3-زەرتتەۋ ماقالاسى
ۇلى جاماعات قۇدايدى جانە ٴماسىحتى ماداقتايدى
«قۇتقارىلعانىمىز ٷشىن ٴبىز تاقتا وتىرعان قۇدايىمىز بەن توقتىعا بورىشتىمىز» (ايان 7:10).
14-ٵن جەردىڭ جاڭا پاتشاسىن داڭقتايىق!
اڭداتپا *
1. 1935-جىلى وتكەن كونگرەستە ايتىلعان بايانداما ٴبىر جاس ەر باۋىرلاسقا قالاي اسەر ەتتى؟
كيەلى كىتاپ زەرتتەۋشىلەرىنىڭ * وتباسىندا تاربيەلەنگەن ٷش ۇل مەن ەكى قىز ەحوباعا قىزمەت ەتۋدى جانە يسا ماسىحكە ەلىكتەۋدى ۇيرەندى. اراسىنداعى ٴبىر ۇل 1926-جىلى 18 جاسىندا شومىلدىرۋ راسىمىنەن ٶتتى. بارلىق كيەلى كىتاپ زەرتتەۋشىلەرى سياقتى، بۇل جاس ەر باۋىرلاس تا كوكتەگى ومىرگە ۇمىتتەندى. سوندىقتان ول جىل سايىن يەمىزدىڭ كەشكى اسىندا نان مەن شاراپتان ٴدام تاتىپ ٴجۇردى. ٴبىراق «ۇلى جاماعات» دەپ اتالاتىن تاريحي باياندامادان كەيىن ونىڭ كوزقاراسى تۇبەگەيلى وزگەردى. بۇل باياندامانى 1935-جىلى رۋتەرفورد باۋىرلاس ۆاشينگتوندا (اقش) وتكەن كونگرەستە ايتقان ەدى. بۇل كونگرەستە قانداي شىندىق ايقىن بولدى؟
2. رۋتەرفورد باۋىرلاستىڭ بايانداماسىندا قانداي شىندىق ايقىندالدى؟
2 رۋتەرفورد باۋىرلاس ٶزىنىڭ بايانداماسىندا ايان 7:9 داعى «ۇلى جاماعات» كىمدەردى بىلدىرەتىنىن ٴتۇسىندىردى. بۇعان دەيىن كيەلى كىتاپ زەرتتەۋشىلەرى ۇلى جاماعات تا كوككە بارادى، ٴبىراق مايلانعاندارعا قاراعاندا ازىراق ادال بولعاندىقتان، يسامەن بىرگە بيلىك ەتپەيدى دەپ ويلاعان. رۋتەرفورد باۋىرلاس كيەلى جازبالاردى قولدانىپ، ۇلى جاماعاتتىڭ كوككە بارۋ ٷشىن تاڭدالماعانىن، ٴبىراق ولار «زور الاپاتتان» امان ٶتىپ، جەر بەتىندە ماڭگى ٶمىر سۇرەتىن ٴماسىحتىڭ باسقا قويلارىنا * جاتاتىنىن ايتتى (ايان 7:14). يسا: «مەنىڭ بۇل قوراداعىدان باسقا دا قويلارىم بار. سولاردى دا الىپ كەلۋىم كەرەك، ولار مەنىڭ داۋسىما قۇلاق سالادى. سوندا ٴبارى ٴبىر باعۋشىسى بار ٴبىر وتار بولادى»،— دەپ ۋادە ەتكەن (جوح. 10:16). بۇل قوي تارىزدەس ادامدار جەر بەتىندە ورنايتىن جۇماقتا ماڭگى ٶمىر ٴسۇرۋدى ٷمىت ەتەتىن ەحوبانىڭ ادال كۋاگەرلەرىن بىلدىرەدى (مات. 25:31—33، 46). قازىر رۋحاني جارىقتىڭ جارقىراي تۇسكەنى ەحوبانىڭ كوپتەگەن قىزمەتشىلەرىنىڭ، سونىڭ ىشىندە الگى 18 جاستا بولعان ەر باۋىرلاستىڭ ٶمىرىن قالاي وزگەرتكەنىن كورەيىك (ٴزاب. 97:11؛ ناق. س. 4:18).
