1. Oshipopiwa osho sha li sha yandjwa poshoongalele shomo 1935, osha li sha kuma ngahelipi omulumenhu umwe omunyasha?

OMULUMENHU umwe omunyasha okwa li e na omido 18 eshi a ninginifwa mo 1926. Ovadali vaye ova li Ovakonakoni vOmbibeli pefimbo opo, sha hala kutya Eendombwedi daJehova. Ova li ve na ovanamati vatatu novanakadona vavali, ovo ve va honga okudja kounona okulongela Jehova Kalunga nokuhopaenena Jesus Kristus. Ngaashi Omukonakoni wOmbibeli keshe pefimbo opo a li ha ningi, omulumenhu oo omunyasha okwa li ha kufa ombinga mokulya omungome nokunwa omaviinyu omudo keshe pOuvalelo wOmwene. Ashike nande ongaho, eteelelo laye li na sha nonghalamwenyo ola li la lundululwa koshipopiwa sha fimana shi na oshipalanyole “Ongudu inene.” Oshipopiwa osho osha li sha yandjwa mo 1935 komumwatate J. F. Rutherford poshoongalele osho sha li sha ningilwa moWashington, D.C., moU.S.A. Oshike sha li sha hololwa poshoongalele osho?

2. Oshili itunhula ilipi omumwatate Rutherford a li a holola moshipopiwa shaye?

² Omumwatate Rutherford okwa li a yelifa moshipopiwa shaye kutya oolyelye tava ka kala “ongudu inene,” oyo ya tumbulwa mEhololo 7:9. Pefimbo opo, Ovakonakoni vOmbibeli ova li tava diladila kutya ongudu oyo inene oyaavo navo tava ka ya meulu, ovo ve na eitavelo linini okuyelekanifa naali lovavaekwa. Omumwatate Rutherford okwa li a longifa Omishangwa opo a yelife kutya ongudu inene inai hoololwa i ye meulu, ndele  oi li eedi dimwe * daKristus, odo tadi ka xupa “moudjuu munene” notadi ka kala nomwenyo fiyo alushe kombada yedu. (Eh. 7:14) Jesus okwa udaneka kutya: “Ondi na eedi dimwe dihe fi domoshiunda eshi; nado ondi na oku di eta mo ndele tadi ka uda ondaka yange, notadi ka kala moshiunda shimwe, di na omufita umwe.” (Joh. 10:16) Eedi dimwe otadi ulike kEendombwedi daJehova didiinini, odo di na eteelelo loku ka kala nomwenyo fiyo alushe mOparadisa kombada yedu. (Mat. 25:31-33, 46) Natu ka taleni nghee eudeko olo lipe li na sha noshili yOmbiibeli la lundulula okukalamwenyo kwovapiya vaJehova vahapu, mwa kwatelwa omumwatate oo womido 18. — Eps. 97:11; Omayel. 4:18.

3-4. Poshoongalele shomo 1935, ovanhu omayovi ova li va uda ko shike shi na sha neteelelo lavo, nomolwashike?

³ Osha li shitunhula eshi omupopi a li a pula ovapwilikini ta ti: “Amushe ovo mu na eteelelo loku ka kala nomwenyo fiyo alushe kombada yedu fikameni?” Omumwatate umwe oo a li poshoongalele osho okwa popya kutya ovanhu ve dulife petata lovakalipo 20 000 ova li va fikama. Opo nee omumwatate Rutherford okwa ti: “Tala ongudu inene!” Konima yaasho, keshe umwe okwa li a ingida pombada a tunhukwa. Aveshe ovo va li va fikama ova li va didilika kutya Jehova ine va hoolola va ka kale nomwenyo meulu. Ova li ve shii kutya inava vavaekwa nomhepo yaKalunga. Mefiku la shikula ko loshoongalele, ovanhu 840 ova li va ninginifwa ve li Eendombwedi, navahapu vomuvo ova li eedi dimwe.

