1. Adieyi nleke mosi kavanga vava kawá e longi diafilwa muna lukutakanu lwa mvivu lwavangama muna mvu wa 1935?

NLEKE mosi mvu 18 kakala miau vava kavubwa muna mvu wa 1926. Mase mandi Alongoki a Bibila bakala, i sia vo, nkumbu ina Mbangi za Yave bayikilwanga muna kolo kiokio. Mase mama balonga wan’au tatu amakala ye wole amakento basadila Yave wa Nzambi yo tanginina Yesu Kristu. Nze una bavanganga Alongoki awonso a Bibila muna kolo kiokio, konso mvu nleke ndioyo wa nkwa kwikizi wadianga e mbolo yo nua e vinyu muna Nlekelo a Mfumu. Kansi, e vuvu kiandi kiasoba vava kawá e longi diamfunu diakala yo ntu a diambu vo: “E Ndong’ayingi.” E longi diadi diafilwa kwa mpangi Joseph Franklin Rutherford muna lukutakanu lwa mvivu lwavangama muna mvu wa 1935, kuna Washington, Estados Unidos. Nkia diambu Alongoki a Bibila balongoka muna lukutakanu lwalu lwa mvivu?

2. Nkia ludi mpangi Rutherford kasasila muna longi kafila?

² Muna longi diandi, o mpangi Rutherford wasasila aki nani bena muna buka kia “ndong’ayingi” ina iyikwanga muna Lusengomono 7:9. Yamuna mvu wau, Alongoki a Bibila bakwikilanga vo e ndong’ayingi ku zulu mpe badi kwenda, kansi o lukwikilu lwau ke lwakala lwasikila ko nze lwa akuswa. Mpangi Rutherford wasadila e Bibila muna sasila vo e ndong’ayingi ke bekwenda ku zulu ko, kansi bena mu buka kia mameme mankaka * ma Kristu ana bevuluka muna “mpasi zayingi” yo zingila ova ntoto yakwele  mvu. (Lus. 7:14) Yesu wasia o nsilu vo: “Mameme mankaka mpe ngina mau, mana ke ma mpaka yayi ko; itwasa mo mpe mwamu, mewa nding’ame, mekala se kambi dimosi, mvungudi mosi.” (Yoa. 10:16) E mameme mama mankaka i Mbangi za Yave ana besonganga e kwikizi, bena ye vuvu kia zingila yakwele mvu mu Paradiso ova ntoto. (Mat. 25:31-33, 46) Yambula twazaya una umbakuzi wau wampa wasobela e zingu kia ulolo wa nkangu a Yave, kumosi yo nleke ndiona tuyikidi muna tini kiantete.—Nku. 97:11; Nga. 4:18.

3-4. Muna mvu wa 1935, nkia diambu ulolo wa wantu babakula mu kuma kia vuvu kiau? Ekuma?

³ E diambu diasimba e ntima mia wantu muna lukutakanu lwalu i vava o mpovi kavovesa o nkangu vo: “Dodokolo, yeno awonso nuna ye vuvu kia zingila yakwele mvu ova ntoto, nutelama.” Mpangi mosi wakala muna lukutakanu lwalu, wavova vo ayingi muna awana bakala mo batelama. I bosi, mpangi Rutherford wavova vo: “Nutala! E ndong’ayingi!” Vana vau, awonso bakala muna lukutakanu lwalu, bayengoloka ye kiese. Awonso ana batelama, babakula vo ke bakala ye vuvu kia kwenda zingila ku zulu ko. Babakula mpe vo ke bakuswa ko muna mwand’avelela a Nzambi. Muna lumbu kialanda, 840 ma wantu bavubwa se Mbangi za Yave muna lukutakanu lwalu, ayingi muna buka kia mameme mankaka bakala.

⁴ Kuna mfoko a longi diadi, o nleke ona tuyikidi kala ye ulolo wa wantu ankaka, bayambula dia e mbolo yo nua e vinyu muna Nlekelo a Mfumu. Mpangi zayingi bamona una kamona mpangi mosi ona wavova kuna lulembamu lwawonso vo: “E Luyindulu lwavangama muna mvu wa 1935, i nkumbu ansuka yadia e mbolo yo nua e vinyu. Kadi yabakula vo Yave kasadila o mwand’andi avelela ko muna kunsola mu kala ye vuvu kia kwenda kuna zulu. Yakala ye vuvu kia zingila ova ntoto yo yikama e salu kia kitula o ntoto se paradiso.” (Roma 8:16, 17; 2 Kor. 1:21, 22) Tuka muna mvu wauna, o lutangu lwa ndong’ayingi luwokelanga ye besalanga kumosi ye akuswa ana bakinu ova ntoto.

