1. Kukwe keteiti kädriebare gätä kri kä 1935 yete, ¿ye matabare ño monso bati itibätä?

MONSO bati kä nämäne 18 biti yekwe ja ngökani ñöte kä 1926 ye ngwane. Rün aune meye ye Ni Ja Tötikaka Bibliabätä ñobätä ñan aune kä ye näire nitre testiko Jehovakwe ie nie nämäne kore. Nitre rüne yekwe monsotre brare nämäne nimä aune ngängän nibu ye tötikani kwetre Jehová mikakäre täte aune ja ngwankäre Jesukristo erere. Kä kwatire kwatire te Jesús ja nire biani ngwan nämäne törö jai ye näire ja mräkätre mada jökrä erere monso bati ne nämäne pan kwete aune vino ñain ñobätä ñan aune niara näin kä kwinbiti nämäne ruin ie yebätä. Akwa kukwe keteiti kädriebare kädekani “Nitre kwati krubäte” ye kukwe nuani kwe ye käkwe töi kwitani. Ja mräkä Joseph Rutherford käkwe kukwe ye kädriebare gätä kri kä 1935 ye ngwane, juta Washington Estados Unidos yete. ¿Kukwe meden mikani gare gätä kri yete?

2. Ja mräkä Rutherford käkwe kukwe kädriebare yete, ¿kukwe meden mrä mikani gare kwe?

² Nitre kwatibätä blitata Apocalipsis 7:9 yekänti ye abokän nire nire, ye ja mräkä Rutherford mikani gare kwe kukwe kädriebare yete. Nükebe ye ngwane, nitre kwati ye näin kä kwinbiti akwa ñaka gobrandi kwetre Kristobe rei erere ñobätä ñan aune ñaka ja ngwen metre krubäte yebätä ye nämäne ruin ja mräkätre kä ye näire ie. Nitre kwati krubäte ye ñaka dianinkä nänkäre kä kwinbiti, ñakare aune ye oveja mada abokän rabaite nire ja tare nikai kri ye ngwane aune nünandi kärekäre kwetre kä tibienbätä ye ja mräkä Rutherford mikani gare Bibliabiti *  (Apoc. 7:14). Jesukwe kukwe ne käbämikani: “Arato obeja mada tärä tikwe, nebrä abokän ñan tä ketaninkä ki nete. Ne jäntädi tikwe arato. Ne käkwe ti mikadi täte angwane tädi keteitibe jökrä, arato ni tädi itibe krakabiti” (Juan 10:16, NGT). Nitre ye testiko Jehovakwe ja ngwanka metre arato. Tätre tö ngwen nüna kärekäre kä bä nuäre yete kä tibienbätä (Mat. 25:31-33, 46). Kukwe mrä mikani gare ye käkwe nitre Jehová mikaka täte kwati töi kwitani ño aune ja mräkä bati kä nämäne 18 biti ye töi kwitani ño ye ani mike gare jai (Sal. 97:11; Prov. 4:18).

3, 4. ¿Gätä kri kä 1935 yete dre namani gare ja mräkätre kwati ie aune ñobätä?

³ Kukwe ütiäte krubäte namani bare gätä kri yete. Ja mräkä Rutherford käkwe kukwe ne ngwanintari nitre nämäne ja ükaninkrö yete ie: “¿Mun meden meden tä tö ngwen nünankäre kärekäre kä tibienbätä ye törba rükai krö ya?”. Ja mräkä iti nämäne yete siba tä mike gare erere, nitre 20,000 näre nämäne yete ye bäsi jökrä nükani krö. Aune ni kukwe kädriekä käkwe niebare: “¡Ni kwati krubäte nieta abokän medendre noko!”. Nitre kwati krubäte namani kise mete aune ngwänenkä kä jutobiti. Nitre nämäne nünaninkä krö ie nükani gare niaratre ñaka dianinkä nünankäre kä kwinbiti aune ñaka dianinkä üai deme yebiti. Jändrinaine nitre 840 näre käkwe ja ngökani ñöte gätä kri yete aune bäsi jökrä ye oveja mada.

