1. Дь сала 1935-да, готарәке ль сәр бьраки щаһьл чаԝа һʹӧкӧм кьр?

ДЬ САЛА 1926-да, хортәки 18 сали һатә ньхӧмандьне. Де-баве ԝи Леколинкʹаред Кʹьтеба Пироз * бун. Ԝана се лаԝьк у дӧ ԛизед хԝә һин кьрьн кӧ Йаһоԝарʹа хьзмәт бькьн у чʹәʹв бьдьнә Иса Мәсиһ. Һәр сал ль сәр Биранине, ви бьре щаһьл мина һʹәму Леколинкʹаред Кʹьтеба Пироз нан дьхԝар у шәрав вәдьхԝар. Ле готарәкә бь наве «Әʹлаләта Мәзьн» ньһерʹандьна ԝи бь тʹәмами гӧһаст. Әв готар дь сала 1935-да ль сәр щьвата мәзьн бажаре Ԝашингтонеда (Америка) бьре Щозеф Рутерфорд хԝәнд. Ль сәр ве щьвина мәзьн гәло чь һат зәлалкьрьн?

2. Бьре Рутерфорд дь готара хԝәда чь зәлал кьр?

² Готара хԝәда, бьре Рутерфорд зәлал кьр кӧ «әʹлаләта мәзьн», йа кӧ Әʹйанти 7:9-да те готьне, дәрһәԛа кʹе йә. Һʹәта ԝе дәме, хушк у бьра дьфькьрин кӧ әʹлаләта мәзьн жи ԝе һәрә әʹзмана. Ле бәле, әԝ дьфькьрин кӧ әндәмед ве кʹоме мина мәсиһийед бь рʹӧһʹ кʹьфшкьри амьн ниньн. Бьре Рутерфорд бь сайа Ньвисаред Пироз зәлал кьр кӧ әʹлаләта мәзьн ԝе нәчә әʹзмана, ле әԝана пәзед дьн * йед Иса Мәсиһ нә, йед кӧ ԝе ԝәʹде  «тәнгасийа мәзьн» сах бьминьн у һʹәта-һʹәтайе ль сәр әʹрде бьжин (Әʹйанти 7:14). Иса Мәсиһ ӧса соз дабу: «Пәзед мьнә дьн жи һәнә, йед кӧ нә ви ахлида нә. Гәрәке әз ԝана жи биньм у әԝе дәнге мьн бьбьһед у бьбьнә кәрик бәр шьванәки» (Йуһʹәнна 10:16). Әв «пәзед дьн», Шәʹдед амьн ьн, йед кӧ һивийа жийана һәрһәйи ль сәр әʹрде нә (Мәтта 25:31-33, 46). Ньһа әме бьвиньн кӧ ве рʹонайа ну жийана ви бьре щаһьл у жийана гәләк хушк у бьред дьн чаԝа гӧһаст (Зәбур 97:11; Мәтʹәлок 4:18).

3-4. Ль щьвинәкә мәзьн йа сала 1935, бь һʹәзара кәса фәʹм кьр кӧ һевийа ԝан чь йә, у чьма?

³ Ль сәр ԝе щьвата мәзьн, готарван ӧса гот: «Кәсед кӧ һивийа жийана һәрһәйи йа ль сәр әʹрде нә, бьра рʹабьн сәр пʹийа!» Бьраки кӧ ль ԝедәре бу гот кӧ жь 20 000 мәрьвед кӧ ль щьвата мәзьн бун, жь ниви зедәтьр рʹабун сәр пʹийа. Паше, бьре Рутерфорд ӧса гот: «А вай – әʹлаләта мәзьн!» Гӧһдар пʹьрʹ ша бун! Кәсед кӧ рʹабун сәр пʹийа фәʹм кьрьн кӧ әԝ бона жийана ль әʹзмана нәһатьнә бьжартьне. Ԝана заньбу кӧ әԝ бь рʹӧһʹе Хԝәде нәһатьнә кʹьфшкьрьне. Рʹожа дьн, 840 Шәʹдед ну һатьн ньхӧмандьне, у пʹьрʹанийа ԝан «пәзед дьн» бун.