⁴ Konima yoshipopiwa osho, omunyasha oo a tumbulwa metetekelo nosho yo vamwe omayovi okudja opo ova li va efa po okukufa ombinga mokulya omungome nokunwa omaviinyu pOuvalelo wOmwene. Omumwatate umwe omulininipiki okwa li a ulika nghee ye nosho yo vahapu va li ve udite a ti: “Onda li nde lixula okulya omungome nokunwa omaviinyu pEdimbuluko lomo 1935. Onda li nda didilika kutya Jehova ka li a hoolola nge okupitila momhepo yaye iyapuki kutya ondi na eteelelo lomeulu, ndele ponhele yaasho, ondi na eteelelo loku ka kala kombada yedu nokukufa ombinga moilonga yoku li ninga oparadisa.” (Rom. 8:16, 17; 2 Kor. 1:21, 22) Okudja opo, ongudu inene oya enda tai hapupala neenghono noya kala tai yambidida oshixupe * shovavaekwa.

5. Jehova okwa tala ko ngahelipi ovo va li va efa po okukufa ombinga pOuvalelo wOmwene?

⁵ Jehova okwa tala ko ngahelipi ovo va li va efa po okukufa ombinga pOuvalelo wOmwene konima yEdimbuluko lomo 1935? Ongahelipi ngeenge umwe oo a ninginifwa e li Ondombwedi kunena okwa kufa ombinga mokulya omungome nosho yo mokunwa omaviinyu pOuvalelo wOmwene, ndele lwanima ta ka didilika kutya i na vaekwa shili? (1 Kor. 11:28) Vamwe ova li hava kufa ombinga pOuvalelo wOmwene molwaashi kava li ve udite ko shi na sha neteelelo lavo. Ashike ngeenge ove livele shili ombedi kutya ova ninga epuko nokweefa po okukufa ombinga, ndele tava twikile okulongela Jehova noudiinini, Jehova ote ke va tambula ko ve li oshitukulwa sheedi dimwe. Ndele nonande ihava kufa ombinga mokulya omungome nokunwa omaviinyu, ove na natango okukala hava kala pEdimbuluko, molwaashi  kungaho otava ulike kutya ova pandula osho Jehova naJesus ve va ningila.

6. Jesus okwa li a lombwela ovaengeli va ninge shike?

⁶ Molwaashi oudjuu munene ou li popepi, otashi tu tu omukumo okukundafana osho sha popiwa mEhololo etukulwa 7 shi na sha nOvakriste ovavaekwa nosho yo ongudu inene yeedi dimwe. Jesus okwa lombwela ovaengeli va twikile okukelela eemhepo nhee di na sha nehanauno. Ovaengeli ovo kave na okweefa eemhepo odo di pepe kombada yedu fiyo osheshi ovavaekwa aveshe Ovakriste va didilikwa, sha hala kutya va hokiwa kuJehova. (Eh. 7:1-4) Omolwoudiinini wovamwaxe vaKristus ovavaekwa, otava ka kala eehamba nosho yo ovapristeri pamwe naye meulu. (Eh. 20:6) Aveshe ovo ve li oshitukulwa shoukwaneumbo waKalunga womeulu ova halelela oku ka mona ovavaekwa 144 000 eshi tava ka mona ondjabi yomeulu.

7. Metwokumwe nEhololo 7:9, 10, Johannes okwa mona oolyelye memoniko, nova li tava ningi shike? (Tala efano kombada yoshifo.)