مىڭداعان ادامنىڭ ٶمىرىن وزگەرتكەن جاڭا تۇسىنىك
3، 4. 1935-جىلى وتكەن كونگرەستە مىڭداعان ادام نەنى ٴتۇسىندى جانە قالاي؟
3 بۇل كونگرەستىڭ ايتۋلى ٴبىر ٴساتى بولدى. بايانداماشى تىڭداۋشىلاردان: «جەردە ماڭگى ٶمىر سۇرۋگە ۇمىتتەنەتىندەر، ورىندارىڭنان تۇرىڭدارشى»،— دەپ ٶتىندى. سول كونگرەستە بولعان ٴبىر ەر باۋىرلاستىڭ ايتۋىنشا، سوندا وتىرعان 20000 داي ادامنىڭ جارتىسىنان كوبى ورنىنان تۇرەگەلىپتى. سوندا رۋتەرفورد باۋىرلاس: «قاراڭدارشى! مىنەكي، ۇلى جاماعات!»— دەپ جار سالدى. ارتىنان ٴبارى قاتتى داۋىستاپ قۋانىشتارىن ٴبىلدىردى. ورنىنان تۇرعاندار وزدەرىنىڭ كوككە بارۋ ٷشىن تاڭدالماعاندارىن جانە قۇداي رۋحىمەن مايلانباعاندارىن ٴتۇسىندى. كونگرەستىڭ كەلەسى كۇنى 840 ادام شومىلدىرۋ راسىمىنەن ٶتتى. ولاردىڭ دا باسىم بولىگى باسقا قويلاردىڭ قاتارىنان بولدى.
4 سول باياندامادان كەيىن، جوعارىدا ايتىلعان جاس ەر باۋىرلاس پەن باسقا دا مىڭداعان باۋىرلاس يەمىزدىڭ كەشكى اسىندا نان مەن شاراپتان ٴدام تاتۋدى دوعاردى. كوپشىلىكتىڭ سەزىمىن ٴبىلدىرىپ، ٴبىر ەر باۋىرلاس بىلاي دەدى: «مەنىڭ رامىزدەردەن سوڭعى رەت ٴدام تاتقان كەزىم سول 1935-جىل بولدى. ناقتى تۇسىنگەنىم، ەحوبا مەنى كوكتەگى ومىرگە تاڭداعانىن كيەلى رۋحىمەن بىلدىرگەن جوق. مەنىڭ ٷمىتىم — جەر بەتىندە ٶمىر ٴسۇرىپ، جەردى جۇماققا اينالدىرۋعا اتسالىسۋ» (ريم. 8:16، 17؛ قور. 2-ح. 1:21، 22). سول ۋاقىتتان بەرى ۇلى جاماعاتقا جاتاتىنداردىڭ سانى ٶسىپ كەلەدى. ولار مايلانعانداردىڭ تامتىعىمەن * بىرگە يىق تىرەسە ەڭبەكتەنىپ ٴجۇر.