⁴ Yete ja käne ja mräkätre kwati aune monso batibätä blitani párrafo käne yekänti, ñaka namani pan kwete aune vino ñain Jesús ja nire biani ngwan nämäne törö jai ye näire. Ja mräkä iti käkwe kukwe niebare ja töi bobrebiti ne erere ja nämäne ruin ja mräkätre kwati krubäte ie. Niebare kwe: “Kä 1935 ye ngwane tikwe pan kwetaba aune vino ñaba mrä. Jehovakwe ñaka ti töi mikaba tö ngwen nüna kä kwinbiti ie üai deme yebiti rükaba gare tie, ñakare aune nünandre kärekäre kä tibienbätä aune sribidre gwairebe kä tibien kwitakäre bä nuäre ye ie tö ngwanta tikwe” (Rom. 8:16, 17; 2 Cor. 1:21, 22). Yete ja käne nitre kwati krubäte ye kite nirien bäri aune tätre sribire gwairebe nitre dianinkä nänkäre kä kwinbiti kitera nemen braibe kä tibienbätä yebe.

5. ¿Nire ñaka niena pan kwete aune vino ñain ye tuin ño Jehovai?

⁵ Kä 1935 ye bitikäre, ¿nire ñaka namanina pan kwete aune vino ñain ye tuin ño Jehovai? Ni iti käkwe pan kwetadre aune vino ñadre dianinkä yebätä ruin ie, ¿akwa ja känenkäre ñaka dianinkä rükadre gare ie yebätä dre raba nemen bare? (1 Cor. 11: 28). Nitre ruäre nämäne pan kwete aune vino ñain ñobätä ñan aune dianinkä nünankäre kä kwinbiti nämäne ruin ietre. Akwa niaratre ñaka dianinkä rükadre ietre ngwane, ¿dre nuaindre kwetre? Naninte ietre ye mikadre gare kwetre jai, ñan rabadre pan kwete aune vino ñain mada aune Jehová mikai täte metre jankunu kwetre ngwane, Jehovakwe kain ngäbiti oveja mada ye erere. Ñaka niena pan kwete aune vino ñain Jesús ja nire biani ngwanta törö jai ye näire, akwa täbe niken gätä ütiäte yebätä ñobätä ñan aune tätre debe bien krubäte Jehová aune Jesús ie kukwe kwin nuainbare kräketre yebätä.

6. ¿Jesús tä dre nuainmana angeletre ie?

⁶ Ja tare nika kri ye kebera nüke. Ye medenbätä Apocalipsis kapitulo 7 tä blite nitre  kristiano dianinkä nänkäre kä kwinbiti aune nitre kwati krubäte mada yebätä ye mikadre gare jai nguseta ye ütiäte krubäte. Yete, murie kri ketabokä nitre gatekäre Jesukwe ketatemana jankunu angeletre ie nieta. Ñaka gibiadrekä kwetre mate kä tibienbätä nememe nitre kristiano dianinkä nänkäre kä kwinbiti ye rabadrera täte ngwane, ye abokän Jehovakwe kadre ngäbiti täte meden gärätä (Apoc. 7:1-4). Nitre dianinkä nänkäre kä kwinbiti ye rabaitre reire aune sacerdotere kä kwinbiti ja ngwanbätä metre (Apoc. 20:6). Nitre 144,000 dianinkä nänkäre kä kwinbiti ye ie kukwe kwin biain ye ngwane, Jehová, Jesús aune angeletrebätä kä rabai juto krubäte.

7. Apocalipsis 7:9, 10 tä niere erere, ¿nire nire tuani Juankwe aune nämänentre dre nuainne? (Üai kena täräkwatabätä mikadre ñärärä).

⁷ Nitre 144,000 rei aune sacerdote kädekaninte Juankwe, ye bitikäre ‘nitre kwati krubäte’ namaninte nire rü Armagedón yete jutuabare ie. Nitre kwati krubäte ye bäri kwati käne ye kräke aune nibe ye ñaka gare metre ta (ñäkädre Apocalipsis 7:9, 10 yebätä). Niaratre tä ‘dän bä ngwenbrere ngwen jabätä’, ye tä mike gare “ñaka ja mrite” nitre gobrainta Satanakwe yebe aune tä ja ngwen metre Ngöböi aune Kristo ie (Sant. 1:27). Tätre ngwänenkä krikri ñobätä ñan aune Jehová aune Jesús, Cordero Ngöbökwe, niaratre mikani kwäre yebätä. Ne madakäre, Jesús kädekani Reire Jehovakwe ye ka ngäbitita kwin kwetre ye bämikakäre tätre krikä ngwen kisete (Juan 12:12, 13, TNM mikadre ñärärä).

