea 1,44,000 zannank sorgincho inam melltta tednam Jehova, Jezu ani ainz khuxal zatole.

7. Prokasovnni 7:9, 10-ant, Juanvan konnank polloilem, ani ti kitem korta? (Masikachem fuddlem chitr polloiat.)

⁷ 1,44,000 zannam raza ani iadnik zale tea vixim Juanvan sanglea uprant tannem “ek bhov vhodd lokanchi urponz” Armaged’don zhuza thaun salvar zata ti polloili. Ho zomo 1,44,000 poros vhodd asa ani tantunt kitle astole tem amkam khobor na. (Prokasovnni 7:9, 10 vachat.) Ti urponz “dhovi nhesonn ghalun,” ravlea. Hacho orth tim “sonvsara thaun mekllim” ani Devak ani Kristak visvaxi ravleant. (Jak. 1:27) Jehovan ani Devachea Menddrean, mhunnche Jezun tankam salvar keleant mhunn tim arddun mhunnttat. Ani oxem kortana tim tallio vo maddancheo chuddtteo aplea hatant gheun asat. Hantuntlean tim Jezuk, Jehovan vinchun kaddlolo Raza mhunn khuxen manun ghetat oxem dakhoitat.—Juanv 12:12, 13 sor korat.

8. Prokasovnni 7:11, 12 sorgar asat tea sogleam vixim kitem sangta?

⁸ Prokasovnni 7:11, 12 vachat. Sorgar asloleamnim vhodd urponjek polloilem tednam tannim kitem kelem? Tim soglim khuxal zalim ani Devak vakhann’nni dili mhunn Juanvan polloilem. Tor hem dorxon purnn zata tednam mhunnchem vhodd urponz vhodd sontapa thaun salvar zata tednam sorgar asat tim soglim khuxal zatolim.

9. Prokasovnni 7:13-15-ant sanglolea pormonnem, vhodd urponz aiz kitem korta?

⁹ Prokasovnni 7:13-15 vachat. Vhodd urponjen “aplim vostram Menddreachea rogtan dhuleant ani dhovim keleant” mhunn Juanv boroita. (Iz. 1:18) Hacho orth tankam ek nitoll ontoskornn asa ani Jehovak tim manvotat. Tannim somorponn korun bautizm ghetla, Jezuchea bolidanacher ghott bhavarth dovorla ani Jehova lagim tanchi ek ghott ixttagot asa. (Juanv 3:36; 1 Ped. 3:21) Taka lagon, tim Devak manvotat ani prithumer Devachi seva ‘dis ani rat korunk’ xoktat. Tanchea jivitant Devachem Raj sogleam-von mhotvachem aslolean tea Rajea vixim porgottchea kamant ani xis korchea kamant tim aiz urben bhag ghetat.—Mt. 6:33; 24:14; 28:19, 20.

10. Vhodd urponjek kosli khatri asa, ani khoinchi bhasaunni purnn zata ti tim polloitolim?

¹⁰ Vhodd sontapa thaun bhair soron aileat tea vhodd urponjechi Dev kallji ghetolo mhunn tannim khatri dovrunk zata. Karonn ‘xinvasonar boslolo asa tacho tombu munxam modem’ astolo mhunn bhasailam. Zaitea vorsam thaun her menddram vatt polloitat ti hi bhasaunni purnn zatoli: “[Dev] Tanchea dolleantlim sogllim dukam To pusun kaddtolo; moronn anink aschem na, dukh anink korchim nant, rudon somptolem, koxtt-ui anink asche na.”—Prok. 21:3, 4.

11-12. (a) Prokasovnni 7:16, 17 pormonnem, vhodd urponjek koslim besanvam mellttolim? (b) Ugddas Disak her menddram kitem kortat, ani kiteak?