5. ەحوبا ەسكە الۋ كەشىندە رامىزدەردەن ٴدام تاتۋدى دوعارعاندارعا قالاي قارايدى؟
5 ەحوبا 1935-جىلدان كەيىن رامىزدەردەن ٴدام تاتۋدى دوعارعاندارعا قالاي قارايدى؟ ال وزدەرىن مايلانعان دەپ ويلاپ نان مەن شاراپتان ٴدام تاتقان، ٴبىراق كەيىن مايلانباعانىن تۇسىنگەن بۇگىندەگى كۋاگەرلەرگە شە؟ (قور. 1-ح. 11:28). كەيبىرەۋلەر ۇمىتتەرىنىڭ قانداي ەكەنىن تۇسىنبەي رامىزدەردەن ٴدام تاتقان. ەگەر ولار قاتەلەسكەندەرىن شىن جۇرەكتەن مويىنداپ، رامىزدەردەن ٴدام تاتۋدى توقتاتسا جانە ەحوباعا ٵرى قاراي ادال قىزمەت ەتەر بولسا، ەحوبا ولاردى ٴسوزسىز باسقا قويلاردىڭ مۇشەلەرى رەتىندە قابىلدايدى. ولار نان مەن شاراپتان ٴدام تاتپاسا دا، ەحوبا مەن يسانىڭ بەرگەن تولەم قۇرباندىعىنا دەگەن شەكسىز ريزاشىلىقتارىن ٴبىلدىرۋ ٷشىن ەسكە الۋ كەشىنە قاتىسادى.
تاماشا ٷمىت
6. يسا پەرىشتەلەرگە قانداي بۇيرىق بەردى؟
6 زور الاپات تاياپ قالعاندىقتان، ايان كىتابىنىڭ 7-تاراۋىندا جازىلعان مايلانعان ماسىحشىلەر مەن ۇلى جاماعات جايلى ايتىلعان سوزدەردى قاراستىرعانىمىز بويىمىزعا جىگەر قۇيادى. يسا پەرىشتەلەرگە ٴتورت جويقىن جەلدى مىقتاپ ۇستاپ تۇرۋدى بۇيىرعان. ولار بۇل ٴتورت جەلدى مايلانعان ماسىحشىلەردىڭ بارىنە بەلگى سالىنعانشا، ياعني ەحوبا ولاردى ادال دەپ تاپقانشا، جىبەرمەي ۇستاپ تۇرادى (ايان 7:1—4). ٴماسىحتىڭ مايلانعان باۋىرلارى تانىتقان ادالدىقتارى ٷشىن سيلارىن الىپ، كوكتە پاتشا ٵرى ٴدىني قىزمەتكەر بولادى (ايان 20:6). قۇدايدىڭ كوكتەگى وتباسىنداعىلاردىڭ ٴبارى 144 000 مايلانعان ٴماسىحشىنىڭ كوكتەگى سيلارىنا يە بولىپ جاتقانىن كورۋدى اسىعا كۇتىپ ٴجۇر.
ۇستەرىنە اق شاپان كيىپ، قولدارىنا پالما بۇتاقتارىن ۇستاعان ۇلى جاماعات ساۋلە شاشىپ تۇرعان قۇداي تاعىنىڭ جانە توقتىنىڭ الدىندا تۇر (7-ابزاستى قاراڭىز)
7. ايان 7:9، 10 دا جازىلعان اياندا جوحان كىمدەردى كوردى جانە ولار نە ىستەپ جاتتى؟ (مۇقاباداعى سۋرەتتى قاراڭىز).
7 جوحان 144 000 پاتشا ٵرى ٴدىني قىزمەتكەر جايلى ايتقاننان كەيىن، ەرەكشە ٴبىر جايتتىڭ كۋاسى بولدى. ول ارماگەددوننان امان وتكەن «ۇلى جاماعاتتى» كوردى. ٴبىرىنشى توپتان ەرەكشەلىگى — بۇل توپ اناعۇرلىم ۇلكەن ٵرى ناقتى سانى بەلگىسىز ەدى (ايان 7:9، 10 وقىڭىز). ولار ۇستەرىنە «اق شاپان كيىپ» العان. بۇل ولاردىڭ شايتاننىڭ دۇنيەسىندەگى ارامدىقتاردان وزدەرىن «كىرشىكسىز تازا» ۇستاپ، قۇداي مەن ماسىحكە ادال بولىپ قالعاندارىن بىلدىرەدى (جاق. 1:27). ولار قاتتى داۋىستاپ، ەحوبا مەن ونىڭ توقتىسى يسانىڭ بەرگەن تولەم قۇرباندىعىنىڭ ارقاسىندا امان قالعاندارىن ايتىپ جاتتى. ولاردىڭ قولدارىندا پالما بۇتاقتارى بولدى. وسىلاي ولار يسانى قۇداي تاعايىنداعان پاتشا رەتىندە قۋانا مويىندايتىندارىن كورسەتتى (جوحان 12:12، 13 سالىستىرىڭىز).