8. ¿Apocalipsis 7:11, 12 tä dre niere Jehová mräkätre kä kwinbiti yebätä?

⁸ Ñäkädre Apocalipsis 7:11, 12 yebätä. ¿Jehová mräkätre kä kwinbiti yebätä kä namani ño nieta? Nitre kwati krubäte ye jutuabare Jehová mräkätre ie ngwane, kä namani juto krubäte bätätre aune namani Ngöbö käikitekä tuani Juankwe. Jehová aune Jehová mräkätre kä kwinbiti yebätä kä rabai juto krubäte nitre kwati krubäte rabaite nire ja tare nikadi kri ye ngwane.

9. Apocalipsis 7:13-15 tä niere erere, ¿nitre kwati krubäte ye tä dre nuainne?

⁹ Ñäkädre Apocalipsis 7:13-15 yebätä. Nitre kwati krubäte yekwe dängutu ngwenbrere ye bätäninte Cordero däriete nieta Juankwe. Niaratre ye töi mrebe aune Jehovata kain ngäbiti mikata gare kukwe yebiti (Is. 1:18). Nitre ye ja dianinkä mento Jehová kräke aune ja ngökani ñöte. Jesukristo ja nire biani ni ütiäre yei tödekata krubäte kwetre aune tätre ja kete Jehovabe (Juan 3:36, TNM; 1 Ped. 3:21). Yebätä dibire rare raba Ngöbö mike täte jukwetari templo ja üaire yekänti. Tätre kukwe driere kä jutobiti aune nitre mike ja tötikaka aune Gobran Ngöbökwe mikata bäri käne kwetre kukwe jakwe yebiti ta (Mat. 6:33; 24:14, TNM; 28:19, 20).

10. ¿Nitre kwati krubäte ye ie dre gare metre aune kukwe meden käbämikata tuai nemen bare kwetre?

¹⁰ Nitre kwati krubäte ye Ngöbökwe ngübadi jankunu ja tare nikadi kri ye bitikäre ñobätä ñan aune Bibliabätä nieta Ngöböta täkänintibe kürä gobrankärebiti ye käkwe ja mikai jure niaratrebiti ye gare metre ietre. Ne madakäre, kä nerabe kukwe käbämikata ne ngübata oveja madakwe ye rabai bare: Ngöbökwe “okwä ñöi sökadite jökrä ietre amne ni ñan krütadre jire iti mda amne ñan ja müaidre jire chi mda amne ñan ja müaidre ja tare nikabtä” (Apoc. 21:3, 4).

11, 12. a) Apocalipsis 7:16, 17 tä niere erere, ¿kukwe meden kwin tä nitre kwati ye kräke? b) Jesús ja nire biani ngwanta törö jai ye näire, ¿oveja mada raba dre nuainne aune ñobätä tätre nuainne?

¹¹ Ñäkädre Apocalipsis 7:16, 17 yebätä. Nengwane, nitre ruäre Jehová mikaka täte tä ja tare nike mrö nika kisete, ngwian ñaka,  huelga aune rüta jabe ye köböite. Mada abokän tä ngite Ngöbö mikabätä täte. Akwa nire nire tä nitre kwati ye ngätäite siba ye ie gare niaratre rabaite kwäre nitre käme gaite ngwane, ye bitikäre mrö ja ngätäre aune ja üaire rabai krubäte kwetre kukwe ye tä kä mike jutobätä bätätre. Ja brukwä romonbiti Jehovakwe nitre gobrainta Satanakwe ye gaite ye bämikata kä trä ngire krubäte ye kwrere, akwa nitre kwati krubäte ye kriemikai kwe kukwe ye käne. Ja tare nikadi kri ye bitikäre Jesús näin nitre rabaitre kwäre ye ngwena “ñö ni mikaka nüne kärekäre” ye kokwäre. Kukwe kwin tä nitre kwati ne kräke ye bämike ja töite: nitre kwati krubäte nünanbarera ye ngätäite, niaratre ye aibe ñaka raba krüte jire (Juan 11: 26).