⁷ Konima eshi Johannes a popya shi na sha neehamba nosho yo ovapristeri 144 000, okwa mona vali oshinima shimwe shihokwifa, “ongudu inene” yaavo va xupa puArmagedon. Mepingafano nongudu yotete, ongudu ei onhivali oi li momuvalu munene noya nyengana okuvalwa. (Lesha Ehololo 7:9, 10.) Oya “djala oikutu itoka,” osho tashi ulike kutya oye likaleka kokule “nokuhenoukoshoki” kwounyuni waSatana noya kala idiinini kuKalunga nokuKristus. (Jak. 1:27) Oya ingida pombada ya ti kutya oya xupifwa kwaasho ya ningilwa kuJehova naJesus, Odjona yaKalunga. Kakele kaasho, oi kwete oivale yomilunga momake ayo, osho tashi ulike kutya oya tambula ko nehafo Jesus e li Ohamba ya nangekwa po kuJehova. — Yelekanifa naJohannes 12:12, 13.

8. Ehololo 7:11, 12 otali tu lombwele shike shi na sha noukwaneumbo waJehova womeulu?

⁸ Lesha Ehololo 7:11, 12. Ovakalimo vomeulu ova li ve linyenga ngahelipi eshi va mona ongudu inene? Johannes okwa mona oukwaneumbo waJehova womeulu aushe wa hafa nowa tanga Jehova eshi va mona ongudu oyo inene. Oukwaneumbo waJehova womeulu otau ka kala wa hafa neenghono eshi tau ka mona exunganeko olo tali wanifwa, eshi ongudu inene tai ka pita moudjuu munene.

9. Metwokumwe nEhololo 7:13-15, oshike osho ongudu inene tai ningi paife?

⁹ Lesha Ehololo 7:13-15. Johannes okwa shanga a ti kutya ongudu inene oya ‘kosha oikutu yayo mohonde yOdjona i kale itoka.’ Osho osha hala kutya ove na eliudo la koshoka novayuki koshipala shaJehova. (Jes. 1:18) Ove li Ovakriste va ninginifwa, ve na eitavelo la kola mekuliloyambo nove na ekwatafano liwa naJehova. (Joh. 3:36; 1 Pet. 3:21) Ova wana okukala komesho yolukalwapangelo laKalunga molwaashi ohave mu ‘longele oilonga iyapuki omutenya noufiku’ moshihale shokombada yedu shotembeli yaye yopamhepo. Nokuli nopaife ohava longo noudiinini moilonga ya fimanenena yokuudifa Ouhamba nokuninga ovanhu ovahongwa, molwaashi Ouhamba waKalunga oo oshinima sha fimanenena kuvo. — Mat. 6:33; 24:14; 28:19, 20.

10. Oshike osho ongudu inene ya udanekelwa, neudaneko lilipi tai ka mona tali wanifwa?

¹⁰ Ongudu inene oyo tai ka xupa poudjuu munene oya udanekelwa kutya Kalunga ota ka twikila noku i fila oshisho, molwaashi oo “e li kolukalwapangelo ote ke va amena.” Eudaneko olo eedi dimwe da kala da teelela nodjuulufi li wanifwe otali ti: “[Kalunga] ota ka feta po omahodi aeshe momesho avo, nefyo itali ka  kala po vali, ile oluhodi, okulila nouyahame itau ka kala po vali.” — Eh. 21:3, 4.

11-12. (a) Ngaashi sha popiwa mEhololo 7:16, 17, ongudu inene oya tuvikililwa omanangeko noupuna elipi? (b) Oshike osho eedi dimwe di na okuninga pEdimbuluko, nomolwashike?

¹¹ Lesha Ehololo 7:16, 17. Ovapiya vamwe vaJehova kunena otava mono oixuna, molwaashi kave na oimaliwa ya wana yokulanda oikulya, ile tava mono oixuna omolwomakuyunguto opashiwana ile omolwoita. Vamwe ova tulwa modolongo omolweitavelo lavo. Ashike nande ongaho, ongudu inene oya hafa molwaashi oi shii kutya ngeenge oya xupu mounyuni ou wa nyonauka, otai ka kala i na oikulya ya henena yopalutu noyopamhepo. Ngeenge ounyuni woukolokoshi waSatana owa hanaunwa po, Jehova ota ka shilipaleka kutya ongudu inene oya amenwa koupyuhandu waye oo wa fa ‘etango tali xwike.’ Konima youdjuu munene, Jesus ota ka wilika aveshe ovo tava ka xupa kombada yedu e va twale ‘komeva omwenyo waalushe.’ Diladila ashike kongudu inene oyo i na eteelelo litunhula! Ovanhu omabiliyona aveshe ovo tava kala kombada yedu, itava ka fya vali! — Joh. 11:26.