8. ايان 7:11، 12 دە ەحوبانىڭ كوكتەگى وتباسى جايلى نە ايتىلعان؟
8 ايان 7:11، 12 وقىڭىز. كوكتەگىلەر ۇلى جاماعاتتى كورگەندە نە ىستەدى؟ جوحان ەحوبانىڭ كوكتەگى وتباسىنداعىلاردىڭ ٴبارى ۇلى جاماعاتتى كورگەندە شاتتىققا كەنەلىپ، قۇدايدى داڭقتاپ جاتقانىن كوردى. وسى ايان جۇزەگە اسىپ، ۇلى جاماعات زور الاپاتتان امان وتكەندە، ەحوبانىڭ كوكتەگى وتباسى قالاي قۋانادى دەسەڭىزشى!
9. ايان 7:13—15-تارماقتاردا ۇلى جاماعات جايلى نە دەلىنگەن جانە بۇل نەنى بىلدىرەدى؟
9 ايان 7:13—15 وقىڭىز. جوحان ۇلى جاماعات وزدەرىنىڭ «شاپاندارىن توقتىنىڭ قانىنا جۋىپ اعارتقانى» تۋرالى جازعان. بۇل ولاردىڭ ار-ۇجداندارى تازا ٵرى ەحوبانىڭ الدىندا ٵدىل ەكەندەرىن بىلدىرەدى (يشايا 1:18). ولار يسانىڭ تولەم قۇرباندىعىنا بەرىك سەنىم تانىتقان، ەحوبامەن تىعىز قارىم-قاتىناس دامىتقان جانە باعىشتالىپ، شومىلدىرۋ راسىمىنەن وتكەن ماسىحشىلەر (جوح. 3:36؛ پەت. 1-ح. 3:21). سونىڭ ارقاسىندا ولار قۇداي تاعىنىڭ الدىندا تۇرۋعا لايىقتى بولىپ، ونىڭ رۋحاني عيباداتحاناسىنىڭ جەردەگى اۋلاسىندا «كۇنى-ٴتۇنى قاسيەتتى قىزمەت» اتقارىپ ٴجۇر. ولار قۇداي پاتشالىعىن بارىنەن جوعارى قويىپ، ۋاعىزداۋ مەن شاكىرت دايىنداۋ ىسىندە جۇمىستىڭ باسىم بولىگىن قۇلشىنا اتقارىپ ٴجۇر (مات. 6:33؛ 24:14؛ 28:19، 20).
زور الاپاتتان وتكەن ۇلى جاماعاتتىڭ قۋانىشىندا شەك جوق (10-ابزاستى قاراڭىز)
10. ۇلى جاماعات نە نارسەگە سەنىمدى جانە ولار قانداي ۋادەنىڭ ورىندالعانىن كورەدى؟
10 ۇلى جاماعات زور الاپاتتان وتكەننەن كەيىن دە ەحوبا قامدارىن جاساي بەرەتىنىنە سەنىمدى. ويتكەنى «تاقتا وتىرعان ولاردىڭ ۇستىنەن ٶز شاتىرىن تىگەدى». سول كەزدە باسقا قويلار وزدەرى تاعاتسىزدانا كۇتىپ جۇرگەن مىنا ٴبىر ۋادەنىڭ ورىندالعانىن كورەتىن بولادى: «قۇداي ولاردىڭ كوزىندەگى ٵربىر جاستى ٴسۇرتىپ تاستايدى، ەندى قايتىپ ٶلىم، جوقتاۋ، زار ەڭىرەۋ مەن اۋرۋ بولمايدى» (ايان 21:3، 4).