⁴ Паши ԝе готаре, хорте кӧ мә жоре бәʹса ԝи кьрьбу у бь һʹәзара кәсед дьн, ида ԝәʹде Биранине симбола нәдьхԝарьн. Гәләк кәса мина бьраки мә хԝә тʹәхмин дькьрьн, йе кӧ ӧса гот: «Ль сәр Биранина Мьрьна Иса Мәсиһ йа сала 1935, мьн щара хьлазийе нан хԝар у шәрав вәхԝар. Мьн фәʹм кьр кӧ Йаһоԝа әз бь рʹӧһʹе пироз бона жийана ль әʹзмана нәбьжартьмә. Һевийа мьн әв бу кӧ ль сәр әʹрде бьжим у тʹәви кәсед дьн әʹрде бькьм щьнәт» (Рʹомайи 8:16, 17; 2 Корьнтʹи 1:21, 22). Һьнгева, һәжмара әндәмед әʹлаләта мәзьн зедә дьбә, у әԝана тʹәви мәсиһийед бь рʹӧһʹ кʹьфшкьри кӧ һе ль сәр әʹрде нә һәвкʹарийе дькьн.

5. Йаһоԝа ль кәсед кӧ симболед Биранине ида нахԝьн, чаԝа дьньһерʹә?

⁵ Йаһоԝа ль кәсед кӧ паши сала 1935 симболед Биранина Мьрьна Иса Мәсиһ нәдьхԝарьн, чаԝа дьньһерʹә? Һәгәр Шәʹдәки ньхӧманди жь дьл баԝәр дькә кӧ гәрәке әԝ ль Биранине нен бьхԝә у шәраве вәхԝә, ле паше фәʹм дькә кӧ бь рʹасти әԝ нәһатийә кʹьфшкьрьне, Йаһоԝа дәрһәԛа кәсед ӧса чь дьфькьрә? (1 Корьнтʹи 11:28). Һьнә кәса симбола дьхԝарьн, чьмки ԝана рʹьнд фәʹм нәдькьр кӧ һевийа ԝан чь йә. Ле һәгәр әԝ шашийа хԝә тʹобә бькьн, ида симбола нәхԝьн у бь амьни Йаһоԝарʹа хьзмәт бькьн, Йаһоԝа ԝе ԝана бешьк ча пәзед дьн ԛәбул бькә. Рʹаст ә әԝана ида симбола нахԝьн, ле диса жи әԝана тенә сәр Биранина Мьрьна Иса Мәсиһ, чьмки әԝана жь Йаһоԝа Хԝәде у жь Иса Мәсиһрʹа гәләк рʹази нә.

6. Иса Мәсиһ тʹәми дайә мәләка кӧ әԝ чь бькьн?

⁶ Тәнгасийа мәзьн бәр шемике йә, ләма ԝе баш бә кӧ әм готьнед жь сәре 7 йа кʹьтеба Әʹйанти дәрһәԛа мәсиһийед бь рʹӧһʹ кʹьфшкьри у әʹлаләта мәзьн диса шеԝьр бькьн. Ль гора тʹәмийа Иса Мәсиһ, гәрәке мәләк чар байед ԝеранкьрьне бьгьрьн һʹәта кӧ һʹәму кәсед бь рʹӧһʹ кʹьфшкьри бен моркьрьн,  демәк ԛәбулкьрьна Йаһоԝа бьстиньн (Әʹйанти 7:1-4). Хәлата амьнийа бьред Иса Мәсиһ йед кʹьфшкьри ԝе әԝ бә, кӧ әԝана ԝе ль әʹзмана тʹәви Иса ча пʹадша у кʹаһин һʹӧкӧм бькьн (Әʹйанти 20:6). Гава 144 000 кәсед бь рʹӧһʹ кʹьфшкьри хәлата әʹзмани бьстиньн, Йаһоԝа, Иса Мәсиһ у мәләк ԝе пʹьрʹ ша бьн.

7. Ль гора Әʹйанти 7:9, 10, Йуһʹәнна дь хәԝн-хәйала хԝәда кʹи дитьн, у ԝана чь дькьр? (Бьньһерʹә шькле рʹуйе журнале.)

⁷ Паши кӧ Йуһʹәннайе шанди бәʹса ван 144 000 пʹадша у кʹаһина кьр, әԝи «әʹлаләтәкә мәзьн» дит, йа кӧ жь шәрʹе Һармәгәдоне сах дәрбаз буйә. Әв кʹом жь ве кʹома пешьн мәзьнтьр ә, у һәжмара ԝе әʹйан нинә (Әʹйанти 7:9, 10 бьхунә). Әв йәк кӧ ԝана «чӧхед чилә-ԛәрԛаш» хԝәкьрьбун те һʹәсабе кӧ әԝ ль дьнйа Шәйтʹан «паԛьж у беләкʹә» мабун у Хԝәде у Иса Мәсиһрʹа амьн манә (Аԛуб 1:27). Әԝ бь дәнгәки бьльнд дьбежьн кӧ әԝана бь сайа Йаһоԝа у Бәрхе Хԝәде, демәк Иса Мәсиһ, хьлаз бунә. Әв йәк кӧ дь дәсте ԝанда чʹьԛьлед хӧрма һәнә нишан дькә кӧ әԝ Иса Мәсиһ ча Пʹадше кʹьфшкьри ԛәбул дькьн (Йуһʹәнна 12:12, 13 жи бьньһерʹә).