5. Aweyi Yave kebadikilanga awana bayambula dia e mbolo yo nua e vinyu muna Luyindulu?

⁵ Aweyi Yave kabadikila awana bayambula o dia e mbolo yo nua e vinyu muna Luyindulu kuna nim’a mvu wa 1935? Adieyi tuvova o unu avo mpangi ona wadianga e mbolo yo nua e vinyu muna Nlekelo a Mfumu oyambwidi wau kabakwidi vo kakuswa ko muna mwand’avelela? (1 Kor. 11:28) Akaka badianga e mbolo yo nua e vinyu muna Luyindulu kadi ngindu zabendomoka bakala zau mu kuma kia vuvu kiau. Kansi, avo batambulwidi o vilwa wau yo yambula o dia e mbolo yo nua e vinyu muna Luyindulu yo kwamanana sadila Yave ye kwikizi kiawonso, kieleka Yave okubayambula bakala muna buka kia mameme mankaka. Kana nkutu vo ke bedianga diaka e mbolo ko yo nua e vinyu, bekwamanananga kutakana muna Luyindulu kadi beyangalelanga dina Yave yo Yesu bavanga muna wete diau.

6. Nkia diambu Yesu kakanikina ambasi bavanga?

⁶ Ke kolo ko, e mpasi zayingi ziyantika. Muna kuma kiaki, diamfunu twafimpulula mana meyikwanga muna mona-meso kiasonama muna Lusengomono kapu kia 7 mu kuma kia Akristu akuswa ye ndong’ayingi ya mameme mankaka. Muna mona-meso kiaki, Yesu wakanikina ambasi vo bakwamanana simbinina e tembwa yá ya lufwasu. Ke balendi yambula e tembwa yayi ko yabwa ova ntoto yavana  Yave kesia e dimbu kwa Akristu awonso akuswa, i sia vo, osonga luyangalalu lwandi muna kwikizi kiau. (Lus. 7:1-4) Mpangi za Kristu betambula o nsendo wa kituka se atinu ye anganga kuna zulu mu kuma kia kwikizi kiau. (Lus. 20:6) Yave, Yesu ye ambasi betoma yangalala vava bemona akuswa awonso, i sia vo, 144.000 betambula o nsendo au kuna zulu.

7. Nze una wasonama muna Lusengomono 7:9, 10, aki nani Yoane kamona muna mona-meso? Adieyi bevanganga? (Tala e fwaniswa kia fukwa.)

⁷ I bosi, Yoane wamona diambu diasivi, i sia vo, “ndong’ayingi” ina ivuluka muna Armangedo. Nswaswani ye 144.000 ma atinu ye anganga, e ndong’ayingi ke izayakene lutangu ko. (Tanga Lusengomono 7:9, 10.) “Bavuete mvuatu miampembe,” i sia vo, ‘bakondwa e tona’ muna mambu ma nza ya Satana ye besikilanga ye kwikizi muna Nzambi yo Kristu. (Yak. 1:27) Bebokanga muna nding’a ngolo mu kuma kia luvuluzu lutukidi kwa Yave yo Yesu, wa Mwan’a meme a Nzambi. Awonso bena ye ndala vana moko mau, muna songa vo bena ye kiese kia tambulwila Yesu se Ntinu ona Yave katumbika.—Tezanesa ye Yoane 12:12, 13.

8. Landila e sono kia Lusengomono 7:11, 12, adieyi diavangama kuna zulu vava bamona e ndong’ayingi?

⁸ Tanga Lusengomono 7:11, 12. Adieyi diavangama kuna zulu vava bamona e ndong’ayingi? Yoane wamona vo awonso kuna zulu, i sia vo, Yave, Yesu, ambasi ye akuswa ana bafuluka, bayangalala yo kembelela Nzambi vava bamona e ndong’ayingi. Muna kuma kiaki, awonso kuna zulu betoma yangalala vava bemona e ndungan’a mona-meso kiaki, i sia vo, vava e ndong’ayingi ivuluka muna mpasi zayingi.

9. Mun’owu wa Lusengomono 7: 13-15, e ndong’ayingi nkia salu besalanga owau?

⁹ Tanga Lusengomono 7:13-15. Yoane wasoneka vo e ndong’ayingi “basukwidi e mvuatu miau yo pembesela mio muna menga ma Mwan’a meme.” Ediadi disongele vo bena ye ntona zavelela yo tondakanua vana meso ma Yave. (Yes. 1:18) Akristu awaya bakiyekola yo vubwa, bena ye lukwikilu lwasikila muna kimenga kia lûkulu kia Yesu ye ngwizani ambote yo Yave. (Yoa. 3:36; 1 Pet. 3:21) Muna kuma kiaki, bafwana telama vana ntwal’a kunda kia Nzambi muna kunsadilanga ‘salu kiavauka fuku yo mwini’ ova ntoto. Kana nkutu owau, besonganga o vema muna salanga kwayingi muna salu kia samuna e nsangu za Kintinu yo kitula o wantu se alongoki kadi besianga e Kintinu kia Nzambi va fulu kiantete muna zingu kiau.—Mat. 6:33; 24:14; 28:19, 20.