11، 12. ا) ايان 7:16، 17 گە ساي، ۇلى جاماعاتتى بولاشاقتا قانداي باتالار كۇتىپ تۇر؟ ٵ) ەسكە الۋ كەشىندە باسقا قويلار نە ىستەي الادى جانە ولاردى بۇلاي ەتۋگە نە تالپىندىرادى؟
11 ايان 7:16، 17 وقىڭىز. قازىرگى ۋاقىتتا ەحوبانىڭ كەيبىر قىزمەتشىلەرى ەكونوميكالىق قيىن جاعدايلاردىڭ كەسىرىنەن نەمەسە ازاماتتىق تولقۋلار مەن سوعىستاردىڭ سالدارىنان تۋرا ماعىنادا اشتىق كورىپ ٴجۇر. كەيبىرەۋلەرى سەنىمدەرى ٷشىن تۇرمەدە وتىر. ٴبىراق ۇلى جاماعات قۋانىشتارىن جوعالتپايدى. ويتكەنى ولار الداعى ۋاقىتتا وزدەرىنىڭ وسى زۇلىم دۇنيەنىڭ باسىنا تۇسەتىن اپاتتان امان قالىپ، رۋحاني جانە تاندىك اس-سۋعا ٵردايىم تويىپ جۇرەتىنىن بىلەدى. ەحوبا حالىقتارعا «اپتاپ ىستىقتاي كۇيدىرەتىن» قاھارىن توگىپ، شايتاننىڭ دۇنيەسىن جويعان كەزدە ۇلى جاماعات قورعانىشتا بولادى. زور الاپات بىتكەننەن كەيىن، يسا جەر بەتىندە امان قالعانداردى «ٶمىر سۋىنىڭ بۇلاقتارىنا جەتەلەيدى»، ياعني ولارعا ماڭگىلىك ومىرگە يە بولۋعا كومەكتەسەدى. ۇلى جاماعاتتىڭ ٷمىتى نەتكەن تاماشا دەسەڭىزشى! جەر بەتىندە ٶمىر سۇرەتىن ميللياردتاعان ادامنىڭ ەشقاشان ولمەۋگە مۇمكىندىگى بولادى! (جوح. 11:26).
12 باسقا قويلار وزدەرىنىڭ تاماشا ٷمىتى ٷشىن ەحوبا مەن يساعا شەكسىز ريزا! ەحوبا ولاردى كوكتەگى ومىرگە تاڭداماسا دا، مايلانعانداردى قالاي جاقسى كورسە، ولاردى دا ٴدال سولاي جاقسى كورەدى. مايلانعاندار دا، باسقا قويلار دا ەحوبا مەن ٴماسىحتى ماداقتاي الادى. مۇنىڭ ٴبىر جولى — يەمىزدىڭ كەشكى اسىن اتاپ ٶتۋ.