¹² Eedi dimwe otadi pandula neenghono Jehova naJesus eshi di na eteelelo litunhula! Nonande inadi hoololwa di ka kale nomwenyo meulu, Jehova okwe di lenga nodi na ondilo momesho aye ngaashi ashike ovavaekwa. Eengudu adishe odo dopavali ohadi tange Kalunga nosho yo Kristus. Onghedi imwe omo hadi shi ningi, omokukala pOuvalelo wOmwene.

13-14. Omolwashike keshe umwe e na okukala pEdimbuluko lefyo laKristus?

¹³ Omido opo da di ko, omunhu umwe womovanhu 1 000 ovo hava kala pEdimbuluko, oha kufa ombinga mokulya omungome nokunwa omaviinyu. Momaongalo mahapu kamu na ovo hava kufa ombinga pEdimbuluko. Vahapu vomwaavo hava kala pEdimbuluko ove na eteelelo loku ka kala kombada yedu. Ndele mbela omolwashike hava kala pOuvalelo wOmwene? Ohava kala po netomheno la faafana naalo lovanhu ovo hava kala pohango yookaume kavo. Ohava i kohango molwaashi ova hala okuulika kutya ove hole notava yambidida ovo tava hombola. Sha faafana, eedi dimwe nado ohadi kala pEdimbuluko molwaashi ohadi kala da hala okuulika kutya odi hole notadi yambidida Kristus nosho yo ovavaekwa. Eedi dimwe  natango ohadi kala pEdimbuluko opo di ulike olupandu li na sha nekuliloyambo laJesus, olo le shi ningifa tashi shiiva opo ndi ka kale nomwenyo fiyo alushe kombada yedu.

¹⁴ Etomheno likwao la fimana molwaashi eedi dimwe hadi kala pEdimbuluko, otadi dulika kelombwelo laJesus. Eshi Jesus a dika po oshikando shotete ouvalelo we likalekelwa pamwe novayapostoli vaye ovadiinini, okwe va lombwela a ti: “Kaleni hamu shi ningi okudimbuluka nge.” (1 Kor. 11:23-26) Onghee hano, ove na okutwikila okukala pOuvalelo wOmwene ofimbo ovavaekwa vamwe ve li natango momwenyo kombada yedu. Eedi dimwe ohadi shivi keshe umwe a kale pEdimbuluko pamwe nado.

15. Ongahelipi hatu dulu okutanga Kalunga nosho yo Kristus pEdimbuluko?

¹⁵ PEdimbuluko, ohatu mono omhito yokutanga Kalunga naKristus okupitila meimbilo nomeilikano. Oshipopiwa shEdimbuluko osho tashi ka yandjwa neudo oshi na oshipalanyole tashi ti: “Ulika kutya owa pandula osho Kalunga naKristus ve ku ningila.” Otashi ka kulika olupandu letu lokuhola Jehova naKristus. Eshi omadidiliko tae ke litambekidwa, ovapwilikini otava ka dimbulukifwa kutya otaa faneke olutu nosho yo ohonde yaJesus. Ohatu ka dimbulukifwa yo kutya Jehova okwa yandja Omona waye a fye ponhele yetu opo tu dule oku ka kala nomwenyo. (Mat. 20:28) Keshe umwe oo e hole Tate yetu womeulu nosho yo Omona waye ota ka kala a hala okukala pEdimbuluko.