10. E ndong’ayingi nkia ziku bena kiau? Nkia nsilu bevingilanga vo walungana?

¹⁰ E ndong’ayingi ana bevuluka muna mpasi zayingi bena ye ziku vo Nzambi okwamanana kubalunga-lunga kadi “Ndiona ovuende vana kunda okubayalumwinina e saba kiandi.” Muna kolo kiokio, o nsilu una mameme mankaka bevingilanga ulungana emvimba, wa sia vo: “[Nzambi] okunguna mansanga mawonso muna meso mau, o lufwa ke lukala diaka ko, ngatu kala diaka dilu, yovo kazu ngatu mpasi.”—Lus. 21:3, 4.

11-12. (a) Nze una usonganga e sono kia Lusengomono 7:16, 17, nkia nsambu betambula e ndong’ayingi kuna sentu? (b) Adieyi mameme mankaka balenda vanga muna lumbu kia Luyindulu? Ekuma?

¹¹ Tanga Lusengomono 7:16, 17. Omu lumbu yeto, akaka muna nkangu a Yave befwanga e nzala mu kuma kia kondwa nzimbu yovo mu kuma kia mpasi zitwasanga e vita. Akaka besiwanga mu pelezo mu kuma kia lukwikilu lwau muna Yave. Kansi, e ndong’ayingi bazeye wo vo vava bevuluka muna lufwasu lwa nza yayi ya Satana, bekala ye ulolo wa madia ma kinsuni ye ma mwanda. Vava Yave kefwasa e  nza yayi ya Satana, ovuluza e ndong’ayingi muna makasi mandi mana metezaneswanga ye “mbangazi.” Vava e mpasi zayingi zifokoka, Yesu ofila awonso bevuluka kuna “maza ma moyo [a mvu ya mvu.]” Ekwe vuvu kiasikila bena kiau e ndong’ayingi! Kadi muna mafunda ye mafunda ma wantu ana bazinga kala, yau kaka bekala ye lau dia lembi yeleka lufwa.—Yoa. 11:26.

¹² Mameme mankaka bevutulanga matondo kwa Yave yo Yesu mu kuma kia vuvu kiasikila bena kiau. Dialudi vo, Yave kabasola ko mu kwenda zingila kuna zulu, kansi okubazolanga nze una kezolelanga akuswa. Muna kuma kiaki, akuswa ye mameme mankaka bena ye lau dia kembelela Nzambi yo Kristu. Imosi muna mpila bevangilanga wo i lungana muna Nlekelo a Mfumu.

13-14. Ekuma yeto awonso tufwete lunganenanga muna Luyindulu lwa lufwa lwa Kristu?

¹³ Omu lumbu yayi, vana vena 1.000 dia wantu muna Luyindulu, mosi kaka odianga e mbolo yo nua e vinyu. Muna nkutakani zayingi ke mwina mpangi ko odianga e mbolo yo nua e vinyu muna Luyindulu. Ayingi muna awana belungananga muna Luyindulu, vuvu kia zingila ova ntoto bena kiau. Ozevo, ekuma belunganenanga muna Nlekelo a Mfumu? E kuma kifilanga o wantu mu kwenda muna nkinzi a lukazalu lwa akundi au, i kiau mpe kifilanga mameme mankaka mu lungana muna Luyindulu. O wantu bekwendanga muna nkinzi a lukazalu muna songa o zola kwau yo yikama awana basompele. Diau dimosi, e mameme mankaka bekwendanga muna Luyindulu mu songa o zola kwau yo yikama Kristu ye akuswa. Bekwendanga mpe muna Luyindulu muna songa luyangalalu lwau muna kimenga kia lûkulu kia Yesu. E kimenga kiaki i kiau kiaziula e nzila kimana bazinga yakwele mvu ova ntoto.

¹⁴ E kuma kiankaka kifilanga mameme mankaka mu lungana muna Luyindulu i lemvokela o nkanikinu a Yesu. Vava Yesu kasikidisa o Nlekelo a Mfumu kumosi ye ntumwa zandi zakwikizi, wabavovesa vo: “Nukwamanana wo vanga muna luyindulu lwame.” (1 Kor. 11:23-26) Muna kuma kiaki, mameme mankaka mekwamanana lungana muna Nlekelo a Mfumu ekolo akuswa ankaka bakinu ova ntoto. Mameme mankaka mekwamanana mpe bokela  awonso bazolele mu lungana yau muna Luyindulu.