ەسكە الۋ كەشىندە ەحوبا مەن يسانى ماداقتاڭىز
ەسكە الۋ كەشىندەگى نان مەن شاراپ يسانىڭ ٴبىز ٶمىر ٴسۇرسىن دەپ ورنىمىزعا ولگەنىن ەسىمىزگە سالادى (13—15-ابزاستاردى قاراڭىز)
13، 14. نەلىكتەن ەسكە الۋ كەشىن مايلانعانداردىڭ تامتىعى دا، باسقا قويلار دا اتاپ ٶتۋ كەرەك؟
13 سوڭعى جىلدارى شامامەن ەسكە الۋ كەشىنە كەلگەن ٵربىر 1000 ادامنىڭ 1 ەۋى عانا نان مەن شاراپتان ٴدام تاتىپ ٴجۇر. كوپتەگەن قاۋىمداردا رامىزدەردەن ٴدام تاتاتىندار تىپتەن جوق. ەسكە الۋ كەشىنە كەلەتىندەردىڭ باسىم كوپشىلىگى جەر بەتىندە ٶمىر سۇرۋگە ۇمىتتەنەتىن ادامدار. ەندەشە ولار يەمىزدىڭ كەشكى اسىنا نە ٷشىن كەلەدى؟ ولار دوستارىنىڭ ۇيلەنۋ تويىنا كەلگەن ادامدارعا ۇقسايدى. ونداي ادامدار تويعا وتاۋ قۇرىپ جاتقان جۇپتى قولداپ، جاقسى كورەتىندەرىن كورسەتۋ ٷشىن كەلەدى. تۋرا سول سياقتى، باسقا قويلار دا ەسكە الۋ كەشىنە ٴماسىح پەن مايلانعانداردى قولداپ، جاقسى كورەتىندەرىن كورسەتۋ ٷشىن كەلەدى. سونداي-اق باسقا قويلار ەسكە الۋ كەشىنە كەلۋ ارقىلى جەر بەتىندە ماڭگى ٶمىر سۇرۋگە جول اشقان ٴماسىحتىڭ تولەم قۇرباندىعىنا دەگەن ريزاشىلىقتارىن كورسەتكىسى كەلەدى.
14 باسقا قويلاردىڭ ەسكە الۋ كەشىنە كەلۋىنىڭ تاعى ٴبىر ماڭىزدى سەبەبى — ولار يسانىڭ بۇيرىعىنا مويىنسۇنادى. ادال ەلشىلەرىمەن بىرگە يەمىزدىڭ كەشكى اسىن ەنگىزگەن كەزدە، يسا: «مەنى ەسكە الۋ ٷشىن وسىلاي ىستەپ تۇرىڭدار»،— دەگەن (قور. 1-ح. 11:23—26). سوندىقتان مايلانعانداردىڭ تامتىعى جەر بەتىندە ٶمىر سۇرگەن كەزدىڭ بارىندە باسقا قويلار يەمىزدىڭ كەشكى اسىن اتاپ وتە بەرەدى. سونداي-اق باسقا قويلار ەسكە الۋ كەشىنە ٵربىر ادامدى شاقىرادى.
15. ەسكە الۋ كەشىندە ەحوبا مەن ٴماسىحتى قالاي ماداقتاي الامىز؟
15 ەسكە الۋ كەشىندە ٵن ايتىپ، دۇعا ەتۋ ارقىلى ەحوبا مەن ٴماسىحتى ماداقتاۋعا مۇمكىندىگىمىز بولادى. وسى جىلى ەسكە الۋ كەشىندە «قۇداي مەن ماسىحكە ريزاشىلىق بىلدىرەيىك!» دەگەن بايانداما ايتىلادى. ول ٴبىزدىڭ ەحوباعا جانە ماسىحكە دەگەن ريزاشىلىعىمىزدى ودان سايىن ارتتىرادى. رامىزدەر قولدان-قولعا وتكەن كەزدە، نان مەن شاراپ يسانىڭ دەنەسى مەن قانىن بىلدىرەتىنىن ەسىمىزگە سالادى. سونداي-اق ەحوبا ٴبىز ٶمىر ٴسۇرسىن دەپ ٶزىنىڭ ۇلىن ٴبىزدىڭ ورنىمىزعا ولىمگە قيعانى جايلى وي جۇگىرتەمىز (مات. 20:28). كوكتەگى اكەمىزدى جانە ونىڭ ۇلىن جاقسى كورەتىندەردىڭ ٴبارى ەسكە الۋ كەشىنە قۋانا كەلەدى!