¹¹ Prokasovnni 7:16, 17 vachat. Thodde Jehovache sevok bhuken asat karonn tanchea lagim jevonn gheunk poixe nant  vo te ravtat tea desa bhitor zhuz cholta vo tancho des dusrea desa sangata zhuzta dekhun tacho vaitt porinnam tankam soscho poddtta. Ani thoddeank aplea bhavarthak lagon bondkhonnint ghatleant. Punn vhodd urponjent aslolim tim khub khuxal asat karonn hea noxttea sonvsara thaun salvar zalea uprant tankam bhorpur jevonn ani Jehova thaun xikounn mellttoli. Jehova Soitanachea hea noxttea sonvsaracho nas korta tednam vhodd urponjek aplea ragan ‘hulpounk diuncho na.’ Vhodd sontapa uprant, Jezu vhodd urponjek ‘jivea udka’ lagim pavoitolo vo sasnachem jivit ditolo. Vhodd urponjek kitlo kherit bhorvonso asa tea vixim chintat. Munxachea itihasant fokot vhodd urponjent aslolim tim ghoddie kednanch morchimnant.—Juanv 11:26.

¹² Hea kherit bhorvonxea pasot her menddram Jehova ani Jezuchim kitlim upkari asat! Tankam sorgar vochonk mellona tem khorem, punn obhixiktancho Jehova kitlo mog korta titloch to tancho-i mog korta. Tor obhixikt ani her menddram, Jehova ani Jezu Kristachi vakhann’nni korunk xoktat. Ani tem korunk ek vatt mhunnttlear, Somiachea Rat-jevnnak hajir zavop.

13-14. Obhixikt ani her menddramnim Ugddas Disak kiteak hajir zaunk zai?

¹³ Halinchea vorsamnim, Ugddas Disak hajir zatat tantuntlea sumar 1,000 lokam modem ekloch unddo khata ani dakhancho soro pieta vo choddxe pavtti eklo pasun ghena. Hacho orth, choddxea sobhamnim Ugddas Disa unddo khaupi ani dakhancho soro pieupi konnuch na. Tor hajir zatolea choddxea lokank prithumer jieuncho bhorvonso asa mhunn kollon ieta. Toxem zalear tim Jezuchea Ugddas Disak kiteak hajir zatat? Tankam ami eka ixttachea kazarak hajir zatoleank sor korunk zata. Ek zoddpem kazar zata tednam tanchim ixttam tanchea kazarak hajir zaun aplo mog ani tenko ditat. Teach bhaxen, her menddram Jezuchea Ugddas Disak hajir zaun Jezuk ani obhixikt Kristanvank aplo mog ani tenko ditat. Tea bhair, her menddram Jezuchea bolidanacho valor kortat mhunn dakhounk pasun hajir zatat. Karonn tea bolidana  udexim tankam prithumer sasnak jieunchi vatt ukti zata.

¹⁴ Ugddas Disak hajir zaunk anik ek karonn mhunnttlear, tim Jezun dil’li adnea pallttat. Aplea mornnacho ugddas korunk Jezun apostlank sanglem tednam tannem oxem mhunnttlem: “Mhozo ugddas korun oxench tumi korat.” (1 Kor. 11:23-26) Tor obhixikt Kristanv prithumer asa tea meren her menddram Jezuchea Ugddas Disak hajir zait ravtolim. Tea bhair, tim herank pasun Ugddas Disak hajir zaunk apounnem di-it ravtolim.

15. Ugddas Disa ami Devachi ani Kristachi vakhann’nni koxi korunk xoktat?

¹⁵ Ugddas Disak ami sangata mellon git gaitat ani magnnem kortat tednam ami Devak ani Jezuk vakhannttat. Hea vorsa, Ugddas Disa hem bhaxonn astolem: “Devan ani Kristan Kel’lea Bolidanacho Upkari Asa Mhunn Dakhoi!” Hem bhaxonn, Jehova pasot ani Krista pasot amchem upkariponn vaddoitolem. Unddo ani Soro ami ek dusreachea hatant ditat tednam tem Jezuchea kuddik ani rogtak koxem suchit korta tea vixim ami niall korunk pavtolim. Amkam jivit mellonk Jehovan aplea Putak moronk dilem hacherui ami niall korunk pavtolim. (Mt. 20:28) Amchea sorginchea Bapacho ani tachea Putacho mog kortat tim soglim Ugddas Disak hajir zatolim.

