1. ¿Kasa jülüjaka naaʼin wanee jimaʼai sutuma tü pütchi kanüliakat «La grande muchedumbre»?

EEJANA waneinnua wayuu Ekirajaalii sünain tü Wiwüliakat (nanüliapuʼu tia na aküjaliikana pütchi nüchiki Jeʼwaa), apünüinshii nachonnii tooloyuu otta piamashii jieyuu. Nekirajüin naya süpüla naʼyataainjanain nümüin Jeʼwaa jee noushikajaainjanain süchiirua nukuwaʼipa Kürisüto. Soʼu juyakat 1926 woutiisashi wanee nachon jimaʼai 18 nuuyase. Jimaʼaikai chia nikapuʼuin tü pankat jee nüsapuʼuin tü wiinokot sünain tü Outkajawaakat eere Sotuin Waaʼin Outuin Jesuu, naaʼinrapuʼuinya tia napüshuaʼa na Ekirajaaliikana sünain tü Wiwüliakat. Soʼu juyakat 1935, aʼwanajaasü tü jülüjakat naaʼin süchiki jalainjachin nia kepiain sutuma tü pütchi kanüliakat «La grande muchedumbre». Nia ekirajaka chi wawalakai Joseph Rutherford sünain wanee outkajawaa miyoʼu chajatkat Washington (Estados Unidos). ¿Kasa apansaajünaka sünain tia outkajawaakat miyoʼu?

2. ¿Kasa apansaajünaka achiki sünain tü pütchi nikirajakalü anain chi wawalakai Rutherford?

² Sünain tü pütchi nikirajakalü anain chi wawalakai Rutherford, nüküjain jaraliin na wayuu wattakana naalii saashin Alateetkat Mapeena 7:9. Aküjünapuʼusü süchiki chainjanain naya iipünaa, nnojoliipejeʼe naya waneepiain maʼin nümaa Maleiwa maʼaka naaʼin na waneinnua chainjanakana iipünaa. Nüküjain chi wawalakai Rutherford sükajee tü sümakat tü Wiwüliakat nnojoliin chainjanain iipünaa na wattakana naalii wayuu. Naashin chi wawalakai naya na wane anneerüiruaʼaya waneejannuu * münakana, na  oʼttaainjanakana süchikijee tü müliaa miyoʼusükat jee na kepiainjanakana waneepia saaʼu tü Mmakat (Alat. Map. 7:14). Anuu nünüiki Jesuu: «Eeshiʼiya wane anneerüiruayaʼa waneejannuu. Tantireena nayaʼaya tanainmüin süpüla noonooinjanain sümaa tanüiki. Kotteeshii tatüma na taʼanneetsekana napüshua süpüla naaʼinmajünüinjanain tatüma tamüiwa, tayakai chi napüʼüyakai» (Juan 10:16). Na naashajaakana achiki Jesuu naya na Aküjaliikana pütchi waneepiakana nümaa Jeʼwaa, na kepiainjanakana yaa saaʼu tü Mmakat paʼaraiisüpa shia (Mat. 25:31-33; Mat. 25:46, TNM). Aʼwanajaʼalaa müsü tü suluʼujatkat naaʼin wainma aʼyataalii nümüin Jeʼwaa soʼu tia. Müshia chi jimaʼai waküjakai achiki paala (Sal. 97:11; Prov. 4:18).

3, 4. (1) ¿Kasa nayaawataka aaʼu wainma wawalayuu soʼu tü juyakat 1935? (2) ¿Jamüsü nayaawataka saaʼu tia?