سيلاعان ٷمىتى ٷشىن ەحوباعا ريزاشىلىق ٴبىلدىرىڭىز
16. مايلانعاندار مەن باسقا قويلار قاي جاعىنان ۇقساس؟
16 مايلانعاندار مەن باسقا قويلار كوپ جاعىنان ۇقساس. ەكى توپتى دا ەحوبا بىردەي جاقسى كورەدى. ەكەۋى دە وعان بىردەي باعالى. ول مايلانعانداردى دا، باسقا قويلاردى دا ساتىپ الۋ ٷشىن بىردەي قۇن تولەپ، ٶزىنىڭ سۇيىكتى ۇلىن ولىمگە قيدى. ەكى توپتىڭ وزگەشەلىگى — ۇمىتتەرى ٵرتۇرلى. ەكى توپ تا ەحوبا مەن ماسىحكە ادال بولىپ قالۋلارى ٴتيىس (ٴزاب. 31:23). سونداي-اق مىنانى ۇمىتپايىق: قۇدايدىڭ رۋحى بارىمىزگە بىردەي اسەر ەتە الادى. بۇل دەگەنىمىز — ەحوبا مايلانعان بولسىن، باسقا قوي بولسىن، ٵربىر قىزمەتشىسىنە قانشا قاجەت بولسا، سونشا كيەلى رۋحىن بەرەدى.
17. مايلانعانداردىڭ تامتىعى نەنى تاعاتسىزدانا كۇتىپ ٴجۇر؟
17 مايلانعان ماسىحشىلەر كوكتە ٶمىر ٴسۇرۋ ۇمىتىمەن تۋىلمايدى. بۇل ٷمىتتى ولاردىڭ جۇرەگىنە ەحوبا سالادى. ولار وزدەرىنىڭ ٷمىتى جايلى ويلانادى، دۇعا ەتەدى جانە كوكتەگى سيلارىنا يە بولۋدى اڭسايدى. ولار كوكتە وزدەرىنىڭ رۋحاني دەنەلەرىنىڭ قانداي بولاتىنىن ٴتىپتى ەلەستەتە دە المايدى (ٴفىلىپ. 3:20، 21؛ جوح. 1-ح. 3:2). سوندا دا ولار ەحوبامەن، يسامەن، پەرىشتەلەرمەن جانە وزگە دە مايلانعاندارمەن كورىسۋدى تاعاتسىزدانا كۇتەدى. ولار كوكتەگى پاتشالىقتا قىزمەت ەتۋدى قاتتى قالايدى.
18. باسقا قويلار نەنى تاعاتسىزدانا كۇتىپ ٴجۇر؟
18 باسقا قويلاردىڭ ٷمىتى تابيعي قالاۋعا نەگىزدەلگەن. كەز كەلگەن ادام جەر بەتىندە ماڭگى ٶمىر سۇرگىسى كەلەدى. باسقا قويلار سونداي ۋاقىتتى تاعاتسىزدانا كۇتىپ ٴجۇر (ۋاع. 3:11). ولار بۇكىل جەر ٴجۇزىن جۇماققا اينالدىرۋعا اتسالىساتىن كۇندى، سونداي-اق ٶز ۇيلەرىن سوعىپ، باۋ-باقشالارىن وتىرعىزىپ، بالالارىمەن بىرگە كەمەلدى دەنساۋلىقتىڭ راقاتىن كورەتىن كۇندى اڭساپ ٴجۇر (يشايا 65:21—23). ولار جۇماقتا تاۋلار مەن ورمانداردى، مۇحيتتار مەن تەڭىزدەردى — ەحوبانىڭ سان الۋان جاراتىلىستارىنىڭ ٴبارىن زەرتتەۋدى قاتتى قالايدى. بارىنەن دە بۇرىن ولاردى قۋانتاتىنى — ەحوبامەن قارىم-قاتىناستارى بۇرىن-سوڭدى بولماعانداي بەرىك بولادى.