8. Әʹйанти 7:11, 12 дәрһәԛа малбәта Йаһоԝа йа әʹзмани чь дьбежә?

⁸ Әʹйанти 7:11, 12 бьхунә. Ԝәхта кӧ хәԝн-хәйала Йуһʹәннайе шанди ԝе бе сери у әʹлаләта мәзьн ԝе жь тәнгасийа мәзьн сах дәрбаз бьбә, әндәмед малбәта Йаһоԝа йа әʹзмани ԝе гәләки ша бьбьн у пәсне Хԝәде бьдьн.

9. Ль гора Әʹйанти 7:13-15, әʹлаләта мәзьн ньһа чь дькә?

⁹ Әʹйанти 7:13-15 бьхунә. Йуһʹәнна готьбу кӧ әʹлаләта мәзьн «чӧхед хԝә пе хуна ԝи Бәрхи шуштьнә, чил-ԛәрԛаш кьрьнә». Әв йәк нишан дькә кӧ исафа ԝан тʹәмьз ә, у Йаһоԝа ԝан ча кәсед рʹаст һʹәсаб дькә (Ишайа 1:18). Бь сайа сонда тʹәсмилбуйине у ньхӧмандьне, әԝана бунә шагьртед Иса Мәсиһ. Әԝана баԝәрийа хԝә ԛӧрбана Иса тиньн, у һәләԛәтийа ԝан тʹәви Йаһоԝа ԛәԝи йә (Йуһʹәнна 3:36; 1 Пәтрус 3:21). Ләма Хԝәде жь ԝан рʹази йә, у әԝана дькарьн ль сәр әʹрде «шәв у рʹож» ԝирʹа хьзмәт бькьн. Жь бәр кӧ әԝана бәри һәр тьшти ль Пʹадшатийа Хԝәде дьгәрʹьн, әԝана мьзгине бь хирәт бәла дькьн. Иро, ише бәлакьрьна мьзгине у һазьркьрьна шагьрта һәри зедә жь алийе әʹлаләта мәзьнва те кьрьне (Мәтта 6:33; 24:14; 28:19, 20).

10. Паши тәнгасийа мәзьн, Хԝәде ԝе бона әʹлаләта мәзьн чь бькә?

¹⁰ Паши тәнгасийа мәзьн, Хԝәде ԝе «коне хԝә ль сәр ԝан вәгьрә» у бона һʹәԝщед ԝан хәм бькә. Ԝи чахи, пәзед дьн ԝе пе чʹәʹве хԝә әв созе Йаһоԝа бьвиньн: «[Хԝәде] жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук, чьмки тьштед бәре дәрбаз бун» (Әʹйанти 21:3, 4).

11-12. (а) Ль гора Әʹйанти 7:16, 17, әʹлаләта мәзьн ԝе кʹижан кʹәрәма бьстинә? (б) Пәзед дьн дькарьн ль сәр Биранине чь бькьн, у чьма?

¹¹ Әʹйанти 7:16, 17 бьхунә. Рʹожед мәда, һьнә хьзмәткʹаред Хԝәде сәва тәнгасийед економик, тʹәвльһәвийа политики у шәрʹ, бьрчи дьминьн. Ль һьнә ԝәлата, һьнә хушк у бьред мә сәва баԝәрийа хԝә кʹәтьнә кәле. Ле бәле, паши ԝеранкьрьна ве система хьраб, һʹәму хушк у бьред мә ԝе һәртʹьм тʹер у тʹьжә хԝарьна физики у рʹӧһʹани бьстиньн. Ԝәхта кӧ Йаһоԝа ԝе система  Шәйтʹан кʹӧта бькә, әԝе әʹлаләта мәзьн жь ‹гәрмайа› һерса хԝә бьпарезә. Паши хьлазийа тәнгасийа мәзьн, Иса Мәсиһ ԝе ԝана бәрбь «ава жийане» бьвә. Һевийа әʹлаләта мәзьн бь рʹасти жи һевикә мәхсус ә. Дә бьдьнә һʹәсабе хԝә, бь милйарда ль ве дьнйайе инсан житьнә у мьрьнә, ле тʹәне әʹлаләта мәзьн дькарә тʹӧ щар мьрьне нәвинә! (Йуһʹәнна 11:26).