³ Na wawalayuu chajanakana sünain tia outkajawaakat miyoʼu, talatüsü maʼin naaʼin wanaa sümaa nümüin chi wawalakai Rutherford: «Eeshii süpüla jütamaain jüpüshuaʼa jiakana yaainjanakana kepiain saaʼu tü Mmakat». Naashin wanee wayuu chajachikai sünain tia outkajawaakat, eejana maʼaka saaʼin 20.000 na jutkatakana. Atamaashii shiatapünaamüin na jutkatakana soʼu tia. Nümakalaka joo chi wawalakai: «¡Anaa na wayuu wattakana naalii!». Süchikijee tia, aʼwatüshii najapü na wawalayuukana jee aʼwaatüshii naya sutuma talatüin maʼin naaʼin. Na wawalayuu atamaakana, nayaawata aaʼu nnojoluin naneekünüin süpüla chainjanain naya iipünaa, nnojoluin naneekünüin nükajee chi naaʼinkai Maleiwa. Waneemüin kaʼi süchikijee tia, woutiisashii maʼaka 840 wawalayuu, napüshi naya wawalayuukana naya na wane anneerüiruaʼaya waneejannuu münakana.

⁴ Yalejeechikireʼeya wainma na wawalayuu ooʼulaakana suulia ekaa tü pankat jee asaa tü wiinokot sünain tü Outkajawaakat eere Sotuin Waaʼin Outuin Jesuu. Ooʼulaashia chi jimaʼai waküjakai achiki paala. Wainma na makana anüiki maʼaka saaʼin nünüiki wanee wawala. Anuu nünüiki: «Ooʼulaashi taya suulia ekaa tü pankat jee asaa tü wiinokot soʼu tü juyakat 1935. Ooʼulaashi taya suulia süka tayaawatüin saaʼu nnojolin nüneeküin taya Jeʼwaa süpüla chainjachin taya iipünaa, nnojolin nüneeküin taya nükajee chi naaʼinkai. Tü eejatkat suluʼu taaʼin shia kepieein taya yaa saaʼu tü Mmakat jee taʼyataain süpüla paʼaraiisüinjatüin shia» (Roma 8:16, 17; 2 Cor. 1:21, 22). Ayatayüliʼiya maaʼulu awainmalaain na wattakana naalii wayuu jee aʼyataajiraashii naya namaa na chainjanakana iipünaa na eeyüliikana yaa saaʼu tü mmakat.

5. ¿Jamüsü nakuwaʼipa noʼuluʼu Jeʼwaa na ooʼulaakana suulia ekaa tü pankat jee asaa tü wiinokot?

⁵ ¿Jamüsü nakuwaʼipa noʼuluʼu Jeʼwaa na ooʼulaakana suulia ekaa tü pankat jee asaa tü wiinokot süchikijee tü juyakat 1935? ¿Jama eere wanee wawala maaʼulu yaa ekakai tü pankat jee asakai tü wiinokot jee niyaawatüle saaʼu mapa nnojolin nüneekünüin süpüla chainjachin nia iipünaa? (1 Cor. 11:28). Eeshii na aaʼinrapuʼukana tia süka müin chainjanakai naaʼin iipünaa saaʼin namüin. Müleka nayaawatüle saaʼu nnojoluin anain tü naaʼinrakat jee nooʼulaale suulia ekaa tü pankat jee asaa tü wiinokot jee ayatüle naya sünain aʼyatawaa maʼin nümüin Jeʼwaa, aneerü nakuwaʼipa noʼuluʼu Jeʼwaa, süka jamüin, napüshin naya na wane anneerüiruaʼaya waneejannuu münakana. Mayaainjeʼe nnojoluitpain neküin tü pankat jee nasüin tü wiinokot sünain tü Outkajawaakat eere Sotuin Waaʼin Outuin Jesuu, ayatüshiʼiya naya oʼunuin sünain tia outkajawaakat süka kojutuin namüin tü naaʼinrakat Jeʼwaa otta Jesuu napüleerua.

6. ¿Kasa nuluwataaka anain Jesuu na aapieekana?