16. Obhixikt Kristanv ani her menddram khoinchea ritimnim ek-sarkinch asat?

¹⁶ Obhixikt Kristanv ani her menddram thoddea ritimnim ek-sarkinch asat. Jehova donui zomeacho ek sarkoch mog korta. Tannem donui zomea pasot aplea mogall Putachem bolidan diun ek-sarkench mol farik kelam. Tanchea modem ekuch ontor mhunnttlear, tankam veg-vegllo bhorvonso asa. Punn donui zomeanim Devak ani Kristak visvaxi ravonkuch zai. (St. 31:23) Ami obhixikt zaum vo her menddram zaum amchea gorzam pormonnem Jehova amkam dor ekleak apli povitr xokti ditolo mhunn ami ugddas dovrunk zai.

17. Prithumer urlole obhixikt Kristanv kiteachi vatt polloitat?

¹⁷ Obhixikt Kristanvam zolmol’lim tednam tankam sorgar voicho bhorvonso naslo. Punn Jehova to bhorvonso tankam uprant dita. Tim tea bhorvonxea vixim chintat, tea vixim magnnem kortat ani sorginchea inamachi vatt polloitat. (Filp. 3:20, 21; 1 Juanv 3:2) Tankam sorgar kosli kudd astoli tem tankam khobor na. Punn sorginchea  Rajeant tim Jehova, Jezu, ainzam vo her obhixiktam sangata aschi vatt polloiat.

18. Her menddram kiteachi vatt polloiat?

¹⁸ Her menddram prithumer sasnank jieunchi vatt polloitat ani hi itsa soglea munxank asa. (Up. 3:11) Tea vellar hi prithum ek Sobit Bag korchi tim vatt polloitat. Tim aplim ghoram bandtolim, zhaddam roitolim ani aplea poripurnn bhurgeank vaddoitolim. (Iz. 65:21-23) Tea bhair, tim prithumer voilea veg-vegllea zagear zoxem, dograr, ranant ani doriant vochon Jehovachea rochnne vixim xikonk vatt polloiat. Punn mhotvachem mhunnttlear, tea vellar tanchi Jehova sangata ixttagot ghott zait voitoli hem chintun tim sogleant chodd khuxal zatat.

19. Ugddas Disa dor ekleak kosli sondhi melltta, ani hea vorsa Ugddas Dis kednam astolo?

¹⁹ Apleak somorponn kel’lea dor eka sevokak Jehovan fuddarak ek boro bhorvonso dovorla. (Jer. 29:11) Amkam dor ekleak sasnachem jivit mellonk Jehova Devan ani Jezu Kristan zaitem kelam. Tor Ugddas Disak donui zomeank tanchi vakhann’nni korunk ek bori sondhi asa. Ugddas Dis, ho khorea Kristanvak sogleant mhotvacho dis zaun asa. Hea vorsa ti kariavoll Sonvar, 27 Mars, 2021 hea tarker suria buddlea uprant zatoli. Zaitea zannank hea kariavollik hajir zaunk tim ravtat tea zagear svotontrtai asa. Thoddeank virodh aslear pasun tim tea disa hajir zatolim. Anik thoddim bondkhonnint pasun Jezuchea mornnacho Ugddas Dis kortolim. Ugddas dovrat, sorgar thaun Jehova, Jezu, ainz ani sorgar gel’le obhixikt Ugddas Disak khuxalkaien hajir zatat tea dor eka munxacher, grupacher ani sobhecher dhean ditat.