¹² Пәзед дьн бона ве һевийа хԝәш жь Йаһоԝа у Иса Мәсиһ рʹази нә. Әԝана бона жийана ль әʹзмана нәһатьнә бьжартьн, ле әв йәк найе һʹәсабе кӧ дь чʹәʹве Йаһоԝада ԛимәта ԝан ньмьзтьр ә. Ԝәʹде Биранина Мьрьна Иса Мәсиһ, әндәмед һәр дӧ кʹома жи дькарьн пәсне Хԝәде у Иса Мәсиһ бьдьн.

13-14. Чьма фәрз ә кӧ һәр кәс бе сәр Биранина Мьрьна Иса Мәсиһ?

¹³ Иро, дькарьн бежьн жь һәр 1 000-и йәк ль сәр Биранина Мьрьна Иса Мәсиһ нен дьхԝә у шәраве вәдьхԝә. Ль гәләк щьвата, тʹӧ кәс жь ван симбола настинә. Һәрге пʹьрʹанийа хьзмәткʹаред Йаһоԝа һивийа жийана ль сәр әʹрде нә, әԝана чьрʹа тенә сәр Биранина Мьрьна Иса Мәсиһ? Чаԝа кӧ һәвал тʹәглифа бук у зәʹва ԛәбул дькьн, чьмки ԝана һʹьз дькьн у дьхԝазьн пьштгьрийа ԝана бькьн, пәзед дьн жи дьчьн сәр Биранине, чьмки әԝана Иса Мәсиһ у мәсиһийед бь рʹӧһʹ кʹьфшкьри һʹьз дькьн у дьхԝазьн пьштгьрийа ԝан бькьн. Пәзед дьн нишан дькьн кӧ әԝана ԛӧрбанбуна Иса Мәсиһ ԛимәт дькьн, йе кӧ әʹмьре хԝә бәрва да, ԝәки әԝана бькарьбьн һʹәта-һʹәтайе ль сәр әʹрде бьжин.

¹⁴ Мәʹникә майин кӧ чьрʹа пәзед дьн тенә сәр Биранина Мьрьна Иса Мәсиһ әв ә, кӧ әԝана дьхԝазьн гӧһ бьдьн тʹәмийа Иса Мәсиһ. Гава Иса Мәсиһ әв шива мәхсус тʹәви шандийед хԝә йед амьн дәрбаз кьр, әԝи ԝанрʹа гот: «Ве йәке бона биранина мьн бькьн» (1 Корьнтʹи 11:23-26). Ләма, һʹәта кӧ һьнә кәсед бь рʹӧһʹ кʹьфшкьри һе ль сәр әʹрде нә, пәзед дьн ԝе Биранина Мьрьна Иса Мәсиһ дәрбаз бькьн, у әԝана гази һәр кәси дькьн кӧ әԝана жи бен.

15. Ль сәр Биранина Мьрьна Иса Мәсиһ, әм ча дькарьн пәсне Хԝәде у Иса Мәсиһ бьдьн?

 ¹⁵ Ль сәр Биранина Мьрьна Иса Мәсиһ, әм дькарьн бь кʹьлам у дӧа пәсне Хԝәде у Иса Мәсиһ бьдьн. Исал, готара Биранине йа бь наве «Бьшекьринә Әԝ Чь кӧ Хԝәде у Иса Мәсиһ сәва Тә Кьрьнә!» ԝе рʹазибуна мә зедә бькә. Ԝәхта кӧ нан у шәрав бен дәрбазкьрьн, әме биньн бира хԝә кӧ әԝана бь симболик тенә һʹәсабе бәдән у хуна Иса Мәсиһ. Бь сайа ве йәке әме биньн бира хԝә кӧ Йаһоԝа изьн да кӧ Кӧрʹе ԝи бона мә бьмьрә, ԝәки әм жийана һәрһәйи бьстиньн (Мәтта 20:28). Ләма, һʹәму кәсед кӧ Хԝәде у Кӧрʹе ԝи һʹьз дькьн ԝе бьхԝазьн бенә ль сәр Биранине.

16. Кәсед бь рʹӧһʹ кʹьфшкьри у пәзед дьн чь алийева мина һәв ьн?