⁶ Alüʼütsü maʼin tü müliaa miyoʼusükat, makalaka anain wekirajaale sooʼomüin tü sümakat Alateetkat Mapeena kapiitulo 7, aashajaaka  nachiki na chainjanakana iipünaa otta nachiki na wattakana naalii wayuu. Saashin tia pütchikat, nuluwataain Jesuu na aapieekana süpüla nnojoluinjatüin najütüin süchiki pienchisü joutai ajaʼttirajatka tü kasakalüirua. Nnojotsü najütüinjatüin süchiki saaʼumüin tü mmakat waneʼereʼeya shiʼitaanapa nejeetse Maleiwa neʼipoʼunain na aneekuushikana. Tia shia anaʼleepa nakuwaʼipa noʼuluʼu Maleiwa süka waneepiain naya nümaa (Alat. Map. 7:1-4). Tü kasa anasü aapünajatkat namüin na chainjanakana iipünaa sükajee waneepiain naya nümaa Jeʼwaa shia naluwataainjanain jee sacerdooteinjanain naya chaa iipünaa (Alat. Map. 20:5, 6). Saapünapa tü kasa naʼatapajakat na 144.000 chainjanakana iipünaa, talateechi maʼin Jeʼwaa, Jesuu otta na aapieekana.

7. Saashin Alateetkat Mapeena 7:9, 10, ¿jaralii na niʼrakana Juan otta kasa naaʼinraka? (Piirakaa sümüin tü ayaakuaa sünainkat süta tü rewiisütakat).

⁷ Süchikijee nüküjain Juan nachiki na 144.000 aluwataainjanakana jee sacerdooteinjanakana, niʼrüin «wane wayuuirua watta maʼi saalii», oʼttaasü tia wayuukalüirua süchikijee Armagedón. Isasü achikii nayaawajünüin süka wainmashaatain maʼin naya noulia na chainjanakana iipünaa (paashajeʼera Alateetkat Mapeena 7:9, 10). «Kasheʼinjashii naya waneʼewai nakua kuluulu kasuujasü maʼi» süka nnojoluin sünainpünaain naya tü kasa mojusü naaʼinrakat na manoujainsaliikana otta süka waneepiain naya nümaa Maleiwa otta nümaa Kürisüto (Sant. 1:27). Aʼwaatüshii naya emetut maʼin otta naküjain noʼttaain nutuma Maleiwa jee nutuma Jesuu. Kajapuluʼushii naya alanatüna süka talatüin naya sümaa niainjachin Jesuu aluwataain nutuma Jeʼwaa (anasü paashajeʼerüle Juan 12:12, 13).

8. ¿Jamüsü sünüiki Alateetkat Mapeena 7:11, 12 nachiki na nüpüshikana Jeʼwaa chaa iipünaa?

⁸ Paashajeʼera Alateetkat Mapeena 7:11, 12. ¿Kasakaʼa naaʼinrüin na nüpüshikana Jeʼwaa chaa iipünaa? Niʼrüin Juan talatüin maʼin naya jee naʼwaajüin Maleiwa süka neʼrüin na wattakana maʼin naalii wayuu. Talateechi maʼin Jeʼwaa otta na nüpüshi chakana iipünaa neʼrapa shikeraajüin tü niʼrakat Juan: noʼttaainjanain süchikijee tü müliaa miyoʼusükat na wattakana maʼin naalii wayuu.

9. Saashin Alateetkat Mapeena 7:13-15, ¿kasa naaʼinraka maaʼulu na wattakana naalii wayuu?

⁹ Paashajeʼera Alateetkat Mapeena 7:13-15. Naashin Juan kasuujasü nasheʼin na wattakana naalii wayuu süka sülaʼajaaushin «naainjala noulia sütüma tü nüshakat chi Anneetchonkai». Müsü nakuwaʼipa süka wulein naaʼin jee anain nakuwaʼipa noʼuluʼu Jeʼwaa (Is. 1:18). Naapüin naaʼin nümüin Maleiwa jee woutiisashii naya, neʼitaain naaʼin sünain naapajiraain nikii Jesuu jee aleewashii naya nümaa Jeʼwaa (Juan 3:36; 1 Ped. 3:21). Müshiijeseʼe eein naya nümaa chi Maleiwakai «je naʼyataain nümüin waneepia soʼukaʼi je saʼwai» yaa saaʼu tü mmakat. Aʼyataashii maʼin naya maaʼulu sünain aküjaa pütchi otta ekirajaa wayuu. Naaʼinmaasü maʼin tü aʼyatawaa sünainpünaakat Nuluwataaya Maleiwa (Mat. 6:33, TNM; 24:14; 28:19, 20).