¹² Jehová aune Jesús tä tödekara kwin bien oveja mada ie yebätä tätre debe bien krubäte Jehová aune Jesús ie. Jehovakwe ñaka niaratre dianinkä nünankäre kä kwinbiti, akwa niaratre tare krubäte kwe nitre dianinkä nänkäre kä kwinbiti ye erere. Oveja mada aune nitre dianinkä nänkäre kä kwinbiti ye raba Ngöbö aune Kristo käikitekä. Kukwe keteitibiti raba nuainne ye abokän raba kwen Jesús ja nire biani ngwanta törö jai ye näirebätä.

13, 14. ¿Ñobätä ni jökrä kwandre Jesús ja nire biani ngwanta törö jai yebätä?

¹³ Nitre 1,000 näre tä kwen Jesús ja nire biani ngwanta törö jai ye näire, ye ngätäite itibe aibe näre tä pan kwete aune vino ñain. Ye abokän, konkrekasion bäsi jökrä te ni ñaka tä pan kwete aune vino ñain. Nitre bäsi jökrä tä kwen Jesús ja nire biani ngwanta törö jai ye näire ye tä tö ngwen nünankäre kärekäre kä tibienbätä. Akwa, ¿se ñobätä tätre kwen gätä yebätä? Köbö te ni iti tä ja mike gure yete ñokäre ja ketamukotre kwati kwe tä nüke ye erere bämika raba. Ja ketamukotre tä ni ye aune nire ben ja mikai gure kwe tarere bämikata kwetre kukwe yebiti. Ye erere arato, oveja mada ye tä niken köbö te Jesús ja nire biani ngwanta törö jai ye näire ñobätä ñan aune Kristo aune nitre dianinkä nänkäre kä kwinbiti tareta aune dimikata kwetre tö bämikai yebätä. Ne madakäre, Kristo ja nire biani ni ütiäre ye köböire raba nüne kärekäre kä tibienbätä yebätä tätre debe bien tö bämikai kukwe yebiti.

¹⁴ Kukwe mada ütiätebätä oveja mada tä  kwen Jesús ja nire biani ngwanta törö jai yebätä ñobätä ñan aune kukwe ye nuain mananbare Jesukwe tö mikai täte yebätä. Jesukwe kukwe ye ükaninte nitre apóstol ja ngwanba metre yebe ngwane, niebare kwe ietre: ‘Käre munkwe nuain ti ngwiankrä töre jae’ (1 Cor. 11:23-26). Aisete nitre dianinkä nänkäre kä kwinbiti täi kä tibienbätä ngwane, oveja mada kwandi jankunu Jesús ja nire biani ngwanta törö jai yebätä. Ne madakäre, nitre jökrä nübaita kwetre jabe köbö ütiäte yebätä.

15. ¿Ni itire itire raba Ngöbö aune Kristo käikitekä ño Jesús ja nire biani ngwainta törö jai ye näire?

¹⁵ Jesukristo ja nire biani ngwandi törö jai ye näire, ni raba Ngöbö aune Kristo käikitekä kantata aune orata gwaire yebiti. Kukwe kädriei kä nete kräke kädekata: “Ngöbö aune Kristo kukwe nuainbare ni kräke yebätä nita debe bien ye nikwe bämikadre”. Kukwe kädriei ye nikwe kukwe nuai ngwane, ni törbai debe bianbätä bäri Jehová aune Kristo ie. Pan aune vino ngökai jai kwärikwäri ngwane, ye tä Jesús ngrabare aune därie bämike ye nire nire kwandi köbö ye näire käkwe ngwandi törö jai. Jehovakwe monso kwe tuanimetre murie ketadre ni kräke ye köböire ja nire raba nemen nikwe ye nikwe ngwain törö jai arato (Mat. 20:28). Nire nire tä ni Rün kä kwinbiti aune Monso kwe tarere ye kwandi Jesús ja nire biani ngwandi törö jai ye näire.