19. ەسكە الۋ كەشىندە ٵرقايسىسىمىزدا قانداي مۇمكىندىك بولادى جانە وسى جىلى ەسكە الۋ كەشى قاشان وتەدى؟
19 ەحوبا ٶزىنىڭ باعىشتالعان ٵربىر قىزمەتشىسىنە بولاشاققا قاتىستى كەرەمەت ٷمىت سيلاعان (ەرم. 29:11). ٴماسىحتىڭ ٶلىمىن ەسكە الۋ كەشى ٴبىز شەكسىز عۇمىر كەشسىن دەپ تولەم قۇرباندىعىن بەرگەن ەحوبا مەن ماسىحكە العىس جاۋدىرۋعا مۇمكىندىك بەرەدى. ٴسوز جوق، ەسكە الۋ كەشى شىنايى ماسىحشىلەر ٷشىن ەڭ ماڭىزدى جيىن! بۇل جيىن 2021-جىلدىڭ 27-ناۋرىزىندا، سەنبى كۇنى كۇن باتقان سوڭ وتەدى. بيىل كوبىمىز وسى ماڭىزدى جيىنعا سالىستىرمالى تۇردە ەركىن بارا الامىز. كەيبىرىمىز بۇل ماڭىزدى جيىندى قارسىلىقتارعا قاراماي اتاپ وتسەك، كەيبىرىمىز تۇرمەدە اتاپ وتەمىز. قانداي جاعدايدا اتاپ وتپەيىك، ەحوبا، يسا جانە كوكتەگى قايتا تىرىلگەن مايلانعاندار كوكتەن ٴبارىن كورىپ تۇر. ەسكە الۋ كەشى ٵربىر قاۋىم، ٵربىر توپ، ٵربىر ادام ٷشىن تاماشا ٶتسىن!
150-ٵن قۇتقارىلۋ ٷشىن قۇدايدى ىزدەيىك
^ 5-ابزاس 2021-جىلدىڭ 27-ناۋرىزى ەحوبا كۋاگەرلەرى ٷشىن وتە ەرەكشە كۇن بولماق. سول كۇنى كەشكە ولار ٴماسىحتىڭ ولگەن كۇنىن ەسكە الۋ ٷشىن باس قوسادى. جينالاتىنداردىڭ باسىم بولىگىن يسا «باسقا قويلار» دەپ اتاپ كەتكەن ادامدار قۇرايتىن بولادى. 1935-جىلى وسى توپقا قاتىستى قانداي شىندىق ايقىن بولدى؟ زور الاپاتتان كەيىن باسقا قويلاردى قانداي ٶمىر كۇتىپ تۇر؟ سونداي-اق ولار ەسكە الۋ كەشىن اتاپ وتكەندە، قۇدايدى جانە ٴماسىحتى قالاي ماداقتاي الادى؟
^ 1-ابزاس بۇرىندا ەحوبا كۋاگەرلەرى سولاي اتالعان.
^ 2-ابزاس ٴسوز ٴمانى: باسقا قويلار ٴماسىحتىڭ سوڭىنان ەرەتىن جانە جەر بەتىندە ماڭگى ٶمىر سۇرۋگە ۇمىتتەنەتىن ادامداردى بىلدىرەدى. ولاردىڭ كەيبىرى ەحوباعا سوڭعى كۇندەرى قىزمەت ەتە باستاعان. ال ۇلى جاماعات دەگەن ٴماسىح زور الاپات كەزىندە ادامزاتقا ۇكىم شىعارعاندا ٴتىرى جۇرەتىن باسقا قويلاردى بىلدىرەدى. ولار زور الاپاتتان امان وتەدى.
^ 4-ابزاس ٴسوز ٴمانى: «تامتىق» دەگەن ٴسوز مايلانعان ماسىحشىلەردىڭ ٵلى جەردە ٶمىر ٴسۇرىپ جاتقان مۇشەلەرىن بىلدىرەدى. ولار يەمىزدىڭ كەشكى اسىندا نان مەن شاراپتان ٴدام تاتادى.