10. (1) ¿Kasa natüjaaka aaʼu na wattakana naalii wayuu? (2) ¿Kasa pütchi nikeraajeetka Maleiwa namüin?

¹⁰ Na wattakana naalii wayuu natüjaa aaʼu ayateenain naya naaʼinmajüin Maleiwa süchikijee tü müliaa miyoʼusükat. Saashin tü Wiwüliakat «aaʼinmajüneena naya waneepia nütüma» chi joyotokoi saaʼu tü einaseekat. Jee müsia nikeraajeerü Maleiwa tü pütchi nümakat namüin na wane anneerüiruaʼaya waneejannuu münakana, tü makat: «Nümülialeena naya. Müiria nnojolüin ouktaa, mojuu aaʼin, aʼyalajaa, je saalii ayuulii» (Alat. Map. 21:3, 4).

11, 12. (1) Saashin Alateetkat Mapeena 7:16, 17, ¿kasa anasü naʼatapajaka na wattakana naalii wayuu? (2) ¿Kasa eeka süpüla naaʼinrüin na wane anneerüiruaʼaya waneejannuu münakana noʼunule sünain tü Outkajawaakat eere Sotuin Waaʼin Outuin Jesuu? (3) ¿Jamüsü naaʼinraka tia?

¹¹ Paashajeʼera Alateetkat Mapeena 7: 16, 17. Maaʼulu yaa, wainma na aʼyataalii nümüin Jeʼwaa müliakana sutuma jamü süka nnojoluin nneerü namaʼana jee süka joouluin atkawaa noumainpaʼa. Eetaashii na wawalayuu püreesakana sünainjee nanoula. Talatapejeʼe naaʼin na wattakana naalii wayuu süka natüjaain saaʼu ayateerüin naapüin Jeʼwaa namüin tü nepijaainjatkalü aaʼu otta tü anainjatkalü atuma nanoula noʼttaapa süchikijee sajaʼttinnüin tü kasa mojusükat. Najaʼttirapa Jeʼwaa tü kasa mojusü nuluwataakalü aaʼu Satanaa, naaʼinmajeena na wattakana naalii wayuu suulia tü kasa naaʼinrajatkat najaʼttirapa na mojulaashiikana, tü makalü aka saaʼin «suturula kaʼi». Süchikijee tü müliaa miyoʼusükat, nuʼunireena Jesuu na wayuu oʼttaainjanakana «sünainmüin wüin anasü», tia shia kateerüin noʼu waneepia. Anakatche maʼin tü kasa naʼatapajakat na wattakana naalii wayuu, müinnaʼaya naya nnojoluin outuin (Juan 11:26).

¹² Talatüsü maʼin naaʼin na wane anneerüiruaʼaya waneejannuu münakana sümaa tü naʼatapajakat nutuma Jeʼwaa otta nutuma Jesuu. Mayaainjeʼe nnojoluin nüneeküin Jeʼwaa naya süpüla chainjanain naya iipünaa, aishii maʼin naya nüpüla jee kojutushii naya nümüin maʼaka naaʼin na chainjanakana iipünaa. Na wane anneerüiruaʼaya waneejannuu münakana otta na chainjanakana iipünaa, eeshii süpüla naʼwaajüin Maleiwa otta Kürisüto. Naaʼinrüin tia noʼunule sünain tü Outkajawaakat eere Sotuin Waaʼin Outuin Jesuu.

13, 14. ¿Jamüshii woʼunuinjanaka sünain tü Outkajawaakat eere Sotuin Waaʼin Outuin Jesuu?