15. Aweyi tulenda songela luyangalalu lweto muna Nzambi yo Kristu muna Luyindulu?

¹⁵ Muna Luyindulu, tukalanga ye lau dia songa luyangalalu lweto kwa Nzambi yo Kristu muna yimbilanga e nkunga yo samba. E longi dia Luyindulu dia mvu wau dina yo ntu a diambu vo: “Vutulanga Matondo mu Dina Nzambi yo Kristu Bavanga mu Kuma Kiaku!” E longi diadi ditoma wokesa luyangalalu lweto muna Yave yo Kristu. Vava e mbolo ye vinyu iviokeswa, tukala twakubama mu yindula dina e lekwa yayi isunzulanga, i sia vo, nitu ye menga ma Yesu. Tuyindula mpe o zola Yave katusonga wau kayambula vo Mwan’andi kafwa kimana twavua o moyo. (Mat. 20:28) Muna kuma kiaki, konso ndiona ozolanga Se dieto dia zulu yo Mwan’andi, okala ye tima dia lungana muna Luyindulu.

16. Nkia mambu mefwananesanga akuswa ye mameme mankaka?

¹⁶ E nswaswani ina vana vena akuswa ye mameme mankaka ke yau ko ikubakitulanga se bantalu vana meso ma Nzambi. Awana bena mu buka yole yayi, mfunu bena vana meso ma Nzambi. Mu mpila mosi kekubazolelanga. Kadi ntalu yau imosi kafuta, i sia vo, moyo a Mwan’andi anzolwa kavana muna kûla akuswa ye mameme mankaka. E diambu diswasanesanga awana bena mu buka yole yayi i vuvu bena kiau. Kansi, akuswa ye mameme mankaka bafwete kwamanana songa e kwikizi muna Nzambi yo Kristu. (Nku. 31:23) Sungamena dio vo o mwand’a Nzambi mu mpila mosi usadilanga mu yeto awonso. Ediadi disongele vo Yave ovananga o mwand’andi avelela mun’owu wa nsatu za konso muntu.

17. Nkia diambu akuswa belakukilanga o moyo?

¹⁷ Akristu akuswa ke bewutukanga ye vuvu kia kwenda zingila kuna zulu ko. Kansi, Nzambi okubavanang’e vuvu kiaki. Beyindulanga yo samba mu kuma kia vuvu kiau yo lakukila o moyo e nsendo betambula kuna zulu. Ke bazeye ko una ukala e nitu zau kuna zulu. (Fili. 3:20, 21; 1 Yoa. 3:2) Kana una vo i wau, bekalanga ye tima dia mona Yave, Yesu, ambasi ye akuswa akaka yo vuanda vana kunda yau muna Kintinu kia Nzambi kuna zulu.

18. Nkia diambu mameme mankaka belakukilanga o moyo?

¹⁸ Mameme mankaka bena ye tima dia zinga ova ntoto yakwele mvu. Ediadi i tima dia wantu awonso. (Kim. 3:11) Belakukilanga o moyo e lumbu beyikama Yave muna kitula o ntoto se paradiso. Belakukilanga mpe o moyo e lumbu betunga e nzo zau, bekuna e mpatu zau yo sansa wana bekala yo vimpi walunga. (Yes. 65:21-23) Kuna diak’e sambu, belakukilanga  mpe o moyo e lumbu bekangala mu fulu yayingi ova ntoto, mu tala e miongo, mfinda ye kalunga yo longoka e lekwa yawonso Yave kasema. Kansi, e diambu disunda kubamwesa e kiese i dia zaya vo e kikundi kiau yo Yave kikwamanana kumama.

19. O Luyindulu nkia lau luvananga kwa konso muntu mu yeto? Mu mvu wau, o Luyindulu nkia lumbu lukala?

¹⁹ Yave wavana e vuvu kiasikila kia kusentu kwa konso selo kiandi. (Yer. 29:11) O Luyindulu lwa lufwa lwa Kristu lukutuvananga e lau dia songa luyangalalu lweto muna Nzambi yo Kristu mu kuma kia dina bavanga kimana twavua o moyo a mvu ya mvu. O Luyindulu i lukutakanu lusundidi o mfunu bekalanga lwau Akristu akieleka mu konso mvu. Mu mvu wau luvangama kina Kiasabala, kia 27 kia Malusu, 2021 kunim’a ndimuk’a ntangwa. Ndonga ke bekala ye diambu ko dikubakakidila mu lungana mu lukutakanu lwalu lwamfunu. Vo i akaka, kana una vo bebangikwanga, lungana mpe belungana. Akaka nkutu muna pelezo bevangila o Luyindulu. Ozevo, yambula yeto awonso twakala ye Luyindulu lwambote ekolo Yave, Yesu, ambasi ye akuswa akaka ana bafuluka bemona konso nkutakani, buka ye konso muntu muna Luyindulu!