¹⁶ Бәр чʹәʹве Хԝәде ԛимәта мәсиһийед бь рʹӧһʹ кʹьфшкьри у ԛимәта пәзед дьн мина һәв ә. Әԝи әʹмре Кӧрʹе хԝәйи дәлал һьм бона кәсед бь рʹӧһʹ кʹьфшкьри һьм жи бона пәзед дьн бәрва да. Фьрԛи дь нав ԝанда тʹәне әв ә кӧ һевийед ԝан жь һәв щӧдә нә. Һәр дӧ кʹом гәрәке Хԝәде у Иса Мәсиһрʹа амьн бьминьн (Зәбур 31:23). Бир нәкә кӧ рʹӧһʹе Хԝәдейи пироз дькарә бь әʹйни ԛәԝате ль сәр мә һʹәмуйа һʹӧкӧм бькә. Ләма һʹәԝщәдарийа ԝан чь бә жи, Йаһоԝа дькарә рʹӧһʹе пироз бьдә һьм кәсед бь рʹӧһʹ кʹьфшкьри һьм жи пәзед дьн.

17. Шагьртед бь рʹӧһʹ кʹьфшкьри һивийа чь нә?

¹⁷ Кәсед бь рʹӧһʹ кʹьфшкьри бь һевийа әʹзмани найен буйине. Тʹәне Хԝәде дькарә ԝан бьжберә у ве һевийе бькә дьле ԝан. Әԝана дәрһәԛа һевийа хԝә дьфькьрьн у дӧа дькьн, у әԝана һьзрәта хәлата хԝә йа әʹзмани нә. Әԝана ньзаньн кӧ бәдәна ԝан йа рʹӧһʹани ԝе чь щурʹәйи бә (Филипи 3:20, 21; 1 Йуһʹәнна 3:2). Диса жи, әԝана ша нә кӧ әԝе бькʹәвьн Пʹадшатийа әʹзмани у кӧ әԝе Йаһоԝа, Иса Мәсиһ, мәләка у кәсед бь рʹӧһʹ кʹьфшкьрийә дьн бьвиньн.

18. Пәзед дьн һивийа чь нә?

¹⁸ Пәзед дьн һивийа жийана һәрһәйи йа ль сәр әʹрде нә. Бь рʹасти хԝәстьна жийана һәрһәйи йа ль сәр әʹрде дь дьле һʹәму инсанада һәйә (Ԝаиз 3:11). Пәзед дьн ша нә кӧ әԝе бькарьбьн тʹәмамийа әʹрде бькьн щьнәт, ханийа ава бькьн, баха бьчиньн у зарʹед хԝә бь сьһʹәта кʹамьл мәзьн бькьн (Ишайа 65:21-23). Мәщала ԝан ԝе һәбә кӧ чʹийа, дарьстан, бәʹред дьнйайе у тʹәбийәте леколин бькьн. Жь һәр тьшти зедәтьр, әԝана ша нә кӧ әԝе бькарьбьн һе незики Йаһоԝа бьн.

19. Биранин чь мәщале дьдә мә, у исал әме Биранина Мьрьна Иса Мәсиһ кʹәнге дәрбаз кьн?

 ¹⁹ Йаһоԝа һевикә хԝәш дайә һʹәму хьзмәткʹаред хԝә (Йерәмйа 29:11). Хԝәде у Иса Мәсиһ рʹе вәкьрьн кӧ әм жийина һәрһәйи бьстиньн. Биранина Мьрьна Иса Мәсиһ мәщаләкә баш ә кӧ әм рʹазибуна хԝә ԝанрʹа нишан бькьн. Бона мә, Биранина Мьрьна Иса Мәсиһ бешьк рʹожа һәри фәрз йа тʹәмамийа сале йә. Исал, әме ль рʹожа Шәмийе, 27 Адаре, паши кӧ рʹо һәрә ава, бона Биранина Мьрьна Иса Мәсиһ ль һәв тʹоп бьн. Ль гәләк дәра, хушк у бьред мә ԝе бькарьбьн бь азайи ль һәв тʹоп бьбьн. Һьнә кәс ԝе ль дәма пәйкʹәтьне бенә Биранине. Һьнә хушк у бьред мә жи ԝе Биранине кәледа дәрбаз бькьн. Һʹале мә чь бә жи, бьра әм бир нәкьн кӧ Йаһоԝа, Иса Мәсиһ, мәләк у йед бь рʹӧһʹ кʹьфшкьри йә ль сәр әʹзмен, мә дьвиньн. Бьра рʹожа Биранина Мьрьна Иса Мәсиһ бона һʹәму щьват, кʹом у һәр мәрьви хԝәш дәрбаз бә!