¹³ Eeshi waneeshiale neʼe chi ekakai tü pankat jee asakai tü wiinokot naʼakajee 1.000 wayuu antakana sünain tü Outkajawaakat eere Sotuin Waaʼin Outuin Jesuu. Wainma outkajaalee sainküin tü mmakat eere nnojoluin jaralüin eküin tü pankat jee asüin tü wiinokot. Naʼakajee na wayuu antakana sünain tia outkajawaakat wainmaleʼeya na kepiainjanakana yaa saaʼu tü Mmakat. ¿Jamüshii noʼunaka sünain tia outkajawaakat? Süpüla wayaawatüin saaʼu tia, jülüjataa waaʼin tü naaʼinrakat wainma wayuu oʼunakana sünain wanee miʼiraa shikiira kasaalüin wanee naʼaleewain. Oʼunushii naya sünain tia outkajawaakat süka alin napüla jee nakaalinjeein na kasaalüinjanakana. Müsia neʼe tü naaʼinrakat na wane anneerüiruaʼaya waneejannuu münakana, oʼunushii naya sünain tü Outkajawaakat eere Sotuin Waaʼin Outuin Jesuu süka alin Kürisüto napüla namaa na  chainjanakana iipünaa otta nakaalinjeein naya. Jee müsia kojutusü namüin katüinjatüin noʼu waneepia yaa saaʼu tü Mmakat saaʼu naapajiraain nikii Jesuu.

¹⁴ Na wane anneerüiruaʼaya waneejannuu münakana, oʼunushii naya sünain tü Outkajawaakat eere Sotuin Waaʼin Outuin Jesuu süka noonooin sümaa tü nuluwataakalü anain naya. Anuu nünüiki Jesuu namüin na aluwataaushikana soʼu nuutkajaain namaa: «Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya» (1 Cor. 11:23-26). Sümaʼinruʼu eein na chainjanakana iipünaa yaa saaʼu tü Mmakat, ayateenaʼaya na wane anneerüiruaʼaya waneejannuu münakana oʼunuin sünain tia outkajawaakat. Jee müsia, nounejaain wayuu maʼleekalia süpüla sürütkaain namaa.

15. ¿Kasa waaʼinrajatka waneʼewai wakua süpüla waʼwaajüin Maleiwa nümaa Jesuu sünain tü Outkajawaakat eere Sotuin Waaʼin Outuin Jesuu?

¹⁵ Sünain tü Outkajawaakat eere Sotuin Waaʼin Outuin Jesuu, waʼwaajeechi Maleiwa nümaa Kürisüto wanaa sümaa weeʼirajüin otta woʼuraajüin. Anuu sünülia tü pütchi ekirajünajatkalü anain soʼu juyakat tüü: «Kojuta wamüin tü naaʼinrakat Jeʼwaa nümaa Jesuu wapüleerua». Waapajapa tia pütchikat kojuteerü wamüin tü naaʼinrakat Jeʼwaa nümaa Jesuu wapüleerua. Sülatinnapa tü pankat sümaa tü wiinokot, soteerü waaʼin kasain kayaawasein tü nukuwaʼipakat Jesuu otta tü nüshakat. Soteerü waaʼin nuluwataain Jeʼwaa chi Nüchonkai süpüla outuinjachin nia saaʼu waainjala jee katüinjatüin woʼu (Mat. 20:28). Na aikana apüla chi Washi iipünaajachikai otta chi Nüchonkai, oʼuneena naya sünain tü Outkajawaakat eere Sotuin Waaʼin Outuin Jesuu.

16. ¿Kasa wanaawaka aluʼu nakuwaʼipa na chainjanakana iipünaa namaa na yaainjanakana saaʼu tü Mmakat?

¹⁶ Wanaawasü nakuwaʼipa noʼuluʼu Jeʼwaa na chainjanakana iipünaa namaa na yaainjanakana saaʼu tü Mmakat, aishii naya nüpüla. Nuluwataainjeseʼe chi Nüchonkai süpüla outajachin nia naaʼu napüshuaʼaleʼeya, jaʼitashii chainjanain naya iipünaa jee yaainjanain naya saaʼu tü Mmakat. Tü naatakalü aluʼu nakuwaʼipa na aneekuushikana noulia na yaainjanakana kepiain saaʼu tü Mmakat, shia süka chainjanain naya iipünaa. Waneepiainjanapejeʼe naya nümaa Maleiwa jee nümaa Kürisüto (Sal. 31:23). Nnojo motuin waaʼin naapüin Jeʼwaa chi naaʼinkai namüin napüshuaʼa na aʼyataashiikana nümüin, jaʼitashii chainjanain waya iipünaa jee yaainjanale waya kepiain saaʼu tü Mmakat.