16. ¿Kukwe medenbiti nitre dianinkä nänkäre kä kwinbiti aune oveja mada ye ja erebe?

¹⁶ Nitre dianinkä nänkäre kä kwinbiti aune oveja mada ye ütiäte ja erebe Jehová kräke. Niaratre ye tare ja erebe Jehovakwe. Ne madakäre, Monso tare kwe yebiti nitre dianinkä nänkäre kä kwinbiti aune oveja mada ye ütiä biani ja närebe kwe. Kukwe keteitibe ñaka ja erebe kwetre, ye abokän tätre tö ngwen kukwe ñaka ja erebe ie. Akwa rabadre ja ngwen metre Ngöböi aune Kristo ie (Sal. 31:23). Ngöbö raba üai kwe yebiti nitre jökrä niara mikaka täte ye dimike ye nikwe ñaka käi kwitadrekä jabiti. Nitre dianinkä nänkäre kä kwinbiti o oveja mada ye ie Jehová raba üai deme bien tätre ribere jai nuäi ye ererebätä.

17. ¿Nitre dianinkä nänkäre kä kwinbiti tö dre tuabätä nemen bare?

¹⁷ Nitre dianinkä nänkäre kä kwinbiti ye ñaka tä därere nünankäre kä kwinbiti, ñakare aune Jehovata nüna kä kwinbiti ye mike niaratre brukwäte. Niaratre töita kukwe kwin yebätä, tä kädekete orasionte aune tö kukwe kwin ye ie ja kräke kä kwinbiti. Ngrabare ja üairebiti ño rabai kwetre ye ñaka gare jire ietre, akwa tädi keteitibe Jehová, Jesús, angeletre, nitre dianinkä mada mada yebe aune rabai siba Gobran Ngöbökwe yete ye tö tuai nüke jötrö (Filip. 3:20, 21; 1 Juan 3:2).

18. ¿Oveja mada tö dre tuabätä nüke jötrö?

 ¹⁸ Oveja mada ye töita nünanbätä kärekäre kä tibienbätä, nitre kä tibienbätä töita nierare kore (Ecl. 3:11). Köbö te gwairebe kä tibien kwitai bä nuäre kwetre, ju sribei kwetre jai, nura nökai kwetre jai, kriblü bä nuäre nökai kwetre jai aune rabai nüne kwin mräkätre kwe yebe ye tö tuabätä nüke jötrö (Is. 65:21-23). Raba dikekä kä jökräbiti tibien, kä tokwä bätäkä ngwarbe, kri bätäkä ngwarbe aune mren bätäkä ngwarbe mike ñärärä aune jondron sribebare Jehovakwe ye mike gare kwin jai ye tö tuabätä nüke jötrö. Akwa rabaitre ja kete bäri kwin Jehovabe aune nökrö bäri Jehová ken köbö kwatire kwatire ye bäri käi juto bätätre.

19. ¿Jesús ja nire biani ngwainta törö jai yete dre nuain raba aune ñongwane ngwain törö jai kä nete?

¹⁹ Jehovata ni niara mikaka täte itire itire ie tödekara kwin bien (Jer. 29:11). Jesús ja nire biani ngwanta törö jai ye köböire ni jökrä raba kukwe ütiäte krubäte nuainne: Ngöbö aune Kristo käikitekä ñobätä ñan aune niaratre köböire ni raba nüne kärekäre yebätä. Erametre, Jesús ja nire biani ngwanta törö jai ye gätä bäri ütiäte nitre kristiano metre kräke. Kä 2021 nete, köbö ye ngwain törö jai sábado 27 marzo ñänä näin nekä ye bitikäre. Kä nete, töi jämebiti nitre kwati krubäte raba köbö ütiäte ye ngwen törö jai, mada abokän käkwe nuaindi rüeta nakainkä yebiti ta aune mada tä ngite akwa yebiti ta köbö ye ngwandi törö kwetre jai. Konkrekasion jökrä, grupo jökrä aune ni jökrä käkwe köbö ütiäte ne ngwandre törö jai Jehová, Jesús aune Jehová mräkä ja üairebiti kwe ye okwäbiti.