16. Ovavaekwa nosho yo eedi dimwe ova faafana meenghedi dilipi?

¹⁶ Ovavaekwa nosho yo eedi dimwe aveshe ove na ongushu i fike pamwe koshipala shaKalunga. Oku hole eengudu adishe shi fike pamwe. Kakele kaasho, okwa yandja ofuto i fike pamwe, omwenyo wOmona waye omuholike, opo e lilandele ovavaekwa nosho yo eedi dimwe. Eyooloko pokati keengudu odo mbali ololo kutya odi na eteelelo la yoolokafana. Eengudu adishe dopavali odi na okukala didiinini kuKalunga nosho yo kuKristus. (Eps. 31:23) Dimbuluka yo kutya, omhepo iyapuki yaKalunga ohai longo shi fike pamwe kufye atushe. Osho osha hala okutya Jehova oha yandje omhepo yaye iyapuki kukeshe umwe womufye pauhandimwe she likolelela paemhumbwe daye.

17. Oshixupe shovavaekwa osha teelela nodjuulufi shike?

¹⁷ Ovakriste ovavaekwa inava dalwa ve na eteelelo lomeulu. Kalunga oye a tula eteelelo la tya ngaho momitima davo. Ohava diladila kombinga yeteelelo lavo, hava ilikana kombinga yalo nova halelela oku ka pewa ondjabi yavo yomeulu. Kave shii nokuli kutya otava  ka kala ve na omalutu opamhepo a fa peni. (Fil. 3:20, 21; 1 Joh. 3:2) Ashike nande ongaho, ova halelela oku ka mona Jehova, Jesus, ovaengeli nosho yo ovavaekwa ovanyumunwa, noku ka kala pamwe navo mOuhamba womeulu.

18. Oshike osho eedi dimwe da teelela nodjuulufi?

¹⁸ Eedi dimwe ohadi hafele eteelelo olo keshe umwe e na loku ka kala nomwenyo fiyo alushe kombada yedu. (Omuud. 3:11) Oda teelela nodjuulufi efiku li fike eshi tadi ka kwafela mokuninga edu alishe oparadisa. Ova teelela nodjuulufi eshi tava ka tunga omaumbo avo vene, tava ka twika oikunino yavo nokutekula ovana vavo ve na oukolele wa wanenena. (Jes. 65:21-23) Ova teelela nodjuulufi eshi tava ka talela po eenhele di lili noku lili oku kombada yedu, ngaashi eemhunda, eefuka, omafuta noku ka konakona eshito laJehova alishe pauyadi. Komesho yaaishe, otava ka kala va tunhukwa okushiiva kutya ekwatafano lavo naJehova otali ka enda tali kolo nokupamenena.

19. Edimbuluko ohali pe keshe umwe womufye omhito ilipi, notali ka kala ko naini omudo ou?

¹⁹ Jehova okwa pa keshe umwe womovapiya vaye e mu liyapulila eteelelo litunhula li na sha nonakwiiwa. (Jer. 29:11) Edimbuluko lefyo laKristus ohali pe keshe umwe womufye omhito itunhula yokutanga Kalunga nosho yo Kristus omolwaashishe osho ve tu ningila tu dule oku ka hafela omwenyo waalushe. Onghee hano, Edimbuluko oli li okwoongala kwa fimanenena kOmukriste washili keshe oko haku ningwa omudo keshe. Edimbuluko otali ka ningwa konima yeningino letango mOlomakaya, 27 Marsa 2021. Ovanhu vahapu neudo, otava ka dula okukala pokwoongala oko kwa fimanenena, molwaashi ove li meenhele da manguluka. Vamwe otava ka kala po nonande ova taalela omapataneko. Vamwe otava ka danena Edimbuluko modolongo. Jehova, Jesus, ovaengeli nosho yo ovavaekwa ovo va nyumunwa, ova teelela omaongalo aeshe, eengudu domaongalo nakeshe umwe pauhandimwe a ka kale pEdimbuluko olo la denga mbada.