17. ¿Kasa naʼatapajaka maʼin na aneekuushikana nutuma Maleiwa?

¹⁷ Na aneekuushikana nutuma Maleiwa nnojoishii naya joʼuujiraain sümaa eein suluʼu naaʼin chainjanain naya iipünaa. Niʼitaain Jeʼwaa suluʼu naaʼin cheein naya iipünaa. Jülüjasü naaʼin tia, naküjain shia nümüin Jeʼwaa noʼuraajapa  otta naʼatapajüin maʼin cheein naya iipünaa. Mayaainjeʼe nnojoluin natüjaain saaʼu jameerüin nakuwaʼipa süsoʼiraapa naaʼin süpüla chainjanain naya chaa iipünaa, naʼatapajüin maʼin nantüinjanain nümaʼanamüin Jeʼwaa, Jesuu, na aapieekana otta na wane aneekuushikana jee naʼatapajüinya naluwataainjanain wanaa namaa (Filip. 3:20, 21; 1 Juan 3:2).

18. ¿Kasa naʼatapajaka maʼin na wanee anneerüiruaʼaya waneejannuu münakana?

¹⁸ Na wanee anneerüiruaʼaya waneejannuu münakana, antüsü suluʼumüin naaʼin kepieein naya saaʼu tü Mmakat (Ecl. 3:11). Naʼatapajüin maʼin tia kaʼikat jee naʼatapajüin maʼin naʼyataajiraainjanain süpüla paʼaraiisüinjatüin tü Mmakat. Nakumajüinjanain nepia, napünajüinjanain jee nnojoliinjanain naya ayuulin sümaa napüshi (Is. 65:21-23). Naʼatapajüin maʼin noʼunajaain sainküinpünaa tü mmakat. Neʼraajee maʼin amüinrü tü uuchikalüirua, tü mojuuikalüirua otta tü palaakat, neʼraajeein maʼin tü kasa nukumajalakat Jeʼwaa. Tü naʼatapajakat maʼin shia aleewaleein maʼin naya nümaa Jeʼwaa.

19. (1) ¿Kasa eeka süpüla waaʼinrüin sünain tü Outkajawaakat eere Sotuin Waaʼin Outuin Jesuu? (2) ¿Joujeerü saainjünaka tia outkajawaakat soʼu juyakat tüü?

¹⁹ Napüshuaʼa na aʼyataaliikana nümüin Jeʼwaa eesü tü kasa naʼatapajakat nutuma (Jer. 29:11). Wapüshuaʼa wayakana waʼwaajeechi Maleiwa otta Kürisüto sünain tü Outkajawaakat eere Sotuin Waaʼin Outuin Jesuu. Waaʼinreerü tia sükajee kojutuin wamüin katüinjatüin woʼu waneepia natuma. Kojutusü maʼin wamüin wayakana anoujashiikana tia outkajawaakat. Soʼu tü juyakat 2021, aainjüneerü maatsoʼu 27, saawanoʼu nikerotapa chi Kaʼikai. Wainmeena na wayuu oʼunakana sünain tia outkajawaakat. Eejeenapejeʼe na wawalayuu kapüleejeenakana amüin outkajawaa süka süpülajünüin noulia tü naʼyataainkat nümüin Jeʼwaa. Eejeena na wawalayuu outkajaakana suluʼu tü kaatsetkat. Kasataalejeseʼe noʼunuin sünain tia outkajawaakat napüshuaʼa na wawalayuukana otta na wayuu ounejaanakana. Niʼreena naya Jeʼwaa, Jesuu otta na nüpüshi Jeʼwaa chakana iipünaa.